90
Ana kariimet nanga bagara mu tom tukunangta, bare Kaem mu kumik menara mena
(Kaem ko kari Moses ko guranek)
1 O Biya, ni anananga bagara kuwim ningo;
anananga girigir alo nunga tom te, tai
aitak, se pempem la butata bagerko.
2 Duruk ali se mel suen la me aratu namaman ko tom te la,
ni Kaem kimik menara mena butata bagasam.
3 Ni balsam se ana kariimet aking kupkup ko geragasan;
ale balsam, “Nina kariimet ko gue, nina kueral ale ali ko aralko!”
4 1000 yia mu nika ikia loagara te mu
kowarkalal suanta se tairate nama menaso iwita;
agi sor ko bitua kari tirom sor bitaruwoso se tairate ukiso iwitatala.
5 Agi kariimet ipingisan ale tairate
nungamili sapa namoso iwita, ni nanga sarumu warsam.
Agi diri turomola wakala yawara beteso ale ulaloso,
6 bare bainga ningi mu kusuga namoso iwitatala.
7 Nika gemang magara mu tama kuamili iwita nanga lakumam,
se ana ninguru nguangasan.
8 Ni anananga kiwem memek mu suen la ari sapasam,
ale anananga memek yumura la betesan mu agotala ari sapasam.
9 Anananga bagara ali imi te mu nika
gemang magara bowa ningi baga lagasan;
ale nanga nangamang bataga se niara mu ago eng kua namasan.
10 Ana yia 70 iwita ko bagasan,
se bo sail tagiso mu yia 80 taso;
bare yia suen la mu ningi mu yaman ikup karogo la,
se yia mu tairate menaso se ana mena namasan.
11 Awiri nika gemang magara mu ko iki saparukko terong? Mena.
Nika gemang magara ko sokel mu aora
biya, se ana mu ko iki se nika nguanganakko.
12 Ana tom maiya biya ali imi te me baganakko;
mu ko ni ninguru nanga kasuru se,
ana mu te ikia ningo nuam tanakko.
13 O Yawe, tom awila nunguningkiri nika gemang magara anirukko?
Ana nika kariimet gemang lila nangaruko.
14 Ni turomola pempem ka kua nangara ko munan mu te, nanga sangaruko;
se mu te ana marak baga se mu,
wur ilu se amilmil kisu se laganakko.
15 Ana tom suen biya ikup nangaru lagerem, uwutatala aitak amilmil nangaruko;
ana yia suen biya baga maguwu lagaman,
uwutatala aitak mu amilmil karogo baga se laganakko.
16 Aitak nika ura bibiya sokel karogo mu, ana nika kariimet nanga kasuruko;
ale nika sokel aora garagar nikim karogo mu,
anananga kuriang imas ago nunga kasuruko.
17 O Biya, ni anananga Kaem, ka gemang lila nangaruko;
se anananga ura mel kasik la betesan mu ningo la aratukko;
butata marak sokel tui se aratu nangarukko.