1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Izelayɛle nuiti pɔ, è ɠɛ ti ma: Siɛgi zu nui ta kotoi ɠɛɛzu la, é la kɛɛni ga gaaɠilimai, Ɠɔoɠɔ GALAGI ná-devei ta laalɔɠɔma, é fai ta ɠɛ, nii maa la nɛɛni ga é ʋa ɠɛ, 3 ni zalaɠa ɠula nui ʋe, gulɔ ɲadegai ziaai ma, é nuɓusɛiti kɛ ga sɔba nu, ná-kotoi é kɛai naa maaʋele ma, toɠa nikɛ zinɛ ɓokpagi ɠula ga zalaɠai, nii nɛɛʋuzu la ba, Ɠɔoɠɔ GALAGI ʋɛ, é ɠɛ ga koto gba zalaɠai. 4 Toɠa ʋa ga nikɛ zinɛi GALA daaɠomi seɠe ʋɛlɛi laaʋɛ, Ɠɔoɠɔ GALAGI ɠaazu, é yeeʋɛɛ nikɛ zinɛi unmaʋɛ, é kɔdaaleʋe Ɠɔoɠɔ GALAGI ɠaazu. 5 Zalaɠa ɠula nui gulɔi ziaai ma, naa ɠa nikɛ zinɛi ma ɲamai ta zeɠe, é lii la GALA daaɠomi seɠe ʋɛlɛi wu, 6 toɠa yeeɓeɠai lɔ ɲamai wu, é ɲamai vaza daa ɠɛ lɔfela, seizu ɲadegai ma zeɠe zuɠooza golai letemaʋɛ, Ɠɔoɠɔ GALAGI ɠaazu. 7 Zalaɠa ɠula nui ɠa ɲamai ta ziɛ ani maku nɛɛnɛgiti ma zalaɠa ɠulazuʋɛ ma minɛiti ma, nii é Ɠɔoɠɔ GALAGI ɠaazu, GALA daaɠomi seɠe ʋɛlɛi wu. Toɠa nikɛ zinɛi ma ɲamai mɔtai ʋu ya gala zalaɠaiti kulazuʋɛ ɠɔɠɔaʋɛ, nii é GALA daaɠomi seɠe ʋɛlɛi laaʋɛ. 8 Toɠa koto gba nikɛ zinɛi ma wulɔi kpein kula: ma wulɔi felevelegai koozu zɔɔlaiti ma, ta nii kpein giliai ba, 9 ta ma lɔɠɔ felegɔiti, ta ma wulɔi felevelegai ti ma, é ʋɛɛzu ma zaamalɔkaeiti ma, ta ma mɔɔin ʋasuʋɛ, a kula ma lɔɠɔiti kobaʋɛ. 10 Zalaɠa ɠula nui ɠa tobazuʋɛ naati kula, eɠɛʋelei ti ɠulazu la ziilɛi zalaɠa nikɛ zinɛi ʋa, é ti ɠala, gala zalaɠaiti kulazuʋɛ. 11 Kɛlɛ nikɛ zinɛi ma ɠɔlɔi, ta ma zuai kpein, é ʋɛɛ nɔungi ʋa, ta kɔɠɔiti, ta ma ɠoozu zɔɔlaiti, ta ma ɓooiti, 12 woo zuɓuɠa su, nii kpein zɛgai ʋoluzu nikɛ zinɛi ʋa, toɠa li ga naa ti-ʋuuzuʋɛ ʋoluʋɛ, ada ɲadegai ta, zuʋu ʋilisuʋɛ, é gala abui ɠa, koʋii maazu. Toɠa gala zuʋu ʋilisuʋɛ.

13 «Ni Izelayɛle ʋɛbɛi kpein ka é kotoi ɠɛa, ti la gaaɠilini ma, ti la suɠwɛɛni, ti naa ɠɛ Ɠɔoɠɔ GALAGI ná-tɔgi taɠila daalɔɠɔma, fai nii ti maa la nɛɛni ga ti ʋa kɛ ɲɛgɛlɛin, ti ɓɔɠɔ ɠɛ ɠana ga sɔba nu, 14 kotoi ti kɛai, naa a ɠulana kɛlɛ zu, bɛbɛi ɠa nikɛ zinɛ ɓokpa gila kula ga koto gba zalaɠai, ta ʋaa la GALA daaɠomi seɠe ʋɛlɛi laaʋɛ. 15 Izelayɛle ɠɛwolaiti ta yeeʋɛɛ nikɛ zinɛi unmaʋɛ, ti kɔdaaleʋe Ɠɔoɠɔ GALAGI ɠaazu. 16 Zalaɠa ɠula nui nii gulɔi ziaai ma, naa ɠa li ga nikɛ zinɛi ma ɲamai ta GALA daaɠomi seɠe ʋɛlɛi wu, 17 toɠa yeeɓeɠai lɔ ɲamai wu, é faza, ná zeizu ɠɛ lɔfela Ɠɔoɠɔ GALAGI ɠaazu, seɠe zuɠooza golai letemaʋɛ. 18 Toɠa ɲamai ta ziɛ zalaɠa ɠulazuʋɛ ma minɛiti su, nii é Ɠɔoɠɔ GALAGI ɠaazu GALA daaɠomi seɠe ʋɛlɛi wu, ta toɠa ɲamai mɔtai ʋu ya gala zalaɠaiti kulazuʋɛ ɠɔɠɔaʋɛ, nii é GALA daaɠomi seɠe ʋɛlɛi laaʋɛ. 19 Toɠa nikɛ zinɛi ma wulɔi kpein kula, é gala, zalaɠa ɠulazuʋɛ. 20 Toɠa nikɛ zinɛi naa ɠɛ, eɠɛʋelei nɔ koto gba nikɛ zinɛi ɠɛɛzu la. Toɠa kɛ ɠana nɔ. Zekana zalaɠa ɠula nui a koto gba vai ɠɛ la ti ʋɛ, suvaa ɠa yɛ ti ʋɛ. 21 Toɠa li ga nikɛ zinɛi ti-ʋuuzuʋɛ ʋoluʋɛ, é gala, eɠɛʋelei é nikɛ zinɛ mɔungi ɠalani la. Koto gba zalaɠai ɠana bɛbɛi ná-faa zu.

22 «Siɛgi zu kundiɠii ta a kotoi ɠɛɛna la, é la gaaɠilini ma, é kɛ ná-GALAGI, Ɠɔoɠɔ GALAGI ná-devei ta laalɔɠɔma, é fai ta ɠɛ, nii maa la nɛɛni ga é ʋa ɠɛ, é ɓɔɠɔ ɠɛ ɠana ga sɔba nu, 23 a ná-kotoi ɠwɛɛna, nii é kɛai, toɠa boli zinɛi ɠula ga zalaɠai, nii nɛɛʋuzu la ba. 24 Toɠa yeeʋɛɛ boli zinɛi unmaʋɛ, é kɔdaaleʋe, gala zalaɠa loganiiti kɔdaaleʋezuʋɛ, Ɠɔoɠɔ GALAGI ɠaazu. Koto gba zalaɠai ʋe. 25 Zalaɠa ɠula nui ɠa koto gba zalaɠai ma ɲamai ta zeɠe ga yeeɓeɠai, é ta ziɛ gala zalaɠaiti kulazuʋɛ ma minɛiti ma, toɠa ɲamai mɔtai ʋu ya gala zalaɠaiti kulazuʋɛ ɠɔɠɔaʋɛ. 26 Toɠa ma wulɔi kpein gala zalaɠa ɠulazuʋɛ, eɠɛʋelei ziilɛi zalaɠai ma wulɔi la. Zekana zalaɠa ɠula nui a koto gba vai ɠɛ la kundiɠii naa ʋɛ, ná-kotoi vaa zu, suvaa ɠa yɛ bɛ.

27 «Ni nui ta ʋe, nuɓusɛiti saama, é kotoi ɠɛai, é la gaaɠilini ma, é naa ɠɛ Ɠɔoɠɔ GALAGI ná-tɔgiti ta laalɔɠɔma, é fai ta ɠɛ, nii maa la nɛɛni ga é ʋa ɠɛ ɲɛgɛlɛin, é ɓɔɠɔ ɠɛ ga sɔba nu ɠana, 28 a ná-kotoi ɠwɛɛna, é kɛai, toɠa boli zaai ɠula ga zalaɠai, nii nɛɛʋuzu la ba, kotoi vaa zu nii é kɛai. 29 Toɠa yeeʋɛɛ koto gba loganii unmaʋɛ, é kɔdaaleʋe, gala zalaɠa loganiiti kɔdaaleʋezuʋɛ. 30 Zalaɠa ɠula nui ɠa suai ma ɲamai ta zeɠe ga yeeɓeɠai, é ta ziɛ gala zalaɠaiti kulazuʋɛ ma minɛiti ma, é ɲamai mɔtai ʋu ya zalaɠa ɠulazuʋɛ ɠɔɠɔaʋɛ. 31 Toɠa ma wulɔi kpein kula, eɠɛʋelei ziilɛi zalaɠai ma wulɔi ɠulazu la, é gala, zalaɠa ɠulazuʋɛ, toɠa ɠɛ ga ani maku nɛɛnɛgi Ɠɔoɠɔ GALAGI ʋɛ. Zekana zalaɠa ɠula nui a koto gba vai ɠɛ la bɛ, suvaa ɠa yɛ bɛ.

32 «Ni sɔba nui a ʋaana ga baalagi ga koto gba zalaɠai, toɠa ɠɛ ga ma zaai, nii nɛɛʋuzu la ba. 33 Toɠa yeeʋɛɛ koto gba zalaɠa loganii unmaʋɛ, é kɔdaaleʋe, gala zalaɠa loganiiti kɔdaaleʋezuʋɛ. 34 Zalaɠa ɠula nui ɠa suai ma ɲamai ta zeɠe ga yeeɓeɠai, é ta ziɛ gala zalaɠaiti kulazuʋɛ ma minɛiti ma, é ɲamai mɔtai ʋu ya zalaɠa ɠulazuʋɛ ɠɔɠɔaʋɛ. 35 Zalaɠa ɠula nui ɠa ma wulɔi kpein kula, eɠɛʋelei ziilɛi zalaɠa ʋaala gulɔi ɠulazu la, é gala, zalaɠa ɠulazuʋɛ, naa ʋɛɛ gala zalaɠai zɔiti ba, ti ɠalazu Ɠɔoɠɔ GALAGI ʋɛ. Zekana zalaɠa ɠula nui a koto gba vai ɠɛ la zunui naa ʋɛ, ná-kotoi vaa zu é kɛai, suvaa ɠa yɛ bɛ.