Rongamwahu me Ntingdier sang rehn
MARK
Oaralap en Pwuhk wet
Rongamwahu en Mark, iei “Rongamwahu duwen Sises Krais me Sapwellimen Koht.” Pwuhk wet kasalehiong kitail duwen Sises ih aramas emen me kin sapwellimaniki mwekid kehlail oh manaman. Sapwellime manaman dehde mwahu sang ni sapwellime padahk, sang ni sapwellime manaman pohn ngehn suwed akan, oh pil sang ni sapwellime manaman en lapwahda dipen aramas akan. Sises pil koasoia duwen pein ih Nein-Aramas me ketidohn tounmeteikihla sapwellime mour pwe en kasaledekihala aramas sang nan diparail kan.
Mark kin koasoia duwen sapwellimen Sises mahsen oh padahk kan, ahpw e kin koasoia laud duwen sapwellime wiewia kan ni koasoi kehlail oh dehde. Mark ntingihedi mahs koasoi mwotomwot duwen Sohn Sounpapidais oh pil duwen en Sises eh ketin papidaisla oh ale songosong pahn Sehdan; oh mwuhr e koasoiahda duwen sapwellimen Sises doadoahk en kamwahwihala me soumwahu kan oh wia padahk. Ni sapwellimen Sises tohnpadahk ko ar kin rongorong oh kilikilang ih, re ahpw kin kalaudehla ar wehwehki oh dehdehki; ahpw sapwellime imwintihti kan kin kalaudehla ar kailongki. Ire laud kan me kaimwisekala pwuhk wet, iei koasoiepen wiewia kan me pweida ni kaimwiseklahn wihk me Sises ketin ieiaski nin sampah, ahpw mehlel eh pwoula pohn lohpwu oh iasada.
Imwin Rongamwahu wet me riau, me mi nan kilel me duwehte met [ ]. Emen sounnting tohrohr likin me ntingihada pwuken mark, me mwein ntingihedi.
Audepe ni Oaralap
1. Tepin rongamwahu 1.1-13
2. Sapwellimen Sises doadoahk nan Kalili 1.14—9.50
3. Sises ketsang Kalili ketilahng Serusalem 10.1-52
4. Kaimwiseklahn wihk nan Serusalem oh limwah 11.1—15.47
5. Iasadahn Sises 16.1-8
6. Kaun Sises me iasadahr pil pwarohng sapwellime tohnpadahk ko oh kitidahla nanleng 16.9-20
1
En Sohn Sounpapidais eh Kapahrek
(Pil tehk Mad. 3.1-12; Luk 3.1-18; Sohn 1.19-28)
1 Iet tepin Rongamwahu duwen Sises Krais me Sapwellimen Koht, 2 nin duwen mahsen me ntingdier rehn soukohp Aiseia:
“Koht mahsanih, ‘Iet nei meninkedero me I pahn kadarewei mwohmwi
pwe en onopada alomwi.’ Mal. 3.1.
3 Ngihl ehu me kin likilikwer nan sapwtehn:
‘Kumwail kaunopada ahl akan koaros ong Kaun-o;
kumwail kainenehla kisinial akan wasa e pahn ketin keid ie!’ ” Ais. 40.3 (LXX).
4 Eri, Sohn ahpw pwarada nan sapwtehn, wiewia papidais ong aramas akan, lohlohkihong irail, mahsanih, “Kumwail koluhla, wiliakapwala oh papidaisla, Koht ahpw pahn ketin mahkikihong kumwail dipamwail kan.” 5 Me ngeder sang Sudia oh sang nan kahnimw en Serusalem ahpw kin kohieila pwe en rong en Sohn eh kapahrek. Re ahpw kin wehkada diparail kan, Sohn ahpw kin papidaisihrailla nan Pillap Sordan.
6 Sohn kin likawih likou me wiawihdahsang ni wunen kamel, oh kin pirehki lukope kateng kilin kou; oh ih me e kin sakasakan: mensiek oh sukehn loangalap en nanwel. 2 Nan. 1.8. 7 A iet audepen kalohk me e kin mahsanihong aramas akan: “Mie ohl emen me pahn ketido mwuri, me lapalapasang ie mehlel; me I sohte warohng poaridi mwowe pwe I en lapwahda selen sapwelllime suht. 8 Ngehi I kin papidaisihkin kumwail pihl, a ih, e pahn ketin papidaisihkin kumwail Ngehn Sarawi.”
Sises Papidaisla oh Ale Songosong pahn Sehdan
(Pil tehk Mad. 3.13—4.11; Luk 3.21-22; 4.1-13)
9 Mwurin Sises eh ketido sang Nasaret, kisin kahnimw kis nan wehin Kalili, oh ketin papidaisla rehn Sohn nan Pillap Sordan. 10 Ni ahnsou me Sises ketida sang nan pihlo, e mahsanihada duwen nanleng eh ritpeseng oh Ngehn Sarawi eh ketidi ni mwomwen mwuroi men oh ketiket powe. 11 E ahpw pil karongehda kapitie ehu me peidihdo sang nanleng, me mahsanih, “Kowe, me iei nei pwutak kompoake, me I kin kupwurperenki.” Sen. 22.2; Mel. 2.7; Ais. 42.1; Mad. 3.17; 12.18; Mark 9.7; Luk 3.22.
12 Eri, ni ahnsowohte Ngehn Sarawi ahpw kahluwalahng Sises nan sapwtehn. 13 Sises eri ketiketki wasao rahn pahisek, Sehdan eri kasongosongehda. Mahn lawalo kan pil kin iang Sises wasao; a tohnleng kan ahpw kin pwarodo oh kin sewese.
Sises Malipe Soused Pahmen
(Pil tehk Mad. 4.12-22; Luk 4.14-15; 5.1-11)
14 Mwurin Sohn eh lekdekiong nan imweteng, Sises ahpw ketila Kalili oh ketin lohkiseli Rongamwahu sang rehn Koht, mahsanih, 15 “E lelehr ahnsowo, oh Wehin Koht kerendohr! Kumwail eri koluhla oh wiliakapwala oh pwosonla Rongamwahu!” Mad. 3.2.
16 Rahn ehu Sises ketiket kohla pohn oaroahr en Lehen Kalili; e ahpw mahsanihada soused riemen, Saimon oh rie Andru, me wie lalaidki ara uhk pwoat nan leho. 17 Sises eri ketin mahsanihong ira, “Kumwa kohdo iangiehla; I ahpw pahn padahkihong kumwa duwen laidih aramas akan.” 18 Ni ahnsowohte, ira pwilikihdi ara uhk ko oh iangala Sises.
19 E ketin douluhlla sang wasao, ahpw pil mahsanihada pirien ehu, Seims oh Sohn, nein Sepedi. Ira mihmi pohn kisin pwoht kis onohne ara uhk kei. 20 Ni Sises eh mahsanihirahda, e ahpw ketin malipe ira. Ira eri peidedi samarao me iang mihmi pohn kisin pwohto rehn tohndoadoahk kei, ira ahpw iangala Sises.
Ohl emen me Ngehn Saut Tiada Powe
(Pil tehk Luk 4.31-37)
21 Kedekedeo, irail ahpw ketila Kapernaum, a ni rahnen Sapado Sises ahpw ketilong nan sinakokeo oh tapihada wia sapwellime padahk. 22 Aramas koaros me iang rong ahpw pwuriamweikihla duwen eh kin ketikihwei sapwellime padahk; pwe e sohte duwehte sounkawehwehn Kosonnedo kan, pwe e kin ketin kawehwehda ni manaman. Mad. 7.28-29.
23 Ohl emen me ngehn saut tiada powe ahpw pwarala nan sinakokeo oh mahdidi eh wer, ndinda, 24 “Sises mehn Nasaret, dahme komw men ketin wiahiong kiht? Komwi ketidohng kauweikitala! I ese ihs komwi, pwe komwi me Sapwellimen Koht meninkeder sarawio!”
25 Sises eri ketin angiangihada ngehn sauto, e mahsanih, “Nennenla, kowe eri pedoisang rehn aramas menen!”
26 Ngehn sauto eri itikada ohlo eh lao rerada, e ahpw weriwer oh pwedieisang reh. 27 Aramas koaros eri pwuriamweikihla oh wie peipeidekpene nanpwungarail, ndinda, “Dahkot met? Soangen padahk kapw dah ieu met? Ohl menet me inenen manaman. E ketin mahsente, a pil ngehn saut akan kin peikiong!”
28 Rongen Sises ahpw mwadang lohkseli wasa koaros nan wehin Kalili.
Sises ketin Kakehlahda Aramas Tohto
(Pil tehk Mad. 8.14-17; Luk 4.38-41)
29 Eri, Sises oh sapwellime tohnpadahk ko, iangahki Seims oh Sohn ahpw ketisang nan sinakokeo oh ketila nan imwen Saimon oh Andru. 30 A soulap en Saimon wie wonohnki nan ihmwo soumwahu karakar. Ni Sises eh ketin lel wasao, re ahpw kairehki duwen iren liho. 31 Ih eri ketila oh ketin kolada pehn liho oh sewesehda en kesihnenda. Ni ahnsowohte, karakaro pah kohsang rehn liho; e ahpw tapihada papah irail.
32 Nin soutikohte, ni ketipin eh pahn kihrlahr, aramas akan ahpw wapenehng rehn Sises me soumwahu koaros oh me ngehn saut akan tiadahr pohrail. 33 Tohn kahnimwo koaros ahpw iang pokonpene mwohn ihmwo. 34 Sises eri ketin kakehlahda aramas tohto me ahneki soangen soumwahu tohto oh ketin kausasang ngehn suwed tohto rehn aramas akan. Ih eri ketin kalikedi ngehn suwed ko re en dehr lokaia, pwe re ese ihs ih.
Sises ketin Lohkiseli Rongamwahu nan Kalili
(Pil tehk Luk 4.42-44)
35 Mandahn rahno, nin sohrahn, Sises ahpw ketin kipada oh ketiketla sang ni ihmwo, ketiketlahng likin kahnimwo wasa kis pwe en kalapwukala ie oh loulou. 36 Saimon oh ienge ko ahpw rapahkihieila; 37 ni ar diarada, re ahpw patohwanohng, “Maing, aramas koaros patohwan raparapahkin komwi.”
38 A e ketin sapeng irail, mahsanih, “Kitail douluhlwohng nan kousapw teikan oh kahnimw keren kan, pwe I en pil lohkiseli wasa ko Rongamwahu, pwe ihme I kohkihdo.”
39 Ih eri ketin kakahnseli nan wehin Kalili pwon, kapakapahrekseli nan sinakoke kan oh ketin kakausasang ngehn suwed kan rehn aramas akan. Mad. 4.23; 9.35.
Sises ketin Kakehlahda Ohl Tokutok men
(Pil tehk Mad. 8.1-4; Luk 5.12-16)
40 Ohl tokutok men pil patohdo rehn Sises, kelehpwikihdi mwowe oh sarada, patohwanohng en ketin sewese, patohwan, “Maing, ma komw ketin kupwurki, komw kak ketin kamwakeleiehda.”a KAMWAKELEIEHDA: Dene soumwahu wet kin kasaminehla aramas ong kaudok.
41 Sises eri ketin kupwurehla oh ketin kapahla nin limeo oh doahke, mahsanih, “Iei, I mwahuki. Nna, mwakelekelda!” 42 Ni ahnsowohte tokutoko pa sarasang rehn ohlo; eri, e ahpw mwakelekella. 43-44 Sises ahpw ketin kalikedi, mahsanih, “Kilang, kaleke ke ndahng emen met; a kohwei inenwohngete rehn samworo oh kasalehiong pein uhk pwe en kasawihiuk; mwuhr, ke ahpw kihda omw meirong me Moses kilelehdier mehn kadehde ong aramas koaros duwen omw mwakelekellahr.” Eri, e ahpw ketin kadarala ohlo. Lip. 14.1-32.
45 Ohlo kohlahte lohkiseli wasa koaros eh mwakelekellahro; me kahrehda Sises sohla kak ketseli ni pokon sansal nan kahnimw ko, e ahpw kin kalakalapwukseli likin kahnimwo. Ahpw soh, pwe aramas ngeder kin pokondohng reh sang wasa koaros.