8
1 Dhala Shawuul di’d mmogam bwa me’d mo gom wum piti mo be.
Shawuul Ṯo’cki’da Ḵaniisa Bwa mo be
Dhali ka cim yin tani monṯo’c ’kus caaca yayi’da po/ ḵaniisa jin di’di Pa Urushaliim mo dhali uni ’baar mo c̱ekerki bwa mo i bampa/ ’baar mo e Pa Yahuudiyya mo dhali Pan Saamira mo, jasi imandhunu ki she/ uni i’kokin mo. 2 Dhali ’kwani gun tana gayiin mo tani uni ikankina Isṯip̱anuus mo dhali gwon mo dhali ananki is kagahara gom a’di mo be. 3 Hila Shawuul mii’da nyor ka daran du kagahara mo mmoshi/a ḵaniisa is mo dhali mmocic̱a a’di gu’bi ’baar ki ’beles mo tani a’di ki dir ’kwaniŋ gwas mo dhali ’kwani up̱ si’da/ ’ko’da ’cesh mo mmodhu uniya sijin mo.
Gwom ’Borga/ C̱ikunu mo e Pan Saamira mo
4 Uni si’da/ kun c̱ekerki bwa mo tani uni iikin mo mmoṯor gwo ki lala’th mo be. 5 Dhala P̱ilibbus ya’d ka luŋgu’b mo e Pan Saamira mo be dhali c̱i uni gwo mo goma Ḵrisṯẖos yan mo. 6 Dhala waambuhany ’kwani c̱ina dum buni ki bwan ṯal ’de/ ki gwo kun ṯorkin ma P̱ilibbus mo me’d jin ciḵa uni gwo mo dhali momer misha uni kun miikina a’di mo be. 7 ’Peni uni ka ris kun bu’th ma rum thus kun nyo/on mo tani arum thus pikin mo mmocuuna uni ki dhan ’twa/ kun caaca mo dhali uni tana ris kun muṯṯa/ is mo dhali kun ta ŋwol mo tani uni wac̱kunu mo be. 8 Dhali mom’bor bwa caaca di’di pa c̱aan mo be.
9 Wathiŋ kamu/ di’d jin yuḵu gway ka Simaan mo. Nṯwa/a/ mo tani a’di mii’da ruma tiya e pa c̱aan mo dhali ’Kwani gi Pan Saamira meren gom gwo jin ona a’di uni ki a’di ki is piti ta a’di jin ca’d ki tiya mo. 10 Dhali uni ’baar c̱i is buni ki gwom piti ’peni a’di jin gwa’da’d ntagi a’di jin ca’d mo mmo/o gwo mo ki: Wathi/ yan ta ji gi mom’bi’th ma Arumgimis jin yuḵu ki A’di jin Ca’d mo be. 11 Dhali uni c̱i is buni ki gwom piti mo gom a’di mer uni is ki mii ma rum piti isa gush mo. 12 Hili ki uni gam gwo ma P̱ilibbus is jin ṯorkina a’di gom gwom ’borga/ gom Bampa/ ma Arumgimis mo dhali gway ma Yesus Ḵrisṯẖos mo tani uni miikunu ki yi’de/ mo ki gwasi lu/ mo dhali ki up̱i lu/ si’da/ mo be. 13 Dhala Simaan ki is piti si’da/ a’di gam gwo is mo dhali miikunu ki yi’de/ mo. A’di nyaḵ c̱a’b ka P̱ilibbus mo mmohil momer mo dhali dhan miimer kun caaca kun miikunu mo tani a’di merki’d mo be.
14 Hili ki imandhunu ki she/ mo kun ’koni Pa Urushaliim, ki uni ciḵki ki ’Kwani gi Pan Saamira bu’thki gwo ma Arumgimis mo tani uni ki ṯuca Buṯerus uni ka Yohaan ki iiku/ i uni mo. 15 Ki uni thulkin ka luŋgu’b mo tani uni ’thon gom uni ki uni mini ’taki bu’th Shi/in Dheleladhelel mo 16 haali/ a’di diki ya ap̱o/ jamu/ i bwam uni naskina/ mo. Uni miikunu ki yi’de/ jasi ki gway gi Tap̱a Yesus ’te/ mo. 17 Ŋ’ko’d mo tani uni dhu uni me’di ’kup̱ mo dhali uni bu’thki Shi/in Dheleladhelel mo be. 18 Dhali ka Simaan p̱arki uni e mo mmodhuna imandhunu ki she/ uni me’di ’kup̱ mo tani Shi/in Dheleladhelel c̱ikunu mo a’di ki ṯor uni aguurush i e mo, 19 mmo/o gwo mo ki: C̱iyaa/ mom’bi’th yan si’da/ mo ma, ki wathiŋ kamu/ jin miga/ ’taki kar me’d pemi ’kup mo tani ki a’di si’da/ midi ’taki bu’th Shi/in Dheleladhelel mo. 20 Hila Buṯerus ki thoḵ a’di gwo mo ki: Aguurush pini dhalki a’di nyaḵ sho’k ’ce’d ki /e mo haali/ /e ṯoshki gam to jin c̱in ma Arumgimis ki me’d ka guurush ’te/ mo. 21 /E dar gi to walla mii e gwo yan mo haali/ adum pini diki ’bor ibwambor ma Arumgimis mo be. 22 Rici adu is mo gom miinthus pini yan mo dhali ’thoyi Tap̱a mo ma, ki gwo jin kuluma /e ibwa wakan mo minu ’taki gwam /e mo. 23 Haali/ mishga/ ki /e din e mo ma c̱i/ jin ḵa/aḵa/ mo dhali mondeḵu gi miinthus mo. 24 Dhala Simaan thoḵ a’di gwo mo dhali o gwo mo ki: ’Thoyi Tap̱a gom aha/ mo ma ki to gwansan kun ona um mini ’koki ’taki p̱u’du/ ap̱o/ aha/ mo.
25 Dhali ki uni c̱i gwonṯor buni mo dhali ṯor gwon Tap̱a mo tani uni doḵkin ka nyaŋ’ko’d mo mPa Urushaliim mo dhali ṯor gwom ’borga/ eya ris pa gi ’Kwani gi Pan Saamira mo be.
P̱ilibbus dhali Wathi/ gi Paŋ Gale/ jin Ta Mantil mo
26 Hila man’doyu gwo gi Tap̱a ki owa P̱ilibbus gwo mo ki: Cuyi mis mo ma dhali yayi ’kup̱ ki ’ko’d gwar ka biny cam ki bway jin ya’d ka luŋgu’b ’peni Pa Urushaliim mo ntagi Paŋ Ghassa jin ta mombwaasho mo. 27 Dhali a’di ki cu mis mo dhali ya mo. Dhali hili Wathi/ gi Paŋ Gale/ di’d jin ta mantil mo dhali jin ta tap̱a jin ca’d ’pena Kandaaka, a’bom jin ta’da maliḵ gi ’Kwaniŋ Gale/ mo. A’di ta’da mandhuwa guurush piti ’baar mo. A’di si’da/ yayi’di Pa Urushaliim mmoluŋ mo be. 28 Dhali a’di di’d mmodoḵ ka nyaŋ’ko’d mo dhali a’di c̱a’bki’d i bwaman ma arabiya jin dira shumarum mo dhali di’d mmodeŋ gwo jin ’kwarkin ma manc̱i gwo ma Arumgimis kadhamo/ e mo jin yuḵu ka Ishaya mo be. 29 Dhali Shi/in Dheleladhelel ki owa P̱ilibbus gwo mo ki: Shori is pini mo ma dhali ’dishi a/arabiya yan is mo. 30 Dhala P̱ilibbus guski’di a’di mo dhali ciḵ gwo jin deŋa a’di gwo e mo jin ’kwarkin ma manc̱i gwo ma Arumgimis kadhamo/ mo jin yuḵu ka Ishaya mo tani dhali o a’di gwo mo ki: Gwo jin deŋa /e e mo tani misha /e ’ban mo ’taa? 31 Dhali a’di ki o gwo mo ki: Miga/ mish ’peni mana ki dar gi wathi/ mmothuḵ aha/ gwo isi ciki/ mo. Dhali a’di yuḵki’da P̱ilibbus mo mmoseyu/ a/arabiya mo dhali nyaḵ c̱a’b ki a’di mo. 32 Dhali gwo ’peni Gwo ma Arumgimis jin ’kwaru jin deŋa a’di e mo tani wa cikise/ mo be, jin o’d ki:
A’di susu me’d ḵa’bal mmo’ciṯẖ ’kus mo
dhali me’d ari ḵa’bal jin mol ’twa/ wal ibwambor ma man’ciṯẖ a’di amur piti mo tani
wakan si’da/ a’di diki c̱ee ’twam piti mo.
33 Dhali mmokara a’di is piti ki gwa’d mo tani mondwall gwom piti ḵwa/u mo ’peni a’di mo.
’Kwani kun tana anyaḵum yil ki a’di mo tani kaja a’di jin midi c̱i gwo ki lala’th mo?
Haali/ mondiki/em piti gunu ’peni mony’cesh yansan mo.
34 Dhali a’di jin ta mantil oki’da P̱ilibbus gwo mo ki: Ṯor aha/ gwo mo ma, amanc̱i gwo ma Arumgimis kadhamo/ yin mo tani a’di ṯori gwo goma ja sa/? A’di ṯorki gwo gom is piti mo ’taa? walla gom wathiŋ kamu/ mo. 35 Dhala P̱ilibbus ḵa’d ’twam piti mo dhali ṯel a’di Gwo ma Arumgimis yin ’pen jin ’kwarkunu mo tani a’di ki c̱i a’di gwo goma Yesus mo be. 36 Dhali mmo/iina uni ibway mo tani uni p̱u’dkin mo e yi’deŋ kamu/ mo dhali a’di jin ta mantil ki o gwo mo ki: Hili yi’de/ a’dan mo. Ata a’di jin midi non aha/ mmomii ki yi’de/ mo? 37 Dhala P̱ilibbus ki o a’di gwo mo ki: Waḵki/ /e gam gwo is ka dum pini ’baar mo tani /e minu mish mii mo be. Dhali a’di ki thoḵ gwo mo dhali o gwo mo ki: Aha/ gama gwo is ka Yesus Ḵrisṯẖos ta Ya/ ma Arumgimis mo be. 38 Dhali a’di ki ḵan gwo mo ka arabiya jin dira shumarum minu dosh mo dhali uni su/ thulkin ka luŋgu’b i bwaman yi’de/ mo uni su/ ka P̱ilibbus uni ki a’di jin ta mantil mo, dhali a’di ki mii a’di ki yi’de/ mo be. 39 Dhali ki uni sen ka pije/ ’peni yi’de/ mo tani Shi/in gi Tap̱a a’di borki’da P̱ilibbus mo be dhali a’di jin ta mantil p̱ar a’di e doḵ/e yisa haali/ a’di ya’d mo i bway piti mmo’bora bwa a’di mo. 40 Hila P̱ilibbus gamkunu mo e Pa Ashduu’d mo dhali mmo’ciṯẖa/ a’di pa yin mo tani a’di ki ṯor gwom ’borga/ e pa ’baar mo ntagi a’di p̱u’dki’d e Paŋ Kaysariyya mo be.