1-2 Tuḻku Patjuwupangkaya Tjuwu tjuṯa tjungurringkupayi Katutjanya waḻkulkitja. Tjana wiika kutjungka mangarri pikinpawutuwiya ngalkupayi. Tuḻku Patjuwupa palulaya yaṉangu tjuṯa tjungurringanyingka yurrunpa Muutjaku wangka nintilpayi tjuṯangku, tuḻkuku mayutju tiṉa tjuṯangkuṯarra nyinarra kuliṉingi, Yiitjunya mirri pungkukitjangku. Puṯuya kuliṉu Yiitjunya witilkitjangku. Yalatjiya wangkarra kuliṉangi, “Yaṉangu tjuṯaya Yiitjuku yunypa nyinanyi. Nganaṉa palunya witintjala yaṉangu tjuṯangku nganaṉanya ngalyankula ngaparrtjingku pungkupayingkamarra, kuwarripa wanti!”

3 Palulanguru mamu tjuṯaku mayutjungku Tjuutatjanya tjingapungu. Tjuutatja paluru Yiitjuku kutunguḻu tuwalpalangka nyinapayi. Tjuutatjanya paluru tjana yini kutjupa watjalpayi, “Yitjikarriyatanya.” 4 Tjingapungkunytjala, Tjuutatjanya tuḻkuku mayutju tjuṯakutu, pulitjimana tjuṯakutuṯarra yankula wangkangi, “Ngayulu Yiitjuku yunytjuwiya nyinanyi. Ngayulu kuliṉi nyurrangarri palunya witintjaku. Nyaalytjinkuṉa nyurrangarri palunya witintjaku?” 5 Yalatji Tjuutatjalu watjantjala, paluru tjana yunyparringkula mani ngula yungkukitjangku watjaṉu. 6 Maniku kulira yunypangku Tjuutatjalu tjananya watjaṉu ngula tjakultjunkukitjangku. Yankula paluru kutu kulirinangi yalatji, “Yaṉangu tjuṯangkuya Yiitjunya wantirra yankunytjala ngayuluṉa tjananya yankula watjalku. Paluru, palumpa kutunguḻu maṉkurrpaṯarra nyinanytjala, ngayuluṉa tjananya yankula watjalku, tjana Yiitjunya yankula witintjaku.”

7 Tuḻku Patjuwupanya ngarangu. Tuḻku palula Tjuwu tjuṯangkuya mangarri pikinpawutuwiya ngalkuṉingi. Yalatji ngalkura tjaatji ngurrara tjuṯangku tjana tjiipi tjawirrilyi tjuṯa pungkula tjunkupayi, yaṉangu tjuṯangkuya ngalyankula mantjintjaku. 8 Palulanguru Yiitjulu pulanya Piitanya Tjaananya wantirriyalkitjangku watjaṉu, “Nyupali yankula tjiipi tjawirrilyi mangarriṯarra mantjira tjurra!, tuḻku Patjuwupanyala tjungungku ngalkunytjaku.” 9 Paluru kutjarrangku Yiitjunya tjapiṉu yalatji, “Ngurra yaalytjingkalitju mangarri kukaṯarra tjunku, ngalkunytjaku?” 10 Yiitjulu pulanya wantirriyalkitjangku watjaṉu yalatji, “Tawunungka ngururrwana nyupali yankula nyakuku, wati paluru turaama kapitjarra katiyananyingka. Wati palunya nyupali ngaṉṯiwana wanala! Wati paluru waaḻangka tjarrpanytjala, nyupali waaḻa palula tjarrpa! 11 Tjarrparra nyupali waaḻaku mayutjungka yalatji tjapila!, ‘Nintilpayingkunta tjapiṉu yalatji. Tjiipi tjawirrilyi ngurra yaalytjingkalatju palumpa kutunguḻu tjuṯangku palulawana tjungungku ngalkulku?’ ” 12 Yiitjulu pulanya palumpa kutunguḻu kutjarra piyuku watjaṉu, “Waaḻaku mayutjungku kaḻparra nintilku nyupalinya ruuma tiṉa kutjupa. Ngurra palulalampa mangarri kukaṯarra mantjira tjurra!” Yalatji Yiitjulu pulanya watjara wantirriyaṉu.

13 Palulanguru Piitalu, Tjaanalu yankula nyangu, Yiitjulu pulanya yurrunpa watjaṉutja. Ngurra palula paluru kutjarra mangarri kukaṯarra mantjira tjunu. Tjunkulapula yanu rayitpayiki Yiitjulakutu.

14 Mungarrtjirringkunytjalaya Yiitjunya, palumpa kutunguḻu tuwalpalaṯarra waaḻa palulakutu yanu. Yankula tjarrpanguya ngalkulkitja. 15 Paluru tjana yinytjamingka nyinanyingka, Yiitjulu tjananya watjaṉu, “Ngayuluṉa puntura yunytjurringanyi, nganaṉa tjungungku kuka ngaatjanya ngalkunytjaku, tuḻku Patjuwupanya. Ngayulu kuliṉi kuwarri ngaangkala ngalkunytjala ngaṉṯiya ngayunya pikantankula pungkuku.” 16 Piyuku tjananya watjaṉu, “Kuka tjiipi ngaatja nganaṉa kuwarri ngalkura, wiya ngayulu tuḻku Patjuwupa kutjupa piyuku ngalkuku. Ngula kutju Katutjaku ngurrangka ngayulu piyuku ngaa nguwanpa ngalku, palumpa walytja tjuṯawana tjungungku ngalkuku. Ngurra palula Katutjalulanya palumpa walytja yuwankarra yaṉṯayaṉṯanmalpa.”

17 Panikina wayinatjarralpi paluru mantjira Katutjanya waḻkuṉu, wayina paluru yungutjangka. Yiitjulu tjananya palumpa kutunguḻu tjuṯa yungu tjikintjakuya. “Ngaatjaya tjuṯangku tjikila! 18 Wiyaṉa wayina ngaa nguwanpa paṉangka piyuku tjikilku, wiya. Ngula Katutjalu tjananya palumpa walytja tjuṯa ngurra ilkaringka yaṉṯayaṉṯalku. Ngurra palula ngayulu tjanala tjungurringkula tjikilku.”

19 Yiitjululpi puriiti mantjira Katutjanya waḻkuṉu yalatji, “Palya nganaṉanya nyuntu yungu, mangarri ngaatjanya.” Kilytjuntankula paluru tjananya watjaṉu, “Mantjira ngalkula ngaatjanya, yaṉangu ngayunya! Mangarri ngaatjanya nyurrangarri kutu tjungungku ngalkunytjaku, ngayunya kulilkitjangku.”

20 Mangarri kukaṯarra tjana ngalkura wiyarringu. Yiitjulu panikina wayinatjarra mantjira tjananya watjaṉu, “Wayina ngaatjanya ngurrka ngayunya. Kuwarri ngayulu nyurrangarrimpa watiyangka ngurrka yintirra mirrirriku tjawirrilyi nguwanpa, yaṉangu yuwankarraku kuya waṉikitja. Yalatjiṉa ngurrka yintinytjala, Katutjalu nyurrangarrinya watjalku kuya uwankarra nyurrangarrimpa kutu waṉinytjaku.”

21 Yiitjulu tjananya watjaṉu, “Wati kutju ngaangka tiipulangka nyinanyi. Paluru ankula mayutju tjuṯangka tjakultjunku, ngayunya tjana witintjaku. 22 Tjana ngayunya yaṉanguku katja yilta iluntanku. Yalatjiṉiya iluntankunytjaku Katutjalu watjaṉu. Wati kutjungku tjananya tjakultjunku, ngayunyaya witintjaku. Wati palunya Katutjalu ngula puntura pikantanku.” 23 Palumpa kutunguḻu tjuṯangkuya puṯu kulira wangkarra waṉingu, “Nganalu tjananya tjakultjunku Yiitjunyaya witintjaku?” Yalatjiya puṯu kulira wantingu.

24 Palumpa kutunguḻu tjuṯaya piyuku yalatji wangkarra waṉingu, “Ngananya mayutju tiṉalampa nyinaku?, Yiitjulawana ngaṉṯi.” 25 Yiitjulu tjananya watjaṉu, “Mayutju tiṉa Tjuwuwiya tjuṯaya mayutju tjikipaka nyinanyi, palyawiya. Mayutju tjikipaka tjaampalangkuya yalatji ngunytjinytjunkupayi, ‘Ngayulu mayutju palya nyinanyi, yaṉangu tjuṯa nyurrangarrinya ngayulu palya yaṉṯayaṉṯaṉi.’ 26 Wiya nyurrangarri mayutju palunya tjananya nguwanpa nyinanytjaku. Tjinguru nyuntu mayutju nyinakitja waarrkana nguwanpa nyinanytjaku, lipinpala ngaa tjuṯaku. Yalatji lipinpala ngaa tjuṯa tjananya nyuntu yaṉṯayaṉṯantjaku. 27 Yaṉangu ngurra tjuṯawanangku yalatji kuliṉi, ‘Waarrkanangku waarrkarringkula mayutju yaṉṯayaṉṯalpayi, wiya mayutjungku waarrkarringkula waarrkana yaṉṯayaṉṯalpayi, wiya.’ Ngayulu kutjupa kuliṉi. Ngayulu nyurrangarrinya waarrkana nguwanpangku yaṉṯayaṉṯalpayi. Yalatji nyurrangarri mayutju waarrkana nguwanpa nyinanytjaku.”

28 Yara kutjupawanangku Yiitjulu tjananya piyuku watjaṉu, “Yilta, ngayulawana nyurrangarri kutu tjungu yankupayi, nyurrangarri wiya ngayunya wantipayi, kuya tjuṯaku nguḻungku. 29-30 Ngayuku paapangkuṉi mayutju ngaratjunu. Palunya nguwanpa ngayulu nyurrangarrinya mayutju tjuṯa ngaratjunku. Tjungungkula mayutju tjuṯangku ngalkura tjikilku, yuḻṯa palula. Ngayuluṉa nyurrangarrinya ngula yaṉangu tjuṯaṯarra yaṉṯayaṉṯalku. Ngurra palula nyurrangarri mayutju tuwalpala mayutjukuṉu tjiiyingka nyinaku, Yitjurilaku walytja ngaṉṯitja tjuṯaku. Yitjurilakuṉu katja yurruntitja Ruupinanya nyinangu. Palumpa walytja ngaṉṯitja tjuṯa nyinanyi. Ruupinaku maḻanypa yini Tjuutanya nyinangu. Palumpa walytja ngaṉṯitja tjuṯa nyinanyi. Tjuutaku maḻanypa yini Pintjimina nyinangu. Palumpa walytja ngaṉṯitja tjuṯa nyinanyi. Yalatji kaakararranpa tuwalpala nyinangu, Yitjurilaku katja tjuṯa. Palunya tuwalpalaku walytja ngaṉṯitja tjuṯalingku kuwarri nyinanyi. Palunya tjuṯaku tjanampa nyurrangarri mayutju tiṉa tuwalpala nyinaku.”

31 Yiitjulu Tjaamana Piitanya watjaṉu, “Tjaamana. Mamuku mayutjungku Katutjanya tjapiṉu nyurrangarrinya ngayuku kutunguḻu tjuṯa tjingapungkukitjangku. Paluru kuliṉi, ‘Yiitjuku kutunguḻu tjuṯangkuya tjikipaka tjuṯaku nguḻurringkula Yiitjunya wantiku, kutu palulawana nyinanytjawiya.’ Katutjalu palumpa wangka kulira yuwa wangkangu, paluru nyurrangarrinya tjingapungkunytjaku.” 32 Yiitjulu Piitanya piyuku watjaṉu, “Tjaamana, wangka ngaatjanya kulila! Katutjanya ngayulu tjapiṉu, nyuntu tjukarurru kutu ngayuku nyinanytjaku. Ngayulu kuliṉi nyuntu nguḻurringkula ngayunya wantiku. Piyuku nyuntu ngayukulpi tjukarurru nyinaku. Palunyatjanu nyuntu tjananya ngayuku kutunguḻu kutjupa tjuṯa nintilku tjana piyuku ngayukulpi tjukarurru nyinanytjaku. Yalatji ngayulu Katutjanya tjapiṉu.” 33 Piitalu Yiitjunya watjaṉu, “Mayutju. Nyuntunya tjana pungkunytjala, tjunguli ngaraku, kutjarralinya mirri pungkunytjaku. Tjinguru nyuntunya tjana witira tjiilakutu katiku, ngayunyaṯarra tjana katirra tjarrpatjunku, nyuntulawana.” 34 Yiitjulu Piitanya watjaṉu, “Wangka ngaatjanya kulila! Kuwarri tilayiti tjuḻpu lukuluku mirranytjala yurrunpa nyuntu nguḻurringkula tjirripalangara ngurrpa watjalku, ‘Ngayulu Yiitjuku ngurrpa.’ ”

35 Yiitjulu tjananya palumpa kutunguḻu tjuṯa watjaṉu, “Yirriṯi ngayulu nyurrangarrinya wantirriyaṉu, tawunu tjuṯawana tjakultjurinkunytjaku. Wiya nyurrangarri pawutji manitjarra katiyanangi. Payiki mangarritjarra wiya nyurrangarri katiyanangi. Puuta piiwana wiyanyurra katiyanangi. Yalatji yankula tjingurunyurra puṯu kuliṉu ngalkunytjaku, yilta? Tjingurunyurra ngurrangka ngarrinytjaku puṯu kuliṉu, yilta?” Yiitjuku kutunguḻu tjuṯangkuya watjaṉu, “Puṯu kulintjawiya, palyalatju yanangi.” Yiitjulu tjananya watjaṉu, “Yuwa, yaṉangu tjuṯa nyurrangarrimpa ngayukuṯarra tjana yunypa nyinapayi. 36 Kuwarri wiyalpi yaṉangu tjuṯa yunypa nyinanyi nganampa. Tjinguru nyurrangarri pawutji manitjarra kanyira katiyankunytjaku, payiki mangarritjarraṯarra. Tjuuḻa waṯawara kanyintjawiyangku, nyurrangarri kuuta tjalamilara mani mantjira tjuuḻa waṯawara payimilara kanyintjaku. Wiya yaṉangu tjuṯa nyurrangarrimpa yunypa nyinaku. 37 Ngayukuṯarra wiya tjana yunypa nyinaku. Yalatji Katutjaku wangka ngaranyi, yaṉangu tjuṯangkuya wiyawanangku yalatji watjalku, ‘Katutjakuṉungku nganampa luwu kilytjuntanku.’ Yalatji ngayunya tjana watjalku kuwarri, Katutjaku wangka palunya yiltarriku.” 38 Yiitjuku kutunguḻu tjuṯangkuya watjaṉu, “Mayutju. Ngaa kutjarra nyawa!, tjuuḻa waṯawara kutjarra.” Yiitjulu tjananya marrkuṉu, kutunguḻu palumpa tjuṯa, “Wantiya!, yara kutjuṉa nyurrangarrimpa watjaṉi.”

39 Waaḻa tjuṯaya wantirra Yiitjunya palumpa kutunguḻu tjuṯaṯarra, puḻi Yalipatjalakutu yanu. Kututja Yiitjunya ngurra palulakutu yankula nyinapayi. 40 Ngurra palula Yiitjulu tjananya watjaṉu, “Katutjanyaya tjapila!, kutjupangku nyurranya tjingapungkunytjala ngayunyaṉinyurra wantipayingkamarra.” 41 Paluru tjananya nyinatjunkula yanu puparra Katutjanya tjapintjaku yalatji, 42 “Paapa. Tjinguru nyuntu kuliṉi ngayunyaṉiya wiya pungkula iluntankunytjaku. Nyuntu ngangkari tiṉatjarra nyinanyi. Marrkula tjananya!, wiya ngayunyaṉiya witintjaku. Yalatji ngayuluṉanta yunytjurringkula nyuntunya tjapiṉi. Paapa, tjinguru nyuntu kuliṉi ngayunyaṉiya iluntankunytjaku. Palulanguruṉiya tjana palya pungkula iluntankunytjaku.” 43 Palulanguru ilkari ngurrarangku ngalya yankula Yiitjunya rapaṉu. 44 Watjilpangku puparra Yiitjulu Katutjanya puntura tjapiṉu. Yalatji tjapintjala, kapi nguwanpa puntura yintingu yuṉpanguru, ngurrka yintirra nguwanpa. 45 Yiitjulu tjananya yankula nyangu yanku ngarrinyingka, rawaya watjilpa nyinarra. 46 Kanara tjananya tjapiṉu, “Nyaaku nyurrangarri yankurringu?, kananyurra nyinamara. Katutjanyaya tjapinma!, kutjupangku nyurranya tjingapungkunytjala ngayunyaṉinyurra wantipayingkamarra.”

47 Yiitjunya panyapa tjanala wangkanytjala, Tjuutatjanya, palumpa kutunguḻu ngalyanangi. Tjuutatjalu tjananya tjikipaka tjuṯa ngalya katingi. Paluru yankula Yiitjunya ngulytju nguwanpa nyunytjuṉu. 48 Palulanguru Yiitjulu palunya tjapiṉu, “Nyaakitja nyuntu ngayunya nyunytjuṉu?, tjinguru tjikipaka tjuṯa nintilkitjangku, tjana ngayunya ngalyankula witintjaku, yilta?”

49 Tjikipaka tjuṯangkuya Yiitjunya witilkitjangka, tjana palumpa kutunguḻu tjuṯangku nyakula Yiitjunya tjapiṉu, “Mayutju. Wakalkulatju tjananya, tjuuḻa waṯawaratjarrangku?” 50 Palulanguru palumpa kutunguḻu kutjungku tjuuḻa waṯawaratjarrangku yurrkura pina wakutjayiṯi kuntara waṉingu, tuḻkuku mayutju tiṉaku waarrkana. 51 Yiitjulu palumpa kutunguḻu tjuṯa tjananya watjaṉu, “Wiya, wakalwiyangkuya wanti!” Paluru pina mantjira tjunkula palunya palyaṉu. 52 Paluru tjana tjikipaka tjuṯa ngarala waṉingi, tuḻkuku mayutju tiṉa tjuṯa, pulitjimana tjuṯaṯarra tjiḻpi tjuṯaṯarraya. Pulitjimana paluru tjana Tjuwuku tjaatjingka waarrkarripayi. Tjikipaka palunya tjananya Yiitjulu watjaṉu, “Ngayulu mulyaṯangku mantjilpayi nguwanpa, witilkitjanyurra ngalyanu, tjuuḻa waṯawaratjarra, kuṯurutjarraṯarra. 53 Tjiṉṯu kutjupangka tjiṉṯungkaṉa nyurrangarrinya kutu nintiṉingi tjaatji tiṉangka. Nyurrangarri ngurra palula ngayunya witinmara. Ngurra palula wiyaṉinyurra witiṉu, ngayulu wiya kuya palyalpayi nyinanyi, wiya. Palunyatjanu nyurrangarri ngayunya wantimara witilwiyangku. Kala, kuwarriṉinyurra witilku. Mamuku mayutjungku nyurrangarrinya tjingapungu ngayunya witintjaku. Katutjalu yirriṯi watjaṉu, nyurrangarri ngayunya witintjaku.”

54 Palulanguruya Yiitjunya witira katingu tuḻkuku mayutju tiṉaku waaḻakutu. Yiitjunya tjana katirra waaḻangka tjarrpatjunu. Piitalu Yiitjunya ngaṉṯiwanangku wanarinangi, mayutju tiṉaku waaḻakutu. 55 Yaṉangu tjuṯangku waaḻa palulaya yaatjayiṯi waru kutjaṉu. Yaṉangu tjuṯaya Piitanyaṯarra tjunguya nyinarra warungka wuumpirringangi. 56 Ngurra palula kungka waarrkanangku Piitanya nyakula nuuwimilara watjaṉu, “Wati palatjaṯarra, Yiitjulawana tjungu yankupayi.” 57 Piitalu ngunytjilyinu yalatji, “Kungka, nyuntu wiyawana wangkanyi. Wati palumpaṉara ngurrpa.” 58 Palunyatjanu wati kutjupangku Piitanya nyakula watjaṉu, “Nyuntuṯarra yilta palumpa walytja nyinanyi.” Piitalu ngunytjilyinu, “Wiya, ngayulu wiya palumpa walytja.” 59 Palunyatjanu piyuku wati kutjupangku Piitanya nyakula watjaṉu, “Wati ngaatjanya yilta palumpa walytja nyinanyi, Kaliliyinya ngurrara, wangka kutjupa wangkapayi. Yiitjunyaṯarra Kaliliyinya ngurrara.” 60 Piitalu wati palunya ngunytjinytjunu, “Nyuntupa wangkakuṉa ngurrpa.” Piitanya panyapa wangkanytjala tjuḻpu lukuluku mirrangu. 61 Yiitjulu nguṉṯilangarala Piitanya nyangu. Piitalulpi kuliṉu Yiitjulu yurrunpa watjaṉutja yalatji, “Kuwarri tilayiti tjuḻpu mirranytjala yurrunpa nyuntu tjirripalangara ngurrpa wangkaku, ‘Ngayulu Yiitjuku ngurrpa.’ ” 62 Yankula wantirra Piitanya aatjayiṯi puntura yulangu, Yiitjuku ngurrpa wangkarra.

63 Yiitjunya kanyilpayi tjuṯangkuya, yinkarra yalatji ngunytji watjaṉingi, “Nyuntu Tjuwu tjuṯaku mayutju tiṉa. Kana kutu nyinama!, mayutju tiṉa.” Yalatji wangkarraya Yiitjunya pungangi. 64 Yiitjunyaya kuru tjutuṉu mantarratjarrangku. Wati kutjungku marangku pungkula yinkarra tjapiṉu, “Tjukarurrulanyatju watjala! Nganalunta pungu?” 65 Wangka kutjupa kutjupaya wangkarra Yiitjunya panypurangkula pungangi.

66 Tjiṉṯurringkulaya tuḻkuku mayutju tiṉa tjuṯa, Muutjaku wangka nintilpayi tjuṯaṯarra, tjiḻpi tjuṯaṯarraya tjungurringu. Yalatjiya Tjuwu tjuṯaku mayutju tjuṯa tjungurringu. Kutjupa tjuṯangkuya Yiitjunya katirra ngaratjunu, mayutju palunya tjuṯangka. 67 Yiitjunyaya watjaṉu, “Nganaṉanyatju watjala! Tjinguru nyuntu Kurayitjanya nyinanyi, Katutjalu yirriṯi watjara iyaṉutja.” Yiitjulu tjananya watjaṉu, “Tjinguru ngayulu nyurrangarrinya yuwa watjantjala, ngayuku wangkaṉinyurra kulira wantiku. 68 Tjinguru ngayulu nyurrangarrinya nintilku Katutjaku wangka watjalpayingku watjaṉutja, Kurayitjanya yalatji nguwanpa nyinaku. Wangka palunyanyurra kulira wantiku. 69 Ngula, ngayulu yaṉanguku katjaṉa yankula tjungulitju nyinamalpa, Katutjanya, ngayuluṯarra. Ngangkari kutjutjarralitju nyinamalpa.” 70 Yiitjunyaya tjapiṉu, “Nyuntu Katutjaku katja, yilta?” Yiitjulu tjananya watjaṉu, “Yuwa, ngayulu palumpa katja nyinanyi.” 71 Yiitjuku wangka kulira mayutju tjuṯangku kuliṉangi, “Paluru Katutjaku katja watjantjala nganampa luwu kilytjuntanu.” Mayutju paluru tjana watjaṉu, “Ngaangku wiyawanangku watjaṉu, wiya paluru Katutjakuṉu, paluru paṉa ngurrara kutju nyinanyi. Wiyala kutjupa tjuṯanya yaḻṯinytjaku tjanaya tjakultjunkunytjaku. Kala, kuwarri nganaṉa kuliṉu, paluru wiyawanangku watjaṉutja. Yilta luwulampa paluru kilytjuntanu.”