89
Yawe David ilak saruk kaolam wore ko kuamin ares maukko aira
(Ezra ko gue te kari Ethan ko wur)
1 O Yawe, ani pempem nika kua ana
nangara ko munan mu ko wur iluwekko;
ani nika den bala ale diram la karo
tuata mu ko munan mu ko pempem balu se lagarikko.
2 Ani ko ikisam, nika kua ana nangara ko munan mu kumik menara mena;
se nika den kaola ale diram la karo tuata
ko munan mu, taiti gomang iwita pempem la anirukko.
3 Ni iwita balem, “Ani kari bo angamang
tuem ale atumukirem wore ilak den kalem,
aga ura kari David ilak den iwita kalem,
4 ‘Nika gue te la pempem bo king ko aratu se lagamonko;
ani nika kuriang gue luan udagi maiya biya mu ninguru nunga bituekko.’ ”
5 O Yawe, taiti gomang te nika kiting kiwol suen la nika balu pagorsan,
se engel alo duruk wonong te bolala la
nika den bala ale diram la karo tuata ko munan mu ko nip patawusan.
6 Taiti gomang te mel bo ta nika iwita mena;
engel bibiya ni kerak wete bagara wore bo ni kerak arerem mena tala.
7 Engel bibiya laili nunguningkiri, nika
laturu guruga ale ni kerak bagara, mu nika ninguru nguangasan,
mu awuk, ni keta suanta kualala biya bagasam.
8 O Yawe, ni Kaem Sokel Garagar, bo sokel ago nika iwita mena;
nika den suen la mu diram la karo tusam.
9 Ni gagi lilim la bitaruwasam; ale
tom ko tamun bibiya duruk iwita
barasoso mu ni lila awusam ale malin tusam.
10 Ni gagi ko mel memek Rahab* Nup Rahab mu kiwem memek ngual ngual aniso wore ko balso. Nup umutang mu girakala ko dugu duap sang te aniso. Udagi Juda alo nup mu taman ale Egypt te balman. ko sokel menawurem;
iwitatala, nika sokel aora garagar mu te
kager kari memek nunga menawurem.
11 Duruk wonong se ali imi mu am nika la;
ni keta ali imi se mel suen la awote mu nungem.
12 Ni keta koma worem te basuso mu
nungem, ale aking te nama kaposo mu nungem tala.
Se duruk ilagala Tabor se Hermon mu wur te amilmil kisisan.
13 Ni yam sokel garagar!
Nika sokel mu yam aromemek se kalel biya!
14 Ni kiwem ningo diram se tutera ningo mu nika barim, te ira sanamasam;
ni ka munan me gurugusam patawusam, mena,
nika kariimet ninguru nunga kuesam,
ale ka den nunga manem mu diram la karo tusam.
15 Yawe, kariimet nika nip patawusan ale
nika munan yawara mu ko nikim ningi kerak kapetasan mu amilmilamonko.
16 Kariimet imitang mu ni ko ko pempem irua amilmil te bagasan,
ale nika munan ningo mu ko ka nip patawusan.
17 Mu awuk, ni ka nikim se ka sokel aora garagar mu te nanga sangorsam;
nika gemang motam nangara ko munan mu te nanga king nup biya tuem.
18 O Yawe, ni keta anananga karem bagasam;
ni Israel ko Kaem Laili, se ni keta king ana nangarem.
19 Girakala, ipingira bo te, nika kariimet alo iwita nunga manem,
“Ani nenenga kari nuar bo atumukirem ale sokel tuem;
nu nenenga kari dom ko bagarukko.
20 Ani aga ura kari David arigem ale tam
muguri ko welang laili mu supuling te warem, ale marak tuem.
21 Ale ani nu kuting duap ningi nunguning
iluwek ale aninga sokel nu tuek se nu sokel karogo bagarukko.
22 Kager kari memek nu ilak kagermon mu me ta kiamonko;
kariimet memek bitawara mu nu ilak me terong mamonko.
23 Ani noko kager kari memek nunga
menawurik ale awiriya nu me ko kuesan mu nunga moa parusuwurikko.
24 Ani nu angamang tuek ale ilak bagarikko;
ani pempem la nu sangik se nu sokel ago se nup biya karogo bagarukko.
25 Ani noko kingdom ulal awurek se gagi
yu luan bibiya kiaruk ale sor saki te ago namarukko.
26 Se nu aninga manuk,
“Ni aninga Ait, se aga Kaem;
ni aninga Bitua se aga Saonga Kari,” maukko.
27 Ani nu aninga kuriang kari giram bilangaram ko iwita bitirikko,
se ali imi ko king suen la nunga kiarukko.
28 Ani angamang motam mu noko pempem anirukko;
ale den nu ilak kalem mu tom suen biya anirukko.
29 Se noko kuriang gue luan udagi mu aora biya bagamonko;
noko kingdom mu taiti gomang aora biya aniso iwitata pempem anirukko.
30 “Bare noko kuriang gue aninga munan den me karo tumon,
ale munan den baluwoso iwita me karomon,
31 agi aninga den suen biya mel yam ko betemon,
ale aninga kiti guruga ko den ko me sinar tamon,
32 mu asele nunga memek koma bu nungarikko;
ani nunga memek koma yaman ikup nungarikko.
33 “Bare aninga angamang David ko kua tuata mu me ta bita taikko;
ani saruk nu ilak kanuwem mu uwutata anirukko.
34 Aninga den nu ilak kalem mu me ta kulukek,
agi ko ponor bo me ta gurugekko, mena.
35 Agata aga aip laili nunguningkiri mu te
saruk nu ilak kanuwem mu uwutata anirukko;
ani David me ta kulekko:
36 Noko kuriang gue luan maiya kaparuk ale maiyukko;
noko kingdom mu sokel tuek se tom suen biya anirukko,
worem nikim kapa lagoso iwita,
37 se sige taiti gomang te kani lagoso iwitatala.”
38 Bare Yawe, ni kari keta king ko beterem wore ko gemang magaram;
se ni nu merem ale biring tuem.
39 Nika ura kari ilak den kalem umu kulukem,
ale noko king ko kitigat mu ali gege ningi saperem.
40 Ni noko wonong ko por bibiya parusuwurem maguwurem,
se noko kawam aora bibiya mu papak mam kapa saparam.
41 Se awiriya noko sor wonong mu duap
te lage umu karo nama se, mu noko melmasak tere gi ago namasan;
se ali sor saki ko kariimet alo mu nu gusiru gilingisan.
42 Ni kari nu ilak kagerawara mu aking sokel nungarem,
se aitak nuna ninguru amilmilasan.
43 Ni noko kager ko melmasak sokel menawurem,
ale kager te nu me sangem.
44 Ni king ko sikir kuting te mu bataguru
taem, ale ko daiga kuwim patawu ali te saperem.
45 Nu kari sokel ago,
bare ni nu ikup tuem se kari garuk sokel mena iwita baga se
dolara aromemek iramuram.
46 O Yawe, ni butata anananga ko pempem nimi kaluwu se lagerko e?
Ni ana nago ko gemang butata tama ko kani se lagarukko e?
47 Anananga marak bagara ko tom mu tukunangta wore ni ko ikiko;
ana ali ko kariimet nanga nungem se tom bo te kuenakko!
48 Kari awuk wore me kueruk pempem marak bagarukko ya? Mena.
Ana suen la kuenak ale mutim ningi iwi namanakko pa!
49 O Biya, girakala ni ninguru nanga kuakasam, bare aitak awuk?
Ni David ilak saruk kanuwem mu ko kamili saparam agi?
50 Ana nika ura kariimet se den dolara gisan mu ko kamili me saparukko;
me ikia alo den ikup nangarsan se yam giwasan mu ko ikiko.
51 O Biya, kari king ilak kagerawara alo mu den dolara manorsan!
Ale nu apareyate namoso agi taiso wore den ikup la tusan.
52 Yawe, ana nika nip pempem la patawu se laganakko!
Nunguningta! Nunguningkiri!
*89:10: Nup Rahab mu kiwem memek ngual ngual aniso wore ko balso. Nup umutang mu girakala ko dugu duap sang te aniso. Udagi Juda alo nup mu taman ale Egypt te balman.