1 Dhala Musa ta’da amanhila ma’diny ḵa’bal ma mar piti ka Rau/iil mo jin ta’da gasiis gi Pa Midyaan mo. Dhala Musa urki’da ma’diny ḵa’bal piti dhali ’ciṯẖ bway mombwaasho mo dhali p̱u’di Wosh Sinaa/ jin ta wosh jin ḵogu mo be. 2 Dhali aman’doyu/ gwo gi TAP̱A piki a’di i is ka le’dan o’d e ari bwaman cwa mo. Dhala Musa p̱arki mo e dhali merki’d mo ki cwa shwakina o’d mo dhali a’di ’konu ki kup̱ ki sule/ mo be. 3 Dhali aMusa ki kulum gwo i bwa mo ki: Atinta dina o’d ki kup̱ ari bwaman cwa yan mo kan sa/? Aha/ mina shorki is mo dhali p̱ar dhan miimer yan e mo.

4 Ki TAP̱A p̱arki mo e ka Musa ya’d mmo’dish mo is mmop̱ar mo e mo tani Arumgimis yuḵki a’di ’peni ari bwaman cwa mo ki: Musa, Musa. Dhali a’di thoḵki gwo mo ki: Aha/ dina i se mo be.

5 Dhali yan’ko’d Arumgimis ki o a’di gwo mo ki: Dhalku/ ki shor mmo’dish mo yan is mo. ’Cuḵa p̱p̱am pini ’peni sho’k mo ma haali/ mo yan jin dina /e i cine/ mo tani ta’da ’cesh jin ḵogu mo be. 6 Dhali a’di ki o a’di gwo mo ki: Aha/ tana Arumgimis gi ibabam pini jin ta’da Arumgimis ma Ibrahiim mo dhali Arumgimis ma Is/hak dhali Arumgimis ma Yakuub mo be. Dhali yan’ko’da Musa tiḵki jis em piti mo haali/ a’di ḵo/ki is mo mmohila Arumgimis mo be.

7 Dhali yan’ko’d TAP̱A ki o a’di gwo mo ki: Aha/ misha isa nyor jin wo’cki ’kwanim pem mo uni kun ’kokin mo e Pam Masir mo. Dhali aha/ ciḵkina kom buni mo gom mii gi imanjiya ṯu’c buni kun ta ’Kwani Masir mo. Dhali aha/ misha moŋ’kosh is ka nyor buni mo be. 8 Dhali aha/ thulkina ka ’cesh mo mmo’cuḵ uni ’peni me’d gi ’Kwani Masir mo. Dhali aha/ mina sus uni mo ’peni pa c̱aan mo bway mo jin ’kosh jwa mo jin isha ris embul mo dhali jin ’bor ma ’cesh ki ’bor mo. A’di ta mo jin ’kona ’kwani Paŋ Kanaan mo dhali Pa Hiṯẖṯẖa mo dhali Pa Amuur mo dhali Pam P̱aaris mo dhali Pa Hayp̱a mo dhali Pa Yabuus mo be. 9 Dhali shwane/ aha/ ciḵkina ko gi ’kwani ma Israyiil mo dhali aha/ mishkina mo jin siriju asiri’c ki sho’k jin ’kokina ’Kwani Pam Masir mmosiri’c uni ap̱o/ ki sho’k mo be. 10 Dhali shwane/ yaku/ mo ma, aha/ mina hash /e aP̱irawn mo ki /e mini mish susu ’kwanim pem ka pije/ mo, uni kun ta ’kwani ma Israyiil mo ’peni Pam Masir mo be.

11 Hila Musa thoḵki’da Arumgimis gwo mo ki: Aha/ jana/ sa/ mina ’taki ya aP̱irawn dhali susi ’kwani ma Israyiil ka pije/ ’peni Pam Masir mo?

12 Arumgimis ki thoḵ a’di gwo mo ki: Aha/ mina nyaḵ di ki /e mo. Dhali ki /e mini dili ’kwani sho’k ka pije/ ’peni Pam Masir mo tani um mini mii mii mmotaḵ aha/ e ’kuwosh yan mo. Dhali mii yansan midi ta jamas mii mo gom /e mo ki aha/ tana a’di jin hashkina /e mo be.

13 Dhali yan’ko’d aMusa ki owa Arumgimis gwo mo ki: Waḵki/ aha/ mina p̱u’dku/ e ’kwani ma Israyiil mo dhali o uni gwo mo ki: Arumgimis gi ibabam bum a’di i hashki aha/ i um mo tani uni mini doṯ aha/ gwo mo ki: Gway piti yuḵu kaja mo? Atinta i miga/ thoḵ uni mo? 14 Arumgimis ki thoḵa Musa gwo mo ki: Aha/ Be I Tana Aha/ be. Dhali a’di ki o gwo mo ki: Oyi gwo yansan e ’kwani ma Israyiil ki: Aha/ jin Tana Aha/ mo tani i hashki aha/ i um mo.

15 Arumgimis si’da/ ki owa Musa gwo mo ki: Oyi gwo yansan mo ma e ’kwani ma Israyiil mo ki: Aha/ jin tana TAP̱A jin ta’da Arumgimis gi ibabam bum mo a’di jin ta’da Arumgimis ma Ibrahiim mo dhali Arumgimis ma Is/hak mo dhali Arumgimis ma Yakuub mo aha/ i hashkina /e i uni mo. Gway pem a’dansan ki sule/ sule/ ya ye ’ba/ mo. Gway yan a’di ta ’pemen jin min ma risa nyaḵum yili heri ’baar mo ka londhoṯẖ mo be.

16 Yaku/ mo dhali tuli jwahaŋ ’kwani ma Israyiil gun jina ji isi monṯal ’de/ mo dhali oyi uni gwo mo ki: TAP̱A jin ta’da Arumgimis gi ibabam bum mo a’di jin ta’da Arumgimis ma Ibrahiim mo dhali Arumgimis ma Is/hak mo dhali Arumgimis ma Yakuub mo a’di i piki aha/ i is mo mmo/o gwo mo ki: Aha/ nyiṯẖkina um mo gom to kun miikunu um mo e Pam Masir mo be. 17 Dhali aha/ ona gwo is mo ki aha/ mina susi um ka pije/ mo ’peni mii jin woci um is she/ ’peni miiŋ ’kwani gi Pam Masir mo mmop̱u’d mo e Paŋ ḵanaan mo dhali Pa Hiṯẖṯẖa mo dhali Pan Amuur mo dhali Pam P̱aaris mo dhali Pa Hayp̱a mo dhali Pa Yabuus mo e mo jin ’bor ma ’cesh ki ’bor mo.

18 Dhali uni mini ciḵ ’twam pini mo dhali /e dhali gwany jwahaŋ ’kwani ma Israyiil um mini ii eya maliḵ gi ’kwani gi Pam Masir mo dhali o a’di gwo mo ki: TAP̱A jin ta’da Arumgimis gi ’kwani ma Ibraniyiin mo tani a’di buṯki’di aman mo. Dhali shwane/ aman doṯa /e ’twa/ mo ki /e mini dhal aman bway ki aman mina ii mo jin ḵala’da cimi kwara e mombwaasho mo ki aman mina ’ciṯẖ to e ’kus mmomiiya bas gom Tap̱a Arumgimis bam mo be. 19 Aha/ misha ka maliḵ gi Pam Masir midi diki dhal um bway mo hili isi ciki/ a’di minu gac̱ ki dhan me’d jin ’bitha’bi’th mo be. 20 Wakan aha/ mina he’th me’d pem mo dhali dor ’Kwani Masir mo ka ris miimer mo uni kun miga/ mii mo. Yan’ko’d mo tani a’di midi dhal um bway mo be.

21 Dhali aha/ mina raḵ ’kwani gwansan mmoc̱i um monyca mo. Dhali ki um mini ii mo tani um mini ’koki ii bwam me’d ’te/ mo be. 22 Up̱ ’Kwani Israyiil ka ’deṯe/ ’deṯe/ mini ii gu’b gi ’Kwani Masir kun ’dish uni is mo dhali mini doṯ to ’peni uni mo dhali ’peni uni ilu/ gun ’koni gu’b buni mo. Dhali uni mini doṯ uni dhiriny ’dolkon kush mo dhali dhiriny ’dolkon gana/ mo dhali burrinye/ mo. Dhali um mini hi’thki iya/m bum burrinye/ i/is mo dhali i’bwa/m bum si’da/ mo. Dhali um beseene/ mini bu’th mal gi ’kwani Pam Masir ki mom’bi’th bum mo be.