1 Aha/ ḵana /e gwo mo ibuŋ’kus ma Arumgimis mo dhala Ḵrisṯẖos jin ta’da Yesus mo, a’di jin midi dwall gwo mo gom uni kun ’kon ki e mo dhali kun wukin mo, dhali ki pim piti jin mina a’di piyu/ is ka pije/ mo dhali bampam piti mo be. 2 C̱iyi gwo mo, hayi me’d ki embul mo mo, dhali hayi me’d ki embul mo jin diki ’bor mo, dhali ṯokiya ṯo’k mo dhali ḵucuriya ḵucur mo, dhali malasiya malas mo, dhali dhalku/ buye/ ki ’thi mo e bwa jin ’kuc̱u ki ’kari’th mo dhali e gwo jin ṯoru mo. 3 Haali/ mo midi p̱u’du/ mo ki ’kwani mini ’koki ’dim ’kup̱ mo e gwom ’borga/ jin ṯoru mo, hili mmotana uni gi bwany’ce kun ḵasaḵas mo tani uni mini tul imanṯor gwo ’kup̱ mo gom is buni mo mmogam bwam buni kun ona uni ’kup̱ mo, 4 dhali uni mini ṯu’k mo ’peni gway gi gwoŋ gana/ jin ciḵu mo dhali ta c̱a/ ka c̱a/ e gwo lolop̱ jin ta ja maḵ mo. 5 Dhali gom /e mo tani isa yempa/ ṯeli /e sho’k mo, dhali ’dimi ’kup̱ mo e mo jin ’koshu is ka nyor mo, dhali miiya ṯu’c gi imanṯor gwom ’borga/ mo, dhali thimi miin tom pini mo.

6 Haali/ aha/ hila/ dikina e shushan mo jin minu mii aha/ abas mo. Dhali mom pem jin miga/ ḵwa/ is pem bwa mo tani a’di p̱u’dki’d mo be. 7 Aha/ askina ki as gana/ mo. Aha/ ’baarkina bway tur gi miiŋ gana/ mo. Aha/ karkina moŋgam gwo is mo. 8 ’Peni shwane/ mo to karkunu mo gom aha/ mo, a’di jin ta toŋ’kup̱ gi mo ma ḵar/e mo, a’di jin mina Tap̱a, jin ta’da amandwall gwo mo jin ta’da ḵar/e mo c̱i aha/ mo ka Tee c̱aan mo. Dhali yisa jasi e aha/ ’de/ mowa, hili si’da/ gom uni ’baar mo kun enki miim piti jin minu piyu/ a’di is ka pije/ mo be.

9 Miiyi ki is pini ki dher mo mmoyayu/ i aha/ ki jahanne/ mo. 10 Haala Dimas, a’di jin enki mony’cesh yan jin di’d shwane/ mo tani, a’di dhalki aha/ ’pen mo dhali yaki’d mo e Pan Tasaluniiki mo, dhala Kiriskis a’di yaki’d mo e Paŋ Galathiyya mo dhala Tiithus e Pan Dalmathiyya mo. 11 Luuka a’di di’d a’di ’de/ nyaḵki aha/ mo. Gama Markus mo dhali susi a’di mo nyaḵki /e mo, haali/ a’di ta a’dim paŋ gana/ jin mii to gom aha/ mo. 12 Tiḵikus, aha/ hashkina a’di e Pan Ep̱asus mo be. 13 Ki /e mini p̱u’du/ mo tani guyu/ burrinyem p̱om pem mo, a’di jin dhalkika/ nyaḵka Karbus mo e Pan Taruwaas mo, dhala warka/ si’da/ mo, dhali isi ki ji mum mo ayi’c kun ’kwaru gwo ap̱o/ mo. 14 Iskandar jin ta’da mantor to mo tani a’di miiki aha/ dhan to jin shi/ashi/ mo, dhali Tap̱a midi raḵ a’di to ibway mo gom miim piti jin miina a’di mo. 15 Jiyi a’di ki e mo, /e ki is pini mo, haali/ a’di ’bitha’bi’th mo mmocesh mo mo gom gwom bam jin ṯora aman mo be. 16 E gwom pem jin ta jin ṯwa/a/ jin ’ce’dka/ she/ mo tani wathin ṯal ’deŋ kamu/ yisa di’da jin bu’thki ’ban gwom pem mo. Uni ’baar mo dhalki aha/ ’pen mo. Hili mii yan a’di minu mii dhalku/ ki dhu ap̱o/ uni mo. 17 Hili Tap̱a a’di doshki’d nyaḵki aha/ mo dhali c̱i aha/ mom’bi’th is mo mmobah gwo ki bah gana/ ’baar mo, ki aris ’kwani kun ’koki ta ’Kwani Yahuuda/ mo mini ’taki ciḵ a’di mo be. Wakan aha/ yekunu mo ’peni ’twa/ ma dhop̱ mo be. 18 Tap̱a a’di midi ye aha/ ’ba/ mo ’pena ris tonthus mo dhali ta aha/ is ki me’d mo gom bampa/ jin ta ji momis piti mo be. E a’di mo tani monyca midi di mo gom ki sule/ mo dhali ki sule/ ya ye ’ba/ mo be. Amen.

19 Theka P̱iriska me’d mo dhala Akiila mo, dhali kuŋ gu’b ma Unisip̱urus mo be. 20 Araastus diki’d mo e Paŋ Kurinṯẖuus mo. Dhala Ṯurup̱iimus a’di dhalkika/ mo e Pam Miliiṯus mo haali/ a’di ’ba’thki’d mo be. 21 Miiyi is pini ki dher mo mmoyayu/ nṯwa/a/ ki mo diki ta mondiṯ mo. Abuulus hashki monthe me’d gom /e mo. Kan si’da/ miikin ma Budis mo dhala Linus mo dhala Kalap̱idiyya mo dhala risa waḵi ’baar mo be.

22 Tap̱a midi di e shi/in pini mo. A’the midi di gom /e mo.