1 དེ་བས་ན། བདག་ཅག་དད་པའི་དབང་གིས་མི་རྣམ་དག་ཏུ་བརྩིས༌པས། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་འདུམ་འགྲིག་བྱུང་ངོ༌།། 2 ཡང་བདག་ཅག་ཁོང་ལ་བརྟེན་ནས་དད་པའི་དབང་གིས་ད་ལྟ་ཐུགས་རྗེའི་ནང་དུ་ལངས་ནས་སྡོད་ཅིང་། དགའ་དགའ་སྤྲོ་སྤྲོའི་ངང་དཀོན་མཆོག་གི་གཟི་བརྗིད་ལ་རེ་སྨོན་བྱེད༌པ་ཡིན། 3 དེ་ལས༌གཞན། དཀའ་སྡུག་ལ་ཕྲད་པའི་དུས་སུའང་དགའ་སྤྲོས་ཁེངས༌ཏེ། དཀའ་སྡུག་གི་དབང་གིས་བཟོད་པ་དང༌། 4 བཟོད་པའི་དབང་གིས་ཚོད་བགམ་ཐེག་ཐུབ་པ། ཚོད་བགམ་ཐེག་ཐུབ་པའི་དབང་གིས་རེ་བ་འབྱུང་བ་བཅས་ཡིན། 5 རེ་བ་ཡིས་ངོ་གནོང་བར་མི་བྱེད༌པ་བདག་ཅག་གིས་ཤེས་ཤིང་། དེ་ནི་བདག་ཅག་ལ་གནང་བའི་དམ་པའི་ཐུགས་ཉིད་ཀྱིས་དཀོན་མཆོག་གི་བྱམས་པ་བདག་ཅག་གི་སེམས་སུ་ལྷག་པར་བླུགས་པའི་ཕྱིར༌རོ།།

6 དེ་ཡང་བདག་ཅག་ཉམ་ཐག་པའི་དུས༌སུ། སྐྱབས་མགོན་མཱ་ཤི་ཀ་ནི་དུས་བཅད་ལྟར་སྡིག་ཅན་རྣམས་ཀྱི་དོན་དུ་སྐུ་གྲོངས༌པ་ཡིན་ནོ།། 7 སྤྱིར་མི་གཞུང་དྲང་གི་དོན་དུ་འཆི་བ་ཉུང་ཞིང་མི་བཟང་པོའི་དོན་དུ་འཆི་ཕོད་པ་ཡོད་སྲིད་མོད། 8 འོན་ཀྱང་སྐྱབས་མགོན་མཱ་ཤི་ཀ་ནི་བདག་ཅག་ད་དུང་སྡིག་ཅན་ཡིན་པའི་དུས༌སུ། བདག་ཅག་གི་དོན་དུ་སྐུ་གྲོངས༌པ་ཡིན། དེ་ལས་དཀོན་མཆོག་གིས་ཁོང་གི་བྱམས་པ་ནི་བདག་ཅག་ལ་མངོན་པར་མཛད༌དོ།།

9 ད་ལྟ་བདག་ཅག་ནི་སྐྱབས་མགོན་ཡེ་ཤུའི་སྐུ་ཁྲག་བརྒྱུད་ནས་མི་རྣམ་དག་ཏུ་བརྩིས་ཡོད༌པས། དེ་ལས་ལྷག་པར་ཁོང་ལ་བརྟེན་ནས་དཀོན་མཆོག་གི་ཐུགས་ཁྲོ་ལས་བདག་ཅག་ཐར་བར་འགྱུར་རོ།། 10 ཅིའི་ཕྱིར་ཞེ་ན། བདག་ཅག་དགྲ་བོ་ཡིན་པའི་དུས༌སུ། དཀོན་མཆོག་གི་སྲས་སྐུ་གྲོངས་པ་བརྒྱུད་ནས་དཀོན་མཆོག་དང་འདུམ་འགྲིག་བྱུང༌བས་ན། དེ་ལས་ལྷག་པར་ཁོང་ཉིད་སླར་གསོན་པ་ལ་བརྟེན་ནས་བདག་ཅག་ཐར་བར་མཛད་ངེས་ཡིན། 11 དེར་མ་ཟད། བདག་ཅག་ནི་རང་རེའི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་འདུམས་པ་དང་། ཡང་ཁོང་ཉིད་བརྒྱུད་ནས་བདག་ཅག་དཀོན་མཆོག་ལ་དགའ་མགུ་བྱུང་ངོ་།།

12 དེའི༌ཕྱིར། སྡིག་པ་ནི་མི་གཅིག་བརྒྱུད་ནས་འཇིག་རྟེན་འདིར་བྱུང་བ་དང་འཆི་བའང་སྡིག་པ་ལས་བྱུང་བ༌ལྟར། མི་ཐམས་ཅད་ཀྱིས་སྡིག་པ་བྱས་པའི་དབང་གིས་མི་ཀུན་ལ་འཆི་བ་བྱུང་ངོ༌།། 13 བཀའ་ཁྲིམས་མ་གནང་བའི་སྔོན་ལ་འཇིག་རྟེན་དུ་སྡིག་པ་ཡོད༌ནའང༌། བཀའ་ཁྲིམས་མེད་པའི་རྐྱེན་གྱིས་སྡིག་པའང་སྡིག་པ་རུ་མ༌བརྩིས་སོ།། 14 འོན༌ཀྱང༌། ཨ་དམ་ནས་མོ་ཤེའི་བར༌དུ། ཨ་དམ་ལྟ་བུའི་སྡིག་པ་མ་བྱས་པ་རྣམས་ཀྱང་འཆི་བའི་དབང་འོག་ཏུ་ལྷུང༌། ཨ་དམ་ནི་ཁོའི་རྗེས་སུ་ཕེབས་པར་འགྱུར་བ་དེ་ཉིད་ཀྱི་དཔེ་གཞི་ཡིན། 15 འོན༌ཀྱང༌། སྡིག་པ་ནི་ཐུགས་རྗེའི་གནང་སྦྱིན་དང་མི་མཚུངས༌པར། མི་གཅིག་གི་སྡིག་པའི་རྐྱེན་གྱིས་མི་ཐམས་ཅད་འཆི་བ་ཡིན༌ན། མི་གཅིག་སྟེ་ཡེ་ཤུ་མཱ་ཤི་ཀའི་ཐུགས་རྗེའི་དབང་གིས་དཀོན་མཆོག་གི་ཐུགས་རྗེ་དང་གནང་སྦྱིན་ནི་དེ་ལས་ལྷག་པར་མི་རྣམས་ལ་འཐོབ་པ་མ་ཡིན༌ནམ། 16 ཡང་གནང་སྦྱིན་ནི་མི་གཅིག་གི་སྡིག་པའི་འབྲས་བུ་དང་མི་འདྲ༌སྟེ། ཁྲིམས་ཐག་གཅོད་པ་ནི་མི་གཅིག་གི་རྐྱེན་གྱིས་ཉེས་ཆད་ཕོག་པ་ཡིན༌ལ། ཐུགས་རྗེའི་གནང་སྦྱིན་ནི་ཉེས་པ་མང་པོའི་ཁྲོད་ནས་བྱུང་ཞིང་མཇུག་མཐར་མི་རྣམ་དག་ཏུ་མཛད་པ་ཡིན་ནོ།། 17 ཡང་མི་གཅིག་གི་ཉེས་པའི་རྐྱེན་གྱིས་འཆི་བའི་དབང་འོག་ཏུ་ལྷུང༌ན། ཐུགས་རྗེ་ཆེན་པོ་དང་གནང་སྦྱིན་རྣམ་པར་དག་པ་ཐོབ་པ་རྣམས་ཀྱིས་དེ་ལས་ལྷག་པར་ཡེ་ཤུ་མཱ་ཤི་ཀ་ཁོ་ན་བརྒྱུད་ནས་ཚེ་སྲོག་ལ་དབང་བསྒྱུར༌བའོ།། 18 དེའི༌ཕྱིར། ཉེས་པ་ཐེངས་གཅིག་བྱས་པའི་རྐྱེན་གྱིས་མི་ཐམས་ཅད་ལ་ཉེས་ཆད་ཕོག་པ༌དང༌། དེ་བཞིན་དུ་སྤྱོད་བཟང་ཐེངས་གཅིག་གིས་མི་ཐམས་ཅད་རྣམ་དག་ཏུ་བརྩིས་ནས་ཚེ་སྲོག་ཐོབ་པ་ཡིན། 19 མི་གཅིག་གིས་བཀའ་མ་བརྩིས་པས་མི་མང་པོ་སྡིག་ཅན་དུ་གྱུར་པ༌དང༌། དེ་བཞིན༌དུ། མི་གཅིག་གིས་བཀའ་ལ་མཉན་པས་མི་མང་པོ་མི་རྣམ་དག་ཏུ་འགྱུར༌བ་ཡིན། 20 བཀའ་ཁྲིམས་ནི་ཉེས་པ་མང་དུ་མངོན་པའི་ཕྱིར་བསྣན་པ༌སྟེ། གང་ནས་སྡིག་པ་མང་དུ་མངོན་ན། ཐུགས་རྗེའང་དེ་ལས་མང༌དུ་མངོན་ནོ།། 21 དེའི་ཕྱིར། སྡིག་པས་དབང་བཟུང་སྟེ་མི་རྣམས་འཆི་རུ་བཅུག་པ༌དང༌། དེ་བཞིན་དུ་ཐུགས་རྗེས་ཀྱང་རྣམ་པར་དག་པ་བརྒྱུད་ནས་དབང་བཟུང༌ཞིང༌། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་མི་རྣམས་ལ་མཐའ་མེད་པའི་ཚེ་སྲོག་འཐོབ་པར་མཛད་པའོ།།