1 मिनु मुरपुकीमी गो शेंब, आंइ पर्बम मार मिम्‍चा माल्‍नीम देंशा हना, गो ख्रीस्‍त आ गेय पाइब नु परमप्रभु यावे आ ख्रुइश्‍शो लोव़ तुइक्‍पाइक्‍चा कली शेंब नकी। तीतस १:७ 2 मोदेंशो पा शेंबपुकी थमा सुइक्‍चा माल्‍शो मुर दुम्‍चा माल्‍नीम। लूका १२:४२ 3 गे नु अरु निसाफ पतीकेम आं कली नाक्‍तीनीनु, मेको नाक्‍शो मारेइ खोदेंशो ममिम्‍नुङ। गो आंमा यो मनाक्‍सीनुङ। 4 गो मारेइ मरिम्‍शो मपङ, दे मिम्‍नुङ। तन्‍न मतुइक्‍थु, पङा कों? आं कली निसाफ पाइब प्रभु बाक्‍ब। 5 मोपतीके प्रभु आ निसाफ पतीक नाक्‍त मजाक्‍म सम्‍म मुर आन कली मनाक्‍तीन। आ निसाफ नाक्‍ती जाक्‍मेनु, ख्रुइश्‍शा वोइश्‍शो लोव़ नेल्‍ल तुइक्‍पाइक्‍ब। छिङछिङम ख्रुइश्‍शो थुं ङा थोव़क नेल्‍ल छेङछेङम तांइसीनीम। मिनु परमप्रभु यावेमी मुर आन कली “गे रिम्‍शो पाइतीनी” देंब। १कोरिन्‍थी ३:८

6 आं लोक्‍बपुकी, गे परमप्रभु यावे आ लोव़ रिम्‍शो पा टिने चाप्‍नीनी, दे गो मेको नेल्‍ल पाइतक। गे “गो पावल आ शेंशो शेंसीब नङ” अरुमी “गो आपोल्‍लोस आ शेंशो शेंसीब नङ” दे ठेयब लेश्‍शा, इन नें मबोरपतीने। रोमी १२:३ 7 सुमी इन कली ठेयब सेल्‍नी? इन पशोमी ठेयब दुम्‍नी ङा? परमप्रभु यावे आ शिशी पशोमी कका ठेयब दुम्‍शो ननी। मिनु परमप्रभु यावे आ गेशोमी ठेयब लेत्‍चा दुम्‍बा ङा?

8 मुल गे इन माल्‍शो नेल्‍ल ताइतीनी। शुश क्‍येट थीब दुम्‍तीनी। शेंब, आंइ कली हिल्‍लो मपथु, मुर आन कली हुकुम पाइतीनी। गे रिम्‍शो हुकुम पाइतीनी हना, गो यो गे नु गेय पाइब दुम्‍शो, रिम्‍शो दुम वा। प्रकाश ३:१७; प्रकाश ३:२१ 9 परमप्रभु यावेमी आ सोइश्‍शो, आंइ कली मुर नेल्‍ल आन क्‍येङा आइक्‍च सेल्‍शा साइक्‍चा पुंइसीचा कली वोइक्‍तु, दे मिम्‍नुङ। मारदे हना रागी रागी ङा मुर नेल्‍ल नु परमप्रभु यावे आ स्‍वर्ग ङा गेय पाइबम आंइ कली कोव़ना कोव़न बाक्‍नीमी। रोमी ८:३६; हिब्रू १०:३३ 10 गो ख्रीस्‍त आ पर्बम मूर्ख दुम्‍तक। तन्‍न गे ख्रीस्‍त आ पतीकेमी जोक्‍ब तुइक्‍ब बाक्‍नीनी। गोपुकी मचाप्‍ब दुम्‍तक। गेपुकी चहिं बोल्‍यो बाक्‍नीनी। मुरपुकीमी इन कली मान पा ठेयब सेल्‍नीम। आंइ कली चहिं महिक्‍नीम। १कोरिन्‍थी ३:१८ 11 मुल यो जचा तूचा मतथु, मरिम्‍शो फेक्‍सीशा, श्‍येत जशा, आंइ बाक्‍तीक खिं यो मबाक्‍ब। २कोरिन्‍थी ११:२३-२७ 12 गो आंम गुइमी श्‍येत पा गेय पा बाक्‍तक। मुरपुकीमी आंइ कली शुक्‍शी लोव़ पामेनु, मेको आन कली आसीक गेतक। गिश खेदा पाम्‍तेक्‍म हना यो, फाल्‍शा बाक्‍तक। १कोरिन्‍थी ९:१५; प्रेरित १८:३; मत्ती ५:४४; रोमी १२:१४ 13 जिचा पोक्‍शा, गाइश्‍शा मरिम्‍शो पामेनु, गो मेको आन कली रिम्‍शो लोव़ पा, गारपाइक्‍नीकी। गोपुकी रागी ङा ग्रांग्रा दिचा ङा थोव़क खोदेंशो दुम्‍शा, नेल्‍ल क्‍येङा आइक्‍च महिक्‍सीशो मुर दुम्‍तक।

14 गो इन कली मुने तोक्‍चा कली एको मब्रेक्‍तु। गे आं दाक्‍शो तमी तौ इन कली रिम्‍शो अरेचा कली एको ब्रेक्‍ताक्‍ङ। 15 ख्रीस्‍त आ पर्बम अर्ती गेब शेंब मुर शुश बाक्‍मा माइ। तन्‍न इन आफ खोदेंशो मुर शुश मबाक्‍नीम। मारदे हना गो इन कली येसु ख्रीस्‍त आ ग्‍येरपाइक्‍ब लोव़ शेंशा, इन आफ दुम्‍ती। १कोरिन्‍थी ९:२; गलाती ४:१९ 16 मोपतीके गो इन कली अर्ती का गेनन्‍नी। आं पशो खोदेंशो पने। १कोरिन्‍थी ११:१ 17 मोपतीके गो प्रभु आ पशोमी, आ रिम्‍शो नु दाक्‍शो तौ तिमोथी इन बाक्‍तीके सोइक्‍ताक्‍ङ। मेकोमी गो ते ते मार मार लोव़ शेंदु, गो दोपा येसु ख्रीस्‍त आ लां खोदु, मेको नेल्‍ल इन कली शेंदल। प्रेरित १६:१-३ 18 मिनु इन दाते ङा का निक्‍शीमी “पावल मजाक्‍ब” दे ठेयब लेश्‍शो लोव़ पाम्‍तेक्‍म, दे लोव़ पशो नेंता। 19 तन्‍न प्रभुम इन कली ग्रुम्‍चा गेती हना, गो रीब पा जाक्‍नुङ। मेको ठेयब लेश्‍शो मजाक्‍ब देंब आन लोव़ ममाइ, मेको आन सक्ति बाक्‍म कों मबाक्‍म दे ला कोव़नुङ। 20 मारदे हना परमप्रभु यावे आ राज्‍य फू चुइश्‍शो ठेयब लोव़ रे पा मतांइसीब। सक्ति पाइश्‍शो गेय रे पा तांइसीब। १कोरिन्‍थी २:४ 21 गे मार पांइसीचा दाक्‍नीनी? कोक्‍केम हिंच कोंइशो खोदेंशो पा शेंदन्‍नी देय आं दाक्‍शो आल आन कली लेम्‍शो खोदेंशो ब्रोव़शो लोव़ पा शेंदन्‍नी? आमा मिम्‍शा देनीन। २कोरिन्‍थी १०:२