1 ꞌOuge haḡairoteꞌe zamaḡano, kini Heroda Agripaꞌa* Heroda Agripa-ꞌe Heroda I ga 'Herod the great' rae huneꞌeteꞌe, ane aḡi. Heroda I-ꞌe Mataio 2:1 zamaḡano. tuḡuzadu, Ierusalema ekalesia azaḡa nu sausauzoga rae oboze tiro. 2 Ebu aneꞌa tuḡuzadu, Ioane negoḡa, niḡa Iakobo, diribi hina mau runiro. 3 ꞌOugiroteꞌe moneo Iuda azaḡaniꞌa matuꞌoga horonirotene, Petero zuni obone tiro. ꞌAdiꞌe Mene Miniꞌeteꞌe ꞌUvahuḡa Auꞌeteꞌe Muiḡa madaḡano ꞌougiro. 4 Petero obone teadu ḡuꞌano ohoniro, ebu uti azaḡa ꞌevorao tiro. Uti azaḡa, Petero gadiniroteꞌe niduꞌaꞌe gaubanana fuꞌo zu tiba fare (16), ebu vaze ḡazaḡa ḡazaḡaniꞌa mada ꞌaune ꞌaune gadine gauido. Heroda ani uraꞌe, Iḡine Modeꞌeteꞌe Muiḡa ḡaruganobuꞌu mae bunadu, hunio kotaniꞌuma reiro.

5 Eꞌanoꞌo Peteroꞌe ḡuꞌano ohone modiro. U ekalesia azaḡaniꞌe ane veize Badiꞌa mazao inare kuraunu.

6 Irarine, Herodaꞌa Petero kotaniꞌuma reiroteꞌe oheꞌano, Peteroꞌe auri adiriḡa aheu hina batunadu uti azaḡa aheu boꞌaḡano baze radiunu, ebu uti azaḡa aheu ꞌahogaꞌe ḡuꞌa neḡa ibihetaḡano edau radiro. 7 Eꞌe zamaḡano Zuhiꞌa Boro tuḡure vigaꞌa tabara fureraro, ebu ḡuꞌa neḡa zamaḡaꞌe agararo. Aneru ani, Petero rebeḡa moneo faꞌofaꞌonadu evaniro, ebu raenaꞌa, “Ḡarihe iḡunoꞌi!” ꞌOuge reirotene, auri adiriḡaniꞌa ꞌevoꞌanonoꞌo butau buaro. 8 Ebu tuḡure vigaꞌa ninaꞌa, “Kibaꞌiḡo rinedoꞌi, ebu tamakaḡo haḡaoꞌi!” Ebu ani ꞌougiro. Aneruꞌa bare ninaꞌa, “Ogoto dabuaḡa vidanadu, eḡe hegote aroꞌi!”

9 Petero ani, tuḡure viga hegote buaro, rehano eꞌe zamaḡano tuḡure vigaꞌa haḡairotaꞌaꞌe, mene huga rae zamarinu. Ani ꞌane iḡunuꞌeteꞌe teigeꞌohe rae zamarinu. 10 Zeꞌe, uti azaḡaniꞌa ḡiane edauꞌeteꞌe habaꞌa aheu vitiniro, ebu enona auri ibihetaḡano feuriꞌ onairotene, eꞌe ibihetaḡa zuni aneꞌa bohataro. Ebu eꞌeanoꞌo buau onamiro. Ebu ibio mene faḡa onameꞌenogano, tuḡure vigaꞌa tabara muhiniro.

11 Eꞌeabuꞌu Petero ani, zamaḡa bohataro, ebu raenaꞌa, “E izidi edereha. ꞌAdiꞌe huga. Zuhiꞌa Boroꞌa tuḡure viga tuḡuneha, ebu Heroda ꞌevoraonoꞌo zu Iuda azaḡaniꞌa togahiroteꞌe haḡaiḡa sauꞌanonoꞌo mae vaḡiheha.”

12 Eꞌuge ederirotene, Petero ani Ioane viꞌa, niḡa Maria ne onamiro. Ioane niḡa ꞌahogaꞌe Mareko. Vaze ḡehaḡaꞌe ane neo nuꞌoranadu kurau radiunu. 13 Peteroꞌa enone ibihetaḡano toketokerirotene, tuḡure roḡaeḡa, niḡa Rodaꞌa ḡianoga rae onamiro. 14 Ani Petero ago iraḡa igirotene, matuꞌe rudanadu, ibihetaꞌe vavaꞌoga mene zamariro, rehano ne bare dure diuḡiro, ebu ziro, raenaꞌa, “Peteroꞌa ibihetao edauꞌohe.” 15 Rehano zeḡeꞌa ninaꞌa, “Ḡa baborana gaogi.” “A hube rehi!” rae teꞌoteꞌarotene, zeḡeꞌa raenaꞌa, “Aꞌe Petero ane tuḡure vigaꞌa gaogi.” reiro.

16 Rehano Petero ani, bare bare toketokeriro. Ebu zeḡeꞌa iḡunadu, ibiheta vavaꞌirotene, Petero horoniro, ebu zaguzagau rudaro. 17 Petero ani, ꞌevore hina garareꞌenaꞌa, “Ago haraoꞌi!” reiro, ebu Zuhiꞌa Boroꞌa nouge nouge ḡuꞌa neḡanonoꞌo mae buniroteꞌe meꞌodo ziniro. Ebu ziro, raenaꞌa, “Naginiꞌa fureranataꞌaꞌe, Iakobo zu Zuhiꞌa Boro mone azaḡa ihozoꞌi!” Ebu aniꞌe haba ꞌahoga onamiro.

18 Irarirotene, ḡuꞌa neḡa gadineꞌeteꞌe azaḡaniꞌa “Peteroꞌe nougeha?” rae harae iḡuniro. 19 Heroda Agripa ani, uti azaḡa tuḡuzadu Petero faifaine vaḡiro. Ebu mene horonirotene, Petero gadiniroteꞌe azaḡa ḡadiḡadiziro. Ebu gadi azaḡaꞌe zimi ruzoga veize tuḡuziro. Ebu Heroda ani, Iudea habaꞌanonoꞌo iḡunadu, Kaisarea neḡa ovoiro, ebu eꞌea mada nu radiro.

20 Heroda Agripaꞌe Turo zu Sidono neḡa azaḡa mazao maḡune radiu onainu. Rehano Turo zu Sidono neḡa azaḡaꞌe tiburanadu, Heroda ḡianiꞌ onamiro. Zeꞌe Heroda tuḡure vazeḡa boro, niḡa Balasto teite vazetadu, Heroda teite uniho manoḡa mouga rae umidiro, mazaḡa zeꞌe Herodaꞌa ḡianeꞌeteꞌe habaꞌanonoꞌo ogomuze iḡaiḡa meido ꞌahine. 21 Heroda ḡianiꞌuma madaḡa meirotene, ani kini dabuaḡa haḡaadu kini ehoro habaꞌano ehoriro. Ebu hunio nuꞌoraroteꞌe azaḡa mazao haramiro. 22 Eꞌe igirotene, eꞌe azaḡaniꞌa ḡihau bagaḡa ḡoeriro, raenaꞌa, “ꞌAdiꞌe badiꞌaꞌa ḡoereꞌohe, mene vazeꞌa.” 23 ꞌOugirotene, Zuhiꞌa Boro tuḡure vigaꞌa zogone Heroda runediro, mazaḡa aniꞌe vazevazeꞌa ane nigunirotene, ani aneꞌa bare niguniro, u Badiꞌa hugaꞌe mene niguniro. Ebu idiꞌa ahiꞌa anadu rudaro.

24 U Badiꞌa ḡoereꞌe bororu onaminu, ebu vaze ḡehaḡaniꞌa egadu mae ḡihiniro.

25 Banabasi zu Sauloꞌe ekalesia azaḡa moni ziniꞌ onamiroteꞌe gauḡa hauḡirotene, Ierusalema neḡanonoꞌo bariro. Tahiꞌa ꞌahoga niḡa Ioane zu zamahu Antioka neḡa ovoiro. Ani niḡa ꞌahogaꞌe Mareko.