1 Iwaḵa, waḵki/ wathiŋ kamu/ bulu ’twa/a ’cesh e gwon dhaŋa kamu/ mo tani um gun ta gi to gi shi/in mo mini mii wari a’di is ka nyaŋ’ko’d mo e shi/in jin ’thup̱u e ki ’thup̱ mo. Hili ’kup̱, ’kup̱ki is pini mo isi ciki/ ki /e minu pal mo gara/. 2 Ḵali ton diṯin ka rem ’kup̱ mo, dhali ki mii gi wakan mo tani um mini thim gwoŋḵan ma Ḵrisṯẖos mo be. 3 Haali/ waḵki/ jan ṯal ’deŋ kamu/ midi kulum gwo ibwa mo ki a’di ta a’di mo tani ki a’di diki ta toŋ kamu/ mo tani a’di he’kki isi is pitiŋ gana/ e mo be. 4 Hili dhalki ’kwani ’baar ka ’deṯe/ ’deṯe/ pali miim buniŋ gana/ mo, dhali gwo jin di a’di a’diŋ kamu/ ibwa mo mmokar ’ba/ ki ca mo tani midi di gom is piti a’di ’de/ mo dhali yisa eya mannyaḵ c̱a’b jin ’dish a’di is mo be. 5 Haali/ ’kwani ’baar ka ’deṯe/ ’deṯe/ mini ḵal is kom mo gom tom buniŋ gana/ jin ḵala uni mo be.

6 Dhalki a’di jin ṯoru gwo mo nyaḵka’da ris tom ’boron pwaḵ bwa mo ki a’di jin ṯorki gwo mo.

7 Dhalku/ ki ta ku gi hegu e mo. Arumgimis yisa ta ji gi minu mii ka maḵa. Haali/ ma to yin jin mina wathi/ si mo tani a’di si’da/ imina a’di i’ciṯẖ mo be. 8 Haali/ a’di jin siki to gom buŋgwar is piti mo tani a’di midi ’ciṯẖ to ’peni buŋgwar is jin midi p̱u/ mo. Dhali hili a’di jin midi si to gom Shi/in mo tani a’di midi ’ciṯẖ mondiki/e ki sule/ ya ye ’ba/ mo ’peni Shi/in mo be. 9 Dhali dhalki ana daḵa mii is jin wu e mo mmomii miim ’borga/ mo, haali/ ki she/ yil mo mo tani ana mina ’ciṯẖ to mo waḵki/ ana ’kona bwa ki biṯ ka luŋgu’b mo be. 10 Dhali wakan mo tani me’d jin takina ana ki embula ’borga/ mo tani dhalki ana miina miim ’boron e ’kwani ’baar mo dhali isi kan ki jim mum mo gom uni gwansan kun ’kokin eya ṯa/ gi moŋgam gwo is mo be.

11 Misha uma adhan toŋ gwo gun ’kwarkika/ um ki me’d pem gana/ mowa? 12 A’di ta uni gwansan kun ona bwa ki ṯor eya tente/ eya p̱or ma pije/ ’te/ gom buŋgwar is mo kun mini ṯu’c um ki um minu ’ciṯẖa/ munyjal yis mo, dhali ki jasi mii gi wakan mo tani uni ti, iminu ’koki ṯo’c bwa mo gom cwany’ciṯẖan dhul ma Ḵrisṯẖos mo be. 13 Haali/ isi kani uni gwansan kun bu’thki mo ma munyjal yis jin ’ciṯẖu/ mo tani uni yisa ki is buni idhuki gwoŋḵan jin c̱inuwa. Hili uni ona bwa mo ki ta gi mo ma munyjal yis jin ’ciṯẖu/ mo ki uni mini ’tash miinyca mo ’te/ e buŋgwar is bum mo. 14 Hili mii gi wakan midi diki thoṯẖaa/ is mo mmokar ’ba/ ki ca mo isi ciki/ e cwany’ciṯẖan dhul gi Tap̱a Yesus Ḵrisṯẖos bana mo. Ki a’di mo tani mony’cesh ’koshkunu jwa mo gom aha/ mo dhali aha/ gom mony’cesh mo be. 15 Haali/ walla mo ma munyjal yis jin ’ciṯẖu/ mo tani yisa ’dap̱a’dap̱ ki toŋ kamuwa walla mo ma munyjal yis kun ’konu i e mo si’da/, hili a’di jin minu uḵ jin midi ta jin this mo be. 16 Moŋḵu’th is dhali momiimii mini ’ko ap̱o/ umi ’baar mo, um gun iikin mo e gwoŋḵan yansan mo, ap̱o/ um gun ta ’Kwani ma Israyiil kun ta ku ma Arumgimis mo be.

17 ’Peni shwane/ mo tani dhalku/ ki dhal wathin ṯal ’deŋ kamu/ bway mo mmoṯo’c aha/ bwa mo, haali/ aha/ ḵalkina adu’d gi doru aha/ goma Yesus e buŋgwar is pem mo be.

18 A’the gi Tap̱a Yesus Ḵrisṯẖos bana mo midi di e shi/in bum mo, iwaḵ pem mo. Amen.