1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་དང་ཨ་རོན་དང་ནཱ་དབ་དང་ཨ་བི་ཧུ་དང་ཡེས་ར་ཨེལ་གྱི་རྒན་པོ་བདུན་ཅུ་དཀོན་མཆོག་ཡ་ཝཱེའི་མདུན་དུ་ཡར་ཤོག་དང་། རྒྱང་རིང་ནས་གུས་ཕྱག་ཕུལ་ཞིག 2 འོན་ཀྱང་མོ་ཤེ་གཅིག་པུ་དཀོན་མཆོག་ཡ་ཝཱེའི་ཉེ་སར་བཅར་ཆོག་ཅིང་། གཞན་དག་ཉེ་སར་ཡོང་མི་རུང་ལ། མི་རྣམས་ཀྱང་མོ་ཤེ་དང་མཉམ་དུ་ཡར་འོང་མི་རུང་ཞེས་གསུངས་སོ། །

3 མོ་ཤེ་ཡོང་ནས་དཀོན་མཆོག་ཡ་ཝཱེའི་བཀའ་དང་ཁྲིམས་སྲོལ་ཐམས་ཅད་མི་རྣམས་ལ་སྨྲས་པ་དང་། དེའི་ལན་དུ་མི་ཐམས་ཅད་ཁ་མཐུན་ཏེ་ན་རེ། དཀོན་མཆོག་ཡ་ཝཱེས་བཀའ་ཅི་བསྒོས་པ་བཞིན་དུ་ངེད་ཅག་གིས་བསྒྲུབ་པར་བྱ་ཞེས་སྨྲས། 4 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་བཀའ་ཐམས་ཅད་ཡི་གེར་བཀོད་ཅིང་། ཐོ་རངས་ཡར་ལངས་ཏེ་རི་འདབས་སུ་མཆོད་ཁྲི་ཞིག་བཞེངས་པ་དང་། ཡང་ཡེས་ར་ཨེལ་གྱི་ཚོ་པ་བཅུ་གཉིས་བཞིན་དུ་ཀ་བ་བཅུ་གཉིས་བསྒྲེངས་སོ། ། 5 ཡང་ཁོས་ཡེས་ར་ཨེལ་པའི་ཁྲོད་ཀྱི་གཞོན་ནུ་རྣམས་བཏང་བ་དང་། དེ་དག་གིས་སྦྱིན་སྲེག་རྣམས་ཕུལ་ཞིང་། གླང་ཐུག་རྣམས་བསད་ནས་ཞི་བདེའི་མཆོད་པ་རྣམས་དཀོན་མཆོག་ཡ་ཝཱེ་ལ་ཕུལ། 6 མོ་ཤེ་ཡིས་ཁྲག་གི་ཕྱེད་ཀ་གཞོང་པའི་ནང་དུ་བླུགས་ཤིང་། ཕྱེད་ཀ་མཆོད་ཁྲི་ལ་གཏོར་བའོ། ། 7 ཡང་ཞལ་ཆད་ཀྱི་གླེགས་བམ་བླངས་ནས་མི་རྣམས་ཀྱི་མདུན་ནས་བཀླགས་པ་དང་། ཁོ་རྣམས་ན་རེ། དཀོན་མཆོག་ཡ་ཝཱེས་བཀའ་ཅི་བསྒོས་པ་བཞིན་དུ་ངེད་ཅག་གིས་བྱེད་པ་དང་། བཀའ་ལ་མཉན་པར་བྱའོ་ཞེས་སྨྲས། 8 དེ་ནས་མོ་ཤེ་ཡིས་ཁྲག་དེ་བླངས་ནས་མི་རྣམས་ལ་གཏོར་ཅིང་འདི་ལྟར། ལྟོས་དང་། འདི་ནི་ཞལ་ཆད་ཀྱི་ཁྲག་ཡིན་ཏེ། དཀོན་མཆོག་ཡ་ཝཱེས་བཀའ་འདི་ཐམས་ཅད་བཞིན་ཁྱོད་རྣམས་ལ་མཛད་ཟིན་པའི་ཞལ་ཆད་ཀྱི་གཞི་འཛིན་ས་ཡིན་ཞེས་སྨྲས་སོ། །

9 དེ་ནས་མོ་ཤེ་དང་ཨ་རོན་དང་ནཱ་དབ་དང་ཨ་བི་ཧུ། དེ་མིན་ཡེས་ར་ཨེལ་གྱི་རྒན་པོ་བདུན་ཅུ་དང་བཅས་པ་ཡར་རི་ལ་འགོས་པ་དང་། 10 ཁོ་རྣམས་ཀྱིས་ཡེས་ར་ཨེལ་གྱི་དཀོན་མཆོག་མཇལ་ཞིང་། ཁོང་གི་ཞབས་འོག་ཏུ་ཨིནྡྲ་ནཱི་ལའི་རྡོ་གཅལ་ཞིག་བཏིངས་ཡོད་པ་དང་མཚུངས་ལ། དེ་ནི་དགུང་ཨ་སྔོན་བཞིན་གསལ་ཞིང་དྭངས་པ་ཞིག་ཡིན་འདུག 11 འོན་ཀྱང་ཁོང་གི་ཕྱག་གིས་ཡེས་ར་ཨེལ་པ་རྣམས་ཀྱི་འགོ་དཔོན་རྣམས་ལ་གནོད་མ་བསྐྱལ་ཞིང་། དེ་དག་གིས་དཀོན་མཆོག་མཇལ་བ་དང་བཟའ་བཏུང་སྤྱད་དོ། །

12 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་མི་རྣམས་ལ་ཁྲིད་སྟོན་བྱེད་པའི་ཆེད་དུ། བདག་གིས་རྡོ་ལེབ་རྣམས་ལ་བྲིས་པའི་བཀའ་ཁྲིམས་དང་བཀའ་ཁྱོད་ལ་གནང་ངེས་ཡིན་པས། ཁྱོད་རང་རི་མགོར་ངའི་དྲུང་དུ་ཤོག་ལ་འདི་གར་སྡོད་ཅིག་ཅེས་གསུངས་པ་ལ། 13 མོ་ཤེ་དང་ཁོའི་ཞབས་ཕྱི་ཡོ་ཤུ་ཨ་གཉིས་ཆས་ཏེ་དཀོན་མཆོག་གི་རི་ལ་འགོས། 14 མོ་ཤེ་ཡིས་རྒན་པོ་རྣམས་ལ་འདི་ལྟར། ངེད་གཉིས་ཕྱིར་ལོག་པའི་བར་དུ་ཁྱོད་ཅག་གིས་འདི་རུ་སྒུག་སྡོད་དང་། ཨ་རོན་དང་ཧུ་རཱ་གཉིས་ཁྱོད་ཅག་དང་མཉམ་དུ་ཡོད་པས། སུ་ལ་གྱོད་གཞི་ཡོད་ན། དེ་གཉིས་ཀྱི་གམ་དུ་འགྲོ་དགོས་ཞེས་བཀའ་གནང་། 15 མོ་ཤེ་རི་ལ་འགོ་སྐབས་རི་ནི་སྤྲིན་གྱིས་གཡོགས་ནས་འདུག 16 དེ་ནས་སི་ནཱ་རི་བོ་ལ་དཀོན་མཆོག་ཡ་ཝཱེའི་གཟི་བརྗིད་བཞུགས་པ་དང་། ཉིན་དྲུག་གི་རིང་ལ་སྤྲིན་གྱིས་རི་བོ་གཡོགས་ཤིང་། ཉིན་བདུན་པར་ཁོང་གིས་སྤྲིན་གྱི་དཀྱིལ་ནས་མོ་ཤེ་ལ་ཞལ་འབོད་གནང་། 17 ཡེས་ར་ཨེལ་པ་རྣམས་ཀྱི་མིག་ལམ་དུ་དཀོན་མཆོག་ཡ་ཝཱེའི་གཟི་བརྗིད་མངོན་པ་ནི་ཡོངས་རྫོགས་རྩ་མེད་གཏོང་བའི་མེ་ལྟར་དུ་རི་རྩེར་ཡོད་དོ། ། 18 དེ་ནས་མོ་ཤེ་སྤྲིན་གྱི་དཀྱིལ་དུ་ཞུགས་པ་དང་། རི་ལ་འགོས་ནས་ཉིན་ཞག་བཞི་བཅུའི་རིང་དེར་གནས་སོ། །