6
Bab-Dummad Israel-dulemar-sabsur-imakoed
1 Amós sogdebalid:
“Dule-Sión-neggweburgi-baisuli-itodimalad, ¡duledar-wilesmar!
Samaria-yargi-dobsulidba-gudidimalad, ¡duledar-wilesmar!
Dule-nug-nikamalad neggwebur-dummagangi-mamaid, ¡duledar-wilesmar!
A-dulemarse Israel-dulemar bendakleged egisnaddamalad.
2 Calne-neggweburse be namar, nue be dakmalo.
Agi bukwa, Hamat-neggwebur-dummadse be namarbalo.
Geb sorba Filistea-neggwebur-Gatʼye-nugadse be namarbalo.
¿Ar bemarde we-neggweburmargi bur obinmarde?
¿Bemar-yarde bur we-yarmarba dummadye sogde?
3 Bemar iba-isgana obangumarye be bimalad,
aka, be neg-nue-gagaled-iba warmakega imakmalad.
4 Be-gabed-megmaladgi elefante-nugar-goamar nanaid, a-megedgi na be megdimalad,
degi, be-gan-siged-mua-muad-dummadgi be bilikwaa sigdimalad.
A-gangi-sii, bemar sibad-wawaad-mimmigan-e-galugi-sulearmalad gundimalad,
degi, moli-bebe-nikad-senigana-wardummagan be gundimarbalid.
5 Bemar, David-namakeyob namakye be sogmalanad,
yogasaar be namakmalad.
Gar-cítaraʼba be namakdedamalad.
Be-itoleged, gar-gormalad be obinyedamalad.
6 Bemar nog-dummagangi vino be gobdimalad.
Degi, ina-wawadikid-nuegan be ebudimarbalid.
Ar José-e-wagan-e-neg-bibichisadba
nunmaked-dummad, eba nunmak be itosurmalad.
7 A-ulale, emidi bemar-inse dulemar-galesa-seledmaloed-iduar seledmaloed,
deyobi, dulemar-galagwensur-iba-onomalad berguoed.”
Israel-dulemar-san-dummarba-itoged-ular, Bab-Jehová sae-itoged
8 Bab-Dummad-Jehová na dukin ise-sogar imaksad. Bab-Dummad-Jehová-Bela-Gangued-Nikad weyob soged:
“Jacob-wagan san-dummarba-imaked an isdar-daked.
E-neg-gandikmalad an sae-daked.
Agala, e-neggwebur e-isdarmaladga an urmakoed,
degi, bela e-ibmar-nikadi an e-isdarmaladga urmakoed.”
9 Weyob neg gudoed: Dule neg-gwagwengi e-ambe (10) dula besale, bela burgwemaloed. 10 Geb e-gwenad-gwensak muimar-ogumakega, a-negse muimar-sudanikile, dule-neggi-gudiidga weyob sogdoed: “¿Dule-baid amba be-walik gudii?”
Geb dule weyob abin sogdoed: “Suli.” Geb degidgine, ega sogdoed: “¡Boogwa! Anmar geg Bab-Jehová-nug obared.”
11 Ar Bab-Jehová igar-ukdoed:
Neg-dummagan bibisgeye,
degi, neg-burwigana ubigwar imakye.
12 ¿Ar molimar akwa-dummagan-imbaba abarmaksi?
¿Ar akwa-dummagangi nabir moli-bebe-nikad napa imusi?
Ar bemardi, igar-innikigwad, ibmar-isganaga obinnismalad.
Igar-innikigwad-selemaid, boniga be obinnismalad.
13 Bemar ibmar-gwen-imaksasulidgi be wergudimalad.
Be sogmalad: “Anmar-ganguedgi anmarde gargangued nikusmarye.”
14 Degisoggu, Israel-dulemar, Bab-Jehová-Bela-Gangued-Nikadi soged:
“Bemargi neggwebur-soggwen gwichiguega an imakoed.
A-neggwebur ise-mesagwale bemar-imakoed.
Hamatʼse-doglemaid-akale, Arabá-diwar-maidse, bemar ese odurdaklegoed.”