1 Nap’an ni na’ab Mordekai nga urngin e pin’en ni kan rin’, ma gelngin e kireban’ ni yib ngak me guchthiy e mad rok, me yin’ e mad ni tutuw, me af e awat nga daken lolgen, me yan u lan fare binaw, nike pag laman ngalang ni be yor, 2 nge yan i mada’ ko garog u tafen e pilung. De yan nga naun ni bochan e dabiyag ni ngan pag be’ nike yin’ e mad ni tutuw nge yan nga naun. 3 Gubin yang e yungi nug nrung’aged fare thin nike yog fare pilung, me yor e pi Jew riy ngalang. Miyad pag e abich, miyad yor ni yad be dololoy’, ma bo’or i yad ni yon’ e mad ni tutuw miyad mol nga fithik’ e awat.

4 Nap’an ni yog e pi tapigpig ni ppin nge eunuch rok Ester ngak e n’en ni be rin’ Mordekai me magfan’. Me pi’ boch e mad nge yan ngak Mordekai ni nge yin’ ma dabki yin’ e mad ni tutuw, machane de fek Mordekai fapi mad. 5 Ma aram me pining Ester i Hathach, ni’ir reb fapi eunuch nu lan fare naun rok e pilung nike mel’eg fare pilung ni nge mang tapigpig rok Ester, me yog Ester ngak ni nge yan ngak Mordekai nge nang ko mang e ke buch nge mangfan. 6 Me yan Hathach ngak Mordekai nga lukngun e binaw ko garog ni yan nga tafen e pilung. 7 Me yog Mordekai ngak gubin e tin ke buch rok, nge urngin e salpiy nike micheg Haman nra tay ko chubgil ko pilung ni fa’an yira thang e pogofan rok gubin e Jew. 8 Me pi’ ngak Hathach bang fapi babyor ni murung’agen, ni kan be’eg u Susa ni be yog ni ngan thang mit e Jew. Me yog Mordekai ngak ni nge fek i yan ngak Ester, me weliy rogon ngak, me yog ngak nge yan i wenig nagrad girdi’en ngak fare pilung nge runguyrad. 9 Me rin’ Hathach ni aray rogon, 10 me pi’ Ester e re thin ni ba’aray ni ngan fek i yan ngak Mordekai: 11 “Demturug be’ nib pumo’on fa be’ ni bpin nra yan ngalan e yoror ni nge guy e pilung ni dawor nni pining, ma yira thang e pogofan rok ni dariy e maruwar riy. Ara’rogon e motochiyel; gubin e tafanow ko pilung nge girdi’ ma manang e re motochiyel nem. Ta’ab kanawo’ e ra liyeg ko re motochiyel ney: fa’anra paluweg fare pilung e sog rok ngak be’, ma aram e facha’ e dabkun thang e pogofan rok. Me gag e ke gaman reb e pul ni daworki piningeg pilung ni nggu wan gguy.”

12 Nap’an ni taw e thin rok Ester ngak Mordekai, 13 me ginaeng Ester ko re thin ni ba’aray ni pi’ nge yan ngak: “Dab mu tafineynag ni gur u fithik’ e pi Jew e dabi buch ban’en rom, ni bochan e ga bay u tafen e pilung. 14 Fa’anra dabmog ban’en ko ngiyal’ney, ma ayuw e ra yib u tharmiy ngak e Jew, ni dabi buch ban’en rorad, machane gur nge chon e tabnaw ko chitamam e go’ ra math owchemed. Mini’ e manang — sana bochan e ngiyal’n’ey nra taw ngay ma aram fan nim mang queen!”

15 Ba’aray e fulweg ni pi’ Ester nge yan ngak Mordekai: 16 “Mman ngam pining gubin e Jew nu lan yu Susa nga ta’bang; mi gimed pag e abich ngam meybil nigedgag. Dab mu ked fa mu unumed ban’en ni dalip e rran nge dalip e nep’. Pi tapigpig rog ni ppin nge gag e ku bay gu rin’ed ni aray rogon. Ma nga tomuren e bay gu wan ngak fare pilung, ni yugu aram rogon ni ba togopluw ko motochiyel. Fa’anra thingar gum’ ni bochan e ren’ey ni kug rin’, me ere kefel’ nggum’.”

17 Ma aram me chuw Mordekai nge yan i rin’ urngin e pin’en keyog Ester ngak ni nge rin’.