1 Dhala gasiis jin ca’d o gwo mo ki: To gwansan wakana? 2 Dhali a’di o gwo mo ki:

Imudhum pem dhali ibaba kana! Arumgimis jin ta gi monyca mo tani a’di pi’da babam bana ka Ibrahiim i is ki a’di diki’d e uḵa ’cesh jin tana dhan yi’deya ḵara’b nṯwa/a/ me’d jin c̱a’ba a’di e Pan Haraan mo tani 3 dhali a’di ki o a’di gwo mo ki: Yaku/ ka pije/ mo ’peni bampam pini mo dhali ’pena bas pini mo dhali yayi i mo jin miga/ ṯor /e mo. 4 Ŋ’ko’d a’di yaki’d ka pije/ ’peni Bampa/ gi ’Kwani Kaldaan mo dhali c̱a’b e Pan Haraan mo. Dhali ’peni mun mo tani ki com wuki’d mo tani Arumgimis ki so’k a’di mo e bampa/ yan jin ’kokina um nycine/ shwane/ mo. 5 Dhali a’di diki c̱i a’di mala kamu/ nycine/ mo, wakan si’da/ ari ’bana kamu/ mmokar sho’k piti ap̱o/ yisa. Dhali a’di ki o gwo is ki a’di midi c̱i a’di a’di mo mmota jim piti mo be dhali ki emen piti ŋ’ko’di a’di mo, ki a’di dar ga ’ci naskina/ mo. 6 Dhali Arumgimis o gwo cikise/ mo be ki emen piti mini ’taki ’ko ki ’kus e bampaŋ kamu/ mo dhali ki uni mini ’taki sus uni mmota c̱iŋkina/ mo dhali mii uni ka ha’th’ko’d ki yil iss ’kwanimpa i/iss ’de/ mo. 7 Dhali ’kwani gwansan jin mina uni ta c̱iŋkinam buni mo tani uni miga/ mii miiwaḵ mo. A’di ta gwo jin on ma Arumgimis kan mo. Dhali ŋ’ko’d mo tani uni mini pi ka pije/ mo dhali mii gwom pem e mo yan mo be. 8 Dhali a’di ki c̱i a’di gwo jin gamu me’d mo gom gwo ma munyjal yis mo dhali wakan Ibrahiim ki dhodha Is/hak mo dhali ka cim pekwara mo tani a’di ki ’ciṯẖ a’diya munyjal yis mo dhala Is/hak ki dhodha Yakuub mo dhala Yakuub ki dhodha waḵ gi idhan com kun ’koni ’kume’d i’ce’dka su/ mo.

9 Dhali idhan com gwansan uni tan ma du dhap̱ana p̱owa Yuusup mo uni ki yol a’di iPam Masir mo dhala Arumgimis di’d e a’di mo 10 dhali woṯẖ a’di ’peni mo jin ṯoju a’di bwa mo dhali c̱i a’di maŋ mo dhali moyuḵ mo ibwambor ma P̱irawn jin ta’da maliḵ gi Pam Masir mo dhali a’di ki kar a’di ka mudhiir gom Bampa/ Masir mo dhali gu’b piti ’baar mo. 11 Ṯe/ p̱u’dki’da po/ Bampa/ Masiri ’baar mo dhali Paŋ Kanaan si’da/ mo dhali dhan monṯocu bwa di’d mo dhali ibabam bana gamki tonṯe/ yisa. 12 Hili ka Yakuub ciḵki gwo ki tonṯe/ di’d e Pam Masir mo tani a’di ṯu’cki ibabam bana ki ii me’d jin ṯwa/a/ mo. 13 Dhali ki me’d jin ’kon ma p̱o/i su/ mo tani a Yuusup̱ ṯorki is piti eya tente/ e ikam mo dhali ’kwani ma Yuusup̱ ṯoru eya tente/ aP̱irawn mo. 14 Dhala Yuusup̱ ki hash gwo mo dhali yuḵa Yakuub jin ta com e a’di mo dhala risa bas piti kun ta ’kwani iss* ḵamsa wa saba/iin ’kwanimpa ’kwara i’ce’dka ḵarpa’c mo. 15 Dhala Yakuub yaki’d ka luŋgu’b mo e Pam Masir mo dhali a’di wuki’d ki is piti mo dhali ibabam bana si’da/ mo be. 16 Dhali uni ḵalu mo mmo’ciṯẖ Bampa/ gi Pan Shakiim mo dhali uni ’thinu mo e moŋ’kup̱aje jin yolkin ma Ibrahiim ki she yol gi ’dolkon kush ’peni iya/ ma Hamuur gi Pan Shakiim mo.

17 Hili ki moŋ gwo jin onu is mo tani ’dishki’d mo jin gam ma Arumgimis me’d ka Ibrahiim mo dhali ’kwani can mo dhali mari is mo e Pam Masir mo, 18 gama maliḵa kamu/ jin piki’d ap̱o/ Bampa/ Masir mo jin diki misha Yuusup mo. 19 A’di yan miiki ’kwanim bana ka maḵ mo dhali mii ibabam bana ka ha’th’ko’d mmoṯa’k ushi uc̱im buni ka pije/ jin mina uni ’taki ’koki ’ko ki e mo be. 20 Ki yil yan mo tani aMusa dhodhu mo dhali a’di ta yinthoŋ gana/ mo dhali a’di thip̱u ka ppe ’kup̱i kwara e gu’b gi com mo. 21 Dhali ki a’di ḵalu ka pije/ mo tani ’bwa/ ma P̱irawn taḵ a’di mo dhali thip̱ a’di ki ya/m pitiŋ gana/ mo. 22 Dhali yuḵ gi ’Kwani Masiri ’baar mo tani a’di ye’thkunuwa Musa sho’k mo dhali a’di ’bitha’bi’th e gwom piti mo dhali miim piti si’da/ mo be.

23 Hili ki a’di mura yila issu/ ’baar mo tani gwo pu’dki’da dum piti mo mmodoḵa waḵ ’kwanim piti kun ta iya/ ma Israyiil mo be. 24 Dhali mmop̱ara a’di jan ṯal ’deŋ kamu/ e ’peni uni kun ’koshu ka wuny is mo tani a’di ki woṯẖ a’di mo dhali cesh a’di jin miinu ka ha’th’ko’d kan mo mmo’kosh Wathim Pam Masir jwa mo dhali rica ri’c gom a’di mo. 25 Dhali a’di ṯoshki’d ka waḵ piti mish gwo ’ban ka Arumgimis ki c̱i uni mo jin ’cuḵu ki me’d piti mo. Hili uni ’koki mish gwo ’ban mo be. 26 Dhali ka cim jiŋ ’ko’d mo tani a’di pi uni i is mo uni kun ’koni mo/as mo dhali a’di midi ’taki dhu uni mmogwam mo doḵ/e mmo/o gwo mo ki: Kana, um ta ikan mo be. Ata miina um ki shi/ ka rem ’kup kan mo? 27 Hili a’di jin miiki’da mannyaḵ c̱a’b piti ki shi/ mo tani a’di belki a’di mo mmoya mo mmo/o gwo mo ki: Kaja kar /e ki tap̱a mmodwall gwo ap̱o/ aman mo? 28 /E mini ’taki ’kosh aha/ jwa mo me’d jin ’koshkina /e Wathim Pam Masir katiliya? 29 Dhala Musa guski’d mo gom gwo yan jin onu mo dhali a’di warki’d ka mandi gi ’kus e Pam Madyaan mo e jin dhotha a’di iya/ isu/ mo.

30 Dhali ki yila issu/ thimki’d mo tani aman’doyu gwo piki a’di i is em bwaasho e ’Kuwosh Sinaa/ eya le’dan o’d e ari cwa mo. 31 Dhali ka Musa parki a’di e mo tani a’di merki’d gom to jin mishkina a’di mo dhali ki a’di shor a’di is mo mmo’dish a’di is mo mmohil mo mo tani ’twa/ yayi’d ’peni Tap̱a ki: 32 Aha/ tana Arumgimis gi ibabam pini mo dhala Arumgimis ma Ibrahiim mo dhala Is/hak mo dhala Yakuub mo. Dhala Musa deena is kagahara mo dhali ḵo/ki’da ḵo/ is mo mmohil a’di mo be. 33 Dhali Tap̱a ki o a’di gwo mo ki: ’Cuḵa p̱p̱a/ ’peni sho’k pini mo ma haali/ mo yan jin dosha /e ap̱o/ mo tani a’di ta’da ’cesh jin ḵogu mo be. 34 Mishga/ ka jiŋ gana/ monṯo’c bwa di’d e ’kwanim pem kun ’kon e Pam Masir mo dhali aha/ ciḵkina uni oḵonkin mo dhali aha/ dina mmoyaku/ ka ’cesh mo mmo’cuḵ uni mo. Dhali yayu/ shwane/ mo ma. Aha/ mina hash /e e Pam Masir mo.

35 Musa yan jin ushkina uni mo mmo/o gwo mo ki: Kaja kar /e ki tap̱a mmodwall gwo mo tani a’di ihashkin ma Arumgimis mo mmota tap̱a mo dhali mmota man’cuḵ uni ki me’d ma man’doyu gwo jin pi a’di i is e ari cwa mo. 36 Wathi/ yan ishu uni bway ka pije/ mo mmomiikina a’diya dhan mii kun caaca mo dhali momer si’da/ e Pam Masir mo dhali e bwaman dhan Yi’deŋ Ḵummam ’Per e mombwaasho ki yil issu/ mo. 37 Yan ta’da Musa c̱aan jin o ki uc̱i ma Israyiil gwo mo ki: Amanc̱i gwo min ma Arumgimis ipiyu mo gom um ’peni bwaman ma waḵ bum mo mmowa e ki aha/ mo. 38 Yan ta a’di jin di’d e montul is e mombwaasho nyaḵka man’doyu gwo jin o a’di gwo e ’Kuwosh Sinaa/ mo dhali nyaḵ ki ibabam bana kun bu’th gwo gi mondiki/e mmoc̱i ana mo. 39 Ibabam bana ush a’di gwo ha e mmomii mo. Hili uni ki bel a’di mo mmoya mo ’peni uni mo dhali uni doḵ ma dum buni ka nyaŋ’ko’d iPam Masir mo mmo/owa Haruun gwo mo ki: 40 Uḵ am to kun luŋu mo ma kun mini ii amani bwambor mo. Haala Musa yan jin susi ana ka pije/ ’peni Bampa/ Masir mo tani ana mola to jin yayi’di a’di mo be. 41 Dhali uni uḵ ari bip̱ ka cim gwansan mo dhali ’do to jin ’ciṯẖu/ ’kus mo e tomp̱inycon mo dhali ’bor bwa mo gom mii jin ta ji gi me’d buni mo. 42 Hili Arumgimis ṯu’kki’d mo dhali c̱i uni bway mo mmoluŋ to kun ’kon e momis mo me’d jin ’kwarkunu e bwaman ma warka/ gi imanc̱i gwo ma Arumgimis kadhamo/ mo ki:

44 Ibabam bana takan gi gu’b burrinye/ gom gwonṯor e mombwaasho me’d jin kara a’di a’di jin o gwowa Musa ki a’di midi uḵ me’d she/mm jin mishkina a’di mo 45 jin ḵala ibabam bana si’da/ ki moŋgarr buni ki she/ ki she/ mo nyaḵka Yashuu/ ki uni sekin mo e mo gi ’kwanin tiya kun bel ma Arumgimis ka pije/ ibwambori bwam/e gi ibabam bana mo ntaga cim ma Dawuu’d mo be. 46 A’di gam momaŋ ibwambor ma Arumgimis mo dhali ’tho monyc̱a’b goma Arumgimis ma Yakuub mo. 47 Hila Sulemaan nyaŋ a’di gu’b mo. 48 Bahili A’di jin Cayaa/ e ki Ca mo diki c̱a’b e gu’b kun nyaŋu ki me’d mo me’d jin on ma manc̱i gwo ma Arumgimis kadhamo/ mo ki:

50 Dina me’d pem ki uḵ to gwansani ’baar mo ’taa?

51 Um ’theḵ ’bam bum imis mo dhali um ’konuki ’ciṯẖa/ munyjal ma du mo dhali ’ce si’da/ mo. Shi/in Dheleladhelel ura um isa yempa/ mo. Me’d jin miikina ibabam bum mo tani wakan miikina um si’da/ mo. 52 Jana ’peni imanc̱i gwo ma Arumgimis kadhamo/ mo kun ’kona ibabam bum ki ṯo’c ’kus mo? dhali uni ’kosh uni jwa mo uni kun ṯor gwo nṯwa/a/ mo gom mmomina jan ṯal ’de/ jin mii’d ka ḵar/e iyayu/ mo. Um warkin ki iman’ciṯẖ a’di is ki gwo mo dhali iman’kosh a’di jwa mo, 53 um kun bu’th gwoŋḵan jin c̱inu mo me’d jin kara iman’doyu gwo a’di mo dhali a’di karkina um yisa.

54 Ki uni ciḵki gwo gwansan mo tani uni c̱ithirkin ma du mo dhali uni ’pe’dki she/ i a’di mo. 55 Hili a’di mmo’tu’du/ a’di mo ki Shi/in Dheleladhelel mo tani a’di hilki momis ka ’thime/ mo dhali p̱ar monyca ma Arumgimis e mo dhala Yesus si’da/ mmodoshkina a’di ka bim poros ma Arumgimis mo 56 dhali o gwo mo ki: Hili mo mo ma. Aha/ parkina momis ḵa’du/ mo dhali Ya/ gi ’Kwani mmodosh ka bim poros ma Arumgimis mo. 57 Hili uni cuun ki dhan ’twa/ kun caaca mo dhali ’dap̱ ’cem buni ki me’d mo dhali ṯẖa’th a’di ki is mo mmonṯal ’de/ mo 58 dhali uni ki biṯ a’di ka pije/ ’peni bampa/ mo dhali ’kosh a’di ki wosh mo be. Dhali iman/o gwo dhu burrinyem buni a’cesh isho’k gi dhuru’c washana kamu/ mo jin yuḵu ka Shawuul mo 59 dhali uni ki ’kosha Isṯip̱anuus ki wosh mo mmoyuḵa a’di Tap̱a mmo/o gwo mo ki: Tap̱a Yesus, budhi shi/in pem mo. 60 Dhali a’di c̱a’bki’d ki jiŋ ’kup̱a’dup̱un mo dhali cuu gwo ki dhan ’twa/ mo ki: Tap̱a, dhalku/ ki kar miinthus yan i’bam buni mo. Dhali ki a’di o gwo kan mo tani a’di ki ish e mo be.