1 Ke la henahena koe Esita sa baṉara meke se Hamani. 2 Meke sipu korapa naponapo vaeni si arini pa vina rua rane, nanasia sa baṉara sa kalaho, “Kalaho Esita, na sa si hiva nia goi? Mu tozi nau gua sapu hiva nia goi, meke kaqu poni nigo rau. Kukuruna sa qua binaṉara ba kote va malumia rau pude vagia goi.”

3 Olaṉa se Esita, sa kalaho, “Qua baṉara, be qetu nau, meke qetu nia goi pude poni au gua sapu tepa ia rau, mamu va malumau pude kaqu toa si arau meke gua tugo sari na qua butubutu tie. 4 Ura arau meke sari na qua tinoni si ele ta holuholue pude tava mate beto si gami, be guana ele ta holu si gami pude koana pinausu, si lopu kaqu va vura ia rau sa ginugua hie. Ba tata kamo tugo sa totoso pude kaqu tava mate beto si gami.”

5 Meke nanasia Zekisi sa baṉara se Esita sa kalaho, “Esei sa tie sapu lopu matagutu tavetia sa tinavete asa? Pavei koa si asa?”

6 Olaṉa se Esita, “Sa mami kana si na tie kaleana sapu se Hamani!” Neneqara na tarazuzu se Hamani pa kenuna sa baṉara meke koasa kalaho. 7 Ṉaziri sisigiti meke gasa turu sa baṉara, meke vura koasa lose, meke la pa sada koasa inuma havoro tanisa baṉara. Ele gilania meke va nonoga ia e Hamani gua sapu kote tavetia sa baṉara koasa, ke koa hola si asa meke tepa ia sa sa nana tinoa koe Esita, sa kalaho. 8 Sipu korapa kokotuṉu gore kapae koasa habohabotuana te Esita se Hamani, pude tepa ia sa tataru pude ta harupu si asa, si nuquru mae sa baṉara taluarae pule mae pa inuma havoro. Dogoria sa gua sapu ta evaṉa ke kukili vura sa baṉara, “Kasao! Sa tie hie si hiva tavetia sa kinaleana koasa kalaho pa kenuqu rau, meke gua tugo pa korapana sa qua vetu baṉara?” Sipu lopu ele va hokotia sa baṉara sa nana zinama si mae sari na koimata varipera meke nobi tamunia rini batuna se Hamani.

9 Keke ri kasa koimata pa vinaripera, pozana si e Habona, si zama, “Keke vasina huqihuqiana si tavete vekoa e Hamani manege rua ṉava ululuna, pude kaqu vasina kote tava huqi se Modekae, sa tie sapu harupia sa mua tinoa, qua baṉara!”

Olaṉa sa baṉara. “Huqia vasina se Hamani!” 10 Ke tava huqi va mate se Hamani koasa vasina huqihuqiana sapu tavetia telena pude te Modekae. Meke tiqe ibu sa binugoro tanisa baṉara.