1 Palulanguru yuruwanaya Yiitjunyangarri puutangka yankula manta kutjupakutu yanu, yaṉanguku ngurrakutu, manta Kiritjinalakutu. Manta paluru yuru Kaliliyingka kakarrara ngaranyi. 2-4 Puutangka Yiitjunya tjarukatinyingka, wati mamu tjuṯatjarra ngurra palunya ngurrara, kuḻpinguru tjalkaḻungu Yiitjulakutu, nyakukitja. Ngurra palula kuḻpi tjuṯa ngarangi, mirri tjuṯa tjunkupayi. Wati paluru ngurra palula nyinapayi kuḻpingka. Yurrunpa palumpa walytja tjuṯangku mamu tjuṯatjarra palunya tjiinangka puṯu tayimapira wantipayi. Tjuṯangaraya tjina kutjarra, mara kutjarra puṯu tayimapira wantipayi. Paluru tjiina kilytjuntankupayi tjalatangku. Yaṉangu tjuṯangkuya puṯu witira nyinatjunkupayi, tjalata palunya. 5 Mamu tjuṯatjarra paluru kutu mirrarra tjiṉṯurripayi. Parra yankula nyinapayi mirri tjuṯangka. Mungangka tjiṉṯungkaṯarra puḻi tjuṯangka kaḻparra mirrarra yankupayi. Paluru puḻi yiritjarrangkunku kuntaṉingi tjaalpangku pina ramangku.

6-8 Waṉmanguru mamu tjuṯatjarra paluru Yiitjunya nyakula tjalkaḻungkula Yiitjula pupakatingu, puutangka tjarukatirra yila ngaranyingka. Yiitjulu mamu payira wantirriyalkitjangku watjaṉutjangka, paluru mirrarra wangkangu, “Yiitju. Nyuntu Katutjakuṉu nyinanyi paawu tiṉatjarraku katja. Nyuntu nyaakitjanu ngalya yanu ngayulakutu? Katutjala kurungka ngayunya watjala!, pikantankunytjawiyangku wantinytjaku.” 9-10 Yiitjulu tjapiṉu, “Nyuntu yini ngananya?” Paluru watjaṉu, “Yini ngayulu Tjuṯatjarranya. Yini yalatjiṉiya watjaṉi, mamu tjuṯatjarra. Nyuntu wiya tjananya mamu tjuṯa payira waṉma wantirriyantjaku, ngayulanguru.” 11-12 Pikipiki tjuṯangkuya puḻingka ngankirriwana ngalkuyinangi. Mamu tjuṯangkuya Yiitjula watjaṉu yalatji, “Nganaṉatju waṉma ngurra kutjupangka yankula nyinatjipingkamarra, pikipiki nyarra tjuṯakutulanyatju wantirriyala!, pikipikingkalpilatju tjarrparra nyinanytjaku.” 13 Mamu tjuṯangkuya panyapa tjapintjala, Yiitjulu yuwa watjaṉu. Palulanguru wati panyapaya wantirra mamu paluru tjana pikipikingkalpiya tjarrparra nyinangu. Pikipiki paluru tjana tjuṯalingku parra ngalkuyinangi, tjawutjuna kutjarra. Palulanguruya pikipiki paluru tjana mamu tjuṯatjarra tjalkaḻungkula punkaṉu yunngukutu. Tjarrparra yuru tiṉangkalpiya ilurra waṉingu.

14 Palulanguruya maa yankula pikipikiku mayutju tjuṯangkuya tjakultjurinangi tawunuwana, tawunu tjayiṯiwanaṯarra. Palunya ngurrara tjuṯangkuya tjakulpa kuliraya yanu mamu tjuṯatjarra nyinangutja nyakukitja. 15-16 Paluru tjana Yiitjulakutu yankula nyangu mamu tjuṯatjanu paluru pina palyalpi nyinangu, tjaaṯatjarralpi. Yaṉangu kutjupa tjuṯa ngaṉṯiya ngalya yanangi. Yurruntitja tjuṯangku tjananya tjakultjunu, Yiitjulu palunya palyaṉutjangka, pikipiki tjuṯaya yurungka tjarrparra mirrirringutjangkaṯarra. Yaṉangu tjuṯangkuya yalatji kuliṉu, “Yiitjunya Katutjakuṉu ngangkari tiṉatjarra nyinanyi, tjingurulanya pungkuku.” 17 Palulanguruya Yiitjunya marrkuṉu yalatjingku, “Ngurralampatju wantirra yarra!” 18 Yiitjunya maḻaku yankukitja puutangka kaḻpakatinyingka, wati paluru mamutjanungku Yiitjunya tjapiṉu, tjungu yankukitjangku. 19 Yiitjulu wiya watjara iyalkitjangku watjaṉu yalatji, “Nyuntupa ngurrakutu yankula walytja tjuṯangka tjanala tjakultjurra!, mayutju Katutjalunta yaḻṯururringkula palyaṉutjangka.” 20 Palunyatjanu wati paluru mamu tjuṯatjanungku tawunu tjuṯawana tjakultjurinangi tjananya, Yiitjulura mamu tjuṯa payira wantirriyaṉutjangka. Palunya ngurrara tjuṯangkuya yunyparringkula kuliṉu, “Yilta ngangkari tiṉangku mamu tjuṯa payira iyaṉu.”

21 Yiitjunyangarriya kaḻparra puutangka yankula manta palulakutu piyuku yankula tjarukatirra ngarangu. Palulanguru Yiitjulakutuya yaṉangu tjuṯalingku yankula tjungurringu, yurungka tjayiṯi. 22 Palulanguru wati Tjaratjanya, Tjuwuku tjaatjiku mayutju Yiitjulakutu yankula pupakatingu. 23 Pupakatirra tjuṯangara tjapiṉingi yalatji, “Yuṉṯalpa ngayuku mirrirrikitja ngarrinyi, miiṉṯa puntu. Ngayuku ngurrakutu ngalya yarra!, pampura palyantjaku.” 24 Yiitjulu kulira tjungurringkula yanu. Tjaratjaku ngurrakutu ngururrpapula yananyingka, yaṉangu tjuṯangkuya yutjura katiyanangi. 25 Minyma pikatjarraṯarra paluru tjungu yulytjayinangi. Pika palunya minymaku tjanampa pika. Rawa pika palunyatjarra nyinangu yiiya tuwalpala. 26 Minyma paluru maninku ngangkari tjuṯaku yungkula wiyaṉu. Palyarrinytjawiya pika palunyatjarralpi kutu nyinangu, puṯuya ngangkarinangi. 27-28 Yiitjulu tjananya yirriṯi kutjupa tjuṯa palyaṉutjangka minyma paluru kulira yalatji kuliṉu, “Palumpa kuuta kutjuṉa pampura pikawiyalpiṉa kuwarri nyinaku. Ngaatja ngangkari tiṉatjarra.” Wangka palunya kulira minyma paluru ngaṉṯiwana yankula Yiitjunya kuuta yarrkangku pampuṉu.

29 Yalatji pampura pika uwankarra wiyarringu. Palulanguru minyma paluru kuliṉu, “Kuwarriṉa yilta pikawiyalpi nyinanyi.” 30 Yaṉangu pikawiyarringanyingka nintirrirra Yiitjulu yaṉangu tjuṯangka parra taaṉarrirra nyakula tjapiṉu, “Nganaluṉi kuuta pampuṉu?” 31 Palumpa kutunguḻu tjuṯangku Yiitjunya marrkuṉu, “Wiyanu yalatji watjantjaku, pampuṉutjanuku. Tjuṯangkuntaya nyuntunya yutjura katiyanangi.” 32 Yiitjulu tjananya kutu parra nyangangi, pampuṉutjatjanukura. 33 Palulanguru minyma paluru palyarringutjangku kulira Yiitjuku nguḻurrirra tititingarangu. Yiitjulakutu paluru yankula pupakatirra tjukarurrungku tjakultjunu, pampura palyarringutjatjanungku. 34 Yiitjulu watjaṉu, “Minyma. Nyuntu ngayunya kuliṉi ngangkari tiṉatjarra. Palulanguru nyuntu palyalpi ngaranyi mikinpawiya. Nyuntu yunypa yankula nyinama!”

35 Minyma palula Yiitjunya wangkanytjala Tjaratjaku ngurranguru wikarrutja maṉkurrpa ngalya yankula Tjaratjanya tjakultjunu yalatjingku, “Nyuntu kuwarri yuḻṯurringu. Wiyanu nintilpayinya yaḻṯirra ngalya katinytjaku, nyuntupa ngurrakutu.” 36 Tjakulpa palunya kulira Yiitjulu Tjaratjanya watjaṉu, “Wiyanu yulanytjaku, ngayunya kutju kulinma!, ngangkaritjarra.” 37 Palulanguru Yiitjulu tjananya yaṉangu tjuṯa marrkuṉu, nyinakatinytjaku. Paluru palumpa kutunguḻu tjirripala katingu, yini yalatji Piitanya, Tjayimitjanya, Tjaananya. 38 Tjaratjaku ngurrakutuya yankula waaḻangka tjayiṯingka tjananya nyangu, yaṉangu tjuṯa yularra waṉinyingka. 39 Waaḻangka tjarrparra Yiitjulu tjananya watjaṉu yaṉangu tjuṯangka, “Yulanytjawiyaya nyina!, mirriwiya kutu ngarrinyi, yanku kutju ngarrinyi.” 40 Yaṉangu tjuṯangku yalatji kuliṉu, “Yiitjulu wiyawanangku kuliṉi, yankuwiya, mirri ngarrinyi.” Yalatjiya kulira yinkangu. Yiitjulu tjananya watjaṉu yankulaya yaatjayiṯi nyinanytjaku. Yiitjulu yaḻṯirra kungka palumpa paapa anta maama pulanya palumpaṉu ruumangka tjarrpatjunu, palumpa kutunguḻu maṉkurrpaṯarra. 41 Tjunguya ngarala Yiitjulu kungka mirri palunya mara witira watjaṉu, “Kungka. Ngayulu nyuntunya watjaṉi, pakala!” 42 Palulanguru pakara yanu. Yananyingka yaṉangu tjuṯangku nyakula kuliṉu, “Yilta ngaatja ilungutja kanarringu.” Kungka paluru yukarra nyinangi. 43 Yiitjulu pulanya palumpa paapa anta maamanya marrkuṉu, “Yaṉangu tjuṯangka wiya nyupali tjakultjunkunytjaku, ngayulu palyaṉutjangka.” Wangka kutjupa pulanya piyuku watjaṉu kungka palunya paḻtjantjaku.