1 Yiitjunya tjaatji tiṉanguru pakara ngurra kutjupakutu yanangi. Palumpa kutunguḻu tjuṯangkuya wanara ngaratjunkulaya watjaṉu, “Nintilpayi. Nyawa palatja!, tjaatji tiṉa palya nganampa ngaranyi. Puḻi tiṉatjanuya palyaṉutja nyawa! Ilta tjaatji palya kutu nganampa ngaranyi.” 2 Yiitjulu tjanala watjaṉu, “Wangka ngaatjanyaya kulila! Ngula kuya tjuṯangku tjaatji tiṉa palatja yuḻpulku. Puḻi yuḻpuṉutja tjuṯa kutju ngarrirra waṉimalpa.”

3 Palulanguru Yiitjunyangarriya puḻi Yalipatjalakutu yankula nyinangu. Paluru tjana nyinarra katunguru nyangangi tjaatji tiṉa palunya. Yiitjuku kutunguḻu tjuṯangku Yiitjunya yankula tjapiṉu, “Yaalytjingara tjaatji tiṉa nyarratja tjana yuḻpulku?” Piyukuya tjapiṉu yalatji, “Nganaṉa kuliṉi manta ilkariṯarra ngula wiyarriku. Yuḻṯa palula nyuntulpi piyuku mantakutu ngalya yanku. Nyaangku nganaṉanya nintilku wiyarrinytjakutu?, tjinguru paarrtjingku? Yuḻṯa palumpa yaalytjingara ngaraku?” 4 Yiitjulu tjananya wangka kutjupawana watjaṉu, “Purinypaya nyinama!, wiyawana nyurrangarrinya ngunytjinytjunkupayingkamarra. 5 Yaṉangu tjuṯa kutjuṯu kutjuṯu ngalya yanku ngayunya Kurayitjanya nguwanpa. Yalatji wiyawana nyurrangarrinya tjana ngunytjinytjunku, ‘Ngayulu mayutju tiṉa nyurrangarrimpa Kurayitjanya nyinanyi. Katutjalu tjananya yirriṯitja tjuṯangka watjaṉu ngayunya wantirriyantjaku.’ Yaṉangu tjuṯangkuya wangka palunya kulira tjana ngulytjurriku, Kurayitjanya kutju kulira.” 6 Yiitjulu tjanala piyuku watjaṉu, “Yaṉangu tjuṯangkuyanku pikangku pungamalpa, ngurra tjuṯawana. Ngulanyurra tjakulpa kulilku, yalatjiyanku pikangku pungkunytjala. Tjakulpa kulira wiyanyurra nguḻurrinytjaku. Yalatjinyurra kulintjaku, ‘Wiya manta ilkariṯarra kuwarri wiyarriku, ngula wiyarriku.’ 7-8 Manta kutju ngurrara tjuṯangku tjananya, manta kutjupa ngurrara tjuṯa tjananya pikangku pungku. Ngurra kutju ngurrara tjuṯangku ngurra kutjupa ngurrara tjuṯa tjananya pikangku pungku. Yalatji ngurra tjuṯawana ngaraku. Manta, watiya tjuṯa, waaḻaṯarra ngurra tjuṯawana pirrtjiku. Yaṉangu tjuṯa ngurra tjuṯawana puṯu kulira paḻtjatjirratja mirrirriku, mangarri wiyarringkunytjala. Yalatjiya yaṉangu tjuṯa pukuḻpawiya nyinaku, nyurrangarriṯarra pikatjarrarriku. Palulanguru nyurrangarri kulilku, ‘Ngula manta, yilkariṯarra wiyarriku.’ Yuḻṯa palunya ngaranytjala, wiyanyurra yalatji wiyawanangku kulintjaku, ‘Manta, yilkariṯarra kuwarri wiyarriku.’ Palunya tayimi kutu ngaraku, wiyarringkunytjawiya. Yalatjinyurra kulintjaku, ‘Ngula manta, yilkariṯarra wiyarriku.’ ”

9 Yiitjulu tjananya piyuku watjaṉu, “Yuḻṯa palula tjana nyurrangarrinya pikantankula mirrintanku, ngayuku walytjanyurra nyinanytjala. Ngurra tjuṯa ngurrara nyurrangarrimpa tuunlayiki nyinaku. 10 Paluru tjana nyurrangarrinya panypurangkula pungkunytjala tjaampalangku nguḻurringkula ngayuku wangka wantirra munupinalpi nyinaku. Munupinarringkula kutjupa tjuṯangku tjananya tjingapungku ngayuku walytja tjuṯa pungkunytjaku. 11 Yuḻṯa palula yaṉangu tjuṯangku kutjuṯu kutjuṯungku ngalya yankula nyurrangarrinya yalatji ngunytjinytjunku, ‘Katutjalu irriṯi watjaṉu ngayulu palumpa wangka watjantjaku. Ngayulu palumpa wangka watjalpayi ngaatjalpiṉa ngaranyi.’ Yaṉangu tjuṯangku wangka tjanampaṉu yilta kulilku. 12 Yaṉangu yuwankarrangkuya kuya palyara nyinamalpa. Palulanguruya ngayuku walytja tjuṯa wiya ngayuku walytja kutjupa tjuṯaku yunytju nyinaku, yunytjuwiyalpiyanku nyinaku. 13 Tjingurunyurra ngayuku tjukarurru kutu nyinarra, kana kutunyurra nyinamalpa, Katutjaku ngurrangka. 14 Wangka yalatjinyurra yaṉangu tjuṯangka tjakultjurinkunytjaku ngurra tjuṯawana. Yalatji nguwanpa kutjupa tjuṯangku yaṉangu tjuṯangka tjakultjunku ngurra tjuṯawana. Yaṉangu tjuṯangkuya kulilku, yaṉangu kutjupa tjuṯangku wiya kulilku. Palunyatjanu manta, ilkariṯarra wiyarriku.”

15-16 Yiitjulu tjananya piyuku watjaṉu, “Tjikipaka tiṉa kutju Katutjaku yunytjuwiya ngula nyinaku. Yalatji Katutjaku wangka watjalpayi Taniyalalu yirriṯi watjaṉu. Ngula nyurrangarri mayutju palunya nyakula yini kulilku. Paluru Tjuwuku tjaatjikutu yankula puḻi Katutjanya nguwanpa palyara katirra ngaratjunku. Paluru Tjuwuku tjaatji tiṉangka nyinanytjala, yaṉangu tjuṯangku yalatji kulilku, ‘Tjaatji palula wiya tjikipaka paluru nyinanytjaku.’ Palulanguru tjaatji palula tjikipaka paluru nyinanytjala nyurrangarri Tjuutiyanya ngurrara tjuṯangku nyakula puḻikutu tjalkaḻuwa!, tjikipaka palulamarra. 17 Yuḻṯa palula tjinguru wati kutjupa waaḻangka yila nyinaku, wiya yulytjakitja pakara waaḻangka tjarrpanytjaku, pakara tjukarurru puḻikutu parrpaṯu tjalkaḻungkunytjaku, tjikipaka palulamarra. 18 Wati kutjupa tjinguru kaanangka waarrkarriku, wiya paluru purikutu rayitpayiki yankunytjaku, kuuta mantjilkitja, wiya, wantirra tjukarurru puḻikutu parrpaṯu tjalkaḻungkunytjaku, tjikipaka palulamarra. 19 Yuḻṯa palula kuunyiya nyinaku, minyma waḻinyku tjuṯa, minyma yamputjarra tjuṯaṯarra. Puṯuya kulilku parrpaṯu puḻikutu tjalkaḻungkunytjaku, tjikipaka palulamarra.” 20 Yiitjulu tjananya piyuku watjaṉu, “Katutjanya kutju yuḻṯa palumpa ninti. Palunyanyurra tjapintjaku, wiyanyurra kapi tayimi puḻikutu tjalkaḻungkunytjaku, kapi puntungku nyurrangarrinya pulaakamilalku. Palunyatjanu nyurrangarri Katutjanya tjapila!, wiyanyurra puḻikutu kapi tayimingka tjalkaḻungkunytjaku. Katutjanya tjapila!, wiyanyurra puḻikutu Tjarritiyingka tjalkaḻungkunytjaku. Luwulampa ngaranyi wiya nganaṉa Tjarritiyingka waṉma yankunytjaku. 21 Yuḻṯa palula tjikipaka paluru kutu nyinaku kuyalingku. Paluru nyurrangarrinya kutu pungamalpa, nguḻunguḻunyurra nyinamalpa. Tjikipaka palulamarranyurra tjalkaḻungkula waaḻawiyalpi nyinaku. Pirriyangku nyurrangarrinya warritjunku, mangarriwiyanyurra nyinaku. Kuunyi tjuṯanyurra puṯu kulira nyinaku. 22 Yuḻṯa palula wiya tjikipaka paluru kutu nyinaku, yaṉangu uwankarra tjananya pungkula wiyalpayingka. Rawawiya paluru nyinaku, nyinarra paluru yanku. Katutjalu tjikipaka palunya, palumpa waarrkana tjuṯaṯarra marrkulku pikangku pungkula wantinytjaku, Katutjaku walytja tjuṯa wiyalpayingkamarra.”

23 Yiitjulu tjananya palumpa kutunguḻu tjuṯangka piyuku watjaṉu, “Tjinguru yaṉangu kutjupangku nyurrangarrinya yankula yalatji ngunytjinytjunku, ‘Nyawaya palatja Kurayitjanya!, Katutjalu watjara wantirriyaṉutja.’ Tjinguru nyurrangarrinya yalatji watjalku, ‘Yalapalatja nyawa!, Kurayitjanya ngaranyi.’ Yalatji ngunytjinytjunkunytjala kuliraya wanti! Yilta nyurrangarrinya tjana palunya nguwanpa ngunytjinytjunku. 24 Ngunytjinytju tjuṯa nyurrangarrilakutu ngalya yanku kutjuṯu kutjuṯu, Katutjalu wantirriyaṉutja Kurayitjanya nguwanpa, Katutjaku wangka watjalpayi nguwanpaṯarra. Paluru tjana nyurrangarrilakutu yankula kutjupa kutjupa palyalku. Yalatji tjana wiyawanangku palyantjala, tjaampalangku yalatji wiyawanangku kulilku, ‘Yilta, ngaatjanya Katutjakuṉu, nganaṉa palumpa wangka kulintjaku.’ Ngayuku walytja tjuṯaṯarra tjananya ngunytjinytjunku wiyawanaya kulintjaku. 25 Ngunytjinytjunkupayi palunya tjuṯangkamarra purinypaya nyinama!, iltakutjura kulilpayingkamarra. Ngayuluṉa nyurranya wangka palunya yurrun yurrunpa watjaṉi nintinyurra nyinanytjaku. 26 Tjinguru yaṉangu tjuṯangku nyurrangarrinya ngunytji yalatji tjakultjunku, ‘Ngurra nyarratja kapiwiyangka Kurayitjanya nyinanyi. Yarralaka palunya nyawa!’ Wangka yalatji kuliranyurra wantinytjaku, yankunytjawiya. Tjinguru kutjupa tjuṯangku nyurrangarrinya yalatji tjakultjunku, ‘Ngurra palangka waaḻangka Kurayitjanya nyinanyi. Yarralaka palunya nyawa!’ Wangka palunya nguwanpa kulira wantirraya nyinama! 27 Yaṉanguku katjaṉa piyuku mantakutu ngalyananyingka yaṉangu yuwankarrangku ngayunya nyaku. Layitningingku rungkantja nguwanpa, yuwankarrangku nyakupayi. Palunya nguwanpa ngayunya yaṉangu yuwankarrangku nyaku, ngayulu ngalyananyingka. 28 Kuka ilungutja ngarrinyingka waḻawurru tjuṯaya kaaṉka tjuṯaṯarra tjungurripayi, ngalkukitja. Palunya nguwanpa ngayulu mantakutu piyuku ngalyankunytjala, yaṉangu tjuṯa tjungurriku.”

29 “Yaṉangu yuwankarraya mikinpatjarra nyinanytjala ngaṉṯi tjiṉṯu, pira, piṉṯirriṯarra wiya kuwarri panyapa pilinypa ngaraku, pirrtjipirrtjikuya. Tjiṉṯu an pira mungarriku. Piṉṯirri tjuṯa patapatangaraku. 30 Yuḻṯa palula yaṉangu tjuṯangku kutjupa kutjupa ilkaringka nyaku. Nyakulaya kulilku, ‘Yuwa, kuwarrilpi yaṉanguku katja piyuku mantakutu ngalyankula yutirriku.’ Palulanguru tjana nyaku ngayunya yaṉanguku katja yutuwariwana rayitpayiki ngalya tjarukatinytjala. Mayutju paawu puntutjarra tjana ngayunya nyaku, pinypanyingka. Yalatjiṉiya nyakula nguḻurringkula yulaku. 31 Palunyatjanu ilkaringuru turampata raapa mirranytjala, ngayulu tjananya ilkari ngurrara tjuṯa iyalku, manta tjuṯawana tjananya yankula yaḻṯirra Katutjaku walytja tjuṯa tjunguntjaku.”

32 Yiitjulu tjananya piyuku watjaṉu, “Waḻpa kakarraranguru rungkaṉingka nganaṉa kuliṉi, ‘Kuwarri warrikutu wangkanyi.’ 33 Palunya nguwanpa tjiṉṯu piraṯarra panyapa pilinypa ngaranytja wiyarriku. Nyakulanyurra kulintjaku yalatji, ‘Kuwarri mayutjulampa ngalya yananyi.’ 34 Wangka ngaatjanyaya kulila! Yaṉangu tjuṯa nyurrangarri kuwarri nyinanyi. Nyinarranyurra ngaṉṯi mirrirriku, panyapaṉa nyurranya watjaṉutja yilta ngaraku. 35 Yilta ilkari mantaṯarra wiyarriku, kanya wangka ngayuku wiyarrinytjawiya, kutu ngaramalpa.”

36 Yiitjulu tjananya piyuku watjaṉu, “Yuḻṯa paluru ngaranytjaku yaṉangu yuwankarrala ngurrpa nyinanyi, Katutjaku katjaṯarraṉa ngurrpa nyinanyi, ilkari ngurrara tjuṯaṯarra. Paapa Katutjanya kutju ninti nyinanyi. 37-39 Yirriṯi wati Nuuwanya nyinanytjala, yaṉangu tjuṯaya Katutjanya kulilwiya nyinangi, walytjangkuyanku kulilpayi. Mangarri kukaṯarraya ngalkura nyinapayi. Yalatji nguwanpaya nyinarra yuru tiṉangkalpi uwankarra wiyarringkula wanaṉu. Katutjalu kapi tiṉa wantirriyalkitjangku kulintjala, Nuuwanyangarri kutjuya puuta tiṉangka tjarrpangu, kanarringu kapi tiṉangkamarra. Palunya tayimi yaṉangu tjuṯa yilta Katutjanya kulilwiya nyinapayi. Yalatji nguwanpa ngulaya yaṉangu tjuṯa Katutjanya kulilwiya nyinaku, yaṉanguku katjaṉa piyuku mantakutu ngalyananyingka. 40 Yaṉanguku katjaṉa piyuku mantakutu ngalya yananyingka, yaṉangu kutjarra kaanangka tjungu waarrkarriku. Ilkari ngurrara tjuṯangku Katutjaku walytja kutju ngurrtjara katiku, kutjupaya wantikatiku. 41 Yuḻṯa palula kungka kutjarrangku pulanku mangarri yuṉinypa rungkaṉingka, kungka Katutjaku walytja kutjuya ngurrtjara katiku, kutjupaya wantikatiku, ilkari ngurrara tjuṯangku. 42 Kutu tjukarurruya nyinama!, ngayulu piyuku mantakutu ngalyankunytjala ilkari ngurrara tjuṯangku nyurrangarrinya wantitjipingka, ilkarikutu katiwiyangku. Yankuwiya kana nguwanpanyurra tjukarurru kutu nyinarra paṯantjaku. 43 Yalatji nguwanpa waaḻa ngurrara yankuwiya nyinarra paṯalpayi mulyaṯangku mantjilpayi payira wantirriyalkitjangku. Paluru yurrunpa tjakulpa yalatji kulilku, ‘Kuwarri mungangkakunyu mulyaṯanytju ngalyanku nyuntupa waaḻakutu, yulytja mantjilkitja.’ Yilta paluru yalatji kulira yankuwiya nyinarra paṯantjaku. 44 Yara palunya nguwanpa nyurrangarri ngayuku walytja tjuṯa kana nguwanpa paṯara nyinanytjaku, yaṉanguku katjaṉa piyuku ngalyananyingka. Ngurrpanyurra nyinanyi ngayulu ngalyankunytjaku. Ngayukunyurra tjukarurru kutu nyinanytjaku, wiyawananyurra nyinanytjala ngayulu, ilkari ngurrara tjuṯangkuṯarra nyurrangarrinya ngalya yankula wantitjipingkamarra.”

45 Yiitjulu yara kutjupawana watjaṉu, “Yara kutjupaya kulila! Ngayulu nyurrangarrinya nintilku waarrkana tjukarurru nyinapayinyatjarra. Waarrkana tjukarurru nyinapayi waaḻaku mayutju tiṉangku ngurrtjara ngaratjunku waarrkana kutjupa tjuṯaku mayutjulpi tjanampa nyinanytjaku. Paluru tjananya waarrkana tjuṯa yaṉṯayaṉṯara yungamalpa kuka anta mangarriṯarra. Aaḻi paluru tjanampa piiṉpitja yungamalpa, mungarrtji tjanampa paluru tjaapa yungamalpa, wantinytjawiyangku. 46 Waaḻaku mayutju tiṉa paluru ngalya yankula mayutju palunya yunypangku nyaku, ‘Ngaatja yilta ngayuku waarrkana palya, paluru tjukarurru waarrkana tjuṯa yaṉṯayaṉṯaṉi.’ 47 Waarrkana tjuṯa tjukarurru yaṉṯayaṉṯaṉutjangka, waaḻaku mayutju tiṉa paluru watjalku palunya, ‘Waarrkana tjuṯaku kutju mayutju nyinanytjawiya, nyinatjunkuṉanta mayutju tiṉa yuwankarraku, waaḻaku, pulukaku ngurrakuṯarra.’ 48-49 Yara palunya nguwanpa tawunu kutjupangka waaḻaku mayutju tiṉa kutjupa nyinaku. Paluru waarrkana kutjupa ngurrtjara ngaratjunku, waarrkana tjuṯa tjananya yaṉṯayaṉṯantjaku. Palulanguru waaḻaku mayutju tiṉa paluru watjalku, ‘Ngayulu ngunytji yananyi ngurra kutjupakutu. Ngurra palulaṉa nyinarra ngalya yanku rayitpayiki. Nyuntu tjananya waarrkana tjuṯa tjukarurru yaṉṯayaṉṯanma!’ Yilta mayutju tiṉa paluru ngurra kutjupakutu yankuku. Tjinguru waarrkana tjuṯaku mayutjungku waaḻaku mayutju ngalya yankunytjaku, puṯu paṯara paluru walytjangku kulilku, ‘Ngayuku mayutju yirriṯi ngalya yanamara. Tjinguru wiya ngalya yananyi, tjinguru kutu kutju yanu.’ Palulanguru waarrkana tjuṯaku mayutju paluru yunytjuwiyarringkula tjananya pungamalpa. Paluru mangarri tiṉa ngalkura wayina tjikira turaangkarringkula tjananya pungamalpa. 50-51 Paluru yuṯuyuṯu nyinanytjala, waaḻaku mayutju tiṉa paluru ngalyanku. Ngalyankula mayutju kuya palunya nyakula payira iyalku, Katutjaku ngurrpa tjuṯangka nyinanytjaku. Waru palulaya tjungu mikin puntutjarra nyinarra kampaku.”