1 «Ni nui ta a faa ɠaana, ɓaa é faa mɛni, naa ʋolu é toligi mɛni ga zeeleiti ti ʋa, kɛlɛ é la kɛɛni, nii é kwɛɛ, é ʋa naama zeele wooi wo, ná-faaɠaaza golai ma ɠasɔi ɠa la unma.

2 «Siɛgi zu nui ta vɔɔɠuzu la kɔzɔba anii ta ʋa, é la suɠwɛɛ, kɔzɔba zuai ta ma ʋoomai, é ɠɛni ga dɔɓɔ zua, ɓaa toganii ta, ɓaa kpokpo ganii, tɔ ɓɔɠɔi ɠa ɠɔzɔ, é ɠɛ ga sɔba nu.

3 «Ni a vɔɔɠuna nui ta ma zii nɔpɛ ba, kɔzɔai, nii a zoo tɔ ɓalaa kɔzɔzu, a suɠwɛɛna nɔ feya, toɠa ɠɛ ga sɔba nu názu.

4 «Ni nui ta a ɓɔɛna soleyai zu, é ɠona ga toɠa faa ɲɔu ɠɛɛzu ɓaa faa ʋagɔi, é la ɠidaani bu, a suɠwɛɛna nɔ feya, toɠa ɠɛ ga sɔba nu názu.

5 «Deɠɛmu, zɔi é ɠɛɛzu ga sɔba nu niima vaiti gila su, toɠa la zɔ ga ga ná-kotoi. 6 Naa ʋoluma ná-kotoi vaa zu é kɛai, toɠa ʋa ga baala saa ɠila ɓaa boli zaa ɠila, é ɠɛ ga koto gba zalaɠai, faazuɓɛtɛ vai zu Ɠɔoɠɔ GALAGI letema. Zekana zalaɠa ɠula nui a koto gba vai ɠɛ la bɛ, ná-kotoi vaa zu.

7 «Ni ani la nu ya, a baala saai zɔlɔɔ da, ɓaa boli zaai, ná-kotoi vaa zu é kɛai, toɠa ʋa ga kpumago felegɔ, ɓaa poopo kpokpa felegɔ, faazuɓɛtɛ vai zu Ɠɔoɠɔ GALAGI letema. Gilagi ɠɛ ga koto gba zalaɠai, zɔi ɠɛ ga gala zalaɠai. 8 Toɠa ʋa ga tiye zalaɠa ɠula nui ʋɔ, naa ɠa naa ɠula ga zalaɠai mɔunpa, nii maanɛai é ɠɛ ga koto gba zalaɠai. Zalaɠa ɠula nui ɠa kɔgi ʋee ga, kɛlɛ é mina nɔungi ɠula ga. 9 Toɠa ma ɲamai ta vaza zalaɠa ɠulazuʋɛ laamaʋɛ, é ɲamai mɔtai leda zalaɠa ɠulazuʋɛ ɠɔɠɔaʋɛ. Koto gba zalaɠai ʋe. 10 Toɠa zɔɔma wɔni ɠɛ ga gala zalaɠai, eɠɛʋelei deveai la tɔgi zu. Zekana zalaɠa ɠula nui a koto gba vai ɠɛ la zunui naa ʋɛ, ná-kotoi vaa zu é kɛai, suvaa ɠa yɛ bɛ.

11 «Ni ani la nu ya, nii a kpumago felegɔ zɔlɔɔ da, ɓaa poopo kpokpa felegɔ, toɠa ʋa ga vebɛanii ná-kotoi ma vaa zu, ga kilo saʋagɔ ɓulu vukɔ ʋagɔi zu. É mina gulɔ ʋu ma ɲɛgɛlɛin, ta é mina ani maku nɛɛnɛ pɛɛ ba ɓalaa, mazɔlɔɔ toɠa ga koto gba zalaɠai. 12 Toɠa ʋaa la zalaɠa ɠula nui ʋɔ. Zalaɠa ɠula nui ɠa zeeɲɛ gila seɠe ga ɠizɛsui, é gala, zalaɠa ɠulazuʋɛ, naa ʋɛɛ zalaɠai zɔiti ba, ti ɠalazu Ɠɔoɠɔ GALAGI ʋɛ. Koto gba zalaɠai ʋe. 13 Zekana zalaɠa ɠula nui a koto gba vai ɠɛ la zunui naa ʋɛ, ná-kotoi vaa zu é kɛai, é lo naama vaiti taɠila ba, suvaa ɠa yɛ bɛ. Nii a yɛ ʋoluzu, naa ɠa ɠɛ ga zalaɠa ɠula nui nɔnɔ, eɠɛʋelei a ɗa ɠɛ la ga vebɛanii ma zalaɠai.»

14 Ɠɔoɠɔ GALAGI ɓɔɛni Moize ʋɔ, é ɠɛ ma: 15 «Siɛgi zu nui ta ɠɛɛzu la ga ladalala nu, é kotoi ɠɛ, é la gaaɠilini ma, é makɛ aniiti ba ɓɔɠɔ ʋɛ, niiti ti veai Ɠɔoɠɔ GALAGI ʋɛ, toɠa baala sinɛi zeɠe, nii nɛɛʋuzu la ba, é kula ga faazuɓɛtɛ zalaɠai Ɠɔoɠɔ GALAGI ʋɛ, ná-kotoi vaa zu, eɠɛʋelei sɔngɔi la, é lo seizu ɲadegai ma wali vaiti kɛʋelei ʋa. Faazuɓɛtɛ zalaɠai ʋe. 16 Toɠa fe zalaɠa ɠula nui ya, é pɛɛ anii ná zeizu lɔɔlugɔi ɠilazuʋɛ ʋa, nii feai GALA bɛ. Zekana zalaɠa ɠula nui a koto gba vai ɠɛ la bɛ ga baala sinɛi, nii kulaai ga faazuɓɛtɛ zalaɠai, suvaa ɠa yɛ bɛ.

17 «Ni nui ta a koto ɠɛɛna, é la suɠwɛɛ, é naa ɠɛ Ɠɔoɠɔ GALAGI ná-devei gila daalɔɠɔma, fai niiti maa la nɛɛni, ti ʋa ɠɛ ɲɛgɛlɛin, toɠa ɓɔɠɔ ɠɛ ga sɔba nu, ná-faaɠaaza golai ma ɠasɔi ɠa la unma. 18 Toɠa ʋa ga baala sinɛi, nii nɛɛʋuzu la ba, é fe zalaɠa ɠula nu ya, ga faazuɓɛtɛ zalaɠai, é seɠe togani ɓulugi zaama, eɠɛʋelei sɔngɔi la. Zekana zalaɠa ɠula nui a koto gba vai ɠɛ la bɛ, ná-kotoi vaa zu é kɛai, é la suɠwɛɛ, suvaa ɠa yɛ bɛ. 19 Faazuɓɛtɛ zalaɠai ʋe, zunui naa ɓɔɠɔ ɠɛɛni ɠiteɠite su ga sɔba nu Ɠɔoɠɔ GALAGI letemazu.»

20 Ɠɔoɠɔ GALAGI ɓɔɛni Moize ʋɔ, é ɠɛ ma: 21 «Siɛgi zu nui ta koto ɠɛɛzu la, é ɠɛ ga ladalala nu Ɠɔoɠɔ GALAGI letemazu, é zɛɛi wo seiɲɔɠɔi ma, kaliva ma vaa zu, anii é kalivaai ma ga é makɛ, anii unmaai, ɓaa ta ɠulaai su ga yaavai, 22 ɓaa é laamaɓa ga tooya anii ɠaa vai, ɓaa é zɛɛ ɠonai wo, é lo kotoi tanɔpɛ ba, nuɓusɛi a zoo kɛɛzu, 23 siɛgi zu a kotoi ɠɛɛna la ɠana, é ɓɔɠɔ ɠɛ ga sɔba nu, anii nii é unma, ɓaa é ta ɠula su ga yaavai, toɠa naa ʋotogi ve, ɓaa anii é ɠalivaani ma, ɓaa anii toai ya, é ka, 24 ɓaa anii-yo-anii nii é zɛɛ ɠonai wosu, é lo ba. Toɠa gaavɔnigai ve, é seizu lɔɔlusiɛi ɠilazuʋɛ ɠila pɛɛ ba, é teʋe anii kɛɛ nui ʋɔ, naama voloi nɔ ma, yeei é ná-faa zuɓɛtɛ zalaɠai ɠulazu la. 25 Toɠa ʋa zalaɠa ɠula nui ʋɔ ga ná-faa zuɓɛtɛ zalaɠai, ná-kotoi vaa zu, Ɠɔoɠɔ GALAGI ɠaazu, ga baala sinɛi nii nɛɛʋuzu la ba, é ɠula togani ɓulugi zu, eɠɛʋelei sɔngɔi la. 26 Zekana zalaɠa ɠula nui a koto gba vai ɠɛ la bɛ Ɠɔoɠɔ GALAGI ɠaazu, suvaa ɠa yɛ bɛ, é ɠɛni ga faaɠaazagi ma zii nɔpɛ, é ɓɔɠɔ ɠɛai su ga sɔba nu.»