42
Fare tapigpig rok SOMOL
1 Be ga’ar SOMOL,
“Ba’aray e tapigpig rog ni ku gu pi’ gelngin,
ni fa’anem ni gag e kug turguy ni ir e bfel’ u wun’ug.
Ku gu suguy ko kan nthothup rog,
bayi fek e tin nib yal’uw i yib ngak urngin e nam.
2 Dabi tolul ma dabi ga’nag laman,
ara i welthin ni ba ga’ laman u lan e yu pa’ i kanawo’.
3 Dabi thal’uy ba ley i ro’uy nike m’ing,
ma dabi thang ba magal ni be n’en ni nge math.
Tin ra i par nib yal’uw e bayi fek i yib ngak urngin e girdi’.
4 Dabi mulan’ ma dabi pag ir,
ma tin nib yal’uw e bayi tay nga fayleng.
Pi nam nib mal’af e ri yad be sonnag e machib rok.”
5 Got e sunumiy lanelang me filath;
me sunumeg e fayleng nge urngin e tin nib fos ni bay riy;
me pi’ e yafos nge pogofan ngak urngin e girdi’ riy.
Ma chiney e SOMOL ni Got e be ga’ar ngak e tapigpig rok, Act 17:24, 25
6 “I Gag SOMOL e kug piningem ku gu pi’ gelngim
ni ngam guy rogon ngam rin’ e tin nib yal’uw u fayleng.
Ngug ngongliy bm’ag u thilmad urngin e girdi’ ni nggu rin’ u dakenam;
bay gu pi’ e tamilang ngak e pi nam u dakenam. Isa 49:6; Luk 2:32; Act 13:47; 26:23
7 Bay mu bing lan mit e pi malmit,
ma ga chuweg u kalbus e pi’in yad be par riy u fithik’ e lumor.
8 “Kemus ni Gag e SOMOL ni Got rom.
Dariy yugu reb e got ni ta’reb rogomow;
dab gu pag e pi liyos nganog e sorok ngorad ni aram e kan unegrad ngog.
9 Pin’en ni kug yi’iynag e ke yib i m’ug e chiney nib riyul’.
Chiney e nggu weliy ngomed boch ban’en nib be’ech
u m’on ndawori m’ug.”
Ba tangin e sorok
10 Mon’ed ba tang nib be’ech ngak SOMOL;
fayleng ni polo’, mu tanggad ni gimed be pining e sorok ngak!
Gimed e pi’in gimed be milekag u lan e day, mpininged e sorok ngak;
gimed urngin e yafos nu maday, mpininged e sorok ngak!
Gimed e pi nam ni gimed bmal’af nge girdi’ ni be par riy e ngam tanggad!
11 Ted ni desert nge yochi binaw riy e ngar pininged e sorok ngak Got;
girdi’ nu Kedar e ngar pininged e sorok ngak!
Pi’in yad be par u lan e binaw nu Sela
e ngar tolul niged e felfelan’ u p’ebugul e pi burey!
12 Pi’in yad be par ko pi nam nib mal’af
e ngar pininged e sorok ngak SOMOL miyad tay fan!
13 SOMOL e ke yan ni nge mael nrogon be’ nib falu’ ma ba sorok;
ke fal’eg rogon ni fan ko mael.
Bayi tolulnag ni ngan mael;
me dag gelngin nib togopluw ngak e pi to’ogor rok.
Got e be micheg nra ayuweg e girdi’ rok
14 Be ga’ar Got,
“Ke n’uw nap’an ni ug par ni kug th’ab gulungag;
nda ug fulweg lungun e girdi’ rog.
Machane ngiyal’ ni nggu maruwel riy e ke taw nga nap’an e chiney;
gu be non ni ba ga’ lungug ni bod be’ ni bpin ni nge gargel.
15 Bay gu kirebnag e yochi burey nge pi burey,
mu gu mororoynag e pan nge gek’iy riy.
Bay gu gagiyegnag e pi loway ni bay e lul’ riy nge ngal’ ni yungi ted ni desert,
mu gu gagiyegnag e pi lipath nge par nike mlik’.
16 “Girdi’ rog ni yad ba ma’ew e bay gu pow’iyrad
u daken yu pa’ i kanawo’ ndawor ra milekaggad riy.
Lumor ni yad be par u fithik’ e bay gu pingeg nge ngal’ ni tamilang,
ma yungi n’en nib mododongol ni bay nga m’on rorad e bay gu pacheag.
Pin’ey e gu micheg,
ni ri gu ra rin’.
17 Urngin e pi’in yad be toer ngak e pi liyos,
ni kar ted e liyos nike mang got rorad
e bay ra tamra’gad nike m’ayfarad.”
Yu Israel nde mit ban’en ngorad
18 I SOMOL e be ga’ar,
“Motoyilgad, gimed e pi girdi’ baling!
Gimed e malmit, mu uthumed e changar romed!
19 Gur bay be’ ngabang ni kab gel e ma’ew rok ngak e tapigpig rog,
kab gel e baling rok ngak e en ni gu l’oeg nge yib i yog e thin rog?
20 Israel, pire’ ban’en ni kam guy,
machane mang fan u wun’um?
Bay telim ni ngam rung’ag ban’en ngay,
machane ba mang e ka mu rung’ag?”
21 I SOMOL e ba Got ni ba’adag ni nge chuwegem u pa’ e to’ogor rom,
ere ba’adag ni ngan tayfan e motochiyel nge thin rok.
22 Machane chiney e ka ni fek e chugum ko girdi’ rok u fithik’ e yargel;
kan lok nagrad u lan e kalbus ni bay u tan e but’
ma kan mithagrad nga kalbus.
Ka ni fek e chugum rorad u fithik’ e yargel,
ma dariy be’ ni nge yib i ayuwegrad.
23 Mini’ e aromed ni bayi motoyil ko pin’ey?
Rayag ni ngam fal’eged e motoyil e chiney i yan ngaram?
24 Mini’ e ke pi’ yu Israel nga pa’ e to’ogor rorad ka ni fek e chugum rorad?
I SOMOL, ni ir e ud denengad nib togopluw ngak!
Da ud pired nrogon ni ba’adag ni ngad pired
ara u da folgad ko machib rok.
25 Ere gagiyeg nagdad ngad thamiyed gelngin e damumuw rok,
ngad gafgowgad u fithik’ e mael.
Damumuw rok e bod ba nifiy ni yan u lan yu Israel ni ga’ngin,
machane da ud nanged fan;
dariy ban’en ni mit ngodad riy.
DRAFT VERSION — Proofreading in progress