1 Ascatan un oian Diosin ahuun oinmati afu ica futsa mutsisipacoin nai murannoashu fotoaiton. Coin camaqui fotoaiton ahuun caya un oian iscara. Maiti nanhuanfai ointsa maia. Ahuun fuso fasi chashacoian fari ointsa. Ahuun quishi rafu chi ointsari. 2 Ascashon papel uhuapama cunua sufia tonoshon tsoma. Ahuun tau mumiori ununhuan fumancayan paicain ahuun tau mushquiori mai ano paia. 3 Ascatan oi ashcafinin cuna nan masharo uhuapaton ahuun oi nicatsa. Ascaiton nan siete turuica curushcain oi uhuapaton futsan cuma. 4 Ascacun nan yoiafo cuscan nicashon un cunucuana. Ascafia nai ari Dios icarishon oi futsan ua yoiqui isca huaa, —Min rama nica cuscan cunuyamahuu. Aton tsain tsoa tapimayamahuu, —ishon ua yoia.

5-7 Ascatan Diosin ahuun oinmati afu nai muran icaton mutsisipacoin unuhuan yafi mai ano paishon ahuun mucu mumiori mushainacahuan yoia isca huaquin, —Upa Diosin nipanacaton nai yafi nantifi nai muran icafo onihuafain mai yafi mai anoafo onihuafain ununhuan yafi unuhuan muran icafori onihuani. Nanhuunshon un yoiquin isca huai, Upa Diosicai afanan ato manaima. Ahuun yoishomisifo tapimapaoni cuscacai futsafoan tapipaonifoma. Ascafia natian Diospan oinmati afu ica futsan ahuun unutaqui manuti chaan chaancaino ato tapimayoni cuscan nantifi nanscacoinshquinran, —ishon Diosin oinmatinin ua yoia.

8 Ascan nan oi nai murannoa un nicaton afanan ua yoia isca huaquin, —Nan Diosin oinmati afu ica unuhuan yafi mai ano nia. Nanno aqui catahuun. Ascashon nan papel sufia tonoshon tsoma fianhuun, —ishon ua yoia.

9 Ascan cashon Diosin oinmatiqui nocoshon un yoia, —Nan papel sufia uhuapamashta ua inanhuun, —un huaiton. —Fihuu. Ascashon pihuu. Piqui min mui min ashfa muran fata sharacoin fona cuscara. Ascan man shuashon min mui min shaqui murannoashu mocacoin iquin. Ascashon min tapitiro Diosin tsain shara iconcoin. Ascatari min tapitiro nan tsain yoia cuscacoin yorafo omitsiscashcani. Mirifi min tapiaino min fasi shinantiroran, —ishon ua yoia.

10 Ascacun un papel sufia uhuapamashta fitan un pishon uhuun ashfa muran un mua fata shara fona mutsa. Ascafiacun un shuashon uhuun shaqui muran un mua mocacoin. Nanscarifiai ua yoia cuscan huafain ua isma cuscari uhuun nomuran un nanuashu un unimacoinna. Ascafia nan tsain inon pacoai yoia cuscan yorafo omitsiscashcani. Nan oinquin un fasi shinan. 11 Un asca huano afanan ua yoia, —Diosin ahuun yorafo yoipaiyai cuscan afanan ato yoihuu. Ahuarafo iishquiai cuscan yorafohuunoa yoifain manifotihuunoa yoifain niaifofohuunoari ato yoihuu, —ishon ua yoia.