1 དེས་ན་ངེད་ཅག་གིས་ཅི་ཞིག༌སྨྲའམ། ཐུགས་རྗེ་སྔར་ལས་མང་དུ་འཐོབ་ཕྱིར་བདག་ཅག་ནི་སྔར་བཞིན་སྡིག་པའི་ནང་དུ་གནས་པར་བྱེད་དམ་ཞེ༌ན། 2 གཏན་ནས་མི་བྱེད༌དེ། བདག་ཅག་ནི་སྡིག་པའི་ཆ་ནས་ཤི་ཟིན་པ་ཡིན༌པས། སྔར་བཞིན་སྡིག་པའི་ནང་དུ་འཚོ་ག་ལ༌རུང་། 3 མཱ་ཤི་ཀ་ཡེ་ཤུའི་ནང་དུ་ཁྲུས་གསོལ་ལ་ཞུགས་མཁན་བདག་ཅག་ཐམས་ཅད་ནི། ཁོང་གི་སྐུ་གྲོངས་པའི་ཁྲུས་གསོལ་ལའང་ཞུགས་པ་ཁྱོད་ཅག་གིས་མི་ཤེས་སམ། 4 དེའི༌ཕྱིར། བདག་ཅག་ཁོང་གི་སྐུ་གྲོངས་པའི་ཁྲུས་གསོལ་བརྒྱུད་ནས་ཁོང་དང་མཉམ་དུ་དུར་ལ་བཅུག ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་ནི་ཡབ་ཀྱི་གཟི་བརྗིད་བརྒྱུད་ནས་སྐུ་གྲོངས་པ་ལས་སླར་གསོན་པ༌བཞིན། བདག་ཅག་གིས་ཀྱང་མི་ཚེ་གསར་པ་ཞིག་རོལ་དགོས་པའི་ཕྱིར་ཡིན། 5 གལ༌ཏེ། བདག་ཅག་ནི་ཁོང་ཉིད་སྐུ་གྲོངས་པ་དང་མཚུངས་པར་ཁོང་དང་མཉམ་འབྲེལ་བྱས་པ་ཡིན༌ན། ཁོང་ཉིད་སླར་གསོན་པ་དང་མཚུངས་པར་ཡང་ཁོང་དང་མཉམ་འབྲེལ་བྱེད་ངེས་ཡིན། 6 བདག་ཅག་སྡིག་པའི་བྲན་དུ་མི་ཚུད་པ་དང་སྡིག་པ་ཅན་གྱི་ལུས་པོ་དབང་མེད་པར་བཟོ་བའི༌ཕྱིར། རང་གཤིས་རྙིང་པ་ནི་ཁོང་དང་མཉམ་དུ་ཤིང་རྒྱ་གྲམ་གྱི་སྟེང་དུ་བརྡབས་ཟིན་པ་བདག་ཅག་གིས་ཤེས༌ཏེ། 7 ཤི་ཟིན་པ་རྣམས་སྡིག་པ་ལས་ཐར་བའི་ཕྱིར༌རོ།།

8 བདག་ཅག་སྐྱབས་མགོན་མཱ་ཤི་ཀ་དང་ལྷན་དུ་ཤི་བ་ཡིན༌པས་ན། ཁོང་དང་མཉམ་དུ་གསོན་པོར་གནས་པ་ལའང་ཡིད་ཆེས༌ཡོད། 9 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་སྐུ་གྲོངས་པ་ནས་སླར་གསོན་པ་ཡིན་པས། སླར་ཡང་སྐུ་གྲོངས་པར་མི་འགྱུར༌ཞིང༌། འཆི་བས་ཀྱང་ཡང་བསྐྱར་ཁོང་ལ་དབང་བསྒྱུར་མི་ནུས་པ་བདག་ཅག་གིས་ཤེས་པའི་ཕྱིར༌ཡིན། 10 ཁོང་ཉིད་སྐུ་གྲོངས་པ་ནི་སྡིག་པའི་ཕྱོགས་སུ་ཐེངས་གཅིག་ལ་སྐུ་གྲོངས་ཤིང་། ཁོང་ཉིད་སྐུ་གསོན་པོར་བཞུགས་པ་ནི་དཀོན་མཆོག་གི་ཕྱོགས་སུ་གནས་པ་ཡིན༌ནོ།།

11 དེ་ལྟར་ཁྱོད་ཅག་གིས་ཀྱང་སྡིག་པའི་ཕྱོགས་ནས་རང་ཉིད་ཤི་ཟིན་པར་བརྩི་དགོས་པ༌དང༌། དཀོན་མཆོག་གི་ཕྱོགས་ནས་ཁྱོད་ཅག་ནི་མཱ་ཤི་ཀ་ཡེ་ཤུའི་ནང་དུ་གནས་པས་རང་ཉིད་གསོན་པོ་ཡིན་པར་བརྩི་དགོས་སོ།། 12 དེའི༌ཕྱིར། ལུས་ཀྱི་འདོད་པའི་དབང་དུ་མི་འགྲོ་བའི་ཕྱིར། ཁྱོད་ཅག་གི་འཆི་བར་འགྱུར་བའི་ལུས་སྟེང་དུ་སྡིག་པས་གང་འདོད་དུ་དབང་མི་བསྒྱུར་བར༌གྱིས། 13 དྲང་བདེན་མིན་པའི་ལས་བྱེད་པ་ལ་ཁྱོད་ཅག་གི་ཡན་ལག་རྣམས་སྡིག་པའི་ཡོ་བྱད་དུ་མི་སྤྲོད༌པར། ཤི་ནས་སླར་གསོན་པ་ལྟར་རང་ཉིད་ནི་དཀོན་མཆོག་ལ་འབུལ་དགོས་པར་མ༌ཟད། ཡན་ལག་རྣམས་ཀྱང་དྲང་བདེན་གྱི་ལས་བྱེད་པའི་ཡོ་བྱད་དུ་དཀོན་མཆོག་ལ་འབུལ་དགོས། 14 རྒྱུ་མཚན་ནི་ཁྱོད་རྣམས་བཀའ་ཁྲིམས་ཀྱི་འོག་ཏུ་མི་འདུག་པར་ཐུགས་རྗེའི་འོག་ཏུ་ཡོད་པའི་རྐྱེན༌གྱིས། སྡིག་པས་ཁྱོད་རྣམས་ལ་དབང་བསྒྱུར་མི་ནུས་པའི་ཕྱིར༌རོ།།

15 དེས་ན་ཅི་ལྟར་ཡིན་ནམ། བདག་ཅག་ནི་ཐུགས་རྗེའི་འོག་ཏུ་ཡོད་པ༌ལས། བཀའ་ཁྲིམས་ཀྱི་འོག་ཏུ་མི་འདུག་པས་སྡིག་པ་བྱེད་རུང་ངམ་ཞེ༌ན། གཏན་ནས་མི་རུང༌སྟེ། 16 ཁྱོད་རྣམས་ཀྱིས་རང་ཉིད་གཡོག་པོ་བྱེད་པར་འབུལ༌ཞིང༌། སུ་ཡི་བཀའ་ལ་མཉན་ན་དེའི་གཡོག་པོ་ཡིན་པ་མི་ཤེས༌སམ། སྡིག་པའི་གཡོག་པོ་བྱས་ན་འཆི་བར་འགྱུར་བ༌དང༌། བཀའ་ལ་ཉན་པའི་གཡོག་པོ་བྱས་ན་མི་རྣམ་དག་ཏུ་འགྱུར༌བ་ཡིན་ནོ།། 17 སྔོན་ཆད་ཁྱོད་རྣམས་ནི་སྡིག་པའི་གཡོག་པོ་ཡིན༌ཡང༌། ད་ལྟ་ཁྱོད་ཅག་ལ་བསྟན་པའི་ཆོས་དེ་སེམས་གཏིང་ནས་ཁས་བླངས་པའི་རྐྱེན་གྱིས་དཀོན་མཆོག་ལ་བཀའ་དྲིན་ཞུ་བར༌བྱའོ།། 18 ཁྱོད་རྣམས་སྡིག་པ་ནས་ཐར་ཏེ་རྣམ་པར་དག་པའི་གཡོག་པོར་གྱུར༌པ་ཡིན། 19 ཁྱོད་ཅག་གི་ཤ་གཟུགས་ཀྱི་ཕུང་བོར་ནུས་ཤུགས་ཞན་པས། བདག་གིས་མིའི་བཤད་སྲོལ་ལྟར་ཁྱོད་ཅག་ལ་སྨྲ་བར་བྱ་སྟེ། ཁྱོད་ཅག་གིས་སྔོན་ཆད་རང་གི་ཡན་ལག་རྣམས་ཇི་ལྟར་མི་གཙང་བ༌དང༌། ཁྲིམས་མེད་ལུགས་མེད་ཀྱི་གཡོག་པོ་བྱེད་པར་སྤྲད་པས་ཁྲིམས་མེད་ལུགས་མེད་དུ་གྱུར་པ༌བཞིན། ད་ལྟ་དམ་པར་འགྱུར་བའི༌ཕྱིར། ཡང་རང་གི་ཡན་ལག་རྣམས་རྣམ་པར་དག་པའི་བྲན་གཡོག་ཏུ་ཕུལ༌ཞིག 20 ཅིའི་ཕྱིར་ཞེ་ན། ཁྱོད་རྣམས་སྡིག་པའི་བྲན་གཡོག་ཡིན་དུས། རྣམ་དག་གིས་གཅུན་པར་མཛད་མེད་དོ།། 21 དེས་ན་ད་ལྟ་ཁྱོད་ཅག་གིས་ངོ་ཚར་བརྩིས་པའི་དོན་རྣམས་མཐོང༌དུས། འབྲས་བུ་ཅི་ཡོད་ཅེ༌ན། དོན་དེ་དག་གི་མཇུག་འབྲས་ནི་འཆི་བ་ཡིན་ནོ།། 22 འོན༌ཀྱང༌། ད་ལྟ་ཁྱོད་རྣམས་སྡིག་པ་ལས་ཐར་ཞིང་དཀོན་མཆོག་གི་གཡོག་པོར་གྱུར༌པས། ཁྱོད་རྣམས་ལ་དམ་པར་འགྱུར་བའི་འབྲས་བུ་ཐོབ༌པ་དང་། དེའི་མཇུག་འབྲས་ནི་མཐའ་མེད་པའི་ཚེ་སྲོག་ཡིན་ནོ།། 23 དེས་ན་སྡིག་པའི་གླ་ཆ་འཆི་བ་ཡིན༌ཡང༌། དཀོན་མཆོག་གི་ཐུགས་རྗེའི་གནང་སྦྱིན་ནི་བདག་ཅག་གི་གཙོ་བོ་མཱ་ཤི་ཀ་ཡེ་ཤུའི་ནང་དུ་ཡོད༌པའི་མཐའ་མེད་པའི་ཚེ་སྲོག་དེ་ཡིན་ནོ།།