1 Aalɔn ná-doun zunuiti Nadaɓe ta Aɓiyu ti ta-ani maku nɛɛnɛ gala liɠiiti seɠeni, ti abulekaiti pu ti zu, ti ani maku nɛɛnɛgi ʋu maazu. Naazu ti ʋaani ga abu ɠiligi Ɠɔoɠɔ GALAGI ɠaazu, niigi GALA ge la ɠɛni ma leve veeni. 2 Gaamago nɔ, abui ɠulani Ɠɔoɠɔ GALAGI ʋɔ bɛ, é ti ɠala. Ti zaani Ɠɔoɠɔ GALAGI ɠakala.

3 Moize ɠɛni Aalɔn ma: «Naa ɠa Ɠɔoɠɔ GALAGI boni, siɛgi zu é ɠɛni la: ‹Niiti ti maaɓuɠazu bà, kɛni ti unfe nà-ɲadedai ma. Nà lɛbiyai zɔlɔɔ nuɓusɛiti kpein gaazu.› » Aalɔn maaɠɛni kpɔ.

4 Moize Mikayɛle lolini ta Ɛlesafan, Uziyɛle ná-doun zunuiti, nii é ga Aalɔn kɛɛɠɛ kɛɛɠɛloin, é ɠɛ ti ma: «À maaɓuɠa bà, wo wo-ɠɛɛlointi seɠe, wo li ga tiye ade-ʋuuzuʋɛ ʋoluʋɛ, wo ti maaɠooza seizu ɲadegai ʋa.» 5 Ti maaɓuɠani ba, ti ti zeɠe ta-zeɠewuzeɠeiti su, ti li ga tiye ti-ʋuuzuʋɛ ʋoluʋɛ, eɠɛʋelei Moize boni la.

6 Moize ɠɛni Aalɔn ma, ta Eleazaal, ta Itamaal, Aalɔn ná-doun zunuiti: «À mina wɔundeɠaiti zɛ yaɠaba, wo mina wa-zeɠeiti bali ga, saa wɔlɔ vai zu, naa ɠa a kɛ, wo mina za, wo ʋa GALA ná-ziiɠaawanai maaloli bɛbɛi kpein ma. À wo-ɠɛɛlointi Izelayɛle ʋɛlɛyeɠeiti kpein zɛ ná, ti wɔlɔ naati ta-vaa zu, niiti Ɠɔoɠɔ GALAGI ti ɠalaai ga abui, nii é gaazogai. 7 À mina zeɠe GALA daaɠomi seɠe ʋɛlɛi laaʋɛ, naa ɠa a kɛ wo mina za, mazɔlɔɔ Ɠɔoɠɔ GALAGI ná-siɛma wulɔ ɲadegai ɠa wo ma.» Ti naa ɠɛɛni, nii Moize bogai.

8 Ɠɔoɠɔ GALAGI ɓɔɛni Aalɔn ʋɔ, é ɠɛ ma: 9 «Mina dɔɔ ɓɔle, ɓaa kpɔleɓɔle ani nɔpɛ, nii a nu ɠaazulati, ɗa-o, è-loun zunuiti-yo, siɛgi zu wa ɠɛ lɛɛzu la GALA daaɠomi seɠe ʋɛlɛi wu, naa ɠa a kɛ wo mina za. Naa ɠa ɠɛ ga ɠɔoɠɔ tɔgi wo-mavofodaiti kpein bɛ. 10 Mazɔlɔɔ kɛni wo zoo zeeɠaaɠwɛɛzu ɠwɛɛsu ani ɲadegai ta ɲadetala gelei ʋa, ta nii kɔzɔai ta nii é la ɠɔzɔni. 11 À Izelayɛle nuiti kala ga tɔgi kpein, nii Ɠɔoɠɔ GALAGI feeni ti ya ga Moize maaʋele.»

12 Moize ɠɛni Aalɔn ma, ta doun zunu felegɔiti ti yɛni zea, Eleazaal ta Itamaal: «À vebɛanii mɔtai zeɠe, nii é la ɠalani abui ɠa Ɠɔoɠɔ GALAGI ɠaazu. À mi zalaɠa ɠulazuʋɛ ɠobaʋɛ, lɛʋɛ mina ɠɛ ba, mazɔlɔɔ ani ʋe ɲadegai. 13 Wa mi ada ɲadegai ta, naa ɠa é ga wo-laamiizuʋɛ, wa è-loun zunuiti, zalaɠa aniiti saama, ti ɠalazu abui ɠa Ɠɔoɠɔ GALAGI ɠaazu, mazɔlɔɔ devei ɠa naa, é veeni zèa. 14 Ma ɠekegi ta ma ɓalai niiti ti ɠula ga datɛɠɛ vai ma ʋoogi, wa naati mi ada ɲadegai ta, ɗa-o, è-loun zunuiti-yo, ta è-loun anzanuiti ti è ʋɔ bɛ, mazɔlɔɔ ti veeʋɛ wo ʋɛ, ga é leve ɗɔun è ʋɛ, wa è-loun zunuiti, Izelayɛle nuiti ta-yiilɛi zalaɠaiti su. 15 É ɠula gulɔiti polu, ti maanɛai ti ɠala, Izelayɛle nuiti ta ʋa ga ma ɠekegi ta ma ɓalai. Ti ɠulaai ma ga datɛɠɛ vai ma ʋoogi, ta ɠɛ ga ɗɔnɔ, wa è-loun zunuiti, ti è ʋa, ɠɔoɠɔ tɔgi ɠa ɠɛ ga ná, eɠɛʋelei Ɠɔoɠɔ GALAGI deveni la.»

16 Moize koto gba woli zinɛi ɠaiziɛni, kɛlɛ galaa ɠɛni de niina. É yiiɠaawanani naazu Eleazaal ma, ta Itamaal, Aalɔn ná-doun zunuiti ti yɛni ná, é ɠɛ ma: 17 «Leeni vaa zu wo la koto gba zalaɠa zuai miini ada ɲadegai ta? Toɠa ga anii gola ɲadegai, Ɠɔoɠɔ GALAGI feai wo ʋɛ, naa ɠa a kɛ wo bɛbɛi ná-faaɠaazagi zeɠe, naa ɠa a kɛ wo ná-kotoi gba bɛ Ɠɔoɠɔ GALAGI ɠaazu. 18 Wɛlɛ, wo la liini ga zalaɠa zuai ma ɲamai seizu ɲadegai ɠoozuʋɛ. Wo maanɛɛni, wo zalaɠai ma zuai mi ada ɲadegai ta, eɠɛʋelei gè ma levei veai la.» 19 Aalɔn ɠɛni Moize ma: «Wɛlɛ, ti ta-ɠoto gba zalaɠai ɠulaa za, ta ta-ɠala zalaɠai Ɠɔoɠɔ GALAGI ɠaazu. È suɠwɛɛni sɔ, nii kɛai ga ze. Ni za gè ɠɛa koto gba zalaɠai miini, naa a la ɠɛ ga faa ʋagɔ Ɠɔoɠɔ GALAGI ɠaazu ɓaa?» 20 Moize naama wooiti mɛnini, é yeezei ti wu.