1 Vaze ꞌahoga niḡa Korunelioꞌa Kaisarea neḡano radiunu. Aniꞌe Itali uti azaḡa rae huzeꞌeteꞌe ibito ziniro.* Ani uti azaḡa maḡa tiba (100) ibito ziniro. 2 Ani zu ane neo radiuꞌeteꞌe azaḡa niduꞌaꞌe Badiꞌa zamareꞌeteꞌe zu gubaneꞌeteꞌe azaḡa. Aniꞌe Iuda azaḡa, toheꞌa ferezeꞌeteꞌe azaḡa borofe danazido, ebu iḡaiḡa Badiꞌa mazao kuraudo. 3 Ḡorava ꞌahogano mada uḡidu (3 koroko) zamaḡano, iḡunuꞌeteꞌe teigiro. Eꞌe zamaḡano Badiꞌa tuḡure vigaꞌa ane mazao fureraꞌ ovaroga faifaine horoniro. Ebu tuḡure vigaꞌa, “Korunelio!” rae huniro. 4 Korunelio ani ḡiḡaroneꞌenaꞌa, ḡiane runiro. Ebu ḡadimaro, raenaꞌa, “Zuhiꞌa Boro, ḡa nougeꞌohe?”

Aneruꞌa naenaeninaꞌa, “Ḡa kuru zu ḡahugoneꞌe Badiꞌaꞌa horonadu, zamare radiuꞌohe. 5 Izidi ꞌada vaze nu Iopa neḡano tuḡuzoꞌi, vaze ꞌahoga niḡa Simona zamahanoga veize. Niḡa ꞌahogaꞌe Petero rae huneꞌohe. 6 Aniꞌe vaze ꞌahoga, niḡa Simona, eꞌe neo radiuꞌohe. Simonaꞌe boromakau ogaḡa ḡuhadu faineꞌeteꞌe vazeḡa. Ani neꞌe davara genaḡano.”

7 Ani ḡoreniroteꞌe aneruḡa ꞌai barirotene, Korunelio ani, ane tuḡure vazeḡa aheu zu ane uti vazeḡa ꞌahoga ane tuḡure haḡaeꞌeteꞌe huze onairo. Uti vazeḡa aꞌaꞌe Badiꞌa zamareꞌeteꞌe vazeḡa. 8 Korunelio ani, ane mazao fureraroteꞌe niduꞌa ihoziro, ebu Iopa neḡano tuḡuziro.

9 Ze oname iraradu madai mone reirotene, Korunelioꞌa tuḡuziroteꞌe azaḡaꞌe Iopa neḡa hanitiro. Eꞌe zamaḡano Petero ani, kuranoga rae ne binuḡa sebaḡa itiro.† Zeḡe neꞌe binuꞌe funu oꞌoꞌa, rehano raha hina sebaḡa haḡaido. 10 Ebu kurauꞌenogano vininiro ꞌahine, ogatihi reiro. Ebu vazeꞌa ogomu ꞌize ruhineꞌeteꞌe zamaḡano, Petero ani iḡunuꞌeteꞌe teigiro. 11 Eꞌe zamaḡano adureꞌa bohatanoga horoniro, ebu dabua rafaḡa boro bagaḡa heuḡaniꞌe ariḡa ḡazaḡano obonadu raha none ovoe dabaneꞌenoga horoniro. 12 Eꞌe raganoꞌe odaḡa ḡazaḡa maniḡa nunu niduꞌa, dareꞌeteꞌe avazo heuḡa nunu, zu adure niniḡa nunu ḡehaḡa horoniro. 13 Ebu ago ꞌahoga igiro, raenaꞌa, “Petero, iḡunoꞌi! Eꞌe manadu anoꞌi!” 14 Rehano Peteroꞌa naenaeninaꞌa, “Zuhiꞌa Boro, a mene hune zu idaḡa. Eꞌe Iuda azaḡa goro ḡoeꞌa zamaḡano mene deheḡa ga sauꞌa rae huneꞌeteꞌe bonariḡaꞌe mene au onaido.” 15 Bare hena ago igiro, raenaꞌa, “Badiꞌaꞌa dehenateꞌe bonariḡaꞌe mene deheḡa rae ago roꞌi!” 16 Eꞌe haḡaiḡaniꞌe ḡae uḡidu fureraro. Eꞌe ḡarugano dabua rafaḡaꞌe zogone adure ḡoha bare itiro.

17 Peteroꞌa horoniroteꞌe hugaꞌe nagini rae zamare ꞌadaꞌadinuteꞌe zamaḡano, Korunelioꞌa tuḡuziroteꞌe azaḡaniꞌe Simona ne vaḡeꞌenaꞌa, ibihetaḡano edaro. 18 Ze huau ḡadimuꞌenaꞌa, “Vaze niḡa Simona, niḡa ꞌahoga Petero rae huneꞌeteꞌe, ani ꞌahama radiuꞌe hehe?” 19 Petero ani, horoniroteꞌe hugaꞌe nagini rae ꞌize zamare radiuꞌenogano, Vine Zaḡoḡaniꞌa Petero niro, raenaꞌa, “Ḡianoꞌi, Simona! Vaze uḡiduꞌa ḡa vaḡeꞌohe. 20 Iḡunadu ne zamaḡa diuḡiꞌ ovoroꞌi! Ago zamare ꞌadaꞌadoꞌi, rehano zeḡe teite onamoꞌi, mazaḡa eḡeꞌa tuḡuzeha.”

21 Petero ani ovoadu, vaze uḡidu ziro, raenaꞌa, “Zaeꞌa vaḡeꞌeteꞌe vazeḡaꞌe eḡe. Za nougadu onaeha?” 22 Zeḡeꞌa naenaeninaꞌa, “Emeꞌe vaze ꞌahoga, niḡa Korunelio, aneꞌa tuḡufadu onaeha. Aniꞌe Itali uti azaḡa ibito ziniꞌeteꞌe vazeḡa. Ani vaze duduḡa zu Badiꞌa gubaneꞌeteꞌe vazeḡa. Iuda azaḡa niduꞌa ani niguneꞌohe. Ebu tuḡure viga zaḡoḡaniꞌa Korunelio niro, raenaꞌa, 'Vaze ꞌahoga niḡa Petero, ani ḡae ne zamahu aroꞌi, aneꞌa nouge reiteꞌe igifine.' ” 23 Eꞌanoꞌo Petero ani vaze uḡidu ne zamaḡano mae zouzadu, eꞌea baziro.

Irarirotene, Peteroꞌe zeḡe teite iḡuniro. Ebu Zuhiꞌa Boro mazao fieꞌeteꞌe azaḡa nu zuni Iopa neḡanonoꞌo ane teite onamiro. 24 Ebu oname ohereranadu, bare irarirotene, ḡorava moneo Kaisarea neḡano feuriro. U Korunelio ani, nabuga zu ane vaze manoḡa manoḡa huze nuꞌozadu, guhiu radiunu. 25 Peteroꞌa Korunelio neo diuḡirotene, Korunelio ani Petero teite hidadu, Petero odaḡa babaḡano ḡuḡureꞌenaꞌa matuꞌo haro. 26 Rehano Peteroꞌe “Korunelio, iḡunoꞌi!” raenaꞌa, ani mae ḡihiniro, ebu raenaꞌa, “Eḡe zu vaze tauḡi.”

27 Petero ani Korunelio teite ḡoereꞌenaꞌa ne zamaḡa diuḡiro, ebu vaze ḡehaḡaniꞌa nuꞌoranoga horoziro. 28 Ebu Peteroꞌa ziro, raenaꞌa, “Za Iuda azaḡa goro edeḡa. Emeꞌe Iuda mene azaḡa teite mene uniheꞌohe. Rehano Badiꞌaꞌa ihinaꞌa, 'Vaze ꞌahoga huneꞌenaꞌa, mene deheḡa ga sauꞌa rae mene reꞌuma.' 29 Eꞌanoꞌo ḡaeꞌa ḡoere tuḡuratene, mene hezaha rehano, onaeha. Eꞌanoꞌo e ḡadimuꞌohe. Nouga ꞌahine huheha?”

30 Korunelioꞌa naenaeninaꞌa, “Mada ḡazaḡa modateꞌea, ḡorava mone mada uḡidu zamaḡano (3 koroko) eꞌe nehe zamaḡano kuraunu. Eꞌe zamaḡano vaze ꞌahoganiꞌa eḡe zamao tabara edaro. Ani dabuaꞌe vazavazahoga. 31 Ebu aneꞌa raenaꞌa, 'Badiꞌaꞌe ḡae kuru iginu zu ḡahugoneḡo horoninu. 32 ꞌOugadu vaze nu Iopa neḡano tuḡuzoꞌi, ebu vaze ꞌahoga, niḡa Simona zamahanoꞌi! Niḡa ꞌahogaꞌe Petero. Aniꞌe vaze ꞌahoga, niḡa Simona, ane neo radiuꞌohe. Simonaꞌe boromakau ogaḡa ḡuhadu faineꞌeteꞌe vazeḡa. Ani neꞌe davara genaḡano.' 33 Eꞌanoꞌo e ḡarihe fase ḡae veize ḡoere tuḡureha, ebu ḡaeꞌa onaataꞌaꞌe manoḡa tauḡi. Eꞌanoꞌo emeḡe niduꞌa izidi Badiꞌa zama ꞌadao nuꞌoraneha, Zuhiꞌa Boroꞌa ḡaniroteꞌe ḡoeꞌa niduꞌa egoga veize.”

34 Ebu Petero ani ḡoere ḡadaheniro, raenaꞌa, “E izidi hubehune edereha. Badiꞌaꞌe Iuda azaḡa daꞌo mene mae ḡihizeꞌe rehano, vaze niduꞌa hune mae ḡihizeꞌohe. 35 Habaꞌa habaꞌa niduꞌa zamaḡano Badiꞌa gubaneꞌeteꞌe zu haḡai duduḡa haḡaeꞌeteꞌe azaḡaꞌe Badiꞌaꞌa mae ḡihizeꞌohe. 36 Zae edeḡa, Badiꞌaꞌa Isaraela azaḡa mazao hari manoḡa tuḡurirotaꞌaꞌe. Aꞌe Iesu Keriso-onoꞌo zama roḡeḡa meꞌuma hariḡa. Aniꞌe vaze niduꞌa Zuhiꞌa Boro. 37 Za edeḡa, ibite Ioane Babatisoꞌa harameꞌenaꞌa, 'Babatiso moꞌi!' reiro, zu eꞌe enogano Galilea habaꞌanonoꞌo onamo Iudea habaꞌa niduꞌa zamaḡano, naginiꞌa furerarotaꞌaꞌe. 38 Ebu Badiꞌaꞌa Iesu, Nazareta neḡa vazeḡa, Vine Zaḡoḡa zu gigiꞌa haro. Ebu ani ragaveꞌenaꞌa, gau manoḡa haḡao zinido, zu vine sauꞌaniꞌa ragano reiroteꞌe azaḡa niduꞌa faizido, mazaḡa Badiꞌaꞌe ane teite radiunu.

39 Iesuꞌa ꞌouge Iudea habaꞌa niduꞌa zamaḡano, zu Ierusalema neḡano haḡaidoteꞌe haḡaiḡa niduꞌa, eme horoniro. Ebu aniꞌe satauroneadu mau runiro. 40 Rehano aniꞌe Badiꞌaꞌa mada uḡidu zamaḡano bare ḡaboniro. Ebu vazeꞌa Iesu horonoga veize, Badiꞌaꞌa zeḡe mazao fureno ziniro. 41 Vaze niduꞌaꞌe mene horoniro rehano, aꞌe emeḡe zu Badiꞌaꞌa ohotiroteꞌe azaḡaniꞌa daꞌo. Ebu aneꞌa runeonoꞌo bare ḡabode iḡuniroteꞌe enogano emeꞌe ane teite ogau tiburaro. 42 Ebu Iesuꞌa tuḡufiro, vazevaze mazao haramoga. 'Iesuꞌe, ḡabone zu rune azaḡa kotazoga veize Badiꞌaꞌa ohoniroteꞌe rae furenoꞌi!' reiro. 43 Ebu peroveta azaḡa niduꞌaꞌa hariḡa ꞌahige rae fureneꞌohe. Iesu Keriso mazao fiine, eꞌe azaḡa niduꞌa Iesu nionoꞌo Badiꞌaꞌa zeḡe sauꞌa aḡutu modiꞌuma.”

44 Peteroꞌa ꞌize ḡoere eꞌe harame radiunuteꞌea, ḡoere igi radiunuteꞌe azaḡa niduꞌa mazao Vine Zaḡoḡaniꞌa ovairo. 45 U eꞌe zamaḡano Iuda azaḡa, Iesu mazao fieꞌeteꞌeꞌa Petero teite onaadu ehore radiunu. Zeꞌe ahiri rana iḡuri haḡairoteꞌe azaḡa. Zeḡeꞌa, Iuda mene azaḡa mazao zuni Badiꞌaꞌa Vine Zaḡoḡa ovoe beꞌunadu, irivaꞌozoga horonirotene, zaguzagaro, 46 mazaḡa Iuda mene azaḡaniꞌa ḡoere ꞌahoga ꞌahoga hina ḡoereꞌenoga zu Badiꞌa niguneꞌenoga igiro ꞌahine.‡ Iuda azaḡa ze ꞌane ahiri rana iḡuri oꞌoꞌa azaḡaꞌe Badiꞌaꞌa mene mae ḡihiziꞌuma rae zamariro. Iuda azaḡaꞌe ahirize rana iḡurizeta, u Iuda mene azaḡaꞌe iḡurize oꞌoꞌa.

Eꞌe horonirotene, Peteroꞌa raenaꞌa, 47 “Badiꞌaꞌa zeḡe mazao zuni Vine Zaḡoḡa tuḡuneha, emeḡe mazao tuḡuniroteꞌe teige. Eꞌanoꞌo eḡeꞌa zamareꞌetene, ꞌadi duḡuruꞌe iḡuꞌa oꞌoꞌa rehano bapatizo mouga idaḡa.” 48 Eꞌanoꞌo Peteroꞌa Korunelio duḡuru ziro, raenaꞌa, “Iesu Keriso niḡano bapatizo moꞌi!” Ebu eꞌe enogano zeḡeꞌa Petero uminiro, zeḡe teite mada nu radoga veize.