1 Yaṉangu tjuṯa tjungurringkula ngarala waṉinyingka nyakula Yiitjunya puḻingka kaḻpangu katunguru tjananya nintilkitja. Paluru kaḻparra nyinanytjala palumpa kutunguḻu tjuṯa tjungurringkula palula yila nyinangi. 2 Nintilkitjangku tjananya yalatji watjaṉu, 3 “Maralpa kutjupa tjuṯa Katutjaku tjukarurru nyinanyi. Katutjalu tjananya purinypangku kanyinmalpa. Yalatji kulira tjana yunypa nyinaku. 4 Walytja wiyarrinytjala yulapayi tjuṯa Katutjalu tjananya aḻṯurunytjungku kanyilku. Yalatji kulira tjana yunypa nyinaku. 5 Walytjangku waḻkuntjawiya tjuṯa Katutjalu tjananya walytja tjuṯa yaṉṯayaṉṯara kanyilku. Yalatji kulira tjana yunypa nyinaku. 6 Katutjaku tjukarurru nyinakitja yunytjurripayi tjuṯa Katutjalu tjananya yilta ngulytjura kanyilku. Yalatji kulira tjana yunypa nyinaku. 7 Yaṉangu tjuṯaku aḻṯururringkula kanyilpayi tjuṯa Katutjalu tjananya aḻṯururringkula kanyinmalpa. Yalatji kulira tjana yunypa nyinaku. 8 Katutjaku kutju tjukarurru nyinapayi tjuṯangku ngula Katutjala nyinarra palunya yutitja nyakuku. Palunya nyakula tjana yunypa nyinaku. 9 Yaṉangu tjikipaka marrkulpayi tjuṯa Katutjalu tjananya palumpa walytja tjuṯa yaṉṯayaṉṯalku. Yalatji kulira tjana yunypa nyinaku. 10 Yaṉangu tjuṯa Katutjaku tjukarurru nyinanytjala, kutjupa tjuṯangku tjananya panypurangkula pungkuku. Katutjalu tjananya yilta palumpa walytja tjuṯa yaṉṯayaṉṯalku. Yalatji kulira tjana yunypa nyinaku.”

11-12 Yiitjulu tjananya piyuku nintiṉu yalatji, “Nyurrangarri ngayuku walytja nyinanyingka, kutjupa tjuṯa nyurrangarrimpa tuunlayiki nyinaku. Paluru tjanalpi nyurrangarrinya kanginypungkula panypurangkuku, ngayuku walytjanyurra nyinanyingka. Panypuranganyingka Katutjalu nyurranya purinymara kanyilku. Yalatji kuliranyurra yunypa nyinanytjaku. Ngula paluru nyurranya palumpa ngurrangka kutu kanyilku. Nyurrangarrinya kuwarri panypurangkunytja nguwanpa, yirriṯi nyinanytja tjuṯangku Katutjaku wangka watjalpayi tjuṯa tjananya panypurangkupayi.”

13 “Paṉṯutjanu kuka palyarripayi. Paṉṯu palunya palya, ngayuku walytja palya tjuṯa nguwanpa. Paṉṯu kapingka rawa ngarrirra kuyarringkupayi, yaṉangungku paṉṯu palunya waṉipayi.

14 “Waaḻa tjuṯa puḻi katu ngaraku layititjarra. Yaṉangu tjuṯangku layiti nyakula tjungurriku mungangka. Nyurrangarri ngayuku walytja tjuṯa layititjarra nguwanpa nyinanyi. Yaṉangu ngayuku ngurrpa tjuṯangku nyurrangarrinya nyakula tjungurriku ngayuku wangka kulilkitja.” 15 Yara kutjupa tjananya Yiitjulu watjaṉu nintilkitjangku, “Laampa tilira wiya turaamangka tjarrpatjunanyi, yuti waralytjunanyi, tilingaranyingka yaṉangu tjuṯangku nyakunytjaku. 16 Nyurrangarri yaṉangu tjuṯaku tjukarurru palyantjaku. Yalatjinyurra tjukarurru palyantjala tjana nyurrangarrinya nyaku, laampa waralytjunutja nguwanpa yutitja. Yalatji nyurrangarrinya nyakula tjana paapa Katutjanya waḻkulku tjungurringkulalpi.”

17 “Tjinguru tjaampalangkunyurra yalatji wiyawana kuliṉi, ‘Yiitju Kurayitjanya mantakutu ngalya yanu Muutjakuṉu wangka panypurangkukitja. Paluru wangka kutjupaṯarra panypurangkukitja ngalya yanu, Katutjaku wangka watjalpayi tjuṯangku yirriṯi watjaṉutja. Wangka palunya panypurangkula paluru nganaṉanya wangka kutjupa nintilku.’ Wangka palunya panypurangkukitja wiyaṉa mantakutu ngalya yanu. Wangka paluru yiltarringu ngayulu mantakutu ngalya yananyingka. Muutjalu panyapa tjuṯangkuṯarra wangka ngayunyatjarra watjara wakalpayi. 18 Wangka ngaatjaya kulila! Muutjaku luwu tjanampa ngarapayi, yirriṯi nyinanytja tjuṯaku. Wiya yirriṯi nyinanytja tjuṯaku kutju ngarapayi, nganampaṯarralampa, luwu paluru ngaranyi, wiyarrinytjawiya. Luwu paluru kutu ngaramalpa. Ilkari mantaṯarra wiyarringanyingka, kutu luwu paluru ngaramalpa, wiyarrinytjawiya. 19 Wangka paluru puntulingku, marrkuntja tjuṯa. Marrkuntja kutju tjinguru yaṉangungku kilytjuntankunytjala Katutjanyara wiya puntura yunyparriku. Tjinguru yaṉangu paluru kutjupa tjuṯa nintilku marrkuntja palunya tjuṯa kilytjuntankunytjaku. Yalatji tjananya nintintjala Katutjanya yaṉangu palumpa wiya yunypa nyinaku. Paluru Katutjaku walytja tjuṯangka mayutjuwiya nyinaku. Tjinguru yaṉangu kutjupa mantangka nyinarra marrkuntja palunya tjuṯa kulira tjukarurru nyinanytjala Katutjanya palumpa puntura yunypa nyinaku. Yaṉangu paluru kutjupa tjuṯa marrkuntja palunya tjuṯaku tjukarurru nyinanytjaku nintintjala, Katutjanyara puntura yunypa nyinaku. Paluru Katutjaku walytja mayutju nguwanpa nyinaku. 20 Yaṉangu tjuṯangkuya watjalpayi, ‘Muutjaku luwu nintilpayi tjuṯa, Paratji tjuṯaṯarraya tjukarurru Katutjaku luwuku nyinanyi.’ Paluru tjana wiya Katutjaku luwuku tjukarurru nyinapayi. Nyurrangarri Katutjaku luwuku puntura tjukarurru nyinanytjaku. Yalatjinyurra puntura tjukarurru nyinarra kutju Katutjaku walytja tjuṯangkalpi tjungu nyinaku.”

21 Yiitjulu tjananya piyuku nintiṉu, “Yitjurilaku walytja ngaṉṯitja tjuṯa yirriṯi nyinanytjala Muutjalu tjananya Katutjaku luwu nintilpayi. Yalatjikunyurra ninti nyinanyi. Muutjalu tjananya yalatji watjaṉu,

‘Yaṉangu kutjupa wiya mirri pungkunytjaku.’

Paluru piyuku tjananya watjaṉu,

‘Yaṉangu kutjupa mirri pungkunytjala, katirranyurra kuutawutjungka ngaratjunkula watjantjaku.’

22 Ngayulu nyurrangarrinya watjaṉi wangka palunya nguwanpa. Walytja kutjupaku ngurrkurringutjangka, Katutjalu palunya ngula kuutawutjungka watjalku. Tjinguru yaṉangu kutjupangku palumpa walytja yalatji watjalku, ‘Nyuntu kuya, pina rama.’ Yalatji watjaṉutjangka Katutjalu palunya ngula kuutawutjungka watjalku. Tjinguru yaṉangu kutjupangku palumpa walytja pikapikarringkula warrkintjala Katutjalu palunya ngula kuutawutjungka watjara warukutu wantirriyalku.

23 “Walytja kutjupa tjuṯaku nyurrangarri kalypa nyinanytjaku. Tjinguru nyuntu tjaatji tiṉangka Katutjaku tjawirrilyi tjunkukitja nyinaku. Yalatji nyinarra nyuntu pina alytjurarringkula yalatji kulilku, ‘Nyarratja ngayuku walytjatju ngurrku nyinanyi, kalyparrinytjawiya.’ 24 Yalatji kulira tjawirrilyi tjunkula wantirra nyuntu yarra!, palula kalypa wangkakitja. Kalypapula wangkarra rayitpayiki nyuntu ngalya yankula nyuntu Katutjaku tjawirrilyi palunya katirra tjurra tjaatjingka!

25 “Yara kutjupaya kulila! Tjinguru wati kutjupangka nyuntu kuya palyalku. Palurunta pikarrirra kuutawutjukutu katikitjangku watjantjala, nyuntu wangkarra kalyparrinytjaku, kuutawutjukutunta katitjipi, mayutju kuutawutju ngurrarangkunta watjara tjiilangka tjarrpatjunkutjipingka. 26 Tjinguru mayutju palurunta payina puntu yunganyingka puṯu nyuntu kulilku payina payimilalkitjangku.”

27 “Muutjalu yirriṯi Katutjaku luwu tjananya watjara nintiṉu yalatji, ‘Wati kutjupaku miiṯa wiyara tjulyara kanyintjaku.’ Wangka palumpa yalatjikunyurra ninti nyinanyi. 28 Ngayulu nyurrangarrinya watjaṉi. Wiya kungka nyakula kulintjaku, ngarrikitjangku. Ngarrikitjangku kulintjala Katutjalu yalatji kuliṉi, ‘Ngaangku ngayuku luwu kilytjuntananyi, palula ngarrikitjangku kulira.’ ” 29 Yiitjulu tjananya yara kutjupa watjaṉu, “Nyuntu tjinguru kuru kutjungku kuya palyaṉutjangku kulira palunya yurrkura waṉi!, kuya rawangku palyara Katutjaku wangka wantipayingkamarra. Palya nyuntu kuru kutjutjarra Katutjaku ngurrangka kana kutu nyinaku. Kuru kutjarratjarrangku nyuntu kuya rawangku palyara ilurra ngurra kuyakutu ankuku. Ngurra palula waru tiṉa kutu kampamalpa. 30 Nyuntu tjinguru mara kutjungku kuya palyaṉutjangku kulira mara palunya kuntara waṉi!, kuya rawangku palyara Katutjaku wangka wantipayingkamarra. Palya nyuntu mara kutjutjarra Katutjaku ngurrangka kana kutu nyinaku. Mara kutjarratjarrangku nyuntu kuya rawangku palyara ilurra ngurra kuyakutu anku. Ngurra palula waru tiṉa kutu kampamalpa.”

31 “Muutjalu tjananya yirriṯi Katutjaku luwu watjara nintiṉu yalatji, ‘Watingku miiṯa walytjaku yunytjuwiyarringkula wantirriyalkitjangku piipa wakara yungkuliyanytjaku, piipawiya wiya wantirriyantjaku.’ 32 Ngayulu nyurrangarrinya watjaṉi yalatji. Watingku miiṯa walytja kanyira, miiṯa kutjupa mantjilkitjangku wiya wantirriyantjaku. Miiṯa walytja wantirriyara kutjupa mantjira Katutjaku luwu kilytjuntananyi. Palya watingku miiṯa walytja wantirriyantjaku, paluru wati kutjupakutu yanutjangka. Tjinguru watingku miiṯa walytjaku yunytjuwiyarringkula wantirriyantjala kungka paluru wati kutjupakutu yankula nyinaku. Wati kutjupangka nyinarra kungka paluru Katutjaku wangka kilytjuntanku. Wati paluruṯarra kungka palula nyinarra Katutjaku wangka kilytjuntanku.”

33-36 Yiitjulu tjananya yara kutjupa watjaṉu, “Muutjalu tjananya yirriṯi Katutjaku luwu watjara nintiṉu yalatji, ‘Tjinguru nyuntu yaṉangu kutjupangka yalatji watjalku, “Katutjala kurungka ngayuluṉanta tjukarurru watjaṉi nyuntupa palyalkitjangku. Tjinguru ngayulu palyantjawiyangka Katutjaluṉi pungkupayingkamarra.” Yalatji watjara nyuntu palumpa tjukarurru palyala!, ramarringkula wantinytjawiyangku.’ Ngayulu Yiitjulu nyurrangarrinya watjaṉi yalatji. Wiyanyurra wangka palunya nguwanpa watjantjaku, wanti! 37 Yalatji kutju nyurrangarri watjantjaku, ‘Yuwa, palyalkuṉanta.’ Tjinguru kutjupa wayi nyurrangarri watjantjaku, ‘Wiyaṉanta palyalku.’ Tjukarurrunyurra watjantjaku palyalkitjangku. Wiyanyurra yalatji watjantjaku, ‘Katutjala kurungka ngayulu tjukarurru watjaṉi nyuntupa palyalkitjangku.’ Yalatji tjana ngunytji wangkapayi tjuṯa wangkapayi, wiyanyurra yalatji wangkanytjaku.

38 “Muutjalu tjananya yirriṯi Katutjaku wangka watjara nintiṉu yalatji, ‘Tjinguru wati kutjupangkunta marangku kuru pungkula paanganku. Nyuntu palunya ngaparrtjingku kuru pungkula paangantjaku, marangku. Tjinguru wati kutjupangkunta kaṯiṯi pungkula kilytjuntanku. Nyuntu palunya ngaparrtjingku kaṯiṯi pungkula kilytjuntankunytjaku marangku.’ Wangka palunya Muutjalu tjananya watjaṉu. 39 Ngayulu nyurrangarrinya watjaṉi yalatji. Tjinguru yaṉangu kutjupangkunta kuya palyantjala nyuntu ngaparrtjingku pungkuwiyangku wanti! Nyuntu kuya palyantjawiyangka tjinguru yaṉangu kutjupangkunta kantja pungkukunta. Kutjupa tjayiṯi taaṉarrirra ngara!, kantjanta piyuku pungkunytjaku. Yalatjinta pungutjangka nyuntu pungkunytjawiya ngarama! 40 Tjinguru yaṉangu kutjupangkunta maniku puṯu tjapilku ngaparrtjingku yungkunytjaku. Maniwiyangka palurunta tjinguru tjaaṯaku tjapilku. Tjaaṯa kuutaṯarra nyuntu yunypangku yungkunytjaku palunya. 41 Tjinguru tjuulytjingkunta tjingapungku palumpa yulytja katirra yila tjunkunytjaku. Nyuntu wiya ngurra palula tjunkunytjaku, wirriḻira kati!, palumpa ngurrakutu. 42 Tjinguru kutjupangkunta yinkanytjala, yuwa! Kutjupangkunta yulytja ngunytji kanyilkitjangku tjapintjala, yuwara!, ngalytjarringkuwiyangku.

43 “Yirriṯi Muutjalu yaṉangu tjuṯa watjara nintilpayi yalatji, ‘Nyurrangarri walytja tjuṯaku yunytjurringkula nyinama!, kutjupa tjuṯakunyurra yunytjuwiya nyinanytjaku.’ 44 Ngayulu nyurrangarrinya watjaṉi yalatji. Nyurrangarrimpa yunytjuwiya nyinanytja tjuṯaku nyurrangarri yunytju tjanampa nyinanytjaku. Nyurrangarrinya panypurangkula pungkupayi tjuṯaku Katutjanya tjanampa tjapila! 45 Yalatjinyurra palya nyinarra, mayutju Katutjaku walytja tjuṯanyurra nyinaku. Katutjalu palumpa kulilwiya tjuṯa yaṉṯayaṉṯalpayi, kuya palyalpayi tjuṯaṯarra. Yaṉṯayaṉṯara tjanampa kapi wantirriyalpayi yaṉangu yuwankarraku. 46 Nyurrangarrimpa walytja tjuṯa nyurrampa yunytju nyinanyi. Walytja palunya tjuṯaku kutjunyurra yunytju nyinanyingka, Katutjanya wiya nyurrampa yunyparringanyi. Yaṉangu ulaataku nyurrangarri yunytju nyinanytjaku. Palunya nguwanpa Katutjaku kulilwiya tjuṯa tjanampa walytja tjuṯaku kutju yunytju nyinanyi. 47 Nyurrangarrimpa walytja tjuṯa yunypa nyurrampa nyinanyi. Walytja palumpa tjanampa kutjunyurra nyakula yunyparringkupayi. Yalatjinyurra walytja tjuṯaku yunyparrinytjala wiya Katutjanya yunyparringanyi. Yalatji nguwanpaya nyinanyi, Katutjaku kulilwiya tjuṯa. Walytja tjuṯaku kutjuya nyakula yunyparringkupayi. Nyurrangarri yaṉangu ulaataku yunyparrinytjaku. 48 Yalatjinyurra tjukarurru nyinanytjaku, nyurrangarrimpa paapa ilkari ngurrara tjukarurru nyinapayi nguwanpa.”