1 ABuulus jin ta a’di jin karu ki she/ mo goma Ḵrisṯẖos jin ta’da Yesus ki bwa ma Arumgimis mo be.

E uni gwansan gun dhunu ki she/ ki dhelel dhelel mo, uni si’da/ kun ta ku isiŋ gana/ eya Ḵrisṯẖos jin ta’da Yesus mo be.

2 A’the e um mo dhali moŋḵu’th is ’peni Arumgimis jin ta’da Babam bana mo dhali Tap̱a Yesus Ḵrisṯẖos mo be.

3 Mom’bor mii midi di mo goma Arumgimis mo dhali Ababa gi Tap̱a Yesus Ḵrisṯẖos bana mo, a’di jin ’borki ana mii mo eya Ḵrisṯẖos ka ris mii kun ’boruwa ’bor mii mo e to gi shi/in mo e mo kun ’kon e momis mo be. 4 Isi kani me’d jin kwanykina a’di ana mo e a’di mo nṯwa/a/ ki mony’cesh yan ’konuki ḵa’b mo, ki ana mina ta ku gun ḵogu mo dhali ta ku gun mini ta kun dar gi thalkin ibwambori a’di mo be. 5 A’di ’kawurki ana mo e mo/en mo mmota iya/m piti mo eya Yesus Ḵrisṯẖos mo isi ki gwoŋ ’kup̱ bwam ’borgam piti mo 6 gom momaŋ ma ’the gi monycam piti mo a’di jin c̱ikina a’di ana ki me’d mo e A’di jin Enu mo be. 7 E a’di mo tani ana tana gi mo jin wanuwa wan ’ba/ ka bas piti mo dhali amure/ gi gwon dhiŋ bana kun dhalkunu ana ’pen mo, isi ka ’them piti jin tana a’di pa ki pa mo 8 a’di jin karkina a’di mmogus ap̱o/ ana mo be. 9 Haali/ a’di ṯorki ana a’di i e eya tente/ mo eya ris moyuḵ mo dhali mmonyiṯẖ gwo jin c̱inu mo ki jim bag mo jin ta bwam piti mo, isi ki gwoŋ ’kup̱ bwam ’borgam piti mo, a’di jin karkina a’di eya Ḵrisṯẖos mo be 10 me’d gwo jin ’kawurkina a’di mo gom mo jin minu thim mo, mmogama ris to ’baar mo me’d e a’di mo, to gun ’kon e momis mo dhali to gun ’kon e mony’cesh mo be.

11 E a’di mo isi ki gwoŋ ’kup̱ bwam ’borgam piti mo a’di jin thimki’da ris to ’baar mo isi ki bwaŋ gwom piti jin ’kawurkina a’di mo be. 12 Ana kun takina gi mo ma ’teŋ kap̱e/ eya Ḵrisṯẖos nṯwa/a/ mo tani ana ’kawurkunu mo dhali dhu ’pen ka pije/ mo mmo’ko mo gom montaḵ mo gom monycam piti mo be. 13 E a’di mo um si’da/ kun ciḵki gwoŋ gana/ mo dhali gwom ’borga/ mo gom bway gi mowoṯẖ bum mo dhali gam gwo is mo e a’di mo tani um ’kokunu mo mmo’dap̱ ’twa/ ki a’di jin okunu is mo a’di jin ta Shi/in Dheleladhelel mo be. 14 A’di jin ta to jin woṯẖu/ ’twa/ mo gom mal bana mo ntagi ana mina bu’th a’di mo e montaḵ gi monycam piti mo be.

15 Gom ’kup̱ gwo yan mo tani haali/ aha/ ciḵkina gwo mo gom moŋgam gwo is bum mo e Tap̱a Yesus mo dhali mo/en bum ’kup ki uni kun dhunu ki she/ ki dhelel dhelel mo tani 16 aha/ yisa daḵa mo mmoc̱i mo jin ’boruwa ’bor bwa i is mo gom um mo mmoka um e mo e mon’thom pem mo 17 ka Arumgimis jin ta a’di gom Tap̱a Yesus Ḵrisṯẖos bana mo dhali Ababa gi Monyca mo midi c̱i um shi/in gi moyuḵ mo dhali gwo jin ’ceenu e monyiṯẖ jin nyiṯẖa um a’di mo, 18 mmotana um gi e ma du kun ’twaḵki mo ki ’twaḵ jin shi/i’d mo, ki um mini mish mo ma ’teŋ kap̱e/ yan mo jin yuḵkina a’di um icine/ mo dhali mom piti jin tana a’di pa ki pa mo gi mal gi monycam piti e uni kun dhunu ki she/ ki dhelel dhelel mo, 19 dhali mom’bi’th piti yan jin eḵki’d ki eḵ jin shi/i’d jin molu bar mo e ana kun gama gwo is mo isi me’d miim piti jin miina a’di ka dhan ’bi’th jin ta’da dem dem mo, 20 a’di jin thimkina a’di eya Ḵrisṯẖos mo me’d jin ’de’kkina a’di a’di mo ’peni mowu mo dhali kar a’di mmoc̱a’b ki me’da bim poros piti mo e mo kun ’kon e momis mo be, 21 isi mis gana/ mo ap̱owa ris gwoŋḵan kun c̱inu ki ’bi’th mo dhali moshirr mo dhali mom’bi’th mo dhali mo jin tanu tap̱a mo, dhali ap̱owa ris gwayi ’baar mo kun yerkunu mo, yisa jasi e she/ yil yana, hili si’da/ e yil jin midi p̱u’du/ mo be. 22 Dhali a’di dhuki’da ris to ’baar mo e bwaŋ’kwariny sho’k piti mo dhali a’di karki a’di ki a’di jin ta’da ’kaŋ’kup̱ ap̱owa ris to ’baar mo goma ḵaniisa mo, 23 a’di jin ta buŋgwar is piti mo, gom mon’tu’d piti jin ’tu’dkina a’di a’tu’di ’baar mo be.