Olibe meta kaiwa hesau Isalaela yo tenem teha ne basileiyadi maudoidi udiyedi. Yesu yona huyaena olibe koyadi se badokalili. Kaiwa ne saliyana nige ye lohakalili, nuwana 6 mita, na yona kini ne ye pahili. Iyamo huyana ta koi, kabo silina se kiniꞌuyo na badodi nuwana hasi o haligigi.

Olibe nukula kaniyodi se gagilikalili na nige namwanamwa saha hesau kalidiyena. Na tamowai kabo olibe namwanamwana lagana se hekinihekawalaei kaiwa ne unai, kabo kaniyona namwanamwadi ye toledi.

Olibe kaniyodi se suna Nowemba unai. Kabo tamowai se koihebekudi na se tanoidi na se bahelaeidi olibe kabatamtam unai na se tamdi. Masidi ne unai kabo oela se hai. Oela ne se tole kadi kai udiyedi yo hinage se ini lampa udiyedi na se gabudi na numa se hedawaya (Mataiyo 25:1-13). Oela hinage se hai kadi gai yausidi yo se sau dahidi unai (Luka 7:46), yo unai mulamula se ginauli (Luka 10:34, Yamesi 5:14).