1 Guridxi Jesús doce discípulu sti que, ne gudixhe ladxi ná cabe cuee cabe binidxaba de binni, ne usianda cabe binni huará. 2 Biseenda laacabe chi güi cabe modo runi mandar Dios ne usianda cabe binni. 3 Na rabi laacabe:

―Cadi chiné tu gasti ni iquiiñe tu neza, nin bastón, nin ixhiapa, nin pan, nin vueltu. Lachiné lari ni nacu si tu. 4 Ne ra guiete tu la? laguiaana ndaani yoo que dede dxi ma iree tu de guidxi que. 5 Ne ra qué na cabe icaa cabe laatu, lairee de guidxi que, ne laquibi yu cá ñee tu casi ti seña bichee cabe ra qué niná cabe nucaa diaga cabe laatu.

6 Para biree ca ze ca', uzá ca guidxi pur guidxi. Yegüí né ca binni stiidxa Dios, ne bisianda ca cani huará.

7 Ora bina diaga gobernador Herodes xi irá cayuni Jesús, bichenda ni laa, purti nuu tu na Juan Bautista bibani, 8 ne nuu tu na Elías bigueta'. Xcaadxi na tobi de ca profeta ni uyuu chiqué nga ma nabani sti tiru. 9 Para na Herodes:

―Juan la? naa biseenda gaxha yanni. Peru tuu ndi na cabe cayuni irá ndi ya'.

Ne biyubi gu'ya laabe.

10 Ora bigueta ca apóstol de ra biseenda Jesús laaca', biyubi ca ra nuu Jesús ne byui' né ca laabe xi irá bi'ni ca'. Para ucuaa be laaca' yené be laaca uriá guidxi Betsaida. 11 Peru ora gunna binni paraa nuu be, yenanda ca laabe. Bichagalú be laaca ne byuí' né be laaca modo runi mandar Dios. Ne bisianda be cani caquiiñe guianda.

12 Ne raqué nuu cabe bidxí layú para bidxiña ca apóstol ra nuu be, na ca rabi ca laabe:

―Ñee cadi ma ñanda ña'bu ca binni ca ñe ca la? tila nidxela ca ra ñaana ca ne ni ño ca ndaani ca guidxi huiini ne ca ranchu nuu gaxha ca, purti ndaani gui'xhi ndi nuu nu.

13 Para rabi be laaca':

―Laudii ni go cabe laatu.

Oraque na ca':

―Peru xi pe ndi napa du, gaayu pan ne chupa benda. O racala'dxu chi sí du ni go irá binni ri la?

14 Ne nuu bia' gaayu mil hombre raqué. Oraque rabi be ca discípulu stibe:

―Laucuí ca binni ca neza cincuenta cincuenta.

15 Ne zaqué bicuí cabe irá ca binni que. 16 Ne ucuaa be gaayu pan ne chupa benda que, undisa lú be ibá', bidii be diuxquixe Dios. Para undaa be cani, bidii be cani ca discípulu qui'zi lu ca binni que. 17 Gudó irá ca binni que dede bidxá ca', ne biaana ru jma nandahui. Bitopa cabe bia' sti doce dxumi.

18 Ti dxi yení' né Jesús Dios, yené ca discípulu sti' ne ra nuu cabe que rabi be laaca':

―Tu na binni naa.

19 Para na ca':

―Nuu tu na Juan Bautista lii, nuu tu na Elías, ne nuu tu na tobi de ca profeta ni uyuu chiqué, ma bibani.

20 ―Laga laatu ya', rabi be laaca'.

―Tu rabi tu naa.

Oraque na Pedru:

―Lii nga Cristu ni ulí Dios.

21 Peru biinda ca be lú ca' qué chi tidxi ca ni iruti'. 22 Rabi be laaca':

―Naa nga Hombre Biseenda Dios. Naquiiñe tide stale enda naná. Zudxii deche ca xaíque sti guidxi ne ca xaíque sti ca sacerdote ne ca maistru de ley naa, ne zuuti ca naa, peru zabane raguionna gubidxa.

23 Ne rabi be irá ca':

―Tu gacala'dxi gaca xpinne la? gusiaanda laca laa, ne cadi lica guiá xpida sínuque usaana ni lu naya irá dxi ne gueda nanda naa. 24 Purti tu gacala'dxi ulá xpida la? zuniti ni, peru tu uniti xpida pur naa la? zalá. 25 Paraa iquiiñe ni binni pa guni ganar idubi naca guidxilayú peru uniti xhialma. 26 Purti tutiica ituí lú chi nanda naa ne stiidxa la? naa laca zatuí lua inié xpinne laa dxi useenda Dios naa guenda casi ti rey ne enda nandxó' sti Bixhoze' ne sti ca ángel cha'hui'. 27 Peru gabe ca' laatu, nuu caadxi rarí qué zati dede qué guuya ora ma cayuni mandar Dios.

28 Udi'di bia' xhono gubidxa de uní' Jesús ca nga, ucuaa Pedru ne Juan ne Jacobo, udxi'ba né lu dani, yení' né Dios. 29 Ne laga nuu be caní' né be Dios mala biiya cabe ma adxé laabe. Naquichi bé bihuinni xhaba be dede ria'qui biaani'. 30 Ne cayuí' né be chupa hombre diidxa', Moisés ne Elías. 31 Guionna cabe nuu cabe galahui xtuxhu ti biaani ro'. Cuzeete cabe modo chi gati be Jerusalén. 32 Ma nuu bacaanda lú Pedru ne xhupa que, peru qué niná ca ñasi ca'. Ne zacá gunda biiya ca cuzaani ladi Jesús ne xhupa zuhuaa né laa que. 33 Ma chi ixele ca hombre que de Jesús para na Pedru:

―Maistru, aque galán nuu nu rarí nja'. Zanda guni du chonna ranchu huiini', tobi para lii, tobi para Moisés, ne stobi para Elías.

Peru nin ganna Pedru xi caní'. 34 Caní' ru be mala biseegu ti za laacabe. Nabé bidxibi cabe ora bi'ya cabe nuu cabe lade za. 35 Ne ucuá ti ridxi lade za que:

―Ndi nga Xiiñe' ni nadxiee'. Laucaa diaga laa.

36 Biaana dxí si ridxi que, biiya cabe ma stubi Jesús nuu. Dxí dó' uyuu cabe ca dxi que. Iruti ñabi cabe ni bi'ya cabe que.

37 Sti dxi que ra ziyete cabe lu dani beda chagalú stale binni Jesús. 38 Mala biree tobi hombre lade ca binni que, bicaa ridxi na rabi Jesús:

―Maistru, biiya la' xiiñe'. Tobi lucha laabe napa'. 39 Ne riguite binidxaba ique be rucaa be ridxi, rinaaze laabe, ruchuche laabe layú dede riree bupu ruaa be, ruxuuxe laabe dede yaca ti' guuti laabe. Oraque ru rundaa laabe. 40 Ma unaba ca discípulu stiu' ñaxha ca binidxaba ca de laabe, peru qué ñanda.

41 Oraque na Jesús:

―Aque qué runi cre tu xa, binni ca', ne naguidxi ladxidó' to. Dede padxí naquiiñe guiaana nia laatu ne gune huantar laatu ya'.

Oraque rabi be hombre que:

―Dané xiiñu ca rarí'.

42 Ma zidxiña hombre huiini que Jesús, unaaze binidxaba que laa, bitubi laa yu. Peru óraque udinde né Jesús binidxaba que ne oraqueca bianda hombre huiini que, para bidii be laa bixhoze. 43 Nabé bidxagayaa irá ca binni que pabiá' nandxó' Dios.

Ne laga cadxagayaa ca binni que irá ni cayuni be, rabi be ca discípulu stibe:

44 ―Laucaa diaga chaahui ni chi tidxe laatu ri', qué chi guiaanda ni laatu. Naa nga Hombre Biseenda Dios ne ma chi utoo cabe naa lu binni guidxilayú.

45 Peru qué ñene ca xi cayabi be laaca', purti ma nexhe cadi guiene ca ni. Ne bidxibi ca ninaba diidxa ca laabe xi riní' ni.

46 Oraque bizulú ca discípulu cacaa yu ca uná de laaca jma risaca. 47 Peru nanna Jesús xi caní' cabe, para ucuaa ti ba'du bizuhuaa cue'. 48 Ne na rabi laacabe:

―Tutiica acané ba'du ri pur naa la? casi ñaca cayuni ni naa. Ne tu guni ni naa la? cayuni ni ni biseenda naa. Purti ni jma huaxié' risaca lade tu la? nga nga ni jma risaca.

49 Biluxe si uní' Jesús, na Juan:

―Maistru, bidu'ya du ti hombre cuzeete lá lu ra cabee binidxaba de binni, peru bicueeza du laa purti cadi canazá né laanu.

50 Para rabi be laa:

―Xiñee canaucueeza tu laabe, purti cani cadi cucaa lú laanu la? nuu né laanu tobi si.

51 Dxi ma cazaa dxi ibigueta be ibá' udixhe ique be che be Jerusalén. 52 Bisá niru be ca xpinni be ndaani ti guidxi sti Samaria para chi yubi ca ra guiaana be. 53 Peru qué niná ca binni Samaria ñaana be raqué purti ze be Jerusalén. 54 Ngue bi'ya Jacobo ne Juan para na ca rabi ca laabe:

―Señor, ñee racala'dxu inaba du guiaba gui de ibá' para initilú cabe casi bi'ni Elías chiqué la?

55 Oraque biiya dxí be laaca ne udinde né be laaca', rabi be laaca':

―Nin qué ganna tu tu cayabi laatu iní' tu zacá. 56 Purti biseenda Dios naa ndaani guidxilayú ri cadi para uniteluá' binni sínuque para ula'ya laaca'.

Ne biree cabe ze cabe sti guidxi.

57 Neza ze cabe na ti hombre rabi Jesús:

―Señor, racaladxe chi nanda lii ratiica cheu'.

58 Para rabi be laa:

―Ca mistu gui'xhi la? napa ca cueva ra riaana ca', ne zaqueca ca mani huiini napa ca lidxi ca'. Peru naa nga Hombre Biseenda Dios, ne qué gapa nin ra quixhe ique'.

59 Ne rabi be stobi:

―Dananda naa.

Para na ngue:

―Señor, bidii lugar ucaache sia' bixhoze'.

60 Oraque rabi be laa:

―Bisaana nga guni ni qué na gueda nanda naa. Lii la? yegüí né binni modo runi mandar Dios.

61 Oraque biree stobi na rabi laabe:

―Zinanda lii, Señor, peru chi tidxe sia' ca binni lidxe ma chaa'.

62 Para na be:

―Ni quixhe ná lu aradu ne udxigueta lú atrá la? qué zaquiiñe para guni dxiiña'. Zaqueca ni gueda nanda naa ne ibigueta atrá la? qué zaquiiñe lade ca xpinni Dios.