1 Biluxe byui' né si Jesús ca binni que diidxa', biree uyé Capernaum. 2 Ne raqué nabeza ti capitán romanu, napa ti mozo nabé nadxii. Peru huará mozo que dede mayaca gati'. 3 Ora bina diaga capitán que cayuí' cabe stiidxa Jesús, biseenda chupa chonna xaíque sti ca judíu chi naba Jesús gueeda usianda mozo que. 4 Ora yendá cabe ra nuu Jesús bizulú cabe cayabi cabe laa:

―Biá la' capitán ca, Señor. Ucané laabe purti nacha'hui be. 5 Nadxii be binni laanu. Laape be bisenda ucuí be xhyu'du du ndaani guidxi ri'.

6 Para biree Jesús ziné laacabe. Nécati mayaca chindá cabe ra yoo que, biseenda capitán que chupa xhamigu chi tidxi Jesús:

―Señor, cadi gapu dxiiña gueda ndou de ralidxe', purti iruti naca'. 7 Nga runi nin qué ñune pur niree naa pia' niyube lii. Uní' si, ne zacá zianda mozo stinne'. 8 Purti naa ca' nanna ximodo ni. Napa tu runi mandar naa ne napa tu rune mandar. Pa gabe tobi: “Uyé rarica'”, zie. Gabe stobi: “Gudá' rarí'”, zeeda. Ne pa useenda mozo stinne chi guni xiixa la? zuni.

9 Nabé bidxagayaa Jesús de ni uni' capitán que, ne biiya dxi irá binni nanda laa, ne na:

―Laguuya si pabiá' fe napa hombre ri', nin lade cani za de Israel qué huadxela tu napa fe bia' napa be.

10 Ne ora yendá cani yeyubi Jesús yoo, ma bianda binni huará que.

11 Qué nindaa de ngue biree Jesús, ze ti guidxi huiini lá Naín, nanda ca discípulu ne xcaadxi binni. 12 Ora yendá uriá guidxi que, biiya ziucaachi cabe ti gue'tu', tobi lucha xiiñi ti viuda. Ne stale binni guidxi que ziucaachi gue'tu que. 13 Ora bi'ya be gunaa que biá be laa ne rabi be laa:

―Cadi gu'na lu'.

14 Ne bidxiña be uda'na be cajón que, para biaana dxi cani nua ni que. Oraque rabi be gue'tu que:

―Biasa, xiiñe'. Canié nia lii.

15 Oraque biasa hombre huiini que ne bizulú cani'. Para bidii be laa jñaa. 16 Ora bi'ya irá binni que ni guca', nabé bidxibi ca' ne bizulú ca cudii ca diuxquixe Dios, ne na ca':

―Ma biree ti profeta nandxó' lade nu. Ma zeda gacané Dios ca xpinni.

17 Idubi naca Judea ne ca guidxi huiini nuu gaxha bireeche stiidxa Jesús.

18 Gudxi ca discípulu sti Juan laa irá ni guca que. Para guridxi chupa de laacabe, 19 biseenda chi naba diidxa Jesús pa laa nga Cristu ni nexhe gueeda o pa zabeza cabe stobi. 20 Casi yendá cabe ra nuu Jesús bidxiña cabe laa ne rabi cabe laa:

―Biseenda Juan Bautista laadu, zeda naba diidxa du lii pa lii nga Cristu ni nexhe gueeda o pa zabeza du stobi.

21 Ora pe yendá cabe raqué cusianda Jesús stale binni huará ne binni ni napa yuuba', ne cabee binidxaba de binni, ne cusiná cani nacheepa lú. 22 Para na rabi laacabe:

―Lachitidxi Juan irá ni biiya tu ne ni bina diaga tu. Lagüi' né laabe ma riná cani nacheepa lú, ma rizá cani nachiita ñee, ma bianda cani gupa lepra, ma runa diaga ca diaga cuaata', ne bibani ni ma guti, ne ma cayuna diaga ca pobre stiidxa Dios. 23 Dichoso cani guni cre Dios biseenda naa.

24 Biree si cani biseenda Juan que ze', byui' né Jesús ca binni que de Juan, na rabi laaca':

―Tu yeguuya tu ndaani gui'xhi'. Ñee yeguuya tu tobi ni ruluí' ti gueere lase ni uniibi bi laa ladu na la? 25 Pa cadi nga la? tu yeguuya tu ya'. Ñee yeguuya tu ti hombre zuchaahui la? Peru laatu nanna tu cani zuchaahui ne cadi cayaadxa laa gasti la? cadi nabeza ndaani gui'xhi sinuque ndaani lidxi rey. 26 Lagabi naa tuu nga yeguuya tu. Ti profeta la? Nga nga laani, ne jma pe que ti profeta. 27 De Juan nga ruzeete Xqui'chi Dios ra na:

29 Ora bina diaga ca binni que ni na Jesús, na ca jneza runi Dios. Cani uni' ni la? nga cani unaba cu' nisa Juan laaca', ne lade cabe zeeda caadxi ni ruquixe impuestu. 30 Peru ca fariseu ne ca maistru de ley qué nizaala'dxi ca ni ma gudixhe Dios para laaca', ne qué ninaba ca niguu nisa Juan laaca'.

31 ―Tu zanda usaca nu ca binni nuu yanna ri', na Jesús.

―Tu ruluí' cabe. 32 Zeda gune laacabe casi ca xcuidi riguite luguiaa. Ma cucaa ridxi ca ni caguite né ca': “Bixhidxi du saa peru qué niná tu nuyaa tu, ne bixhidxi du son gue'tu' peru qué niná tu ñuuna tu.” 33 Zacá nga laatu. Beeda Juan Bautista, qué ro, qué re' vinu ne na tu nuu né binidxaba'. 34 Yanna ma benda lade tu, naa nga Hombre Biseenda Dios. Rahua' ne ree', ne na tu nalaya' ne binigüé' naa ne ridxaaga ca malu ni ruquixe impuestu ne cani qué rulabi ley. 35 Nga na tu laatu peru cani riene la? rusihuinni jneza runi Dios.

36 Bini invitar tobi de ca fariseu que Jesús chi to né gueta ralidxi. Para guyé Jesús ne gurí ruaa mexa'. 37 Ndaani guidxi que nabeza ti gunaa canazá si. Ora gunna be cayó Jesús gueta ralidxi fariseu que, yené be ti frascu dxá aceite rindá' naxhi. 38 Casi biuu be guri be xa ñee Jesús ne bizulú be cayuuna be. Gudiibi be ñee Jesús irá nisa biete lú be ne bicuiidxi né be ni guicha ique be. Gudó be bixidu ni, ne bichá be aceite rindá' naxhi que ni. 39 Ora bi'ya fariseu que xi cayuni be, na:

―Pa ñaca dxandí profeta ndi la? ñanna gunaa canazá si caga'na laa.

40 Oraque na Jesús, rabi fariseu que:

―Simón, napa xiixa gabe lii.

―Xi laa, Maistru, na.

41 Para rabi be laa:

―Uyuu chupa hombre bizaabi ni ruquixe vueltu. Tobi que bizaabi gaayu gayuaa denariu, stobi que cincuenta si. 42 Peru qué gapa cabe ni quixe cabe ni, para bixhá hombre que lá cabe ti ihuinni ma cadi naquiiñe quixe cabe ni. Yanna gudxi naa uná de laacabe jma nadxii laabe.

43 Para na Simón:

―Para naa la? ruluí' ni jma bizaabi stale que.

―Jneza, rabi be laa.

44 Ne biiya dxi be gunaa que, ne bigueta rabi be Simón:

―Biuaa rali'dxu ne qué nudiiu nisa ña'ri ñee', peru biiya gunaa ri gu'yu', gudiibi ñee ne nisa biete lú ne bicuiidxi né ni guicha ique. 45 Qué ño lo bixidu deche naya', peru laabe dede biuaa qué huayaana dxi be de go be bixidu ñee'. 46 Ne qué niguu lu aceite ique', peru laabe bichá be aceite rindá' naxhi ñee'. 47 Nabé huachee be peru ma bixhaya stonda be, nga runi nadxii be naa de idubi ladxidó' be. Peru cani huaxié' stonda rixá la? huaxié' ranaxhii ca'.

48 Ne óraque na Jesús, rabi gunaa que:

―Ma bine perdonar lii.

49 Bizulú nda cani zuba né Jesús ruaa mexa que uní' saa ca na ca':

―Tu hombre ri' zanda guni perdonar binni.

50 Peru na Jesús rabi gunaa que:

―Bilá lu purti bini cre lu'. Sicarú uyé.