1 Ka Davidalu ngura panya Kaatjanya wantikatira anu kuḻpikutu ngura panya ini Atulamala itingka, kaya kuṯa panya tjuṯangku munu walytja kutjupa tjuṯangku kuḻu kulinu ngura nyara palula paluṟu nyinanytja, munuya ankula palula tjunguringu. 2 Kaya aṉangu ngaḻṯutjara kutjupa tjuṯangku kuḻu kulinu munuya wirkaṟa palula tjunguringu – kutjupa tjaraya taṟapulatjara, kaya tjara kutjupa tjituṟu-tjituṟu kulintja puḻkatjara, kaya tjara kutjupangku mani ngatjintjatjanungku maḻakungku puṯu ungangi. Wati 400 nguwanpaya Davidala tjunguringu, ka paluṟu tjanampa mayatjaringu.

3 Palulanguṟulta Davidalu kuḻpi panya palunya wantikatira anu tawunu ini Mitjapalakutu manta panya ini Mawapalakutu. Munu wangkangu Mawapaku mayatjangka alatji, “Wiṟungkutju ngayuku mama munu ngunytju kuḻu aṯunymaṟa kanyinma ngayuku paṯaṟa? Kaṉatju kumpiṟa ankula ma-nyinamalta Godalu panya nintintjaku paṯaṟa.” Ka Davidalu tjapinnyangka Mawapaku mayatjangku palyanmanu.

4 Ka mulapaṯu Davidalu mama ngunytju mayatjaku panya ngurangkalta wantikatingu, munu tjiṉṯu nyara palula ankula kumpiṟa ma-nyinangi ngura ngurpatjangka. Ka pula mama ngunytju Mawapaku mayatjangka rawa nyinangi Davidanya kumpiṟa ma-nyinanyangka.

5 Ka tjiṉṯu kutjupangka wati wangkatjara ini Kaitalu Davidala wangkangu, “Kuḻpi nyanga wantikati munu manta panya Judah-lakutu maḻaku aṟuriwa.” Ka mulapaṯu paluṟu kuliṟa kuḻpi panya wantikatira anu manta Judah-lakutu munu wirkaṟa puṯi puḻkangka nyinangi ngura ini Iiṟitjala itingka.

6 Ka tjiṉṯu kutjupa Saulanya tawunu ini Kipiyala puḻi katu kuḻaṯatjara nyinangi puṉu wiltjangka, kaya palumpa tjaultji tjuṯaku mayatja maṉkurpa kuḻu palula tjungu ngaṟangi. Ka wati kutjupa maṉkurpa palulakutu pitjangu munuya tjakultjunu, “Ai! Kutjupangku kunyu nyangu wati panya Davidanya tjana ngura kutjupangka utiringkula nyinanyangka.”

7-8 Ka Saulalu tjanala wangkangu, “Kulilaya wati Benjaminkunu tjuṯa! Nyaanguṟu nyura ngayuku mukuringkunytja wiya? Ngayulu puṯu kulini. Tjinguṟu nyura kulini ngula Jesse-ku katjangku mayatjarira nyuranya kaana maitjara kiṟipitjitjara ungkunytjaku. Palu wiya. Munu nyura tjinguṟu kulini alatji, paluṟu nyuranya kuḻu tjunkuku nyura tjaultji tjuṯaku mayatjarinytjaku. Panya ngayuluṉa nyuranya ngurkantaṟa tjunu wati mayatja tjaultji 1,000-ku munuṉa 100-ku kuḻu, palu nyara paluṟu ngayulu puṟunytju nyuranya palyantja wiya alatjiṯu. Kulilaya! Nyura ngayuku kuraringkupai alatjiṯu. Nyura panya ninti ngayuku katja Jonathanku panya paluṟu pulanku Davidalu kalkuṉu tiṯutjara maḻpa mulapa palyanyku nyinanytjikitjangku, kaṉi nyura nyaanguṟu panyatja ngayula tjakultjunkunytja wiyangku wantingi? Munu panya nyura kuwari ngayula tjakultjunkunytja wiyangkuṯu wantingi ngayuku katjangku ngayunya iluntankunytjaku Davidanya wituwitunnyangka.” Nyanga alatji Saulalu tjanala wangkangu.

9 Palu wati panya Tuwikanya nyara palula ngaṟangiṯu tjanala tjungu, wati panya Iitamanya nguraṟa, munu paluṟu Saulala wangkangu, “Ngaṉmanypa panyaṉa ngayulu tawunu Naapala nyinangi munuṉa Jesse-ku katja nyangu paluṟu tjukurtjara Ayima-likala wirkankunyangka, Akitupaku katjangka panyalta. 10 Ka Godala tjapiningi Ayima-likalu Davidanya alpamilantjaku, munu palulanguṟulta Davidanya mai ungu munu tjula waṟa kuḻu ungu, tjula panyatja Davidalu panya Kalaitjanya kata kaṯantja.”

11 Ka Saulalu nyangatja kuliṟa mapalku tjakulpa wituṟa iyaṉu tawunu nyara Naapalakutu Ayima-likanya tjananya aḻṯira ngalya-katinytjaku palumpa walytja tjuṯa kuḻu panya tjana uwankara tjukurtjara. Kaya mulapaṯu pitjangu wangaṉara alatjiṯu Saulalakutu. 12 Ka Saulalu wangkangu, “Akitupaku katja, wanyuṉi kulila!”

Ka palula wangkangu, “Uwa, mayatja wiṟu! Kuliniṉanta.”

13 Ka Saulalu mirpaṉṯu wangkangu, “Nyuntun kura puḻkangku Godala tjapiningi Davidanya alpamilantjaku. Munu panyan kurangku palunya mai ungu, tjula waṟa kuḻu, ka paluṟu kuwari nyanga paṯaṟa ngaṟanyi ngayuku pika pungkunytjikitja.”

14 Ka Mayatja Saulala wangkangu, “Wiya, Davidanya panya nyuntumpa waṟkaripai tjukaṟuru mulapa nyuntunya kurantja wiyaṯu. Nyara paluṟunku nyuntumpa panya wati waputju wiṟu mulapa. Paluṟu nyuntumpa tjaultji tjuṯaku mayatja nyinangi, munu nyuntunya wankaṟu aṯunymaṟa kanyiningi. Munu paluṟu nyuntula wiṟuṟa kulilpai wangaṉarangku, kaya nyuntumpa panya walytjapiti puḻkaṟa pukuḻaripai palumpa. 15 Mulapaṉa ngayulu Davidaku Godala tjuṯa-aṟangku tjapiningi kuwari kutju wiya. Ka mayatja wiṟu ngana, ngayuku mirpaṉarinytja wiyangkutju wantima ngayuku walytja tjuṯaku kuḻu, panya nganaṉa kura palyantja wiyaṯu.” Alatji Ayima-likalu wangkangu.

16 Palu Saulalu wangkangu, “Wiya, nyuntu panyan kura alatjiṯu palyaṉu, kanta palulanguṟulta nyuntunya munu nyuntumpa walytjapiti kuḻu kuwari tjunguṟa uwankara nyuranya iluntananyi.”

17 Munu wangkangu palumpa tjaultji tjuṯangka, “Mayatja Godaku nyanga tjukurtjara tjuṯangku Davidanya alpamilaṉu. Paluṟu tjanaya kulinu wati panya paluṟu ngayuku nguḻu wirtjapakannyangka, palu tjanaṉiya ngayula tjakultjunkunytja wiyangku wantingi. Kaya nyura palunya tjananya iluntara alatjiṯu.”

Palu tjaultji panya tjuṯangku tungunpungkula Godaku tjukurtjara tjuṯa iluntankunytja wiyangku wantingi.

18 Ka Saulalu wati panya Tuwikala wangkangi, “Nyuntu iluntara wati tjukurtjara tjuṯa!” Ka paluṟu mulapaṯu wati panya tjukurtjara uwankara iluntanu nampa nyangatja 85.

19 Ka palula maḻangka Saulalu tjaultji tjuṯa iyaṉu tawunu panya Naapalakutu, kaya ankula ma-iluntanu aṉangu winki mulapa wati, minyma, tjitji, iṯi kuḻu munuya puluka, tangkiyi, tjiipi tjuṯa kuḻu pungu.

20 Palu tjaultji tjuṯangkuya Ayima-likaku katja puṯu witiningi wati panya ini Apiyatjanya, ka paluṟu nguḻu ma-wirtjapakaṉu Davidalakutu. 21 Munu palula ma-tjakultjunu alatji, “Saulalu Mayatja Godaku tjukurtjara tjuṯa iluntanu Naapanya nguraṟa uwankara mulapa.”

22 Ka Davidalu kulinu munu Apiyatjala wangkangu, “Kulila! Tjiṉṯu panyatja kulinma panya ngayulu Naapalakutu anu, ka panya Tuwikanya nyara palula nyinangi wati panya Iitamanya nguraṟa. Kaṉa nyara palula aṟangka ngayulu kuliningi, ‘Kuwari wati nyanga Tuwikalu Saulala tjakultjunanyi Ayima-likalu ngayunya alpamilantja.’ Ka nyanga mulapaṯu kuwari nyuntumpa walytja uwankaralta iluntara wiyaṉu. Ngaḻṯutjara! Mulapa panyaṉa nyuntumpa mamangka wirkaṟa tjapinu ngayunya alpamilantjaku, kaya nyara palulanguṟulta uwankara pungu ngayunya alpamilannyangka. 23 Ka nyuntu kuwari nguḻuringkunytja wiya ngayula tjungu nyinama, panya Saulalulinya nyuntunya ngalinya ngurini iluntankunytjikitjangku. Palu ngayula tjungu nyinarampan wankaṟu nyinaku.” Alatji Davidalu ngaḻṯuringkula wangkangu.