1-4 Yiitjulu tjananya piyuku nintiṉu yalatji, “Katutjaku tjukarurru nyinakitjangku wiyanyurra kulintjaku yalatji, ‘Yaṉangu tjuṯangka kurungka ngayulu yaṉangu maralpa mani yungkuku, yaṉangu tjuṯangkuṉi nyakula waḻkuntjaku.’ Wiyanyurra yalatji yungkunytjaku yaṉangu tjuṯangka kurungka. Wiyanyurra yalatji kutjupaku tjukarurru palyantjaku, yaṉangu tjuṯangka kurungka. Yalatjinyurra yaṉangungka kurungka palyantjala yaṉangu kutjupa tjuṯa kutju nyurrangarrimpa yunyparriku, Katutjanya wiya nyurrangarrimpa yunyparriku. Wiyanyurra palumpa walytja tjuṯa nyinaku. Tjaatji ngurrara ngunytjinytju tjuṯangku yalatji yaṉangu tjuṯangka kurungka maralpa tjuṯa yungkupayi, tjaatji tjuṯangka, kantina yurilpangkaṯarra. Yuwa, Katutjalu tjananya ngula kuutawutjungka watjalku. Yaṉangu maralpa mani yungkunytjaku, yaṉangu tjuṯa yila ngaranytjawiyangka, paapa Katutjalu kutju nyakula yunyparrinytjaku. Yalatji yunyparringkula nyurrangarrinya paluru ngula palumpa ngurrangka waḻkulku.

5 “Tjaatji ngurrara ngunytjinytju tjuṯangku tjaatjingka ngarala rawangku Katutjanya tjapilpayi. Paluru tjana kantina yurilpangkaṯarra ngarala Katutjanya rawangku tjapilpayi, yaṉangu tjuṯangka kurungka, yaṉangu tjuṯangku kulira yalatji kulintjaku, ‘Ingkaṯa palangku rawa Katutjanya wangkarra tjapilpayi. Paluru ilta ingkaṯa palyalingku.’ Wiya nyurrangarri yalatji kulira yaṉangu tjuṯangka kurungka Katutjanya tjapintjaku. Ngula Katutjalu palunya tjananya kuutawutjungka watjalku. 6 Tjinguru nyuntu Katutjanya tjapilkitjangku kulira ngurrangka tjarrparra tuuwa patira kutjungku nyinarra palunya tjapintjaku, yaṉangu kutjupangkunta nyakutjipingka. Nganaṉa wiya nyuntunya nyakuku, paapa Katutjalunta nyakula ngula waḻkulku palumpa ngurrangka.”

7 Yiitjulu tjananya piyuku nintiṉu, “Katutjaku ngurrpa tjuṯangku ngunytji Katutjanya nguwanpa rawangku tjapilpayi. Yalatjiya kuliṉi, ‘Nganampa mayutju ilkaringka nyinanyi. Nganaṉa palunya wiya kutjungara tjapira wantinytjaku, palurulanya kulira wantitjipingka. Nganaṉa palunya rawangku tjapintjala palurulanya parrpaṯungku kulilku.’ Wiyanyurra yalatji rawangku Katutjanya ngunytji tjapintjaku. 8 Wiyanyurra yalatji kulintjaku Katutjaku ngurrpa nguwanpangku. Katutjalu kuliṉi nyuntu palunya tjapilkitjangku kulintjala. 9 Yalatjinyurra Katutjanya tjapintjaku.

14 “Yaṉangu kutjupa tjuṯakunyurra kalypangku nyinarra Katutjanya tjanampa tjapintjaku. Yalatjinyurra yaṉangu tjuṯaku kalypangku nyinarra tjapiṉingka, paapa Katutjalu ilkari ngurrarangku nyuntupa kulira kuya waṉiku. Paluru nyuntupa kalyparriku. 15 Tjingurunyurra yaṉangu kutjupa tjuṯaku kalypawiya nyinarra Katutjanya tjanampa wiya tjapilku. Yalatjinyurra yaṉangu tjuṯaku kalypawiya nyinarra tjapintjawiyangka paapa Katutjalu ilkari ngurrarangku wiya nyuntupa kulira kuya waṉiku. Wiya nyuntupa paluru kalyparriku.”

16 Yiitjulu tjananya piyuku nintiṉingi, “Tjinguru nyuntu kulilku mangarri kukaṯarra wantirra paapa Katutjanya rawangku tjapintjaku. Yalatji mangarri wantirra Katutjanya tjapira nyuntu yunypa nyinanytjaku, wiya nyuntu tjilurutjiluru nguwanpa nyinanytjaku. Tjaatji ngurrara ngunytjinytju paluru tjana tjilurutjiluru nyinapayi, mangarri wantirra Katutjanya tjapira. Paluru tjana yunytjurringkupayi yaṉangu tjuṯangku tjananya mangarri wantinytjala nyakula kulira puḻkapungkunytjaku. Paluru tjana yuṉpa tjuṉpangku nyapara tjilurutjiluru parra ngarapayi, yaṉangu tjuṯangku tjananya nyakula yalatji kulintjaku, ‘Yilta ngaa tjuṯangku mangarri ngalkuwiyangku wantinyi Katutjanyawarri tjapilkitjangku, palya tjuṯangku.’ Yaṉangu tjuṯangku kutju tjananya puḻkapungkupayi, Katutjanya wiya tjanampa yunypa nyinanyi. Paluru tjana ngula Katutjala wangkakuturriku. 17 Nyuntu Katutjanya waḻkulkitjangku mangarri kukaṯarra wantirra yuṉpa paltjintjaku. Yalatji paltjira yunypa parra ngaranytjaku, tjilurutjiluruwiya. 18 Yaṉangu tjuṯangkunta nyakula wiya kulilku, nyuntu mangarri wantirra Katutjanya waḻkuntjala. Yalatji nyuntu mangarri wantirra paapa Katutjanya waḻkuntjala paluru kutju nintingku kulilku. Paluru yunyparringkula nyuntunya ngula palumpa ngurrangka waḻkulku.”

19 Yiitjulu tjananya piyuku nintiṉu yalatji, “Wiyanyurra mani tiṉa yulytja tiṉaṯarra kanyilkitjangku puntura yurrukulintjaku. Yalatji mantjira wiyanyurra kutu kanyintjaku, kutjupaku yungkuwiyangku. Mani tiṉa, yulytja tiṉaṯarra ngurra kutjungka rawa ngarrinytjala katilyka wiima tjuṯangku ngalkula wiyalpayi. Waaḻawana kapingku yintirra mani yulytjaṯarra kuyalpayi. Kutjupangkuṯarra mulyaṯangku mantjira katipayi. 20 Mani yulytjaṯarra kanyira nyurrangarri maralpa tjuṯa yungkunytjaku, kutu kanyilwiyangku. Maralpa tjuṯaku tjanampa nyurrangarri yunganyingka, Katutjanya nyurrampa puntura yunyparringkula ngula kanyilku palumpa ngurrangka katu, kana kutu nyinanytjaku. 21-23 Katutjaku ngurrangka nyinakitjanyurra yunytjurringkula yalatjinyurra kulinmalpa. Tjingurunyurra mani manta ngurraraku, yunytjurringkula maniku kutjunyurra yurrukulinmalpa. Yalatji kulira wiyanyurra Katutjaku ngurrangka nyinaku. Katutjaku ngurrangka nyinakitjangku nyurrangarri maralpa tjuṯa aḻṯururringkula yungkunytjaku, ngurrtjara yungkunytjawiya. Yalatjinyurra aḻṯururringkula yungkula Katutjaku tjukarurru nyinaku.

24 “Yaṉangungku mani tiṉa mantjira kanyilkitjangku kutju kulira nyinapayi, wiya Katutjaku tjukarurru nyinanyi. Nganaṉa Katutjaku kutju tjukarurru nyinanytjaku, mani mantjira kutu kanyilkitjangku kulintjawiya.”

25 Yiitjulu tjananya piyuku watjaṉu, “Wangka panyapa kulira ngayulu nyurrangarrinya yalatji watjaṉi. Wiya nyurrangarri mangarriku mantarraku kutju ngalytjarrinytjaku, kapiku wiyanyurra ngalytjarrinytjaku, Katutjalu nyurrangarrinya yaṉṯayaṉṯaṉi. Katutjalu nganaṉanya kana nyinatjunkula paluru mangarri mantarra, kapiṯarra yungamalpa. Palunya kutjula kulira waḻkuntjaku. 26 Tjuḻpu tjuṯaya kulila! Tjuḻpu tjuṯangkuya kaanangka wiya mangarri pakaltjingaṉi. Wiyaya muṯura waaḻangka tjarrpatjunanyi, ngula ngalkukitjangku. Paapa Katutjalu tjananya tjuḻpu tjuṯa paḻtjaṉi, wiya tjanampa waṯawaṯarringanyi. Nyurrangarri tjuḻpu tjuṯangka wirriḻi nyinanyi, maṯupurra. Katutjalu nyurrangarrinya yaṉṯayaṉṯalku, tjuḻpu mungutja tjuṯa nguwanpaṯarra. 27 Tjiḻpi kutu nyinarra mirrirrikitjangku puṯu kulilku, ‘Yaalytjiyaalytjiṉa kana kutu nyinaku?’ Katutjakuṉu tayimingka paluru mirrirriku. Nganaṉa yalatji kulintjaku. Katutjalu nganaṉanya yaṉṯayaṉṯara kanyiṉi, palumpa tayimingka kutjula wiyarriku.

28 “Mantarra kutjupaku wiyanyurra yurrukulintjaku. Puluuma tjuṯaya kulila! Walytjaya pakara ngarala waṉipayi, wiyaya puluuma tjuṯa mantarrangka tjarrpapayi. Palyaya ngarapayi mantarra palyatjarra nguwanpa. 29 Mayutju tiṉa paluru Tjalamunanya mantarra kiliina palyatjarra irriṯi nyinangi, kanya puluuma tjuṯa palyalingku ngarapayi. 30 Nyurrangarri wiya kuliṉi Katutjanya paluru yilta yaṉṯayaṉṯalpayi nyinanyi. Katutjalu puluuma yaṉṯayaṉṯalpayingku nyurrangarrinyaṯarra yaṉṯayaṉṯalku. Puluuma tjanpiṯarra kuwarri ngarala, tjiṉṯu kutjupangka piḻṯirringkula wiyarringkupayi. Puluuma, tjanpi yaṉṯayaṉṯalpayingku nyurrangarrinyaṯarra maṯupurra yaṉṯayaṉṯalku. Palulanguru nyurrangarri yaṉṯayaṉṯalpayi palunya kulintjaku. Yilta Katutjalu nyurranya yaṉṯayaṉṯanmalpa.

31 “Palulanguru wiya nyurrangarri mangarri ngalkukitjangku, kapi tjikilkitjangku yurrukulintjaku. Wiya mantarrangka tjarrpakitjangku yurrukulintjaku, ‘Mantarrawiyangka nyaangkaṉa tjarrpaku?’ Katutjalu nyurrangarrinya yungkuku. 32 Katutjaku ngurrpa tjuṯangku mangarri ngalkukitjangku kutu kuliṉi. Paapa Katutjanya nyurrangarrimpa ninti nyinanyi, nyurrangarri mangarri ngalkura kapi tjikilpayi, mantarrangkaṯarranyurra tjarrpapayi. Yalatjiku paapa Katutjanya ninti nyinanyi. 33 Katutjalu nyurrangarrinya ngulytjuṉu palumpa walytja tjuṯanyurra nyinanyi. Palumpa nyurrangarri tjukarurru nyinanytjaku. Nyurrangarri tjukarurru nyinanytjala paluru nyurrampa yungamalpa mangarri, yulytjaṯarra. 34 Kutjupa tjuṯangku yalatji kuliṉi, ‘Tjiṉṯungka tjinguru mangarri ngayuku ngarriku, tjinguru wiya. Tjinguru mangarriwiya ngayulu nyinaku, tjinguruṉa miiṉṯarriku.’ Kuwarri nganaṉa wiya yalatji kulintjaku, yunypala nyinanytjaku. Katutjalu kuliṉi tjiṉṯungka nganaṉanya yaṉṯayaṉṯalkitjangku, nganaṉa wiya yurrukulintjaku.”