1 Iudea habaꞌa niduꞌa zamaḡano, apostolo azaḡa zu Zuhiꞌa Boro mone azaḡaniꞌa, Iuda mene azaḡa zuni Badiꞌa ḡoere mae ḡihiniroteꞌe igiro. 2 Eꞌanoꞌo Peteroꞌa Ierusalema neḡa itirotene, ahirize iḡurizeta azaḡa Iesu mazao fieꞌeteꞌeꞌa Petero roniro, 3 raenaꞌa, “Ḡaꞌe Iuda mene azaḡa ne onamadu, zeḡe teite ogau tiburaro. Zeꞌe ahirize rana iḡuri oꞌoꞌa azaḡa.”

4 Ebu Petero ani naginiꞌa fureraroteꞌe niduꞌa doḡoꞌani rae fureno ziniro, raenaꞌa, 5 “Eꞌe Iopa neḡano radadu, kurauꞌegano, iḡunuꞌeteꞌe teigiro, ebu dabua rafaḡa boro heuḡa ariḡa ḡazaḡano obonadu adureonoꞌo ovoe dabaniro, ebu eḡe uhiḡano reꞌ ovairoteꞌe horoniro. 6 Eḡeꞌa faine ḡianirotene, rahao odaḡa ḡazaḡa maniḡa nunu, agire maniḡa, dareꞌeteꞌe avazoḡa heuḡa zu adure niniḡa nunu ḡehaḡa horoniro. Aꞌe emeḡe, Iuda azaḡaniꞌa mene auꞌeteꞌe bonariḡa.

7 Ebu ago ꞌahoga igiro, raenaꞌa, 'Petero, iḡunoꞌi! Manadu anoꞌi!' 8 Ebu eḡeꞌa raenaꞌa, 'Zuhiꞌa Boro, a mene hune zu idaḡa! Eꞌe Iuda azaḡa goro ḡoeꞌa zamaḡano mene deheḡa ga sauꞌa raꞌe huneꞌeteꞌe bonariḡa eḡe hebeo mene au onaido.' 9 Rehano ago ꞌahoganiꞌa adureonoꞌo bare naenaehiro, raenaꞌa, 'Badiꞌaꞌa dehenateꞌe bonariḡaꞌe ufire rae ago roꞌi!' 10 Eꞌe haḡaiḡaniꞌe ḡae uḡidu fureraro. Eꞌe ḡarugano bone dabua rafaḡa zu eꞌe rana tiroteꞌe ḡauḡa niduꞌa adure ḡoha bare mae itiro.

11 ꞌOugiroteꞌe zamaḡano Kaisarea neḡanonoꞌo tuḡuziroteꞌe vazeḡa uḡiduꞌa eḡeꞌa radiroteꞌe neḡano feuriꞌ onairo. 12 Ebu Vine Zaḡoḡaniꞌa ihinaꞌa, 'Zeḡe teite onamoꞌi! Zeꞌe Iuda mene azaḡa rehano, ago zamare ꞌadaꞌadoꞌi!' Ebu Zuhiꞌa Boro mone azaḡa fuꞌo zu tiba fare (6) ꞌadaꞌa ḡatihenaꞌa, Kaisarea neḡa ovoiro. Ebu emeꞌe eḡe veize ḡoere tuḡuriroteꞌe vazeḡa neo feuradu diuḡiro. 13 Ebu eꞌe vazeḡaniꞌa ane neo tuḡure vigaꞌa nouge nouge fureraroteꞌe hariḡa rae furenofiro. Aneruꞌa ꞌahige rae niro, raenaꞌa, 'Iopa neḡano vaze nu tuḡuzoꞌi, ebu vaze ꞌahoga niḡa Simona zamahanoꞌi! Niḡa ꞌahogaꞌe Petero. 14 Aniꞌe hari ꞌahoga rae fureno ziniꞌuma, ebu ḡae zu ḡae neo radiuꞌeteꞌe azaḡa niduꞌaꞌe eꞌe egadu ḡabone hidiꞌuma.'

15 Ebu eḡeꞌa ḡoere ḡadahirotene, Vine Zaḡoḡaniꞌa zeḡe vaḡe ovairo, ibite emeḡe vaḡe ovairoteꞌe teige. 16 Eꞌe horonirotene, e Iesuꞌa ifiroteꞌe ḡoeꞌa zamariro, raenaꞌa, 'Ioane Babatisoꞌe vu hina bapatizoziro, u zaꞌe Vine Zaḡoḡa hina bapatizoziꞌuma.' 17 Ebu emeḡeꞌa Zuhiꞌa Iesu Keriso mazao fiiroteꞌe madaḡano Badiꞌaꞌa ḡahunone rifiroteꞌe teige, Iuda mene azaḡa zuni ḡahunone ziniro. Eꞌanoꞌo eꞌe Badiꞌa haḡai ꞌuoga mene hune idaḡa.” 18 Zeḡeꞌa eꞌe igirotene, mene bare ḡoeriro, rehano Badiꞌa niguneꞌenaꞌa, ꞌahige reiro, raenaꞌa, “Tena, Iuda mene azaḡa zuni Badiꞌaꞌa zamazadu, ḡabone tuḡutuḡu mouga veize zamaze sauꞌanonoꞌo ḡihuziro.”

19 U Stefano maroteꞌe madaḡanonoꞌo Iesu mazao fieꞌeteꞌe azaḡa mazao agireꞌa fureraro. Eꞌanoꞌo zeꞌe Ierusalema neḡanonoꞌo feranadu, Poinikia habaꞌa, Kupro umuḡa, zu Suria habaꞌano Antioka neḡa onamiro. Zeꞌe Iuda azaḡa mazao daꞌo hari manoḡa harameꞌenaꞌa feraro. 20 Rehano Kupro zu Kurene azaḡa nuꞌa Antioka neḡa onamadu, Giriki azaḡa mazao zuni Zuhiꞌa Boro Iesu hariḡa haramiro. 21 Ebu Badiꞌa gigiꞌaniꞌa zeḡe ranao radiunu ꞌahine, vaze ḡehaḡaniꞌa haramoze mae ḡihinadu Iesu mazao fiiro, ebu Zuhiꞌa Boro mone reiro.

22 Eꞌe hariḡa Ierusalema ekalesia azaḡaniꞌa igiro. Ebu vaze ꞌahoga niḡa Banabasi tuḡune onamiro, Antioka neḡa. 23 Ani Antioka neḡano feurirotene, Badiꞌaꞌa ḡahunone manoḡa zenateꞌe horonadu, matuꞌe rudaro. Ebu zeḡe niduꞌa inaraziro, raenaꞌa, “Zamaze niduꞌa hanadu Zuhiꞌa Boro mazao fie gigaru radoꞌi!” 24 Mazaḡa Banabasiꞌe vaze manoḡa zu Vine Zaḡoḡaniꞌa ane mazao iriꞌaviro, zu Zuhiꞌa Boro mazao hubehune fieꞌeteꞌe vazeḡa. ꞌOugadu vaze ḡehaḡa bagaḡaniꞌa Zuhiꞌa Boro moneo reiro.

25 Eꞌebuꞌu Banabasi ani, Saulo vaḡoga radu Taso neḡa onamiro. 26 Ebu Saulo horonirotene, zamahanadu Antioka neḡa bare onamiro. Ebu zeꞌe muri tiba eꞌe ekalesiaḡa azaḡa teite nuꞌoranadu, vaze ḡehaḡa bagaḡa ihozido. Ebu Antioka neḡanobuꞌu, Zuhiꞌa Boro tahiꞌa tahiꞌaꞌe, “Kristeni” rae huze ḡadaheziro.

27 ꞌOuginuteꞌe zamaḡano, peroveta azaḡa nuꞌa Ierusalema neḡanonoꞌo Antioka neḡa ovairo. 28 Eꞌe zamaḡano vaze ꞌahoga niḡa Agaboꞌa, nuꞌonuꞌo zamaḡano iḡuniro. Ebu Vine Zaḡoḡaniꞌa ibito hanadu ꞌahige rae fureniro, raenaꞌa, “Haba niduꞌa zamaḡano zahara boroꞌa fureraꞌuma.” Ebu zahara boroꞌe, Klaudioꞌa Roma zuhiꞌaḡa reiroteꞌe madaḡano fureraro. 29 Eꞌanoꞌo Antioka neḡano Zuhiꞌa Boro tahiꞌa tahiꞌaꞌa, ane ane inarao moni nuꞌonadu, Iudea habaꞌano Zuhiꞌa Boro mone azaḡa veize tuḡuriꞌuma reiro. 30 Ze nuꞌone hauḡirotene, Banabasi zu Saulo ꞌevoreo riꞌinadu, Ierusalema ekalesia boroboro veize odohe itiro.