1 Koasa rane tugo asa si luara vala beto ni e Zekisi, sa baṉara sari doduru tinagotago te Hamani sa kana tadi na tie Ziu koe Esita, sa kalaho. Vata gilana nia e Esita koasa baṉara sapu se Modekae sina turaṉana soti, ke podalae pa totoso asa si tava malumu se Modekae pude nuquru pa kenuna sa baṉara pa nana habotuana baṉara. 2 Vagi vura nia sa baṉara sa nana riṉi sapu koa ia sa vina gilagilana sa nana binaṉara na ṉiniraṉira sapu vagi pule nia sa koe Hamani, meke va sage nia sa koe Modekae pude tavetavete nia. Vala nia ṉiniraṉira Esita sa kalaho se Modekae pude kopu ni sari doduru tinagotago te Hamani.

3 Beto asa si hoqa todoṉo se Esita pa nenena sa baṉara meke kabo si asa, tepa ia sa koasa baṉara pude kaqu tava beto sa tinavete kaleana gua sapu tavetia Hamani sa tie pa butubutu baṉara Aqaqa pa guguadi sari na tie Ziu. 4 Huhuku la nia sa baṉara sa kolu qolo koe Esita, ke turu sage si asa meke zama, 5 “Qua baṉara, be qetu nia goi na tataru nau goi, meke toṉoto koa goi, si mamu kubere pulea goi si keke tinarae hinobena sa tinarae sapu tavetia e Hamani sapu ele tava ene pa doduru popoa. Sa tinavete asa sina tinarae mae gua koe Hamani na tuna e Hamedata pu podo mae koasa butubutu baṉara Aqaqa koasa guguana sa tina huaradi na vina matedi ri doduru tie Ziu pa mua binaṉara. 6 Ura lopu kaqu boka va manoto ni arau sari na tinasuna sapu kote mae ṉoṉovali sari na qua tie, meke sari na turaṉaqu si kote tava mate.”

7 Zama la ia Zekisi sa baṉara, sari Esita, sa kalaho, meke se Modekae sapu na tie Ziu, “Ele ta huqi va mate se Hamani koasa guguana sa tinavete kaleana sapu tavetia Hamani pa guguadi sari na tie Ziu, meke ele poni ni rau sari na tinagotago tanisa koe Esita. 8 Ba sa tinarae sapu ta garunu la pa doduru vasina pa pozaqu rau sa baṉara, sapu koa ia sa vina gilagilana sa qua riṉi si koa ia tugo sa qua ṉiniraṉira meke lopu boka ta hobe. Ba agoi kote boka kubere la koari doduru tie Ziu gua sapu hiva tozi lani goi. Boka kuberia goi pa korapana sa pozaqu sapu koa ia sa vina gilagila sa qua riṉi meke sa qua ṉiniraṉira, doduru gua pu hiva nia gamu.”

9 Ta evaṉa si hie pa sidara vina ṉeta pa vina rua rane koasa sidara Sivani. Tioki Modekae sari na tie kubekubere tanisa baṉara meke tiro vura la nia sa koa rini sapu kote ta kubere koasa leta, pude ta garunu la pa doduru tie Ziu, doduru koimata pa vinaripera, qavuna, meke sari na palabatu pa qinavuna tadi ka keke gogoto hiokona zuapa pinaqaha popoa podalae pa popoa Idia meke kamo pa Itiopia. Sa leta hie si ta kubere pa hopeke dia vinekala soti pa hopeke kinopu qinavuna, meke pa hopeke dia kinubekubere. 10 Vagi Modekae sari doduru leta hire saripu ta kubere pa pozana Zekisi sa baṉara, meke va soto ni sa na vina gilagila tanisa baṉara. Sari na leta hire si ta paleke koa rina tie paleke inavoso pu koi pa hose reregedi tanisa baṉara.

11 Koari na leta hire si ta kubere sapu tava malumu koasa baṉara sari doduru tie Ziu pude madi kopu pule ni pa tinasuna. Be guana keke puku tie pa votiki butubutu si mae raza i sari na tie Ziu, sari dia koburu, babe dia barikaleqe si kaqu varipera hobe sari na tie Ziu meke podekia pude va mate i sari na kana. Kaqu tava mate beto sari na kana hire meke kaqu ta vagi sari na dia tinagotago. 12 Sa tinarae hie si kaqu podalae ta luli pa korapana sa binaṉara pa Pesia pa rane sapu ta huhuku kekenu pude tava mate sari na tie Ziu, sa rane asa sina vina manege ṉeta pa Ada sa vina manege rua sidara. 13 Kaqu podalae tava gilana pa doduru qinavuna koari hopeke pinaqaha popoa pude kaqu koa va namanama sari doduru tie Ziu koasa rane ta vizatana. 14 Pa ginarunu tanisa baṉara si ta suraṉa koa ri na hose reregedi tanisa baṉara meke haqala lani rini sa inavoso. Sa tinarae hie si ta tozi vura koari na tie pa ṉati vasileana pa Susa.

15 Taluarae se Modekae pa vetu baṉara pokopoko nia sa sa poko baṉara, pu koa ia buma na keoro, meke va hakea tugo sa sa toropae baṉara ta tavetae pa qolo, meke keke poko pepolo arilaena pa avarana. Kukili na iraṉa sari na tie pa siraṉa pa Susa. 16 Koa gua koasa vina lavatana e Modekae, si tava manoto na tava lavata, meke koa qetu sari na tie Ziu. 17 Meke koari doduru vasileana nomadi meke pinaqaha popoa koasa binaṉara, vasina pu ta tiro vura sa inavoso tanisa baṉara si koa qetuqetu meke magogoso pa tinavete, meke tavete inevaṉa na gua sari na tie Ziu. Koasa ginugua asa si soku sari na tie si poza pule ni tie Ziu si arini, sina matagutu ni rini sari na tie Ziu.