3
Duwen en Sohn Sounpapidais eh Kapahrek kan nan Sapwtehn
(Pil tehk Mark 1.1-8; Luk 3.1-18; Sohn 1.19-28)
1 Ni ahnsowo Sohn Sounpapidais tapihada kakahnseli oh kapakapahrekseli nan sapwtehn en Sudia. Eri, iet audepen eh kapahrek kan: 2 “Kumwail koluhla oh wiliakapwala, pwe Wehin Koht a WEHIN KOHT: Mehn Suhs ako mahs inenen lemmwiki ar pahn nda de ntingih mwaren Koht, ihme kahrehda Madiu kin ntingihedi “wehin nanleng” ahpw ni mehlel mouren lepin mahsen pwukat iei “wehin Koht”. kerendohr.” Mad. 4.17; Mark 1.15. 3 Eri, Sohn iei ohlo me soukohp Aiseia kohpadahr duwe, ni eh mahsanih,
“Ngilen aramas emen me kin likilikwerki nan sapwtehn,
‘Kumwail kaunopada elen Kaun-o;
kumwail kainenehla ahl akan me e pahn ketin keid ie!’ ” Ais. 40.3 (LXX).
4 Eri wunen soangen mahn me ede kamel me kin wia en Sohn eh likou; e kin pirehki nan lukepe kateng kilin kou; oh mensiek oh sukehn loangalap en nanwel me e kin sakasakan. 5 Aramas tohto sang Serusalem, sang wasa koaros nan wehin Sudia, oh pil sang nan kousapw koaros me mi limwahn Pillap Sordan, kin pokonla reh. 6 Re ahpw kin wehkada diparail kan oh papidaisla rehn Sohn nan pillapo.
7 Ni Sohn eh kilangada Parisi oh Sadusi kei me mwur tohto, me iang pokopokondohng papidaisla reh, e ahpw patohwanohng irail, “Ia duwen kumwail me rasehng sineik kan? Ihs me padahkihong kumwail me kumwail kak pitsang engieng en Koht me nektehn leledohng kumwail? Mad. 12.34; 23.33. 8 Kumwail kapwarehda tiahk kan me pahn kasalehda me kumwail wiliakapwalahr. 9 Kumwail dehr lemeleme me kumwail kak akpwungkin kumwail, me dene kumwail samanki Eipraam; pwe I men kumwail en ese pwe Koht kakete ketin wiahkihla nein Eipraam takai pwukat! Sohn 8.33. 10 Kumwail tehk mwahu pwe sileo miher nin tepin tuhke; eri, tuhke koaros me sohte wa mwahu pahn paldi oh lekdekiong nan kisiniei. Mad. 7.19. 11 Ngehi I kin papidaisihkin kumwail pihl, pwe en kasalehda amwail koluhla; a me pahn ketido mwuri, iei ih me pahn papidaisihkin kumwail Ngehn Sarawi oh kisiniei. E uhdahn lapalapasang ie; oh ngehi I sohte mwahn warohng sair sapwellime suht. 12 Sapwellime sapwel miher nin lime pwe en koahkoa wihd kan oh ketikipene wahn pilawa kan nan sapwellime imwen nahk, a dihpw oh wahn pilawa kan e pahn ketin isikala nan kisiniei sekehkun.” Kupw. 5.14,23.
Sises ketin Papidaisla Rehn Sohn
(Pil tehk Mark1.9-11; Luk 3.21-22)
13 Ni ahnsowo Sises ketsang Kalili ketidohng Sordan pwe en papidaisla rehn Sohn. 14 Sohn ahpw men kapweiekidihsang Sises en papidais reh, iei me e patohwankihong, “Ia duwe, Maing? Ngehi me uhdahn pahn papidaisla rehmwi, a komwi ahpw ketido pwe en papidais rehi?”
15 A Sises ketin sapeng, mahsanih, “Ke dehr kapweiek, pwe ih koasoandien met, pwe ih me konehng en, kita en kapwaiada mahs kupwur en Koht.”
Sohn eri pwungkihla. 16 Sises lao ketin papidaisla, e ahpw ketida sang nan pihlo; a iet ahnsowo nanleng pa ritpeseng. Sises eri ketin mahsanihada Ngenen Koht eh ketket kohdi ni mwomwen mwuroi men oh ketidi powe. 17 A kapitie ieu ahpw peidihdo sang nanleng, me mahsanih, “Kowe, me iei nei pwutak kompoake, me I kin kupwurperenki.” Sen. 22.2; Mel.2.7; Ais. 42.1; Mad. 12.18; 17.5; Mark 1.11; Luk 9.35.