1 Qué nindaa de ngue biree Jesús, canazá ca guidxi ro' ne guidxi huiini', canayuí' né binni modo runi mandar Dios. Ne doce apóstol stibe que canazá né laabe, 2 ne cadi laasi ca' sínuque ne caadxi gunaa ni bisianda be ne ni ulee be binidxaba de laa que. Lade cabe zeeda María ni rabi cabe Magdalena, ni ulee be gadxe binidxaba de laa, 3 ne Juana xheela Chuza, ni rapa cani runi xhiiña Herodes, ne Susana ne xcaadxi. Irá cabe ruchaaga cabe, racané cabe laabe.

4 Stale binni biree de ca guidxi que yeguuya laabe. Biiya si be ma rí binni laabe, gudixhe be ti ejemplu para laaca', 5 na be:

―Sicari bizaaca lú ti hombre, biree zinduu biní. Ra cusaba be xuba que biaba caadxi ni uriá neza. Biitu ñee cabe laa ne biete mani huiini gudó laa. 6 Xcaadxi biaba lade guie. Undani ni peru nagueenda bibidxi ni, purti qué gapa ni gudxa. 7 Xcaadxi biaba lade guichi ne undani, peru jma bisoo guichi que para laacani ne biiti ca guichi que cani. 8 Peru biaba xcaadxi ni ra nayá ne ca ngue huaxa ucuá lú dede nuu ra bidii ti gayuaa carreta niza.

Biluxe uní' si be nga bicaa be ridxi, rabi be laaca':

―Irá ni racala'dxi guiene la? ucaa diaga.

9 Oraque unaba diidxa ca discípulu stibe laabe xi riní' ejemplu que. 10 Para rabi be laaca':

―Laatu la? cudii Dios lugar guiene tu modo runi mandar, dede ni naga'chi'. Peru ca xcaadxi la? puru si ne ejemplu rue nia laaca', ti cadi gu'ya ca neca cayuuya dxí ca', ne cadi guiene ca neca cayuna diaga ca'.

11 Ndi nga ni riní' ejemplu ca. Ca xuba ca la? zeda gaca casi stiidxa Dios. 12 Ni biaba uriá neza que, ngue nga ca binni rucaa diaga stiidxa Dios, peru raxha binidxaba ni ndaani ladxidó' ca ti qué guni cre ca ne qué ilá ca'. 13 Ne cani biaba lade guie que, ngue nga ca binni rucaa diaga stiidxa Dios ne ricaa ca ni ne enda nayeche'. Riaana né ca ni caadxi, peru casi pe gueeda xiixa naná maca zixele ca', purti qué nicaa xcu chaahui ni ndaani ladxidó' ca'. 14 Ne cani biaba lade guichi que, ngue nga ca binni rucaa diaga stiidxa Dios, peru jma cá ique ca dxiiña ne gapa ca bidxichi ne guiaca ca', ne irá nga ruuti stiidxa Dios ne ma qué riree ndu. 15 Ne cani biaba layú ra nayá que, ngue nga ca binni naguudxi ladxidó'. Ora guna diaga ca stiidxa Dios ricaa ca ni de idubi ladxidó' ca'. Qué riuu dxi ixele ca' ne zacá riree ndu ni.

16 Bigueta gudixhe be sti ejemplu, na be:

―Iruti rucaa gui linterna ne ruseegu xiixa lú ni o cu' ni xa'na luuna', sínuque rugaanda ni luguiá' ti tutiica guiuu gu'ya biaani'. 17 Zaqueca irá ni ye'gu lú yanna napa xidé ixele ti gu'ya binni xi laa, ne irá ni naga'chi yanna napa xidé ihuinni ti ganna binni ni.

18 Nga runi laucaa diaga chaahui', purti cani napa la? zacaa jma, peru cani qué gapa, dede ni na napa ziaaxha.

19 Raqué nuu be beeda jñaa be ne ca bi'chi be, peru qué ñanda nidxiña ca laabe purti ri binni laabe. 20 Para biree tobi, na rabi laabe:

―Racá fuera ca zuhuaa jñoou ne ca bi'chi lu'. Racala'dxi ca iní' né ca lii.

21 Peru laga na be rabi be laaca':

―Cani ucaa diaga stiidxa Dios ne guni ni na ni, ngue nga jñaa ne biche'.

22 Ti dxi biuu né Jesús ca discípulu sti ndaani ti canuá ne na rabi laaca':

―Latidi nisa ri'.

Para biaaxha cabe ze cabe. 23 Ne ra zidi'di cabe nisa que gu'ta Jesús, gusi. Lu nisa que ze cabe gunaaze ti bi yooxho laacabe. Ne biguu ni nisa ndaani canuá que, dede ruluí' ma chi guiaazi cabe. 24 Para yeucuaani cabe Jesús, rabi cabe laa:

―¡Maistru, Maistru! ¡Ma chi gati nu!

Oraque biasa be, ne gudxi be bi yooxho que guiaana dxi, ne zaqueca gudxi be ola que, ne oraqueca guta dxí cani. 25 Oraque rabi be laaca':

―Cadi ladxa runi cre tu naa la? Xi uca xa tu yanna.

Peru laaca nabé bidxibi ca' ne unaba diidxa saa ca':

―Tu laabe pue. Riní' né be bi ne nisa, ne ruzuuba cani stiidxa be.

26 Zaqué ze cabe lu nisa que dede yendá cabe Gadara cherica de Galilea. 27 Casi bizuhuaa ñee Jesús yu, bidxiña ti hombre de guidxi que ra nuu. Ma xadxí riguite binidxaba ique be. Qué racu be lari ne qué riaana be yoo. Nisi lade ba' canazá be. 28-29 Stale tiru riguite binidxaba ique be ne rundiibi ca binni que cadena ná be ne ñee be. Peru ruchuugu be ni, ne riné binidxaba que laabe ndaani gui'xhi'. Casi bi'ya be Jesús bizuxibi be xañee ne bicaa be ridxi:

―Xi napa neu naa, Jesús Xiiñi Dios ni nandxó'. Rinaba lii cadi guniná lu naa.

Uní' be zaqué purti cayabi Jesús binidxaba que usaana laabe. 30 Ne na Jesús, rabi laabe:

―Tu lá lu'.

―Legión, na be.

Ngue na be lá be purti stale binidxaba nuu luguiá be. 31 Ne unaba ca binidxaba que Jesús cadi useenda laaca gabiá. 32 Bia'si canayó jma bihui cue' ti dani neza ra nuu cabe que. Para unaba ca binidxaba que Jesús udii lugar chu' ca luguiá ca bihui que. Ne bidii Jesús lugar. 33 Para biree ca de hombre que, yechuu ca luguiá ca bihui que, ne biete tí ca bihuí que de ra dxi'ba ca'. Bia'si pe ndaani nisa biaba ca', ne raqué guti ca'.

34 Ora bi'ya cani cayapa ca bihuí que ni uca que la? biaaxha ca yeuxooñe ca'. Ne bizulú ca byui' ca ni ndaani guidxi que ne irá ca ranchu ni nuu neza que. 35 Para biree ca binni que ziguuya xi uca raqué. Ne ora yendá ca ra nuu Jesús biiya ca dxa hombre ni riguite binidxaba laa que, ma nacu lari, ma bigueta xpiaani', zuba xañee Jesús. Ne bidxibi ca'. 36 Byuí' né cani bi'ya ra uca ni laaca ximodo bianda hombre que. 37 Oraque gudxi ca binni que Jesús iree de ndaani guidxi que, purti cadxibi ca'. Para biuu Jesús ndaani canuá que ne ze'. 38 Peru ante iree be ucala'dxi dxa hombre ni bianda que niné laabe, para rabi be laa:

39 ―Bigueta rali'dxu ne byui' né laacabe pabiá' nandxó' ni bi'ni Dios luguiá lu'.

Para biree hombre que ze', ne bizulú uzá idubi naca guidxi que. Byui' xi bi'ni Jesús laa.

40 Ora yendá Jesús cherica nisa que, bichagalú ca binni que laa ne stale enda nayeche', purti irá ca cabeza ca laabe. 41 Oraque bidxiña ti hombre lá Jairu naca xaíque sti yu'du'. Bizuxibi xañee be ne na chiné be laa ralidxi, 42 purti cayati tobi lucha xiiñi', ti badu dxaapa de doce añu. Para biree be ze be, peru stale binni zinanda laabe, dede calá saa ca'.

43 Lade ca binni que zeeda ti gunaa ma raca doce añu de caxii rini. Ma birá ni napa, biniti luguiá doctor, ne iruti ñanda nusianda laa. 44 Bidxiña neza deche be, guda'na ñee xhaba be ne oraqueca bianda.

45 Para na be:

―Tu guda'na naa.

Ne irá binni na cadi laa. Para na Pedru ne ca xcaadxi que, rabi laabe:

―Maistru, cayuuyu modo cuquiichi binni lii ne nou' tu guda'na lii.

46 Peru na be:

―Uyuu tu guda'na naa, purti nanna bisianda tuuxa ne enda nandxó' sti Dios ni nuu luguia'ya'.

47 Biiya si gunaa que ma bigaa la? cayaca diti bizuxibi xañee be ne ulee ruaa diidxa xiñee guda'na laabe, ne casi guda'na laabe bianda ca. 48 Para rabi be laa:

―Bianda lu, xiiñe', purti bini cre lu'. Yanna sicarú uyé.

49 Caní' ru be biuu ti xpinni Jairu, na rabi laa:

―Ma guti xiiñi lu'. Ma cadi uchiiña rou' Maistru.

50 Peru ora bina diaga be ni, rabi be Jairu:

―Cadi idxibi lu'. Bini cre, ne zianda xiiñi lu'.

51 Ne ora yendá cabe ralidxi Jairu biuu né be laa ne xheela' ne Juan ne Jacobo ne Pedru, ne ma qué niná ru be ñuu iruti'. 52 Rí stale binni raqué, cayuuna cucaa ridxi peru rabi be laaca':

―Cadi gu'na tu purti cadi guti badu dxapa huiini ca, sinuque nisiaasi si.

53 Laga bixidxi ca laabe, purti nanna dxichi ca' ma guti ba'du que. 54 Oraque unaaze be ná ba'du que ne rabi be laa:

―Biasa xiiñe'.

55 Oraqueca bibani ba'du que ne biasa. Para gudxi be laaca udii ca ni go ba'du que. 56 Nabé bidxagayaa bixhoze ba'du que ne jñaa. Peru biinda be lú ca qué chi tidxi ca iruti'.