4. AMÓS SOGATAR NEGBURGAN DAKSAD
7
(7:1–9:10)
Negburgan-sogapaa-daklesad
1 Bab-Jehová-Bur-Gandik-Maid, we-negburgan anga oyosad:
Reyga ibmar-gwag-orosgi-dakleged-ukleged-welesad-sorba, a-gwag gannar ainiali an dakalid. Agi Bab-Jehová sesmar-bukidar urbenai an dakarbalid. 2 Degi, sesmar napaneggi gaganse-bakale, bela obelosgua, binnasuli an goted:
—An-Bab-Jehová-Bur-Gandik-Maidye, an bese wilesakwaa egisye, Jacob-waganga isgued be eliye. ¿Ar igi Jacob-wagande bar bukuosunna? Unnila ichee gumalad.
3 Degidgine, Bab-Jehová wiledakde, sogded:
—Degir nabir, an deyob neg imakosulid.
4 Geb degi, Bab-Jehová-Bur-Gandik-Maid, negburgan-baid anse oyosbalid: An daked, Bab-Jehová dule-sabsur-odurdakega soose gote. Degi, soo napa-urba demar-wilasailad dinnaa imaksad. Degine, nainugan bela swanga imaksad.
5 Deyob an daksagu, binnasuli an goted:
—Bab-Dummad-Jehováʼye, bese wilesakwaa an egisye, soo be oginye. Degisulile, ¿ar igi Jacob-wagande bar bukuosunna? Unnila iche gumalad.
6 Degidgine, Bab-Jehová wiledakde, sogded:
—Degir nabir, an deyob neg imakosulid.
7 Bab-Jehová, anga negburgan-baid oyosbalid: An daked, Bab-Jehová galu-matusulid-nuekwa-sobaled-nagaba gwichi. Degi, neg-wilubsaed-dubgi-gingwa-naid e-argangi-gani, an dakalid. 8 Degi, Bab-Jehová anse egichialid:
—Amós, ¿wede ibu be dake?
An abin-sogded:
—Dubgi gingwa-nai an daked.
Degidgine, Bab-Jehová anga sogded:
—Dubgi-gingwa-naidi, an-Israel-dulemar-abargi an obatoed, adi, wilubdakega, bule inniki-gudimardibeye. Inniki-gudisulile, bar an ega e-isgued eliosulid.
9 Isaac-wagan-e-bab-dummaganse-goled-ailamar bela osulolegoed,
degi, Israel-e-bab-dummaganse-goled-negmar bela bibisgoed.
Jeroboam-e-gwenadgan es-suidgi an oberguoed.
Amasías, Amósʼgi gwichigusad
10 Degidgine, Betel-neggweburgined-dule-irwa-Babse-goled-Amasías, Israel-rey-Jeroboamʼga gayaburba barmisad: “Amós, Israel-sordamar-abargi begi gwisgudiid. Ar Amós-sunmakedba Israel-dulemar binsaed-galediid. 11 Ar ade, Amós sogdiid:
‘Rey-Jeroboam es-suidgi burgoye.
Israel-dulemardi e-yargi gales seledmarmogoye.’ ”
12 Geb degi, Amasías, Amósʼga sogded:
—¡Dule-negburgan-daked, be wegi-gudiid be nae! Ar be mas-gunbiele, Judá-yarse be nae. Agi, Bab-Jehová-igargi be sunmaknae. 13 Melle bar Betel-neggweburgi, Bab-Jehová-igargi be sunmaknoniko, ar Betelʼde, rey-e-neg-islidikidid, rey-e-bab-dummadse-goled-negad.
14 Amós, Amasías-abin sogded:
—An Bab-Dummad-gayaburba-barsoged-dulesulid, an a-machisurbalid. Unnila, an sibad-wawaad-edarbed-dule gued, higuera-sapigi an arbaed-dulebalid. 15 Degi-inigwele, Bab-Jehová sibad-edarbedgi an-onosad. Anga sogsad: ‘An-gayaburbagi be an-Israel-dulemarga be sunmaknaye.’ 16 Degisoggu, Amasías, Bab-Jehová-gayaburba be itoge:
”Bede soged:
‘Mer Bab-Jehová-ibmar-imakoedgi Israel-dulemarga gandikidgi sunmakoye.
Mer Bab-Jehová-gayaburbagi Isaac-waganga gandikidgi sunmakbaloye.’
17 ”Agala, Bab-Jehová weyob bega soged:
‘Be-ome neggweburgi ibmarbina na san-urmakdii guoed.
Be-masmala, degi, be-bunamala es-suidgi oburgwilegoed.
Be-napamar wilubsaar mimilegoed.
Degi, bedi, be-yargi burgosulid.
Israel-dulemardi e-yargi dikasuli gales seledmaloed.’ ”