1 AMusa thoḵki gwo mo ki: Waḵki/ uni ’koki gam gwom pem is mo walla ciḵ ’twam pem mo dhali o aha/ gwo mo ki: TAP̱A yisa piki /e i is mo yisa tani, aha/ mina mii ata mo?

2 Dhali yan’ko’d TAP̱A ki o a’di gwo mo ki: Atinta i di’di me’d pini mo sa/? A’di ki thoḵ a’di gwo mo ki: Alukaas mo be.

3 Dhali TAP̱A ki o gwo mo ki: Biṯi a’di a’cesh mo ma. Wakan a’di biṯki a’di a’cesh mo dhali a’di warki’d ki tasha/ mo dhala Musa guski’d ’peni a’di mo be. 4 Yan’ko’d TAP̱A oki’da Musa gwo mo ki: Luŋi ma dhali buthi a’di i thin mo. Wakan a’di luŋki’d mo dhali bu’th a’di mo dhali a’di warki’d ka lukaas doḵ e mo e me’d piti mo be. 5 Wakan ki uni mini gam gwo is ki TAP̱A a’di piki /e i is mo, a’di jin ta’da Arumgimis jin ta ji gi ibabam buni mo, Arumgimis ma Ibrahiim mo dhali Arumgimis ma Is/haḵ mo dhali Arumgimis ma Yakuub mo.

6 Doḵ e TAP̱A ki o a’di gwo mo ki: Dwari me’d abor pini mo ma, dhali a’di miiki’d kan mo. Dhali ki a’di buḵki a’di ka pije/ mo tani me’d piti ’koshkina monthus mo mmokusha/ kush me’d ’thip̱iny gana/ mo be.

7 Dhali yan’ko’d Arumgimis ki o a’di gwo mo ki: Dwari me’d pini ka nyaŋ’ko’d abor pini mo. Wakan a’di dwarki me’d ka nyaŋ’ko’d abor piti mo. Dhali ki a’di buḵki a’di ka pije/ mo tani a’di dhelelkunu ka nyaŋ’ko’d mo me’d isi is pitiŋ gana/ mo be.

8 Dhali TAP̱A ki o gwo mo ki: Waḵki/ uni mini ’koki gam /e gwo is mo tani, walla ’koki c̱iya hirdhe/ ki to gi miimer jin ṯwa/a/ mo tani uni mini gam gwo is ki miimer yansan mo be. 9 Waḵki/ uni ’koki gam gwo is, isi gom to gi miimera su/ gwansan mo walla ’koki c̱iya hirdhe/ ki ’twam pini mo tani /e mini pash yi’de/ ’peni ḵumma/ yi’de/ mo dhali gac̱ a’di ap̱owa ’cesh jin ḵuthaḵu’th mo dhali yi’de/ midi war ka bas mo be.

10 Hila Musa thoḵki TAP̱A gwo mo ki: Ayy Tap̱am pem, aha/ mola gwo o ka ḵar e ki ’bore/ ki sule/ mo, ’peni nṯwa/a/ nniin wala ’peni embul jin ṯela /e mii ’pen mmowal ’twa/ ki aha/ mo. Hili aha/ diṯa ’twa/ wal ki diṯ mo mmo/o gwo mo dhala le’d c̱umpula/ c̱umpul mo be.

11 Dhali yan’ko’d TAP̱A ki o a’di gwo mo ki: Kaja a’di i uḵki ’twa/ gi wathi/ mo? Dhali kaja a’di i karki a’di mo mmota amanmol ’twa/ wal mo walla mmota ’diye/ mo walla mmomish to p̱ar e mo walla mmota aja’da/ mo? A’di diki ta aha/ mo ’taa jin tana TAP̱A mo? 12 Shwane/ yaku/ mo dhali aha/ mina di e ’twam pini mo dhali ṯor /e gwo jin mina /e i o mo be.

13 Hili aMusa thoḵki gwo mo ki: Ayy Tap̱a, hashki wathiŋ kamu/ mo ma mmomii wakan mo.

14 Dhali yan’ko’d TAP̱A diṯkina bwa ap̱o/a Musa ki ’bi’th mo dhali a’di ki o gwo mo ki: Din ma Haruun ki ta akam pini ’peni ’kwani Lawi mo ’taa? Aha/ misha ki a’di mish gwo o ki ’bore/ mo dhali a’di yayi’di bway mmogam /e ’kup̱ mo. Dhali ki a’di midi mish /e mo tani a’di mina bwa i ’bor kagahara mo be. 15 Dhali /e mini o a’di gwo mo dhali ṯor ki a’di gwo jin mina a’di o mo. Dhali aha/ mina di e ’twam pini mo dhali di e ’twam piti mo dhali ṯorki um gwo mo gom to kun mina umi mii mo be. 16 A’di midi o gwo mo gom /e e ’kwani mo dhali midi ta ’twa/ gom /e mo. Dhali /e a’di i mini wa a’di e ka Arumgimis mo be. 17 Dhali /e mini ḵala lukaas yan i me’d mo mmoṯor miimer ka ris mo.

18 Yan’ko’d aMusa doḵki’d ka nyaŋ’ko’d eya Rau/iil mo a’di jin ta’da mar piti mo dhali o a’di gwo mo ki: /E doṯga/ ’twa/ mo ki: Dhalki aha/ bway mmodoḵ ka nyaŋ’ko’d i ’kwanim pem e Pa Masir mo dhali p̱ar uni e mo waḵki/ ’kon ki e mo. Dhala Rau/iil ki owa Musa gwo mo ki: Yaku/ ki moŋḵu’th is mo. 19 Dhali ka Musa di’d e Pam Midyaan naskina/ mo tani TAP̱A ki o a’di gwo mo ki: Doḵi ka nyaŋ’ko’d e Pam Masir mo, haali/ aris ’kwani kun ŋap̱ki /e mmo’kosh jwa mo tani uni wukin mo be. 20 Wakana Musa suski ash mo dhali iya/m piti isu/ mo dhali dhu uni i ’ku thuluny mo dhali ṯel ’pen mmodoḵ ka nyaŋ’ko’d eya ’cesh gi Pam Masir mo. Dhali e me’d piti mo tani a’di ki ḵala lukaas ma Arumgimis mo be.

21 Dhali TAP̱A ki owa Musa gwo mo ki: Ki /e mini doḵ ka nyaŋ’ko’d e Pam Masir mo tani hili ki ’bore/ mmomiiya ris miimeri ’baar mo ibwambor ma P̱irawn mo uni kun c̱ikika/ /e mom’bi’th mmomii mo. Hili aha/ mina ’bi’thki a’di adum piti is me’d wosh mo, wakan ki a’di midi diki dhal ’kwani bway mo mmo/ii mo be. 22 Dhali /e mini owa P̱irawn gwo mo ki: Yase ta gwo jin ona TAP̱A ki is piti mo ki: Israyiil ta’da bwanyaraŋ gwaṯẖ pem mo be. 23 Dhali aha/ ṯora /e gwo mo ki: Dhalki ya/m pem ya’d mo ki a’di midi mii mii mmotaḵ aha/ mo. Dhali /e ushun mo mmodiki dhal a’di bway mmoya mo. Gom kan aha/ mina ’kosha bwanyaraŋ gwaṯẖ pini mo be.

24 E mo jin ishkina uni mo e bway mo tani TAP̱A gamki a’di ’kup̱ mo dhali ŋap̱ a’di mmo’taki ’kosh jwa mo be. 25 Dhali yan’ko’da Sap̱uura ki ’de’k wosh jin kaaka dhali ’ci’th ya/m piti amunyjal yis mo dhali ta aMusa sho’k piti ki a’di mo. Dhali a’di ki o gwo mo ki: /E ka jiŋ gana/ tana kaṯhim pem ka bas e aha/ mo be. 26 Gom gwo gi wakan mo tani TAP̱A dhalki a’di mo. Dhali yan’ko’d a’di waka’d mo kan me’d jin okin ma yim a’di mo ki: /E tana kaṯẖim pem ka bas mo. A’di o gwo yan goma munyjal yis jin ’ciṯẖu mo be.

27 Dhali TAP̱A oki’da Haruun gwo mo ki: Yaku/ e mombwaasho mo mmogama Musa ’kup̱ mo. Gom kan mo tani a’di yaki’d mo dhali gam a’di ’kup̱ mo e wosha turga/ ma Arumgimis mo dhali p̱i aMusa ’twa/ mo be. 28 Dhala Musa ṯorki’da Haruun aris gwo gi TAP̱A mo jin hashkina TAP̱A a’di mo. Dhali a’di si’da/ ṯorki’da Haruun aris jamas miimer mo jin ḵankina TAP̱A a’di mo mmomii mo be.

29 Dhala Musa uni ka Haruun iikin mo dhali tula ris gwanyjwahaŋ ’kwani ma Israyiil isi monṯal ’de/ mo. 30 Dhala Haruun oki’da ris gwo ’baar mo uni kun ṯorkina TAP̱A aMusa mo. Dhali a’di ki mii jamas miimer i bwambori ’kwani ’baar mo be. 31 Dhali ’kwani gamki gwo is mo. Dhali uni ciḵki gwo ki TAP̱A yaya’di ’kwani ma Israyiil mo dhali ki a’di si’da/ ta gi bwaŋ kulum ki nyanye/ gom isa nyor buni jin wo’cki uni is she/ mo. Dhali uni luŋkina luŋ mo be.