1 Ascatan Diosin oinmati futsan arifi ahuun manuti chaan chaan acaino Diospan tsoara futsa nai muranshon mai ano nichian. Ascan fototan nan yoshin chacafo quininhuan faquish muran icafo ano caa. Nan quininhuan fupotiya. Ascan amurannoafocai ahuuscashu caintirofoma. Ascafia nan nai murannoa fotomana Diosin shafi inan quininhuan faquishi murannoa ato caimanon. 2 Ascashon ato cainmatanaino nan mai quininhuan murannoashu coinmahuanfoya nai muran foafo. Ascaino fari chashasharayoama. Nantio nai faquishcoin iyoa. 3 Ascatan nan coinmahuan murannoashu ocutsuru cuscarafo ichaparasi mai ano nichian. Diosin ato fasi pofucoin ima inapapia cuscara inonfo.

4-5 Ascashon ato yonoa isca huaquin, —Mai anoafo fasifo yafi fanafo non ihuifori chacana huayamacahuun. Ascan tsoan uhuun yorafoma aton fumananquiri uhuun anu nutamuafoma nanfo fusti man ato tucatiro. Ascafia ato rutuyamacahuun. Ato rututama mucu fustiti oshu man ato omitsiscahuatiroran, —ishon ato yonoa. Ascacun ato tucafoanno nan icoinra huamafo inapapia muutsa mucani fasi omitsiscafo.

6 Mucu fustiti oshu nanscara mucani nan icoinra huamafo tunuyamacaicani aafin napaiafo. Ascashon yoiqui isca huafo, —¡Ohuashta! Uncai tunutiroma. Un naafin shara itiroquin, —ishon yoiafo. Ascafia ahuuscashucai natirofoma.

7 Ascan natian nan ocutsurufo ahuu cuscaramainquin un mato tapimai. Caballo iquisi itishara huatirofo futsafo rutuifoshcaquin. Nanscarifiai nan ocutsurufo nan caballo cuscara ointsafo. Ato maiti oro cuscara sharashtacoin maiafo. Aton fusorifi nan nocofunun fuso ointsa. 8 Aton foo ainfoan foo ointsa ato shutarifi masharonun shuta ointsa icain 9 Aton shochi ano cuno ointsaton shofucumuafo ahuaraton ato tsacapaiyaino amuran iquinonma. Ascashon aton putao pua puaiquin achacoin nan caballofoan ahuun taramuti tarafoaino futsafoya rutunain nicatsa. 10 Ascatan nantifi tsitsisiyafo. Naanton yorafo chachiano isin mutiro inapapia mutsa. Ascashon ato tsitsisinin yorafo omitsisca huatiro. Mucu fustiti oshu ato isinmumatiro. 11 Nan quininhuan faquish muran yoshin chacafo icafoan aton niaifoan ahuun anu Israeli tsainman Abadón. Griego tsainmanri ahuun anu Apolión. Onicoinnin tsainman yorafo rutumisi.

12 Ascan man chaca finonquin tau huaa. Ascan nan rafu nocoataima.

13 Ascatan Diosin oinmati afu ica futsan ahuun manuti chaan chaan acaino. Anoshon Dios cufiti acamaqui nan rafu non rafuri moi masho ointsa oro sharashtacoin nan nushmancayanoa oi un nica. Cufimisifo ano un oi nica. 14 Nan oin Diosin oinmati afu icaton manuti tsoma yoiaiton un nica isca huaquin, —Nan rafu non rafuri yoshin chacafo Upa Diosin ato munushua nan unu uhuapa ahuun anu Eufrates anoa ato muputahuun fononfo, —ishon yoia. 15 Nanno nan yoshin chaca rafu non rafuri afin itisharamisifo. Ascan rato hora yafi rato shafatan non rato oshu non rato farimain ato caimanaitian atirifi yora mai anoafo la tercera yorafo ato rutushcani. 16 Ascashon un nica yorahuanrasi dos cientos millones ranushumuafo caballo camaqui tsaoafo futsafo rutui foshcaquin.

17 Ascatan Upa Diosin ua ismani nan ranushumuafo yafi ato caballofo un oian iscara, Nan caballo camaqui tsaoafoan aton shochi nan chii rucun cuscara cuno oshin shara non tonancoin non chashnanpan shofucumuafo. Ascan nan caballofoan aton mapo masharo mapo ointsa. Aton ashfan murannoashu coin yafi chii uruaino azufre ashfacanun siiquin. 18 Nanfoan yora ichaparasi man namafo. La tercera manifoti man ato namafo. 19 Aton ashfa futan ato inan yorafo rututiro. Aton ina nan rono paupaton ina cuscarafo. Nanfoan yorafo omitsisca huafo nanonfo.

20 Atirificai afohuunoashu nayamafiacani aton chaca shatuafoma Upa Dios tanashcaquin. Ascatamarocon yoshin chacafo tanamisifo cuscan shatuyamafain oro iyamarai cuno oshopa sharashta non cuno futsan ahuun anu bronce non toquiri non ihuirifi ramihuafo. Ascafia nanfoancai ahua oinyamafain nicatirofoma raquiri cahuascatirofoma, —Naan nocon Dios. Non ahuun noiran, —ishon yoimisifo cuscan shatuafoma. 21 Ascashon chaca futsa futsatapafo huamisifo cuscan shatuafoma. Rutumitsamisifo cuscari shatuyamafain shointian cuscan shatuyamafain nocofunufo aton ahuinma fu imisifo cuscan shatuyamafain ainfofori nanscarifiaifono. Onumisifo cuscari shatuafoma. Ascashu nanfo chacacoinfiashon tsoan aton chaca shatuafoma nocon Ifo Jesucristo tanasharashcaquin.