1 आं लोक्‍बपुकी, इन कली शेंदुनु, परमप्रभु यावे आ सोक्‍तीम ब्रीशो मुर खोदेंशो पा शेंने मचबु। मारदे हना रागी ङा मुर खोदेंशो पा, ख्रीस्‍त कली थमा सुइक्‍तीकेमी आल खोदेंशो बाक्‍नीनी। यूहन्‍ना १६:१२ 2 गो इन कली खमे मगेथु, दूध तुंइताक्‍न्‍नी। मिनु मुल सम्‍म यो दूध तुंइना तुंइन वोइक्‍तन्‍नी। १पत्रुस २:२ 3 गे मुल सम्‍म रागी ङा मुर खोदेंशो बाक्‍नीनी। गे जीनीनी, रुश पाइनीनी। मिनु रागी ङा मुर खोदेंशो मदुम्‍नी ङा? १कोरिन्‍थी १:१०-११; १कोरिन्‍थी ११:१८ 4 का निक्‍शीमी “गो पावल आ नोले खोइक्‍ब नकी” का निक्‍शीमी चहिं “गो आपोल्‍लोस आ नोले खोइक्‍ब नकी” दे जिना जिन बाक्‍तीनी। मोपतीके रागी ङा मुर खोदेंशो मदुम्‍नी ङा? १कोरिन्‍थी १:१२

5 आपोल्‍लोस माइश्‍शो सु में? गो पावल माइश्‍शो सु नङा? प्रभुमी आंस कली आ लोव़ शेंथ योव़शो नस्‍कु। गेपुकीमी आंस लोव़ नेंशा थमा सुइक्‍तीनी। 6 गो ख्रुम्‍ता आपोल्‍लोसमी ब्‍वाक्‍कु लुक्‍ताक्‍व। मिनु परमप्रभु यावेमी कोल्‍पाइक्‍तु। प्रेरित १८:२४-२८ 7 मोपतीके ख्रुम्‍ब ठेयब ममाइ, ब्‍वाक्‍कु लुक्‍ब यो ठेयब ममाइ। कोल्‍पाइक्‍ब, बारपाइक्‍ब परमप्रभु यावे ठेयब बाक्‍ब। 8 ख्रुम्‍ब नु ब्‍वाक्‍कु लुक्‍ब कांइचीक बाक्‍नीस। मिनु आंइ कली पपाइश्‍शो गेय दोदेंशो पा पका, मोदेंशो पा गाल्‍च ताइनीकी। १कोरिन्‍थी ४:५ 9 गे परमप्रभु यावे आ रू नु आ खिं ननी। गोपुकी चहिं मेको रूमी गेय पाइब नु मेको खिं सेल्‍ब नकी। मत्ती १३:२-९; एफिसी २:२० 10 परमप्रभु यावेमी आं कली रिम्‍शो दारशो खिं सेल्‍ब सेल्‍ती। मिनु आ देंशो टिशा, खिं ङा जग दोशा, बोल्‍यो पा वोइक्‍ता। मेको जग तारी अरुमी प्रोव़ना प्रोव़न लाइक्‍नीम। मेको प्रोव़बपुकीमी दोपा रिम्‍शो दुम्‍बा, मेको मिम्‍शा गेय पामेक्‍ल। 11 थमा जग येसु ख्रीस्‍त ला बाक्‍ब। आ क्‍येङा लाक्‍शा अरु मारेइ जग मबाक्‍ब। मिनु सुइमी अरु जग वोइक्‍ने मचाप्‍नीम। १पत्रुस २:४-६ 12 मेको जग तारी मार मार के खिं सेल्‍नीम देंशा हना, सुन, चांदी, हीरा मोती, शी, खिंवा नु नल के खिं सेल्‍नीम। मुल मार के सेल्‍शो बाक्‍बा मतांइसीब। 13 ख्रीस्‍तम निसाफ पची नाक्‍त मार के सेल्‍तेक्‍म हना यो, मीम हुम्‍शा कोव़ब। मारदे हना मेना ख्रीस्‍तमी आ लोव़ शेंब आन गेय दोदेंशो बाक्‍मे, मीम हुम्‍शा नाक्‍ब। १कोरिन्‍थी ४:५ 14 मेको जग तारी सेल्‍शो खिं लीत हना, सेल्‍बमी इनाम ताइब। 15 गेय मीम ग्रोइश्‍शा, पुलु दुम्‍शा लत हना, मेको मुर गेना हना यो ब्रोंइचा ताइब। तन्‍न इनाम मतथु, मारेइ मपाइश्‍शो दुम्‍शा बाक्‍चा माल्‍ब। 16 गे परमप्रभु यावे आ खिं ननी, दे मतुइक्‍नीनी? मिनु परमप्रभु यावे आ सोक्‍त इन आगाम बाक्‍ब, दे मतुइक्‍नीनी? १कोरिन्‍थी ६:१९; २कोरिन्‍थी ६:१६ 17 मिनु सुमी परमप्रभु यावे आ खिं ग्रांग्रा दिशो सेल्‍बा, परमप्रभु यावेमी मेको कली यो ग्रांग्रा दिशो सेल्‍ब। मारदे हना परमप्रभु यावे आ खिं परमप्रभु यावे के ला बाक्‍ब। मिनु मेको गे बाक्‍नीनी।

18 सुइमी आंम कली जोल मपांइसेक्‍ल। इन दातेमी सुइमी आंम कली जोक्‍ब तुइक्‍ब मिम्‍साक्‍व हना, मेको मूर्ख दुम्‍ल। मोपा ला जोक्‍ब तुइक्‍ब दुम्‍ने चाप्‍ब। प्रकाश ३:१७-१८ 19 एको रागी ङा जोक्‍तीक तुइक्‍तीक परमप्रभु यावे आ ङोंइती मूर्ख लोव़ बाक्‍ब। मार ब्रेक्‍शो बाक्‍ब देंशा हना “जोक्‍ब तुइक्‍बपुकी आंम आन जोक्‍तीक तुइक्‍तीक गेयमी आंम कली ग्‍याइक्‍पांइसीनीम” दे ब्रेक्‍शो बाक्‍ब। अय्‍युब ५:१३ 20 लेंशा “प्रभुमी एको रागी ङा जोक्‍ब तुइक्‍ब आन मिम्‍शो जाम्‍शा लाइब, दे तुइक्‍ब” दे यो ब्रेक्‍शो बाक्‍ब। भजन संग्रह ९४:११ 21 मोपतीके सुइमी मुर आन नें आ पर्बम ठेयब मलेम्‍मल। मारदे हना नेल्‍ल इन के बाक्‍नीम। 22 इन कली शेंब, गो पावल, आपोल्‍लोस, केफास नु रागी, ब्रोंइचा नु बेक्‍चा, मुल मार दुम्‍शो बाक्‍बा नु नोले मार दुम्‍बा, नेल्‍ल इन के बाक्‍नीम। 23 तन्‍न गे ख्रीस्‍त आ मुर बाक्‍नीनी। मिनु ख्रीस्‍त परमप्रभु यावे आ तौ बाक्‍ब। १कोरिन्‍थी ११:३