32
1 “Ke gamu na maṉauru, mi va avoso mae, maqu zama si rau,
ke agoi na pepeso, mamu avavoso koari na zinama pa ṉuzuqu.
2 Mani hoqa guana ruku sa qua vina tumatumae,
meke sari na qua zinama si vura sage guana puni,
meke guana remiremisi ruku koari na duduli vaqura,
meke hoqa guana ruku koari na linetelete.
3 Kaqu tozi vura nia rau sa pozana e Zihova,
meke kaqu tozi vura nia ri na tie sa vina lavatana Sa.
4 Asa tugo sa patu, meke kotokotopo sari Nana tinavete,
meke sari doduru Nana tinavete si toṉoto beto.
Meke loke Nana vina ririunae na sinea si Asa,
ba toṉoto meke gotogoto si Asa.
5 Ba gamu si lopu na tie ta raṉe mia,
meke lopu garomia pude Nana tie soti,
na butubutu va sesea mia na kokoha mia si gamu.
6 Pa siraṉa asa si kaqu tubehia gamu se Zihova?
Ke gamu na tie duviduvili mia na pekipeki mia,
ura Asa mo sa Tamamia, sapu tavete gamu
meke vata evaṉaeni gamu keke butubutu.
7 Mi balabala pulei sari na rane saripu ele holadi,
meke sari na totoso pukerane.
Mi nanasi sari na tiatamamia
pude tozini gamu sapu ele ta evaṉa.
Mi nanasi sari na barogoso
pude tozini gamu saripu ele holadi.
8 Sipu poni lani sa Tamasa Ululuna Hola koari na butubutu sari na dia tinago pepeso,* TTA 17:26
meke sipu varipaqahani Sa sari doduru tiena ka tiena,
si vizata va gotoi Sa sari na voloso tadi na tie
koasa padadi ri na tuna Izireli.
9 Ura sa tinago te Zihova si sari Nana tinoni tugo,
meke se Zekopi tugo sa Nana tinago pepeso ta mizina.
10 Dogori Sa si arini korapa ene vilorae la mae pa korapa popoa qega,
koasa vasina popana meke ivuluna.
Ba kopuni na lavelave hukatani Sa si arini,
gua puta tugo sapu kopu pule nia si Asa.
11 Kekeṉoṉo gua puta tugo sa atata sapu va tumatumaeni tapuru sa sari na tuna,
meke repahi sa sari na tatapuruna pude halo vagi si arini.
E Zihova si kopu gunia tugo se Izireli pudeni lopu hoqa mate.
12 E Zihova mo telena turaṉi sari Nana tinoni Izireli
loke votiki tamasa pule.
13 Meke va malumi Sa pude kopuni sari na vasidi, ululudi,
meke henahena si arini koari na linetelete saripu toqolo pa dia inuma.
Meke vagi gedi zipale pinomodi koari na patu,
meke na oela koari na huda olive saripu toqolo koari na pepeso patupatu.
14 Meke soku meleke vagini rini sari na dia bulumakao na qoti,
noboko valeana sari na sipi, qoti, meke sari na dia bulumakao,
meke toa valeana sari na huiti meke sari na vaeni sapu lomoso hola.
15 Meke koa tagotago, na henahena valeana,
meke noboko hola sari na tinoni Izireli,
meke va karia rini se Zihova sapu tavetedi si arini,
meke kilua rini si Asa sapu kekeṉoṉo guana Patu ṉiṉirana sapu harupudi si arini.
16 Meke va kono ia rini si Asa koari na dia tamasa karovodi saripu vahesi rini,
meke va bugoria rini koari na dia tinavete kaleadi saripu evaṉi rini.
17 Meke va vukivukihi la i rini sari tomate kaleadi sapu sari na tamasa kokohadi,
sari na tamasa saripu lopu hite ta gilana koari na tiatamadia pukerane,* 1 Kor 10:20
meke saripu lopu hite hoke va tabei rina tinoni Izireli.
18 Muliṉi nia rini sa dia Tamasa sapu sa Patu marilaena pu harupudi si arini,
meke poni nia koarini sa tinoa.
19 Sipu dogoria e Zihova sapu gua asa, si bugoro sisigiti si Asa,
meke kilu pani Sa sari na tuna.
20 Zama se Zihova, ‘Namu lopu kaqu hite tokani Rau si arini.
Maqu dogoro paki, sapu nasa beka si kaqu ta evaṉa koa rini?
Na tinoni va guguedi, meke loke dia vina hinokara pa dia tinoa.
21 Ele va bugoro Au na va kono Au rini koari na dia tamasa hoborodi.* 1 Kor 10:22; Rom 10:19
Ego, ele va bugoro Nau beku rini,
ke kote va bugoro ni butubutu hoborodi na duviduvilidi Rau si arini.
22 Sa Qua binugoro si kaqu huruṉu sage guana nika,
meke kaqu sulu va mate betoi sari doduru likakalae pa popoa pepeso,
meke kaqu kamo la gua pa popoa tana minate pa kauruna sa popoa pepeso,
pude sului sari na sinokiraedi ri na toqere.
23 Meke kaqu tomo lani tinasuna na gonani tupi Rau si arini.
24 Kaqu mate pa inovia na minoho,
meke kaqu razai na oza variva mate si arini.
Meke kaqu garunu lani kurukuru pinomo Rau
pude va matei meke na noki variva mate pude garati si arini.
25 Kaqu mate pa vinaripera pa ninae siraṉa sari na tie,
meke kaqu matagutu tarazuzu sari doduru tie pa ninae popoa.
Sari doduru tie na barikaleqe vaquradi si kaqu mate,
meke kaqu loke haha hitekedi meke barogoso na kaleqe si kaqu koa hola.
26 Ele zama nia Rau sapu kaqu va hurakatae la i Rau pa ninae vasina,
meke namu loke tie hokara kaqu balabala pulei si arini.
27 Ba lopu boka tavete gunini Rau si arini.
Zama hoboro guni mo Rau he sari na dia kana,
sina kaqu zama si arini sapu va kilasi rini sari na Qua tinoni, gua;
ura Arau mo evaṉia koa rini sapu guahe.’
28 Pupuhu sisigiti sa butubutu Izireli
meke namu loke nana tinumatumae hokara.
29 Be tumae nia rini si kote ele gilania rini sapu gua asa,
meke kote boka doṉo gilania mo rini sa vinabetodi rini.
30 Na vegua meke boka hadua keke tie sari keke tina tie;
babe va goveti ri karua tie sari ka manege puta tina tie?
Ura ele holuholu pani e Zihova sa dia Tamasa ṉiṉira si arini,
meke luara veko pani Sa si arini.
31 Ura ele gilania ri na dia kana sapu lopu ṉiṉira sari na dia tamasa,
lopu ṉiṉira gua sa Tamasa tadi na tinoni Izireli.
32 Ura dia ṉati vaeni si mae guana pa Sodomu,
meke sari na dia inuma si kekeṉoṉo gua pa Qomora;
gua rina vaeni sapu pasa meke variva mate,
33 guana vaeni sapu ta tavete koari na lorodi rina noki variva mate.
34 Kaqu balabala pulei e Zihova sapu gua ele tavetia rina dia kana,
meke kaqu aqania Sa sa totoso garona pude va kilasi si arini,
35 meke zama si Asa, ‘Arau si kote tubehi; kote hobei Rau si arini,’ gua;* Rom 12:19; Hib 10:30
meke tata sa totoso sapu kaqu gulazoro ni nenedia koasa ranena sa dia tinasuna sapu ele tata mae;
meke kaqu kamo va hodaka mae koa rini si asa.
36 Kaqu va dogoro nia e Zihova sa tinoṉoto koari Nana tinoni.* Sam 135:14
Meke tataruni sari Nana nabulu.
Pana dogoro gilania Sa sapu ele taloa sa dia ṉiniraṉira.
Meke loke tie si koa hola, pinausu babe na tie soti.
37 Meke kaqu zama guahe si Asa,
‘Ai, avei sari na mia tamasa, saripu raṉei gamu?
38 Ele ponini ginani leana na kolo napo vaeni gamu si arini koari na mia vina vukivukihi.
Madi turu mae kamahire pude tokani gamu!
Madi lavelaveni gamu.
39 Ura Arau, Arau mo telequ si na Tamasa;
loke Tamasa pule si hinokara.
Arau tugo si va mate meke va toa.
Va bakobakora meke sasalaṉa.
Meke loke tie si va mate na va toa.
Va bakobakora meke sasalaṉa.
Meke loke tie si boka vagi pania sapu taṉinia Rau pa Limaqu.
40 Ovulu sage nia Rau pa maṉauru sa Limaqu meke zama, guahe:
Hinokara sapu Toaqu si Rau ninae rane ka rane.
41 Pana ovulia Rau sa Qua magu sapu malakapina
meke saputu vagia Rau pa limaqu sa tinoṉoto si kaqu tubehi Rau sari na Qua kana,
meke lipui si arini pu kukiti Nau si Rau.
42 Babe, kaqu honihoni gore koari na Qua tupi sari na eharadi;
meke kaqu va mate betoi sa Qua magu sari doduru pu kana Au si Rau
meke loke tie koa rini pu varipera mae koa Rau si kaqu koa hola,
kamo koarini pu bakoradi na ta pusidi si kaqu mate.’
43 Gamu na butubutu, mi va lavati sari na tinoni te Zihova.* Rom 15:10; Rev 19:2
Ura va kilasi Sa sari doduru pu va matei si arini.
Meke tubehi Sa sari Nana kana,
meke taleosoni Sa sari na sinea tadi Nana tie soti.”
44 Mae koarini sari Mosese e Zosua tuna Nani, meke zamani koarini sari doduru zinamana sa kinera hie pude di avosia ri na tinoni.
Sari na Vina Tumatumae Vina Betobeto te Mosese
45 Meke sipu beto totozini e Mosese sari na zinama te Tamasa koari na tinoni Izireli, 46 si zama guahe si asa koa rini, “Kaqu va tabe na kopu valeana ni gamu sari na tinarae sapu ponini gamu Rau pa rane ṉinoroi, pude mi totozi ni sari na tumia, meke kaqu va tabei rini sari doduru zinamana sa tinarae hie. 47 Sari na vina tumatumae hire, si lopu na zinama kokohadi si arini, ba na tinoa tamugamu si arini. Kaqu va tabei gamu si arini, pude mi koa va gelenae koasa popoa sapu kaqu la koa ia gamu pa kali karovona sa Ovuku Zodani.”
48 Meke koasa ranena tugo asa si zama guahe se Zihova koe Mosese.* Nab 27:12-14; Diut 3:23-27 49 “Mu ene sage la koasa toqere Abarimi pa popoa Moabi, pa kalina sa vasileana lavata pa Zeriko; mamu haele sage la koasa toqere Nebo, mamu doṉo hola la koasa popoa Kenani sapu kaqu ponini Rau koari na tinoni Izireli. 50 Meke kaqu mate si goi koasa toqere asa, kekeṉoṉo gua tugo sa tasimu Eroni sapu mate pa Toqere Horo. 51 Ura gamu kara beto sapu va kari Au si Rau pa kenudia rina tinoni Izireli, sipu koa pa kolo Meriba si gamu tata koasa vasileana nomana pa Kadesi, pa korapa qega sapu ta pozae Zini, meke loke mia pinamaṉa pa kenudia rina tinoni Izireli si gamu. 52 Kaqu koa pa seu, meke doṉo la ia mo goi sa popoa, ba lopu kaqu la kamo ia goi sa popoa asa, sapu kaqu poni nia Rau koari na tinoni Izireli.”