1 Foloi lɔsaʋasiɛi ma, Moize Aalɔn ta ná-doun zunuiti tolini, ta Izelayɛle ɠɛwolaiti, 2 é ɠɛ Aalɔn ma: «Nikɛ yiʋo zinɛ ɠila seɠe koto gba zalaɠa vai zu, ta baala sinɛ ɠila gala zalaɠa vai zu, nɛɛʋuzu mina ɠɛ tanɔpɛ ba, è ti lo Ɠɔoɠɔ GALAGI ɠaazu. 3 Ɗa ɓɔɛ Izelayɛle nuiti pɔ, è ɠɛ ti ma: ‹À boli zinɛ ɠila seɠe koto gba zalaɠai vaa zu, ta nikɛ yiʋo ɠila, ta baala ziʋo ɠila, kona gila keleiti, nɛɛʋuzu mina ɠɛ ti ʋa, gala zalaɠai vaa zu, 4 ta nikɛ zinɛ ɠila, ta baala sinɛ ɠila ziilɛi zalaɠai vaa zu, naa ɠa a kɛ, ti ɠula ga zalaɠai Ɠɔoɠɔ GALAGI ɠaazu, ta vebɛanii, nii é ga ani vukɔi, gaayɔgai ga gulɔi. Mazɔlɔɔ za Ɠɔoɠɔ GALAGI ɠa ɠulazu kɛlɛma wo ʋɛ.› »

5 Nii Moize deveni, ti ʋaani ga naa GALA daaɠomi seɠe ʋɛlɛi laaʋɛ. Bɛbɛi kpein ge maaɓuɠani ná ʋa, ti lo Ɠɔoɠɔ GALAGI ɠaazu. 6 Moize ɠɛni ma: «Wa naa ɠɛ, nii Ɠɔoɠɔ GALAGI deveai, Ɠɔoɠɔ GALAGI ná-lɛbiyai ɠa ʋaazu ɠulazu kɛlɛma wo ʋɛ.» 7 Moize ɠɛni Aalɔn ma: «Maaɓuɠa zalaɠa ɠulazuʋɛ ʋa. Ɗa-ɠotoi gba zalaɠai ɠula, ta ɗa-ɠala zalaɠai, è koto gba vai ɠɛ ɓɔɠɔ ʋɛ, ta nuɓusɛiti bɛ. Nuɓusɛiti ta-vebɛanii ɠula, è koto gba vai ɠɛ ti ʋɛ, eɠɛʋelei Ɠɔoɠɔ GALAGI deveni la.»

8 Aalɔn maaɓuɠani zalaɠa ɠulazuʋɛ ʋa, é nikɛ yiʋoi ɠɔdaaleʋe tɔ ɓɔɠɔi ná-kotoi gba vai zu. 9 Aalɔn ná-doun zunuiti ti ɲamai veeni zea. É yeeɓeɠai lɔɔni ɲamai wu, é ta ziɛ zalaɠa ɠulazuʋɛ ma minɛiti ma. É ɲamai mɔtai ʋuuni ya zalaɠa ɠulazuʋɛ ɠɔɠɔaʋɛ. 10 É ma wulɔi ɠalani zalaɠa ɠulazuʋɛ, ta ma lɔɠɔiti, ta koto gba zalaɠa zuai ma mɔɔin ʋasuʋɛ, eɠɛʋelei Ɠɔoɠɔ GALAGI ma levei veeni la Moize ya. 11 Kɛlɛ é ma zuai ta ma ɠɔlɔgi ɠalani abui ɠa, ti-ʋuuzuʋɛ ʋoluʋɛ.

12 Aalɔn gala zalaɠa loganii ɠɔdaaleʋeni. Ná-doun zunuiti ti ɲamai veeni zea, é pili zalaɠa ɠulazuʋɛ ma, é ɠaku ma kpoloo. 13 Ti gala zalaɠai veeni zea, teʋeleʋeai, é ɓulukpulu, é ʋɛɛ ma ungi ʋa, é ti ɠala zalaɠa ɠulazuʋɛ. 14 É koozu zɔɔlaiti ta kɔɠɔiti gbani, é ti ɠala zalaɠa ɠulazuʋɛ, gala zalaɠai maazu.

15 Naa ʋolu, é nuɓusɛiti ta-zalaɠai ɠulani. É boli zinɛi zeɠeni nuɓusɛiti ta-ɠoto gba zalaɠai, é kɔdaaleʋe, é kula koto gba vai zu, eɠɛʋelei zalaɠa zua mɔungi ɠɛni la. 16 É gala zalaɠai ɠulani, eɠɛʋelei deveai la tɔgi zu. 17 É vebɛanii ɠulani, é zeeɲɛ gila seɠe su, é naa ɠala zalaɠa ɠulazuʋɛ. Naa la ɓɔni gala zalaɠai ʋa, nii kulaai sobui.

18 É nikɛ zinɛi ɠɔdaaleʋeni, ta baala sinɛi ga ziilɛi zalaɠai, nuɓusɛiti faa zu. Aalɔn ná-doun zunuiti ti ɲamai veeni zea, é pili zalaɠa ɠulazuʋɛ ma, é ɠaku ma kpoloo. 19 Ti nikɛ zinɛi ta baala sinɛi ma wulɔi veeni zea: ma wɔɔngi, ta ma wulɔi é koozu zɔɔlaiti maavelevelegai, ta ma lɔɠɔiti, ta ma mɔɔin ʋasuʋɛ. 20 Ti ma wulɔiti puuni ma ɠekegiti su, é ma wulɔi ɠala zalaɠa ɠulazuʋɛ. 21 Aalɔn ma ɠekegiti ta zeezazu ɓalai zeɠeni, é ti latɛɠɛ vai ma ʋoogi ɠɛ Ɠɔoɠɔ GALAGI ɠaazu, eɠɛʋelei Moize ma levei veeni la.

22 Aalɔn yeeiti tɛɛni geezu nuɓusɛiti pɔ pelei, é tuya loo ti ʋɛ. Kpegai ma ga koto gba zalaɠai ɠula, ta gala zalaɠai, naa ʋɛɛ ziilɛi zalaɠai ʋa, é zeɠeni zalaɠa ɠulazuʋɛ, é yei. 23 Moize ta Aalɔn ti lɛɛni GALA daaɠomi seɠe ʋɛlɛi wu. Siɛgi zu ti ɠulani la ná, ti tuya looni nuɓusɛiti bɛ. Ɠɔoɠɔ GALAGI ná-lɛbiyai ɠulani kɛlɛma nuɓusɛiti kpein bɛ. 24 Abui ɠulani Ɠɔoɠɔ GALAGI ʋɔ bɛ, é gala zalaɠai ɠala, ta ma wulɔiti, niiti ti ɠɛni zalaɠa ɠulazuʋɛ. Nuɓusɛiti kpein ti kaani. Ti kpeeiti tooni ga koozunɛɛi, ti nɔkɔ.