1 Palulanguru Yiitjungarriya yankula yuru Kaliliyila tjayiṯingka nyinangu. Yaṉangu tjuṯalingkuya tjungurringkula yutjura waṉinytjala, puutangkalpi Yiitjunya kaḻparra nyinangu, yaṉangu tjuṯa tjananya nintilkitja. Paluru tjana yurungka tjayiṯingka ngarala waṉingu. 2 Yiitjulu tjananya yara tjuṯa watjara nintiṉangi. Yara yalatjilpi tjananya paluru nintiṉangi, 3 “Kulilaya! Kaana ngurrara kaanakutu yankuku tjiiṯa waṉinytjaku. 4 Wati paluru tjiiṯa waṉinytjala tjiiṯa tjaampala yiwarrangka punkanmalpa. Tjiiṯa panyapa tjuṯa tjuḻpu tiṉangku ngalkura wiyanmalpa. 5-6 Tjiiṯa tjaampala patangaramalpa manta puḻitjarrakutu. Tjiiṯa panyapatjanu yukiri pakara wiyarrikulpi, puḻingku yangatjura kuyalku. Tjiṉṯungku kamparra piḻṯilku nguwanpa yukiri palunya wiyarriku. 7 Tjiiṯa tjaampala tjilkalakutu punkara yukiri wiima pakara ngaraku. Tjilkala tjuṯangku yangatjura kuyantjala, mangarri yutitjarrinytjawiya ngaramalpa. 8 Tjiiṯa tjaampala manta palyangka punkalku. Pakara mangarritjarralpi ngarala waṉiku. Manta palyangka ngarala waṉiku tjaampala mangarri wiimatjarra. Tjaampala mangarri tiṉatjarra. Tjaampala mangarri puntutjarra.” 9 Piyuku tjananya Yiitjulu watjaṉu, “Yara palunya nyurrangarri purinypa kulira tjukarurru nyinanytjaku.”

10 Yaṉangu paluru tjana ngurrakutu rayitpayiki yanu. Palunyatjanu yaṉangu kutjupa tjuṯangku, palumpa kutunguḻu tuwalpalangkuṯarra Yiitjunya tjapiṉu yalatji, “Nintilalanyatju!, yara kaana ngurrara palunya, yutilatju kulintjaku.” 11 Yiitjulu tjananya watjaṉu, “Katutjanya yunytjurrinyi nintinyurra nyinanytjaku palumpa wangkaku, yarrkatjunutjatjanuku. Kanya yaṉangu kutjupa tjuṯangkuya wiya wangka palunya yarrkatjunutja kulilpayi, yara kutjuya kulilpayi, wangka yarrkatjunutja palunya wiya. Katutjaku walytja tjuṯangkunyurra wangka yuti kulintjaku, paluru nyurranya ngulytjura yaṉṯayaṉṯantjaku. 12 Paluru tjana yara tjuṯa kutju kulira puṯu nintirringkupayi. Tjinguruya kulira Katutjakuya tjukarurru nyinamara, paluru tjanampa kuya waṉimara.”

13 Yiitjulu tjananya watjaṉu, “Yara palunya kaana ngurrarakunyurra nintingku kulilmara. Yara palunyanyurra wangka yarrkatjunutja puṯu kulira, tjinguru yara kutjupa ngayuluṉa nyurranya watjantjala, wangka yarrkatjunutja nyurrangarri puṯu kulilku. 14 Kulilaya!, ngayulu yara palunya nyurrangarrimpa yutitjanytjaku. Wati paluru tjiiṯatjarrangku tjiiṯa waṉipayi. Wati palunya nguwanpa ingkaṯangku Katutjaku wangka tjakultjunkupayi, yaṉangu tjuṯangka. 15 Tjiiṯa yiwarrangka punkantjala tjuḻpu tiṉangku ngalkura wiyantja nguwanpa alatji. Ingkaṯalu Katutjaku wangka tjakultjunanyingka, yaṉangu tjuṯangku kuliṉi, mamuku mayutjungku tjuḻpu palunya tiṉa nguwanpangku tjaampala tjananya kawaṉtjingaṉi. Palulanguruya wangka palunya kulira wantinyi. 16 Yaṉangu tjaampala nyinanyi tjiiṯa palunya puḻitjarrakutu punkantja nguwanpa. Ingkaṯalu nintintjala, Katutjaku wangkaya kulira yunyparringanyi. 17 Palulanguru tjana wantiku, yaṉangu kutjupangku tjingapunganyingka, tjinguru kutjupangku Katutjaku yunytjuwiyangku pungkunytjala. Tjiṉṯungku kamparra piḻṯintanu yukiri wiyarringutja nguwanpa tjana Katutjaku walytjawiyalpiya nyinaku. 18-19 Tjiiṯa tjilkalakutu punkantja nguwanpa, yaṉangu tjaampala nyinanyi. Ingkaṯalu nintintjala Katutjaku wangkaya yunypangku kulira, ngurrakutu yankula nyinaku. Katutjaku ngurrpa tjuṯangku tjananya tjingapunganyingka, mangarri tiṉaku mani tiṉaku walytjalpiya nyinaku, munupinarringkula. Yalatji Katutjaku ngurrpa tjuṯaku tjana ngulytjurringkula Katutjaku wangkalpiya wantiku. 20 Tjiiṯa manta palyakutu punkantja nguwanpa, yaṉangu tjaampala nyinanyi. Katutjaku wangka yunypangku kulira tjana Katutjaku waarrka tjukarurru palyaṉi, Katutjaku wangkatjarraya nyinanyi. Tjana yukiri mangarritjarra nguwanpa nyinanyi. Yukiri tjaampala mangarri wiimatjarra ngarapayi nguwanpa, yaṉangu tjaampala Katutjaku wangka wiimatjarraya nyinanyi, palumpa waarrka wiimaya palyaṉi. Mangarri tiṉatjarra ngaranytja nguwanpa yaṉangu tjaampalaya Katutjaku wangka tiṉatjarra nyinanyi, palumpa waarrka tiṉa palyaṉi. Mangarri puntu ngaranytja nguwanpa, yaṉangu tjaampalaya Katutjaku wangka puntutjarra nyinanyi, palumpa waarrka puntuya palyaṉi.”

21 Yiitjulu tjananya yara kutjupa piyuku watjaṉu yalatjilu, “Laampa tilira wiya turaamangka tjarrpatjunanyi, wiya piitangka unngu tjayiṯi tjarrpatjunanyi, yuti waralytjunanyi, tilingaranyingka yaṉangu tjuṯangku nyakunytjaku.” 22 Yara kutjupa tjananya yalatjingku watjaṉu, “Yulytjapaka yarrkatjunutja, ngula yutitjarriku. Wangka yarrkatjunutja, ngula kutju yutitjarriku. 23 Yara palunya nyurrangarri purinypangku kulira tjukarurru nyinanytjaku.”

24 Piyuku tjananya Yiitjulu watjaṉu, “Katutjaku wangkanyurra purinytju kulintjaku. Wangka palunya yunypangkunyurra kulintjala, Katutjalu nyurranya yunypangku wangka kutjupa nintilku. 25 Yuwa, Katutjaku wangka nyurrangarri kulira tjukarurru nyinanytjala, yilta Katutjalu nyurrangarrinya wangka puntu kutjupa nintilku. Tjinguru yaṉangu kutjupa tjuṯangku wangka palunya kulira wantinytjala, Katutjalu tjananya kawaṉtjingalku, palulanguruya munupinalpi nyinaku Katutjaku wangkaku.”

26 Yara kutjupa Yiitjulu tjananya watjaṉu, “Katutjalu palumpa walytja tjuṯa ngulytjura kanyilku. Ngurra kutjungka paluru palumpa walytja tjuṯalku. Yalatji tjana tjuṯarrinytja nguwanpa yara ngaatjanya ngaranyi. Watingku tjiiṯa mantawana waṉirinkula, 27 ngurrangkalpi yankula ngarriku. Ngarrirra pakara waarrkarringkula piyuku ngarriku. Yalatji paluru nyinanytjala yukiri wiima tjiiṯatjanu pakara ngarala waṉiku. Yankula nyakula paluru puṯu kulilku, yalatji pakaṉutjangka. Wati paluru kulilku, ‘Yaalytjiyaalytji pakaṉu?’ 28 Walytja pakaṉi mantanguru yukiri wiimatjarra. Palulanguru yukiri tiṉa pakara ngarala waṉiku. Palulanguru mangarritjarralpiya ngarala waṉiku. 29 Yalatji ngarala waṉinyingka, wati paluru tjuuḻa kaḻikaḻitjarrangku muṯura yurrara mantjilku.”

30 Yiitjulu tjananya watjaṉu yalatjingku, “Katutjalu palumpa walytja tjuṯa ngulytjura kanyilku. Yurrunpa Katutjaku walytja maṉkurrpa nguwanpa ngurra kutjungka nyinanytjala paluru yaṉangu kutjupa tjuṯa ngulytjulku, tjuṯalingkulpi tjana nyinanytjaku. Yalatji tjana tjuṯarrinytja nguwanpa yara ngaatjanya ngaranyi. 31 Watingku tjiiṯa yiṯaratjanu mantjira tjawara tjunkuku pakantjaku. Tjiiṯa palunya wiima ngarrinyi, kanya watiya kutjupa tjuṯangka tjiiṯa tiṉa ngarrinyi. 32 Tjiiṯa wiimatjanu tjawara tjunutja pakara tiṉalpi ngaraku. Tjuḻpu tjuṯangkuya yankula pinytjunpa watiyangka palyalku. Palyaraya nyinaku yiṯara palula.”

33 Yiitjulu yara palunya nguwanpa tjuṯa tjananya watjaṉingi, Katutjaku wangka nintilkitjangku. Wangka wiima nguwanpa kutju tjananya nintiṉingi, wangka tiṉa tjana puṯu kulilpayingkamarra. 34 Yaṉangu tjuṯalingkuya tjungurringanyingka, Yiitjulu tjananya yara tjuṯa kutu watjara nintiṉangi. Paluru tjana ngurrakutu yananyingka, Yiitjulu palumpa kutunguḻu tjuṯanya yarawiya nintilpayi, wangka yarrkatjunutja.

35 Tjiṉṯu panyapangka mungarrtjirrirra tjananya Yiitjulu watjaṉu palumpa kutunguḻu tjuṯangka, yalatjingku, “Yarralaka!, manta kutjupakutu yurungka wirriḻi.” 36 Yiitjunya puutangka nyinanyingka palumpa kutunguḻu tjuṯangku katingu. Yaṉangu tjuṯa tjananya wantikatirraya yanu. Yaṉangu kutjupa tjuṯaṯarraya puuta kutjupa tjuṯangka Yiitjulawana tjungu yanangi. 37 Puutangkaya Yiitjunyangarri yankunytjala ngururrpa waḻpa tiṉangku puuta pirrtjipirrtjitjingaṉu. Kapi tiṉa puutangka tjarrparra nguwanpa tjarrpatjunu. Tjarrpatjunkunytjala, yaṉangu tjuṯaya mirrirringamara. 38 Yiitjunya yanku ngarringu puutangka ngaṉṯitjayiṯi katamalangka. Nguḻurrirraya yankula kanara watjaṉu, “Nintilpayi, pakala!, nganaṉatju ilupayingkamarra. Nyuntu kulilwiyakampa ngarrinyi.” 39 Kanarringkula pakara waḻpa, yuru marrkuṉu yalatjingku, “Ataṉarri!” Palulanguru waḻpa rungkalwiya wiyarringu, yataṉpa ngarangu, yuru pirrtjiwiya ngarangu. 40 Paluru tjananya marrkuṉu, “Nyaatjanunyurra nguḻurringu? Ngayunya Katutjakuṉu ngangkaritjarranyurra kulinmara.” 41 Palumpa kutunguḻu tjuṯa wangkawiya nyinarra kuliṉuya, “Nyaatjanu, waḻpa rungkalwiya, uruṯarra pirrtjiwiya ngaranyi?” Palulanguru yalatjiya wangkarra pungu, “Ngaatjanya kutjupa. Ngaangku ngangkari tiṉatjarrangku waḻpa yuru marrkura yataṉmankupayi.”