1 Me yan i bangiyal’ me tolangnag Xerxes ni Pilung be’ nib mo’on ni Haman fithingan nge tay ko fare liw ni kemang tolang u lan e gin ma gagiyegnag. I Haman e be’ nib mo’on ni fak Hammedatha ni be’ ni owchen Agag. 2 Me yog fare pilung ngak urngin e pi tolang ni yad ma maruwel rok, ni ngar daged ngak Haman ni yad be tayfan, ni aram e ngar ragbuggad nga but’ ngar siro’gad ngak. Yad gubin nrin’ed ni aram rogon, kemus ni go’ Mordekai e de rin’. 3 Me fith boch e tolang ko maruwel rok e en pilung ngak Mordekai ko mangfan nder fol ko tin keyog fare pilung’; 4 gubin e rran nu ur gelfen gad ngak ni nge ragbug’, machane de motoyil ngorad. Me welthin ngorad ni ga’ar, “I gag e gu ba Jew ni dabiyag ni nggu siro’ ngak Haman.” Ma aram miyad yog e ran’ey ngak Haman ni yad be tafinaynag ni sana yug ra fek Haman owchen ko tin be rin’ Mordekai. 5 Nap’an ni nang Haman ni der ragbug Mordekai nga but’ nge siro’ ngak mri damumuw, 6 ma nap’an niki nang ni Mordekai e ba Jew me duwgiliy ni gathi go’ Mordekai e nge gechignag. Me leamnag ni nge thang mit gubin e Jew ni bay u tan e gagiyeg rok yu Persia.

7 Lan ragag nge l’agruw e duw nike gagiyeg Xerxes ni Pilung, u lan e pul ni ta’reb ni aram e pul ni Nisan, me yog Haman ni ngan girengiy e pow (ni “Purim,” ni yad ma yog) ni nge duwgiliy e re rran nge re pul ni bfel’ ni ngan rin’ fa pin’en ni ka ni makathnag. Ma aram me muduwgil ni rofen ni ragag nge dalip fen ko pul ni ragag nge l’agruw ni aram e pul ni Adar.

8 Aram me yog Haman ngak fare pilung ni ga’ar, “Bay bmit i girdi’ ni yad ba wear u daken gil’ilungum ni ga’ngin ni yira piri’egrad u lan urngin yang e pi nug ni ga ma gagiyegnag. Pi yalen rorad e yug ba thil nga yalen gubin e girdi’. Ma ku reb e darir ma folgad ko pi motochiyel u lan gil’ilungum, ere de fel’ ni ngam fek owchem rorad. 9 Fa’anra ba m’agan’um ngay i gur Pilung ma ga ngongliy ba motochiyel ni ngan thang e pogofan rorad. Fa’an ga ra rin’, ma gu be micheg ngom ni gu ra pi’ 375 e ton e silber ngom ni ngam tay ko chubgil ko pilung ni ngan maruwel ngay u lan gil’ilungum.”

10 Me luf fare pilung e luwaw rok ni bay e pow rok riy, nge pi ngak Haman ni fare togopluw rok e pi Jew, ni aram fare mo’on ni fak Hammedatha, ni reb i owchen Agag. 11 Me ga’ar fare pilung ngak, “Girdi’ nge salpiy rorad e fanam; mu rin’ e tin ni ga ba’adag ngorad.”

12 Aram, me rofen ni ragag nge dalip ko bin m’on e pul me pining Haman e pi tayol rok e en pilung nge yog ngorad ni ngar yoloyed e babyor ni ngan pilyeg e thin riy nga gubin mit e thin ni yima yog u ga’ngin gil’ilungun fare pilung, mi ni pi’ nge garer ko gubin e pi’in yad ma gagiyeg, nge pi governor, nge pi tolang ko salthaw. Yungi babyor nem e fithingan fare pilung i Xerxes e ni tay nga daken, mi ni pag e hung rok nga daken ni fare luwaw rok e ni fanay ngay. 13 Girdi’en e mil e ra feked e yungi babyor ney nga gubin yang e nug u lan gil’ilungun fare pilung. Bay riy ni kanog ni rofen ni ragag nge dalip ko pul ni Adar e ngan thang e fan rok gubin e Jew, ni fel’ yangren nge pilbithirl, nge ppin nge bitir. Yira li’rad ko saydon ni dab ni runguyrad mi ni fek rorad e tin nib milfan ngorad. 14 Pin’en ni bay u lan fa yungi babyor ni kan duwgiliy ni ngan rin’ e go’ ngan weliy u gubin yang e nug, ni bochan e nge be’ me t’armadlin ko rofen nem ni ba yib.

15 Me yog fare pilung ni ngan fanay fare bbugithin ni ka ni yoloy ngan weliy u lan yu Susa ni aram fare tochuch, ma girdi’en e mil e ra feked fare thin ko pi nug i yan. Me par fare pilung nge Haman nga but’ ngar unumew ban’en e ngiyalin’em ni girdi’ nu Susa e be wagegey laniyan’rad komang e yi be rin’.