49
Israel, e ir e tamilang ngak e pi nam
1 Mu telmed ngog e pi nam nib mal’af,
ni gimed e girdi’ ni mal’af!
Dawor ni gargel nigeg ma ke mel’egeg SOMOL,
me turguyeg ni nggu mang tapigpig rok.
2 Me gagiyegnag e thin rog nge bod feni m’uth ba saydon;
me yororiyeg nga pa’.
Me ngongliyeg ni gu bod ba gan e gat’ing
nib m’uth nrayag ni ngan maruwel ngay.
3 Me ga’ar ngog, “Israel, i gur e tapigpig rog.
Girdi’ e bay ra pininged e sorok ngog ni bocham.”
4 Me lungug, “Ku gu maruwel, machane bm’ayfan.
Gelngig e kem’ay, ma dariy ban’en nike yib riy.”
Machane kug pag fan urngin ban’en nga pa’ SOMOL;
bayi pi’ puluwog ko tin gu be rin’.
5 Dawor ni gargel nigeg ma ke mel’egeg SOMOL;
ke teg ni nggu mang tapigpig rok ya nggu fulweg e girdi’ rok,
ni nggu fulweg e girdi’ nu Israel ni ka ra weargad i yan.
I SOMOL e gagiyegnag ngan tayfag;
ir e en ni be yib gelngig rok.
6 I SOMOL e ga’ar ngog,
“Bay reb e maruwel ni ba ga’ ni ngam ngongliy i gur e tapigpig rog.
Gathi kemus ni bay mfulweg e tin ke magey e girdi’ nu Israel nga rogorad,
ya bay kug gagiyeg nigem ngam mang ba magal ngak e pi nam,
ya ngan nang u fayleng ni ga’ngin kanawo’en mi ni thap ngog.” Isa 42:6; Luk 2:32; Act 13:47; 26:23
7 Got rok yu Israel nib thothup ni ir e ke biyuliyrad e be ga’ar
ngak fa’anem nri yibe darifannag, ma be fanenikay e pi nam daken, me ir e tapigpig rok e pi pilung:
“Pi pilung e bay ra guyed gur ndakuriy be’ ni ga bay u tan pa’
miyad yib ngar ted fam;
ku er rogon e pi’in yad ma gagiyeg ni bay ra guyed
miyad paraw nga but’ ngar ted fam.”
Bayi yodoro’ ya SOMOL e ke mel’eg fare tapigpig rok;
ma Got rok yu Israel nib thothup e ma tay e thin rok u gil’.
Jerusalem nni fulweg nga rogon
8 SOMOL e be ga’ar ngak e girdi’ rok,
“Ra taw ko ngiyal’ ni nggu ayuwegmed ma bay gu runguymed,
mu gu fulweg lungmed ni gimed be wenig ngog ni nggu ayuwegmed.
Bay gu matanagiymed mu gu yoror romed,
mu dakenmed e ngu ngongliy ba m’ag riy ngak urngin e girdi’.
Bay gu fulwegmed bayay
ngalan e nam romed nike par e chiney ni kann’ag. 2 Kor 6:2
9 Bay gog ngak e pi kalbus ni lungug, ‘Ka ni pagmed!’
Ma pi’in yad be par u fithik’ e lumor e bayi lungug ngorad,
‘Mired nga tamilang!’
Bay ra boded e saf ni be kay e pan u daken yochi burey;
10 ni dabki yib e bilig nge belel ngorad.
Yal’ nge gowelngin e yal’ u lan e ted ni desert e dab ku ra gafgowgad riy,
ya fa’anem ni yad bt’uf rok e bay i pow’iyrad.
Bayi pow’iyrad nga bogi alublub. Rev 7:16, 17
11 “Bay gu ngongliy ba pa’ i kanawo’ ni ba ga’ nge yan u daken e pi burey i yan,
ni nge milekag e girdi’ rog riy.
12 Girdi’ rog e bay rabad u orel,
ko lel’och nge ngal
nge binaw nu Aswan* ASWAN: Binaw ni immoy u lan e yimuch u Egypt, ni pire’ yu Israel ni i par riy. ni bay ko yimuch.”
13 Lanelang, mu tang! Fayleng, mu tolulnag e felfelan’!
Me tang e pi burey!
Ya SOMOL e bayi fal’eg laniyan’ e girdi’ rok;
bayi runguy e girdi’ rok ko gafgow ni yad be tay.
14 Machane girdi’ nu Jerusalem e lungurad,
“I SOMOL e ke n’agdad!
Ke pag taldad.”
15 Me fulweg SOMOL ni ga’ar,
“Gur rayag rok be’ ni bpin ni nge pag talin fak ni kabran
ma dabi t’uf rok e re tir nem ni ir e gargeleg?
Gomang e ra pag be’ ni bpin talin fak,
machane gag e dab gu pag talimed.
16 Jerusalem, rdabiyag ni gu pag talim,
ku gu yoloy fithingam ngalan pa’ag.
17 “Pi’in ngar fulweged gur nga rogom e dabki n’uw nap’an miyad taw,
ma pi’in ra kireb niged gur e bay ra chuwgad.
18 Mu sap i yan nga mu guy e n’en ni yibe rin’.
Girdi’ rom e yad be mu’ulung ni ngar sulod nga taferad.
Rogon feni riyul’ ni Gag fare Got ni gu be par ni gub fos,
e aram rogon feni riyul’ ni bay mu felfelan’ ngak e girdi’ rom,
bay mu felfelan’ ni bod gelngin e felfelan’ ni tay be’ ni bpin ko nunuw rok nnap’an ni nge mabgol!
19 “Nam rom e ni kirebnag min n’ag,
machane chiney e bay yan i aw ni kayigi achig,
ya pi’in bay rabad ni ngar pired riy e yad bpire’!
Ma pi’in ra kireb niged gur
e ri bay ni mal’af nagrad rom.
20 Girdi’ rom nni gargelnag u yugu reb e nam ni um pired riy ni ka mu kalbusgad
e bayi reb e rran me lungurad ngom,
‘Re nam ney e kayigi achig,
thangri ga’ boch nge bung e par riy!’
21 Ma aram e bayi lungum ngom,
I mini’ e ke gargeleg e pi bitir ney ni nggu fakay?
I mul pifakag u pa’ag, mu gu par ndabkiyag ni gu diyen,
nchuwegeg ko nam rog mi ni kalbus nigeg,
ere mini’ e chuguliy e pi bitir ney?
Ni pageg ngu’ug par ni go’ gag, ere uw e yib e pi bitir ney riy?”
22 Be ga’ar SOMOL ni Th’abi Tolang ngak e girdi’ rok:
“Bay gu furuy pa’ag ni nge guy e pi nam,
miyad fek pifakam i yib nga tabinaw rom.
23 Ra par e pi pilung ni yad e ra pofed gur,
ma pi le’engirad e bay ur tathuth niged gur ni bod rogon e chitiningiy.
Bay ra parawgad u p’eowchem ngar ted fam;
ma bay ra ted fam u fithik’ e sobut’an’.
Ma aram e bay mu nang ni Gag e SOMOL;
dariy be’ ni be son nageg ni nggu ayuweg nra m’ingan’.”
24 Gur rayag ni nga ni fek rok ba salthaw e tin ni fek ko mael?
Gur rayag ni ngan chuweg e kalbus u pa’ be’ nib yargel?
25 SOMOL e fulweg ni ga’ar,
“Ri aram rogon ni bay nrin’.
Pi kalbus ni bay u pa’ e pi salthaw e bay nchuweg u pa’rad,
ma pin’en ni fek fa’anem nib yargel u fithik’ e mael e bay ni chuweg u pa’.
Bay gu cham ngak e en nra cham ngom,
ma bay gu chuweg pifakam u pa’ e to’ogor rorad.
26 Bay gu gagiyegnag e pi’in yad be gafgow nigem nge mang yad e ur li’ed yad;
gelngin e mathang pogofan nge damumuw ni bayib ngorad e bay ra balyanggad ngay ni gowa karm’ad ko rrum.
Ma aram e gubin e girdi’ e bay ra nanged ni Gag e SOMOL,
ni gag e gu chuwegmed u pa’ e to’ogor romed.
Bay ra nanged ni gag fare Got nu Israel nib gel gelngig.”
49:6 Isa 42:6; Luk 2:32; Act 13:47; 26:23
*49:12 ASWAN: Binaw ni immoy u lan e yimuch u Egypt, ni pire’ yu Israel ni i par riy.
DRAFT VERSION — Proofreading in progress