Pilemona
Paulo yona leta ye lau Pilemona unai
Buka ta hededehemasalahana
Pilemona meta ekalesiya yodi tauwoyawoya tamowaina hesau magai Kolose unai, yo iya yo Paulo se kawakehanamwanamwa. Iya gogo tamowaina, na yona numa lakilakina unai dubu tamowaidi se koikoigogo.
Pilemona meta yona heyayai tauhaidi hekadi, na luwadiyena hesau hesana ede Onesimo. Na Onesimo nuwana kana tanuwaga unai ginauli saha hesau ye kaiwahali ede ye wasabu ye lau Paulo unai, iya numatutugudu unai magai Epeso unai.** Magai Epeso unai: Tausonoga hekadi yodi nuwanuwatu ede, magai Loma o Sisaliya unai. Paulo Yesu wasana ye hededehemasalaha Onesimo unai, ede ye nuwabui. Kabo Paulo ye hineli meta laulau dudulaina ede taba Onesimo ye uyo kana tanuwaga Pilemona unai.
Loma yodi laugagayo ye wane, ena heyayai tauhaina kana tanuwaga ye wasabugabaei na ena se lobai, meta kana tanuwaga yona dudulai gonowana kabo ye koihemwaloi. Unai Paulo leta ta ye kuli ye lau Pilemona unai na ye kaibwadai taba tabu Onesimo ye hekamkamna, na ye haiꞌuyoi na ye kabinamwanamwaei doha kana kaha hesau Keliso unai.
Leta ta taubaheina ye lau Pilemona, siya meta Tikikasi yo Onesimo (Kolose 4:7-9). Na leta huyakulina bolimaina nuwana 64 ad.
Buka ta hedehededena lakilakidi
• Lautoki 1-3
• Pilemona yona gadosisi tausunuma kalidiwai 4-7
• Paulo yona kaibwada Onesimo debanaena 8-22
• Hedehedede gehegehedi 23-25
1
Lautoki
1 Yau Paulo, Yesu Keliso debanaena numatutugudu unai taumiya. Maidagu kada kaha Timoti leta ta ka kuli ye laowa kowa yoma hali taupaisowa Pilemona kalimwai. Kowa meta kama kaha ka gadosisiyeigo. 2 Yoma lautoki se lau loumai Apiya unai, yo Akipasi kalinawai, iya sunuma hesabana ye kaipatesaguigai doha tauꞌiyala hesau. Yoma lautoki hinage ye lau ekalesiya taulaolaomagogoi yom numa unai ne kalidiyena. 3 Taba Tamada Yaubada yo Guiyau Yesu Keliso yodi kabinamwa yo nuwadaumwali se lediwa kalimiuyena.
Pilemona yona gadosisi tausunuma kalidiwai
4 Kagu kaha Pilemona, huya maudoina yogu tapwalolo udiyedi ya nuwanuwatuigo, meta Yaubada ya laulautokiyei, 5 matawuwuna wasam ya lapulapui meta kowa Guiyau Yesu tausunumaena yo Yaubada yona tamowai maudoidi taugadosisiyeidi. 6 Tamowai ku saguidi yom sunuma debanaena. Ya tapwatapwalolo bena yom haisagusagu paisowana ne ye bayao ye lau, na unai bena ku nuwatulobai ginauli namwanamwadi sahasahadi Yaubada ye ledima Keliso debanaena bena ta ginaulidi. 7 Kagu kaha, yom gadosisi debanaena ya gwauyalakalili yo nuwagu ye bayao, matawuwuna ede Yaubada yona tamowai ku henuhenuwabayaodi.
Kaibwada Onesimo debanaena
8-10 Unai kabo nuwatu hesau bena yom ya hedehedede. Ya kaibwadaigo bena yom heyayai tauhaina Onesimo ku haiꞌuyoi. Iya doha natugu, matawuwuna numatutuguduyena ya woyalaei Guiyau unai.** Ya woyalaei Guiyau unai: Numatutugudu unai Paulo Yesu wasana ye hededehemasalaha Onesimo unai, ede ye nuwabui. Unai ye hemala doha Paulo natuna. Keliso debanaena ya dudulai meta ya nuwabayao na ya hedede bena saha ku ginauli, yau Paulo, ya tautaubadako yo Yesu Keliso debanaena numatutugudu unai ya miyamiya. Na iyamo taba nige apostolo gigibwalina ya hepaisowa na ya hededelaowa. Na yoda haigadogadosisiꞌuyoida wa debanaena ede ya kaibwadaigo.
11 Onesimo meta yom heyayai tauhaina. Beyabeyana iya nige yom ye paipaisowanamwanamwa, na teina huya ta unai iya taupaisowa namwanamwana kowa yo yau kalidaena.** Taupaisowa namwanamwana kowa yo yau kalidaena: Hesa Onesimo kaniyona ede taupaisowa namwanamwana. 12 Iya ya hetamali ye uyowa kalimyena, na iya yogu gadosisi tamowaina ede. 13 Ya henuwa bena taba Onesimo sola maidagu ka miya, to kabo ye lauhedamaigo na ye saguigau huyana Yesu wasana namwanamwana debanaena ya miyamiya numatutugudu ta unai. 14 Na nige gonowana saha hesau ya ginauligaibui kana siga ku talambaguna, matawuwuna nige ya henuwa bena ya lauheliligo na laulau namwanamwadi ku ginaulidi, na bena yom gadosisi mamohoina unai ku ginaulidi.
15 Nuwana huyakubwakubwa mo Onesimo ye miyasuwala na bena kabo ye uyowa maidam kwa miya ye lau ee nige kana siga. 16 Iya yom heyayai tauhaina, na sunuma debanaena ye hemala kada kaha. Iya ya gadosisiyei, na nuwana yom gadosisi iya unai kabo ye lakikalili, matawuwuna iya yom hali tamowai yo hinage kam kaha Guiyau debanaena.
17 Unai, ena ku nuwatui meta yau kam kaha, kabo Onesimo ku yogaisini doha hinage yau ku yogaisinigau. 18 Ena laupwano saha hesau ye ginauli o ginauli hesau unai ye kaihagahaga kalimyena, polohena ne ku tole kaliguyena. 19 Yau Paulo, ya bom nimagu ta unai ya kulikulilaowa kalimyena:
Kabo ya hemaisago.
Na yom mauli unai ku kaihagahagakalili kaliguyena,** Ku kaihagahagakalili kaliguyena: Paulo Pilemona ye henuwabui ede mauli nige kana siga ye lobai, na hagahagana ede ye lakikalili. na iyamo taba nige ya hetala. 20 Kagu kaha, Guiyau debanaena yogu kaibwada ta bena taba ku ginauli. Unai kabo nuwagu ta ku hebayao Keliso unai.
21 Teina ta ya kulikuli na ya nuwatui meta yogu kaibwada ta kabo ku ginauli, yo kabina ya kata meta yom laulau ne kabo se namwakalili na kabo yogu kaibwada ta.
Hedehedede gehegehedi
22 Na ginauli kesega mo ede teina: Ya nuwatui meta Yaubada yomi tapwalolo wa ye lapuidi ede kabo ya uyowa kalimiuyena. Unai bili hesau ku kabinonohai yau hesabagu.
23 Epapalasi meta iya hinage maiyagu numatutugudu unai Yesu Keliso debanaena. Yona lautoki ye hetamaliyawa kalimyena. 24 Yo Maleko, Alisitakasi, Demasi yo Luka, siya meta yogu hali taupaisowa, se lautokiyeigo.
25 Guiyau Yesu Keliso yona kabinamwa bena nuwamiuyena ye miya.
**^ Magai Epeso unai: Tausonoga hekadi yodi nuwanuwatu ede, magai Loma o Sisaliya unai.
**1:8-10: Ya woyalaei Guiyau unai: Numatutugudu unai Paulo Yesu wasana ye hededehemasalaha Onesimo unai, ede ye nuwabui. Unai ye hemala doha Paulo natuna.
**1:11: Taupaisowa namwanamwana kowa yo yau kalidaena: Hesa Onesimo kaniyona ede taupaisowa namwanamwana.
**1:19: Ku kaihagahagakalili kaliguyena: Paulo Pilemona ye henuwabui ede mauli nige kana siga ye lobai, na hagahagana ede ye lakikalili.