1 Sayile ná-konagi ɠɛni ga puusaʋagɔ (30), siɛgi zu é zeini la ga masagi. Kona ʋuunaanigɔ maazu felegɔ (42) ɠa é kɛɛni masadai zu, Izelayɛle unda.

2 Sayile yeeloni salaʋusu waasaʋagɔ (3 000) ʋa, Izelayɛle nuiti saama, nu waafelegɔi (2 000) yɛni koba Mikemase ta Ɓeetɛle ɠize yooi zu, mɔta waagilagi (1 000) ʋilɛni ná-doun zunui Zonatan ʋolu, ti li, ti zei Giɓea, Ɓɛnzamɛn yooi zu. Sayile nuɓusɛi mɔtaiti gaaɠaleni ma, ɛsɛ ge li ná-pɛlɛi wu.

3 Yeeta, Zonatan Filiseti nuiti ta-ɠɔɔlaɠai zoni, nii é ɠɛni Geeɓa. Naama wooi zeelini Filiseti nuiti ma. Sayile ɠɛni ti puʋugi vɛ Izelayɛle yooi zu ná pɛ, mazɔlɔɔ é ɠɛni bosu, é ɗa ɠɛ ma: «Kɛni Eɓulu nuiti pɛ ti suɠwɛɛ.» 4 Izelayɛle nuiti pɛ ti mɛnini ga Sayile Filiseti nuiti ta-ɠɔɔlaɠai zogɛ, naa maaʋele ma, Izelayɛle wɔinzeɠea Filiseti nuiti ma. Izelayɛle ɠɔɔʋɛbɛi pɛ ge ɠaalɛɛni ba Sayile ɠoba, Gilegale.

5 Filiseti nuiti ɓalaa, ti ta-ɠɔɔʋɛbɛi ɠaalɛɛni ba, ga ti kɔɔi ʋɛɛ Izelayɛle ʋa. Kɔɔɠɔ wotolo waasaʋagɔ (3 000) ɠa é ɠɛni ti ya, soo ɓizɛ zalaʋusu waadɔzita (6 000), salaʋusuiti ti mɔin, é ɠɛ kpoloɗɛi laaʋɛ ɲaɠaegi. Ti tɔnɔ ma ɠɔɔlaɠai ʋuuni Mikemase, folo ɠulazu ʋelei Ɓɛte-Avɛn letemaʋɛ. 6 Izelayɛle nuiti ti kaai ma ga faaɓaagi ɠa ti daawu, mazɔlɔɔ ti zili nuiti ti ti ɠatani, ti ɠɛni lɔɔɠuzu pugiti su, pɛtugiti su, zeɠeiti su, kɔtu yeɠeiti su, ta ziɛyeɠeiti su niiti ti zuvɔai. 7 Eɓulu nuiti saama, tanigaa ti Zuludɛn maaleʋesuʋɛ ɓudɛni, ga ti li, ti lɔɔɠu Gade ta Galaade yooi zu.

Naazu Sayile ɠɛni dɛ Gilegale, ná-kɔɔʋɛbɛi koba, ti ɗa ɓali ga dualuagi. 8 Folo lɔfela laawu, ti ɠɛni Samiyɛle ɓɔunsu, mazɔlɔɔ é boni ga toɠa ʋaazu. Kɛlɛ é la ɠɛni dɛ ʋaani Gilegale, kɔɔɠɔ nuiti ti tɔɔzeini ga ti ɗa vaza, ti ɗa zeɠe Sayile ɠoba.

9 Sayile ɠɛni ti ma: «À ʋa ga zalaɠa loganiiti pɔ̀, gala zalaɠaiti, ta ziilɛi zalaɠaiti.» Tɔ ɓɔɠɔi é gala zalaɠai ɠulani. 10 Kpesuʋɛ ga kula, Samiyɛle ɗa zeeli ná. Sayile liini, é daaɠomi, é tuʋɔ.

11 Samiyɛle ɠɛni ma: «Lee ɠa è kɛai?»

Sayile gooɠaaʋoteni, é ɠɛ ma: «Siɛgi zu gè kaa la, ga nà-kɔɔɠɔ nuiti ta ta zeɠe kòba, ɗa ma, è la ʋaani fala toligi ma, nii bogai, Filiseti nuiti ma gaalɛai na ba Mikemase, 12 gè ɠɛni ma: ‹Filiseti nuiti ta ʋaazu ti loo gi ma Gilegale, aisa gi ʋa Ɠɔoɠɔ GALAGI maanɛɛnɛ!› Naa ɠa é kɛa, gè ɠɛɛlala vaa ɠɛa, gè gala zalaɠai ɠula.»

13 Samiyɛle ɠɛni Sayile ma: «È ɠimalala vaa ɠɛɛʋɛ, è la ɠoloni devei naa ʋɛ, nii Ɠɔoɠɔ GALAGI, ɗa-ƓALAGI feai è ya. Ni è ná-devei zoni, é ɠɛa vaazu bu ɗa-ʋɛlɛyeɠei yɛ masadai zu eyɛsu ɠɔ, Izelayɛle unda. 14 Kɛlɛ tɛi è la ɠoloni Ɠɔoɠɔ GALAGI ná-deveiti bɛ, ɗa-masadai la yɛga ná ɠɔ. Ɠɔoɠɔ GALAGI devea ga é ziima nui ɠaiziɛ, é naa zei ná-nuɓusɛiti unda, Izelayɛle nuiti.»

15 Naa ʋoluma, Samiyɛle zeɠeni koba Gilegale, é li Giɓea, Ɓɛnzamɛn yooi zu. Sayile ná-kɔɔɠɔ nuiti gaaluni, niiti ti ɠɛni koba, ti ɠɛ ga nu undɔzita (600). 16 Sayile ta ná-doun zunui Zonatan, ta ta-ɠɔɔɠɔ nuiti, niiti ti ɠɛni ti ʋa Geeɓa, Ɓɛnzamɛn yooi zu, ti lopele ɓɛtɛni kɔɔɠɔ vai ma, naazu Filiseti nuiti ɓalaa, ti lopele ɓɛtɛa Mikemase. 17 Faa zuɠoloɠolo kɔɔʋɛbɛi ɠulani Filiseti nuiti ta-ɠɔɔlaɠai zu, ti ɠaaɠwɛ su ga saʋagɔ, ma mɔungiti ti Wɔfela ʋelei zoni, Suale yooi zu ʋele. 18 Felesiɛiti ti li ga Ɓɛte-Ɠɔlon ʋele, saʋasiɛiti ti li ga kwɛpelema ʋelei nii é liizu ga pɛtugi zu ʋele, nii daa ga Seɓɔyime ʋɛtugi, teʋebai ʋɔ pelei.

19 Naama ziɛgi zu, ɠain bo nu nɔpɛ ge la ɠɛni Izelayɛle yooi zu ná tanɔpɛ, mazɔlɔɔ Filiseti nuiti ti ɠɛni ma: «Ade pele ɓesa Eɓulu nuiti tuɠɔ, ga ti mina boɠa zɔkpɔ ɓaa kpɛɛn ɓɛtɛ ɓɔɠɔ ʋɛ.» 20 Kɛni, Izelayɛle nuiti pɛ ti ɓena li Filiseti nuiti pɔ bɛ, ga ti ta-wozawoli nikɛiti ta-ɠaliiti gaali, ta zoovɛiti, naa ʋɛɛ zeɠe wɔɔ ɠɔluiti ba, ta kɔtu wolo ɠɔluiti. 21 Siɛgi zu wozawoli nikɛiti ta-ɠaliiti, ta kɔtu wolo ɠɔluiti, ta gaazaʋa kɔluiti, ta zoovɛiti, ti-ɠaa a la zaana, ɓaa togani makɛ nuiti ta-ɠɔlu ɠaazoɓagi zokpai zɔle fai zu, kɛni ti li Filiseti nuiti pɔ bɛ.

22 Kɔɔɠɔ voloi zeeliai ma, boɠa zɔkpɔ nɔpɛ ge la nu nɔpɛ zea, anɛɛ kpɛɛin, kɛni Sayile ta Zonatanni nɔ ɠa ta ɠɛni ti ya.

23 Filiseti ɠɔɔʋɛbɛi gila ge ʋaani, é gize yɔɠɔzu ʋelei zo Mikemase ɠobaʋɛ.