1 Hili mishi gwo yansan ’ban mo, ki, ka tee kuŋ ’ko’d mo tani mo midi p̱u’du/ mo jin min ma wukura/ di mo. 2 Haali/ ’kwani mini en is buni mo dhali ena guurush mo dhali dhu ’ba/ ki ca mo dhali ’theḵ ’bam buni imis mo, dhali wal gwo sor mo, dhali ush gwo gi icom buni ha e mo dhali ikum mo, dhali uni mini ta iman/usha ’borim bwa c̱i mo, dhali uni mini ta uni gun ’koki dhelel mo, 3 dhali uni mini dar gi mo/en jin di’d eya du wathi/ en’thi/ mo, dhali uni mini ta iman/ush gwo gwam mo, dhali uni mini ta imanthutha thu’th ’pen mo, dhali uni mini ta imandar ga du kun ’timu mo gom e kun dhuna uni ki ’thir ’thir mo, dhali uni mini ta imanmii mii kun ḵaŋkama ḵaŋkam mo, dhali uni mini ta imanshi/ miim ’boro’di e mo, 4 dhali uni mini ta iman’ciṯẖ is ki gwo mo, dhali uni mini ta imanbujura bujur mo, dhali uni mini se ki ’pura/ ’pura/ mo mmodhu ’ba/ oki uni imishi mo mo, dhali uni mini ta iman/en ’kom ’peŋkap̱an buni mo mmodhal mo/en ma Arumgimis e i is mo, 5 mmodhu jasa warma’c mii gom ji gi luŋu mo, hili uni ki waṯ gway gi mom’bi’th piti mo. Theṯẖi/ mo ’peni ’kwani kun wakan mo. 6 Haali/ ibwaman uni gwansan mo tani uni ta uni kun kuli bway buni mo e gu’b gi ’kwanin tiya mo mmobu’th up̱ kun ta ’thalkina/ ki ’thalkina/ mo kun bur ma du mo ki wap̱ wap̱ ki miinthus mo dhali thap̱ miinthus kun ’kona e ki she/ ki she/ mo, 7 uni kun ta imanha ’kwani gunn gwo e mo, dhali yisa bumburkin ki sule/ e mo jin nyiṯẖu/ gwoŋ gana/ mo. 8 Me’da Yanniis dhala Yambiriis, uni ceshkina Musa mo mo, wakan si’da/ ’kwani gwansan uni ceshki mo mo gom gwoŋ gana/ mo, uni kun ta ’kwani kun p̱u/kin mo e bwam buni mo dhali kun ta gi moŋgam gwo is kun waḵu mo. 9 Hili uni mini thoṯẖ isa dhanaa? Haali/ mii ma p̱alim buni midi di eya tente/ mo gom ’kwani ’baar mo, me’d mii gi ’kwani su/ gwansan mo be.

10 Shwane/ /e mishki gwom pem kun ṯorka/ mo dhali miim pem kun miika/ mo dhali tom pem jin guka/ ki e mo e mondiki/e mo dhali moŋgam gwo is pem mo, dhali bwam pem jin ’kuc̱ka/ ki ’kari’th mo, dhali mo/en pem mo, dhali sho’k pem jin ṯelka/ mo, 11 dhali monṯo’c bwam pem mo, dhali isa nyor pem jin ’koshki aha/ mo, dhali a’di jin p̱u’dki’di aha/ e Pa Anthaakiya mo, dhali e Pa Ikuniyya mo, dhali e Pa Listra mo, dhali monṯo’c bwa wana, kun ’dimka/ ’kup̱ mo. Hili ’peni uni gwansani ’baar mo tani Tap̱a a’di yeki aha/ ’ba/ mo be. 12 Ka jiŋ gana/ aris uni gwansan kun ’kona gwo ibwa mo mmo’ko isi ’ko ma gayiin mo e moŋ’koki/e mo eya Ḵrisṯẖos jin ta’da Yesus mo tani uni minu ṯo’c bwa mo be, 13 ki ’kwani gun mii tonthus mo dhali imanheka he’k e mo mini ṯẖi’th mii gun shiyin mo ntagi mii shigga/ kagahara mo, uni kun ta imanheka he’k e mo dhali uni kun he’kkunu e mo be. 14 Hili gom /e mo tani ṯikiri /e di mo e gwo jin da/arkina /e mo dhali e gwo jin gamkina /e is ki gam gana/ eya du mo, mmomishkina /e ’peni a’di jin da/arkina /e a’di mo 15 dhali mish ’ban ’peni mo jin tana /eya ’ci mo tani /e mishki gwo gwansan kun ’kwarkunu mo dhali kun ḵogu mo, uni gun mini mish /e sho’k ye’th mo gom bway gi mowoṯẖ ki moŋgam gwo is eya Ḵrisṯẖos jin ta’da Yesus mo. 16 Aris Gwo ma Arumgimisi ’baar ka ’deṯe/ ’deṯe/ mo kun ’kwarkunu mo tani uni shi/irrkin ma Arumgimis mo dhali ha me’d mo gom gwo mmoṯor mo dhali gom ḵucur jin minu ḵucura ḵucur mo dhali gom ṯo’k jin minu ṯoka ṯo’k mo dhali goma nyoŋ is jin minu nyoŋ mo gom mii ma ḵar/e mo 17 ki wathi/ ma Arumgimis minu ’taki thim mo, mmota ka ris to ’baar mo kun minu mii ta mo goma risa ṯuca ’borga/ ’baar ka ’deṯe/ ’deṯe/ mo be.