1 Yaṉangu tjuṯalingkuya ngarala waṉingi. Paluru tjana palumpa kutunguḻu tjuṯangkuṯarra kulintjaku Yiitjulu yalatji tjananya watjaṉu, 2 “Yilta Muutjaku wangka nintilpayi tjuṯangku, Paratji tjuṯangkuṯarra, Muutjaku wangka purinypangkuya riitarringkula kulira nganaṉanya tjakultjunkupayi. 3 Paluru tjana nyurrangarrinya nintintjala kuliranyurra wangka yuwankarraku tjukarurru nyinanytjaku. Paluru tjana wiya Muutjaku wangkawana tjukarurru nyinanyi, wiyawanaya nyinanyi. Palunya tjananya nguwanpa wiyanyurra nyinanytjaku, wantiya! 4 Katutjaku wangka tjana riitarringkula, luwu kutjupa tjuṯa palyalpayi, tjana walytjangku kulira, Katutjaku luwu wiya. Paluru tjana yaṉangu tjuṯa nintilpayi luwu palulawanalpiya tjukarurru nyinanytjaku. Luwu palunya yuwankarraku yaṉangu tjuṯa tjukarurru nyinakitjangku puṯu kulilpayi. Luwu tjuṯa palunya nintilpayi tjuṯa wiyaya tjukarurru nyinanyi. Luwu palunya tjuṯa tjana palyalwiyangku wantimara. 5 Tjukarurru nguwanpaya nyinapayi, yaṉangu tjuṯangku tjananya nyakula waḻkuntjaku. Pawutji wiima ngalyangka tjana tayimapira katiyankupayi. Pawutji palulaya Katutjaku wangkaya kanyilpayi piipangka wakaṉutja. Marangkaṯarraya pawutji kutjupa tjana tayimapira katiyankupayi. Kuuta walytjangkaya waralytjunkupayi tjaputjapu nguwanpa wiima tjuṯa, yaṉangu tjuṯangkuya nyakula waḻkuntjaku yalatji, ‘Pawutjitjarra, tjaputjapu tjuṯatjarraṯarra, yiltaya Muutjaku luwukuya tjukarurru nyinanyi.’ 6 Paluru tjana Tjuwuku tjaatjikutu yankula, mayutju tiṉaku tjiiyi tjuṯangka kutju nyinakatipayi, yaṉangu kutjupa tjuṯangka tjana nyinanytjawiya. Yaṉangu tjuṯa yunypangku ngalkukitja tjungurringkunytjala, yaṉangu kutjupa tjuṯangka nyinanytjawiya paluru tjana mayutju tiṉaku tjiiyi tjuṯangka kutjuya nyinakatipayi, yaṉangu tjuṯangku nyakula waḻkuntjaku, ‘Pala tjuṯa mayutjulampa nyinanyi.’ 7 Paluru tjana yunytjurringanyi tawunu ngurrara tjuṯangku tjananya parra ngaranyingka nyakula waḻkuntjaku yalatji, ‘Nyuntu nganampa nintilpayi palyalingku nyinanyi, kutjupa tjuṯangka wirriḻi.’ Tjana yilta ngunytjinytju tjuṯa nyinanyi. 8-10 Yaṉangu kutjupangkunta wangka panyapa watjantjala nyuntu marrkuntjaku, ‘Wiyaṉin nintilpayi palyalingku watjantjaku, ngali Yiitjuku walytja kutjarra nyinanyi. Yiitju Kurayitjanya kutju nganampa nintilpayi palyalingku nyinanyi, nintilpayi kutjupa tjuṯangka wirriḻi.’ Yaṉangu kutjupangkunta tjinguru yalatji waḻkulku, ‘Nyuntu nganampa mayutju paapa nguwanpa nyinanyi.’ Wangka yalatjinta watjantjala nyuntu marrkuntjaku, ‘Wiyaṉin mayutju paapa nguwanpa watjantjaku, ngali Yiitjuku walytja kutjarra nyinanyi. Katutjanya kutju nganampa mayutju paapa tiṉa nyinanyi.’ Yaṉangu kutjupangkunta tjinguru yalatji waḻkulku, ‘Nyuntu nganampa mayutju palya nyinanyi.’ Wangka yalatji watjantjala nyuntu marrkuntjaku, ‘Wiyaṉin mayutju watjantjaku, ngali Yiitjuku walytja kutjarra nyinanyi. Yiitju Kurayitjanya kutju nganampa mayutju tiṉa nyinanyi.’ 11 Mayutju nyinakitjanyurra waarrkana tjuṯa nguwanpa nyinanytjaku, walytjangku waḻkuntjawiya. Kutjupa tjuṯakunyurra waarrkarringkula nyinanytjaku. 12 Tjinguru yaṉangungku mayutju nyinakitjangku kulintjala ngayulu watjalku yaṉangu paluru waarrkanalpi Katutjaku ngurrangka nyinanytjaku. Tjinguru yaṉangu kutjupangku waarrkarringkula kutjupa tjuṯaku palyantjala ngayulu watjalku yaṉangu paluru mayutjulpi Katutjaku ngurrangka nyinanytjaku.”

13-14 “Yilta, Muutjaku wangka nintilpayi tjuṯa, Paratji tjuṯaṯarranyurra ngula kuutawutjungka yunypawiya ngaraku, wiyawanangku tjananya nintira. Nyurrangarri Katutjaku wangka tjananya tjukarurru tjakultjunkunytjawiya. Nyurrangarri tjananya tjukarurru nintinmara Katutjaku wangkawana kutju, kana kutuya nyinanytjaku. Wiyanyurra Katutjaku wangka kulira tjukarurru nyinanyi, kuliranyurra wantipayi.

15 “Yilta, Muutjaku wangka nintilpayi tjuṯa, Paratji tjuṯaṯarranyurra ngula kuutawutjungka yunypawiya ngaraku, ngunytjinytju tjuṯanyurra nyinanyi. Kutunyurra ngurra kutjupakutu yankupayi yaṉangu tjuṯa nintilkitja. Nyurrangarri tjananya wiyawanangku nintintjala paluru tjana kuya kutu palyalpayi nyurrangarrinya nguwanpa. Ngula Katutjalu palunya tjananya nyurrangarrinyaṯarra watjara warukutu wantirriyalku.

16-17 “Yaṉangu tjuṯa tjananya nyurrangarri yalatji nintilpayi, ‘Panikina wayinatjarraku kutju Katutjanya yunyparringanyi, wiya paluru tjaatji winkiku yunyparringanyi.’ Wiyawanangkunyurra kulira nintilpayi. Katutjanya tjaatji winkikuṯarra yunyparringanyi, palumpa walytja tjuṯangku tjarrparra palunya puḻkawaṉinytjaku. 18-19 Yalatji nyurrangarri Paratji tjuṯangku, Muutjaku wangka nintilpayi tjuṯangkuṯarra yaṉangu tjuṯa nintilpayi yalatji, ‘Mukaṯi mani tjawirrilyitjarraku kutju Katutjanya yunyparringanyi, wiya paluru aalta tjaatjingka ngarapayiku yunyparringanyi.’ Wiyawanangkunyurra kulira nintilpayi. Katutjanya aaltakuṯarra yunyparringanyi, palumpa waarrkana ingkaṯa palulawana ngarala tjapintjaku. 20-22 Katutjanya tjaatji winkiku yunyparringanyi, aaltakuṯarra. Paluru yulytja yuwankarraku yunyparringanyi, tjawirrilyikuṯarra. Palumpa walytja tjuṯa palula tjungurrinytjala paluruṯarra tjaatjingka nyinapayi. Katutjanya ilkarikuṯarra yunyparringanyi, palumpa ngurra. Yalatji nyurrangarri tjananya tjukarurrungku nintintjaku.”

23-24 Yiitjulu tjananya piyuku watjaṉu, Muutjaku luwu nintilpayi tjuṯangka Paratji tjuṯangkaṯarra yalatji, “Luwu nintilpayi tjuṯa, Paratji tjuṯaṯarranyurra ngula kuutawutjungka yunypawiya ngaraku, kuya yalatji palyara. Yukirinyurra pakaltjingara, ngurrtjara tjaatjikutu katipayi, Katutjaku tjunkukitjangku. Yalatjinyurra kuliṉi, ‘Nganaṉa Katutjaku luwuwana yukiri katirra Katutjaku tjunanyi. Nganaṉa palumpa luwu kilytjuntankunytjawiya palya nyinanyi.’ Nyurrangarri wiyawanangku kuliṉi. Yukiri katirra Katutjaku tjunkula kutunyurra Katutjaku luwu kilytjuntananyi, kuya palyara. Yaṉangu kutjupaku mani yulytja mantjilkitjangkunyurra ngunytjinytjunkupayi. Wiyanyurra Katutjaku yunytju nyinanyi, wiya. Palyanyurra yukiri ngurrtjara Katutjaku katirra tjunkunytjaku. Yalatji tjunkula yaṉangu kutjupa tjuṯaku palya nyinanytjaku, mulyaṯangku mantjintjawiya, ngunytjinytjunkunytjawiya.

25 “Luwu nintilpayi tjuṯa, Paratji tjuṯaṯarranyurra ngula kuutawutjungka yunypawiya ngaraku, kuya yalatji palyara. Nyurrangarri purinypangku panikina an puliita paltjilpayi kututja. Kuliṉinyurra, ‘Katutjaku luwuwana nganaṉa mara paltjiṉi, puliitaṯarra. Nganaṉa Katutjaku luwu kilytjuntankunytjawiya palya nyinanyi.’ Wiyawanangkunyurra kuliṉi. Katutjaku luwu kutunyurra kilytjuntananyi kuya palyara. Mangarri, yulytja, maniṯarranyurra mulyaṯangku mantjilpayi. 26 Yilta wiyawananyurra kulira nyinanyi. Kalanyurra tjukarurrulpi nyinanytjaku. Yaṉangu tjuṯanyurra tjukarurru yaṉṯayaṉṯara kanyintjaku.”

27-28 Yiitjulu tjananya piyuku watjaṉu, “Paratji tjuṯa, Muutjaku wangka nintilpayi tjuṯaṯarranyurra kuunyi tjuṯa nyinanyi. Katutjalu nyurrangarrinya ngula watjara payira iyalku, nyurrangarri ngunytjinytju tjuṯa nyinanytjala. Yalatjinyurra wiyawana kuliṉi, ‘Nganaṉa tjukarurru Katutjaku nyinanyi. Yaṉangu tjuṯangku nganaṉanya waḻkuntjaku.’ Yiltanyurra wiyawana nyinanyi wiyanyurra Katutjaku tjukarurru nyinanyi, wiya.”

29-31 “Yilta nyurrangarri ngula kuutawutjungka yunypawiya ngaraku yalatji wiyawanangku palyara. Katutjaku wangka watjalpayi tjuṯa nyurrangarrimpa walytja tjuṯangku yirriṯi mirri pungangi, tjanampa wangka kulira wantirra. Katutjaku wangka watjalpayi palunya tjuṯa tjunutjunkula wantingutjanyurra ngurrira, puḻi yinitjarra ngaratjunkupayi miimiri, yaṉangu tjuṯangku yalatji kulintjaku, ‘Kuunyi, nganampa ingkaṯa yirriṯitja ngaangka ngarrinyi.’ Nyurrangarri miimiri tjanampa palyara wiya yalatji kuliṉi, ‘Kuunyi, ingkaṯa ngaangku tjananya yirriṯi Katutjaku wangka nintilpayi. Nganaṉaṯarra wangka palunya kulira tjukarurru nyinanytjaku.’ Wiya yalatjinyurra kuliṉi, Katutjaku wangkanyurra kulira wantipayi, nyurrangarrimpa walytja irriṯitja tjuṯa nguwanpangku. Paluru tjana irriṯitja tjuṯangku palumpa wangka wantirra Katutjaku wangka watjalpayi tjuṯa mirri pungkupayi. 32 Kala, Katutjaku wangka watjalpayi kutjupalpinyurra iluntankuku.

33 Yiltanyurra ngunytjinytju tjuṯa nyinanyi. Yilta Katutjalulpi ngula nyurrangarrinya kuutawutjungka payira warukutu iyalku. 34 Wangka ngaatjanyaya kulila! Ngayulu nyurrangarrimpa Katutjaku wangka watjalpayi tjuṯa, palumpa wangka nintilpayi tjuṯaṯarra nyinatjunku, palumpa wangkaku ninti tjuṯa. Nyurrangarri palumpa tjanampa wangka kulira wantirra tjaampala mirri pungku. Kutjupa tjuṯanyurra watiyangka waralytjunkula mirrintanku. Kutjupa tjuṯa tjananya nyurrangarri tjaatji tjuṯangka ngaratjunkula wiipatjarrangku pungku. Katutjaku wangka tjakultjunkupayi paluru tjana tawunungka nyinanytjala, nyurrangarri tjananya payira iyalku tawunu kutjupangka nyinanytjaku. Nyurrangarrimpa walytja ngaṉṯitja tjuṯangkuṯarra tjananya payira wantirriyalku. Tjana tawunu palula nyinanytjala nyurrangarri tjananya piyuku payira wantirriyalku tawunu kutjupangkaya nyinanytjaku. Yalatji tjuṯangara tjananya nyurrangarri payira wantirriyalku. 35 Ngula, Katutjalu nyurrangarrinya Tjuwu tjuṯa kuutawutjungka warukutu payira iyalku Katutjaku wangka watjalpayi tjuṯa mirri pungangitjangka. Nyurrangarrimpa walytja yirriṯitja tjuṯangkuṯarra tjananya mirri pungkupayi. Yirriṯi wati Yipulanya nyinangu, kuya palyalpayi wiya paluru. Palumpa kaakangku palunya mirri pungu. Palulanguru kutjupa tjuṯangku wati Tjakarriyatjanya, Parakaku katja mirri pungu, tjaatji tiṉangka ngururrpa tjawirrilyi kutjalpayingka yila. 36 Wangka ngaatjanyaya kulila! Paluru tjana pungkupayi tjuṯangku tjananya mirri pungutjangka, yilta Katutjalu nyurranya kuwarri nyinanytja tjuṯa ngula kuutawutjungka kuru watjara warukutu wantirriyalku.”

37 Yiitjulu tjananya piyuku watjaṉu, “Tjarutjalumanya ngurrara tjuṯaku, ngayulu tjanampa aḻṯururringanyi, tjana Katutjaku wangka kulira wantipayi. Tjanampaṉu walytja yirriṯi nyinapayi tjuṯangkuya Katutjaku wangka watjalpayi tjuṯanya mirri pungkupayi. Katutjalu tjanalakutu palumpa wangka tjakultjunkupayi tjuṯa iyantjala, paluru tjana kulilwiyangku tjananya mirri pungkupayi. Ngayulu Tjarutjalumanya ngurrara tjuṯaku aḻṯururringanyi ampura kanyilkitjangku tjuḻpu lukuluku maama nguwanpangku. Tjuḻpu lukuluku maamangku wiima tjuṯa nyaḻpingku kapuṯura kanyilpayi nguwanpangku ngayulu tjanampa aḻṯururringanyi. Ngayuku wangka tjana kulira wantipayi. 38-39 Tjanaya yalatji kulintjaku. Katutjalu tjaatji tiṉa tjanampa wiya yaṉṯayaṉṯanmalpa ngurra tjuṯa tjanampaṯarra. Yaṉangu tjuṯa wiya ngurra palulawana nyinamalpa. Tjana ngula kutju ngayunya nyaku. Nyakulaṉiya yalatji waḻkulku, ‘Mayutju tiṉa ngaatjanyalaka waḻkula! Ngaatjanya Katutjakuṉu ngangkari tiṉatjarra. Nganaṉa palunya waḻkuntjaku.’ ”