1 Ka tjiṉṯu kutjupangka aṉangu kutjupa tjuṯangku pitjala Davidala wangkangu, “Wati warmaḻa Pilitjiyanya nguraṟa tjuṯangku tawunu panya Kiilala aṉangu tjuṯa punganyi munuya mai uṉinypa kuḻu kutitjunanyi.”

2 Ka Davidalu Mayatja Godala tjapinu, “Mayatja, mulapan mukuringanyi ngayulu ankula tjananya pungkunytjaku? Wanyuṉi tjakultjura!”

Ka Mayatjalu wangkangu, “Uwa palya, ankula tjananya puwa Pilitjiyanya nguraṟa tjuṯa, munu aṉangu nyara Kiilanya nguraṟa tjuṯa ngalkila.”

3 Palu Davidaku tjaultji tjuṯangku wangkangu, “Wiya, nganaṉa palumpa tjanampa nguḻuringanyi. Ka ngura nyara Kiilanya tjanampa ngurangka itingka ila ngaṟanyi. Kala nyara palulakutu pika ankulampa nganaṉa puḻkaṟa alatjiṯu nguḻuringkuku! Munula tjananya puṯu wiyalku Pilitjiyanya nguraṟa panya tjuṯa.”

4 Ka Davidalu piṟuku Mayatja Godala tjapinu, ka palula wangkangu, “Wiya palya, araya Kiilalakutu munuya Pilitjiyanya nguraṟa tjuṯangka pikariwa, kaṉa ngayulu nyuranya alpamilalku pungkula uwankara wiyantjaku.”

5 Ka mulapaṯu Davidanya tjana anu Kiilalakutu munuya Pilitjiyanya nguraṟa tjuṯa pungkula uwankara iluntanu, munu tjanampa puluka tjiipi kuka uwankara kuḻu mantjiṟa katingu. Kaya aṉangu panya Kiilanya nguraṟa tjuṯa wankaringu.

6 Ka wati panya Apiyatjalu ngaṉmanytju tjukurtjaraku mantara miḻmiḻpa katingu ngura Naapalanguṟu munu Saulalanguṟu nguḻu wirtjapakaṉu munu Davidala tjanala tjunguringkula anu ngura Kiilalakutu.

7 Ka kutjupangku Saulala tjakultjunu Davidanya Kiilala nyinanytja, ka Saulalu wangkangu, “Munta wiṟunya! Kuwari Godalu palyaṉi ngayulu witintjaku palunya. Panya kuwari paluṟu tawunu wall puḻkatjarangka nyinanyi, kaṉa kuwari ankula witilku patingka nyinanyangka.” 8 Munu Saulalu wituṉu palumpa panya tjaultji tjuṯa ritiringkula ankula Kiilala wirkaṟa para-tjatutjuṟa Davidanya witintjaku.

9 Palu wati kutjupangku kuliṟa pitjala Davidala tjakultjunu. Ka Davidalu kulinu munu Apiyatjala wangkangu, “Tjukurtjaraku panya mantara ngalya-kati ngayulakutu, kala Godala tjapilku.”

10 Ka mantara panya palunya ngalya-katingu, ka Davidalu Godala tjapiningi munu wangkangi alatji, “Mayatja Israelku God! Panya nyuntumpaṉa ngayulu waṟkaripai. Kutjupangkuṉi tjakultjunu Saulalu kunyu kuliningi tawunu nyangangka pitjala uwankara wiyantjikitjangku waḻi tjuṯa kuḻu, panya ngayulu tawunu nyangangka nyinanyangka. 11-12 Mayatja, wiṟungkuṉi tjakultjura – mulapaṉiya nyanga Kiilanya nguraṟa tjuṯangku witiṟa ungkuku Saulanya, kaṉi pitjala witilku?”

Ka Mayatja Godalu palula wangkangu, “Uwa, tjana nyuranya wantir'iyalku alatjiṯu Saulalu witiṟa katinytjaku.”

13 Ka Davidalu munu palumpa tjaultji tjuṯangku Kiilanya kuwariṯu wantikatingu Saulalu tjananya pitjala witintjaku-tawara. Munuya para-ngaṟangi ngura tjuṯangka nguḻu wati panya nampa nyanganpa 600-tu. Ka Saulalu kulinu Davidalu Kiilanya wantikatinytja, munu wantira ma-nyinangu ankunytja wiya.

14 Ka Davidanya tjana puḻingka kumpiṟa nyinangi ilytjingka ngura panya Tjipala itingka. Ka Saulalu Davidanya rawangkuṯu nguriningi, palu Godalu Saulanya alpamilantja wiyangku wantingu alatjiṯu, ka puṯu nguriningi.

15 Ka tjiṉṯu kutjupa Davidanya ngura ini Uuṟitjala nyinangi Tjipala itingka. Panya paluṟu kuliningi, “Mulapa, Saulalu ngayunya iluntankunytjikitjangku ngurini.”

16-17 Ka Saulaku panya katja Jonathannga anu ngura nyara palulakutu palumpa panya maḻpa nyakunytjikitja Davidanya, munu wirkaṟa palula wangkangu alatji, “Nguḻu wiya rapa nyinama, panya Mayatja Godalunta aṯunytju kanyini! Ngayuku mamangkunta nyuntunya pungkunytjikitjangku puṯu alatjiṯu ngurilku. Panya paluṟu ninti nyuntu ngula Israelku mayatjariku. Ka nyuntu mayatjarinyangka ngayulu nyuntumpa tjaultji tjuṯaku mayatjarira nyinaku.”

18 Munu pulanku Jonathantu pula Davidalu kalkuṉu Mayatja Godala miṟangka maḻpa mulapa tiṯutjara nyinanytjikitjangku, pika wiyakitjangku. Munu Jonathannga kalkuntjatjanu anu ngurakutu maḻaku, ka Davidanya nyinangi ngura panya Uuṟitjala.

19 Ka ngula aṉangu Tjipanya nguraṟa kutjupatjara Saulaku ngurakutu anu Kipiyalakutu munuya palula wangkangu, “Davidanya nganampa ngurangka itingka kumpiṟa nyinanyi ngura panya Uuṟitjala puḻi ini Aakilala. 20 Ka nyuntu ngula mukuringkulampa pitja nganampa ngurakutu, kala nyuntunya Davidanya witintjaku nintilku.”

21 Ka Saulalu nyangatja kuliṟa puḻkaṟa pukuḻaringu munu tjanala wangkangu, “Wiṟu mulapa nyangatja panya nyuraṉi wiṟungku alpamilaṉi Davidanya witintjaku, kaṉa Mayatja Godala tjapilku nyuranya pukuḻmankunytjaku. 22 Ala, walaya ara nguraku munuya wirkaṟa para-nguriṟa kulila aṉangu ngananya tjanaya palulakutu rawa ankupai, munuya ma-nyawa kuḻu yaaltjingka paluṟu kumpiṟa nyinanyi, panya paluṟu kunyu ayinayini mulapa. 23 Uwa, ngura tjuṯangkaya para-ngurila munuya nyawa paluṟu kumpiṟa nyinanyangka, munuṉiya maḻaku pitjala tjakultjura, kaṉa nyurala tjunguriwa munula ngura nyara palulakutu ara. Ka paluṟu ngura nyara palulaṯu nyinanyangkampaṉa ngayulu palunya nyakula witilku alatjiṯu. Palu wiyangkaṉa ngayulu palunya wantinytja wiyangku rawangku alatjiṯu ngurilku manta winkingka Judah-lawanungku.” Alatji Saulalu tjanala wangkangi. 24 Kaya maḻaku anu ngura Tjipalakutu.

Ka Davidanya palumpa tjaultji tjuṯatjara kumpiṟa nyinangi ilytjingka puḻi ngura ini Mayanta uḻpaṟira ailurungka.

25 Ka Saulanya wirkanu tjaultji tjuṯatjara ngura ini Tjipala munuya nguriningi Davidaku. Ka kulintjatjanungku kutjupangku Davidala wangkangu, “Saulalunta ngurini.” Kaya Davidanya tjana anu ngura kutjupakutu munuya kumpiṟa ma-nyinangi puḻi puḻkangka ngura panya Mayanta. Palu kutjupangku tjananya Saulala wangkangu kumpiṟa nyinanytja, ka Saulalu tjana kuliṟa waṉaṉu alatjiṯu ngura nyara palulakutu munuya para-nguriningi Davidanya.

26 Munuya puḻi kampa kutjupawanungku para-nyakula arintanangi, ka Davidanya tjana puḻi kampa kutjupa palulaṯu mapalku para-pitjangu Saulaku nguḻu. Ka Saulanya tjana ngalya-ilaringangi Davidanya tjananya witintjikitja. 27 Palu wati kutjupangku pitjala Saulala tjakultjunu, “Maḻakuya warpungkula pitja! Pilitjiyanya nguraṟa tjuṯaya nganampa ngurangka wirkanu.”

28 Ka tjananya Saulalu markuṉu palumpa panya tjaultji tjuṯa Davidanya witintja wiyaku, kaya mulapaṯu wantira maḻaku anu Pilitjiyanya nguraṟa tjuṯa pika pungkunytjikitja. Ka Davidanya tjana wankaṟu anu munuya ngura palunyalta iniṉu, ‘Puḻi Wankaṟunkupainya’.

29 Munuya ngura panya palunya wantikatira puḻi kutjupa kuḻpitjarangka wirkaṟa nyinangi ngura ini In-Kitila.